Read Yambeta Əbələ́ə 8 Bible Online

Əbələ́ə 8 - Yambeta bible

Əbələ́ə 8

¹Kɛbán kɛmɔɛ́d kɛ́laŋ kɛ́ tɛlɛɛ́ əgusəə áanɛ aa kɛ́ɛnɛ kɛ́lɛɛ́ lɛ́: Táá ɔnjaaganɛʼ pɛfɔny nyɔ́ oʼkóʼkóón nyɔ́ tigódíí anyóon. Alɛ undəndínə́ə́n kɔ a mɔɛn a noʼkóm nó nɛlaamɛʼ, a ombɔg ó nɛnom ó Táán[42] nyɔ́ alɛɛ́ alaamɛ na toɛn tuim.

²Alɛ kɔ agɛɛlɛ pigólí piə́ŋ pɛ́ ɔnjaaganɛʼ pɛfɔny nyɔ́ oʼkóʼkóón a uʼkóó ó fɔ́lɔ́b, a kiób kɛmɔɛ́d kɛ́ adɛ́njaŋ pɔɔd aa pɛ́ɛ́wáag, Sə́dúk nyɔ́lɛ́nyɔ́amɔɛ́d áa yɛɛ́wáag kɛ́lɛ́.

³Pálɛ əgudə́nigi ɔnjaaganɛʼ pɛfɔny nyɔ́ oʼkóʼkóón ungim lɛ́ ná yɛ́ʼkɛn ngab na Táán, áamoóyaagɛnɛ pɛfɔny pɛ́ pɔɔd pə́əmuyíimin na pɛ́lɛ́. Kíəguunə tɛn lɛ́ ɔnjaaganɛʼ pɛfɔny wəəs nyɔ́ oʼkóʼkóón yɛ́ɛn tɛn na yoom yɛ́ aáfɔnyɛn Táán.

⁴Pɔ́nɔ́ Kilíʼtus ayɛ́ɛnɛn áanɛ a nsí, ná ɔdɛɔ́gɔ ɔnjaaganɛʼ pɛfɔny lɛ́ payaaganɛʼ pɛfɔny pɛ́ndɛ́ŋ pálɛ kɔ pá pálɛ́ɛ́ agɛɛlɛ pigólí pɛ́ɛb wɔnɔ́ ná pɛcɛm pɛ́ Moyíis pɛ́lɛɛ́ əgusəə.

⁵Pigólí pɛ́ payaaganɛʼ pɛfɔny póob pálɛɛ́ agɛɛlɛ, pɛ́lɛ əgín agá kílíndiʼ kɛ́ a kifílí kɛ́ nkə kɛ́ kɛ́lɛɛ́ agaáyɛ́ɛlɛ a mɔɛn. Kɛ́lɛ əgín wɔnɔ́ nkə kɛ́ kɛ́yásánɛ́ɛ́ na Moyíis lɛ́: Ná ayɛ́ɛ aándawáag kiób kɛ́ kifúŋiə́n[43], Táán əyímusíʼtəg, ɔnɔ́ na nyɔ́lɛ́: «Taa, ɛɛlɛ piim əgín wɔnɔ́ ná njígulóódi kɛ́lɛ́ wɛ a oʼkon a mɔɛn.»

⁶Náa, pigólí pɛ́ Yə́sus nyɔ́lɛ́ ogóódi lɛ́ yɛ́ɛlɛ, pɛ́mááyɛn pɛ́ pɔsɔ́g payaaganɛʼ pɛfɔny póob káag lɛ́ nyɔ́lɛ́ aa adɛ́lɛ́mɛ́nɛ́ɛ́ a kɛgaágadɛ kɛ́ɛg lɛ́ na Táán, na pɔɔd agɛɛlɛ lɛ́ páálad a nɛálad nɛ́ nɛ́mááyɛn nɛ́ kalaʼ, nɛgónáán a oʼkag wó wádɛ́ɛ́ agaáyɛn ó kalaʼ.

⁷Nɛsɔ́g nɛ́ na oʼto na oʼto[44] nɛ́ Táán ayɛ́ɛ́lɛ na pəsi nɛ́yásánɛn kɔŋɛʼ, adɛʼkɛ́ɛ amanɛ nɛ́lɛ́ əgiiʼkini kɛɛlɛ nɛ́ annam ábaan.

⁸Kɛ́lɛ lɛ́, Táán yɛɛ́dála masɛd má pɔɔd aáság kusəə ɔnɔ́ na pɔ́lɛ́: «Mɛ Sə́dúk mbə́səə nyɔʼkɔ́: Mədúg mə́ndəgiim má ndɛ́ɛ́ kaáyóóbananɛɛ́ na ndɛg yɛ Ɛ́sɛlayɛl, na ɛ Siudáa kɛ́, a nɛálad nɛ́ nɛwa.

⁹Nɛ́ɛn nɛ́dɛndɛ́ɛ́ kɛɛn wɔnɔ́ nɛ́ tɛyáágánan na pasɛʼkóón pɔ́ɔ́bɔn a wɔɔ́s wó njíbugúmin a ombɔg agobolónɛ a nigúu nɛ́ Əsíibtə. Pɔ́lɛ́báamɔɛ́d pádɛʼkáadáŋana wɔnɔ́ ná tɛyáágánan. Náan aa mɛ tɛn njíbudúmin ngim. Mɛ Sə́dúk áa ndɛɛ́ əgusəə náan.

¹⁰Táá nɛálad nɛ́ ndɛ́ɛ́ kaágananɛɛ́ na ndɛg yɛ Ɛ́sɛlayɛl a ngim ɛ mədúg móom aa nɛ́ɛnɛ nɛ́lɛ́ɛ́ kɛɛnɛɛ́ lɛ́: Ndaboyɛ́ʼkɛn pɛcɛm pɛ́am, ndaamágam pɛ́lɛ́ a nsiŋ yɔɔbɔn na a ntɛ́m yɔɔbɔn a kaadɛ. Ndɛ́ɛ́ kɛɛn Táán yɔɔbɔn, pɔ́lɛ́ páyɛɛn ndɛg yaam.

¹¹Úmmuʼ na úmmuʼ a pəŋi adɛndɛ́ɛ́ kaaʼkananɛ mɔɔ́n o sɛ o nigúu, ɔmbɔ́ lɛ́ móŋŋí lɛ́ yɛ́ndɛŋ mɛ Sə́dúk lɛ́, ungim kəə́bə́ə́ a poómbaa, kɛɛn əgiig a pasaá, alɛ́ɛ́ kɛndɛŋ.

¹²Kɛ́lɛ lɛ́, mɛ ndɛ́ɛ́ kubuúlisin mabɛ́ mɔ́ɔ́bɔn, ɔmbɔ́ masɛd mɔ́ɔ́bɔn tɛn, ntɛndɛ́ɛ́ kaáyɔ́ɔ́ŋɛ kə́mmú[45]»

¹³A nisəə nɛ́ɛn nɛ́ Táán yiísə́ə́ náan ɔnɔ́ «nɛálad nɛ́ nɛwa», yiílóódi lɛ́ nɛ́ʼkáag nɛ́ kalaʼ niə́ʼkulun anyóon. Yoom anɛ́ɛ́n yɛ́ yə́ʼkubúlimií, yə́ʼkulun, ɛ́lɛ lɛ́ kɛnɛŋ sɔɔŋ íwu.