Read Yambeta Əbələ́ə 9 Bible Online

Əbələ́ə 9 - Yambeta bible

Əbələ́ə 9

¹A nɛálad nɛ́ na oʼto na oʼto pɛcɛm pɛ́yɛ́ɛ kɔ pɛ́ píoloodi tuə́ áa pányádɛɛ́ Táán, na kɛnɔ tɛn kɛ́ pɛ́ɛ́wáag agomonyáadɛ.

²Pɛ́ɛ́wáag kiób, páásaa asom ábaan kɔ a yoog na sanjaʼ. Nɛsom nɛ́ na oʼto na oʼto páyɛ́ɛ ɔdɔ́ŋɔn lɛ́: «Uʼkóó.» Kɔ a nɛsom nɛ́ɛn, kɛa kɛ́ kudə́nigəni paʼkɛ́ntɛlɛ kɛ́yɛ́ɛ kɔ. Tɛ́bɛlɛʼ tɛn ɛyɛ́ɛ kɔ yɛ́ páyɛ́ɛ páágan pɛlɛ́ɛd pɛ́ pááfɔny Táán na pɛ́lɛ́.

³Nɛsom nɛ́ annam ábaan nɛ́ nɛ́yɛ́ɛ a ngim ɛ sanjaʼ, páyɛ́ɛ agodɔ́ŋɔn nɛ́lɛ́ pɔ́nɔ́: «Uʼkóó wó ufúŋiə́n a fuʼ.»

⁴Kibóŋ kɛ́yɛ́ɛ kɔ kɛ́ páyɛ́ɛ́lɛ na kóol. Kɛ́lɛ́ kɛ́go aa kɛ́yɛ́ɛ kibóŋ kɛ́ kogɔ́lɔnɛ ɛdɛm. Igóó tɛn ɛ́yɛ́ɛ kɔ yɛ́ yóoloodi nɛsɔ́g nɛ́ Táán yɛɛ́lád na ndɛg yəəŋ. Yɛ́lɛ́ tɛn páyɛ́ɛ́lɛ, pə́ə́wú na kóol. Kɔ a igóó ɛgo yɛ́ɛy, isə́n yímmú tɛn ɛ́yɛ́ɛ kɔ. Páyɛ́ɛ́lɛ tɛn yɛ́lɛ́ na kóol. Kɔ a isə́n tɛn ɛgo, moom mó konɛ mó pɔ́ɔdɔ́ŋɔn lɛ́ máan[46] móyɛ́ɛ kɔ. Oʼtɔ́ŋ wó Álɔn wó óyɛ́ɛ wándɛ na pɛsam, óyɛ́ɛ tɛn kɔ. Ɔmbɔ́ tɛn aʼtáán yá píídílə pɛbán pɛ́ páyáyóóbánánɛ́ɛ́ a pɛ́lɛ́ a nɛálad nɛ́ɛn, ayɛ́ɛ kɔ.

⁵Páyɛ́ɛ́lɛ pílíngə́lingə pímmú kɔ pɛ́baan a kɛŋwáŋánán kɛ́ məŋun má maʼtom má nugəm má pɔ́ɔdɔ́ŋɔn lɛ́ Pəsəlubɛ́ɛŋ, pámáág kɔ a igóó yɛ́ɛy a mɔɛn. Nfaáan yɔɔbɔn yiísúʼkinin kɛnɔ kɛ́ páagaágan maŋɔ́ má ponyam agɛɛlɛ lɛ́ Táán ə́lisin pɔɔd mabɛ́ mɔ́ɔ́bɔn. Náa, adɛ́njaŋ kɛnɛŋ kɛ́ koboyásɛnan pɛbán pɛ́ɛb piim aa kɛ́ɛnɛ nɛ́gɔŋ[47]

⁶Táá, náan aa moom móom múyə́də́nígə́níí. Payaaganɛʼ pɛfɔny pálɛ agosɔ́dɔn anɛ́ɛ́n kɔ pɛnɛŋ piim a nɛsom nɛ́ na oʼto na oʼto agɛɛlɛ pigólí pɛɔ́bɔn.

⁷Náa, əgín Ɔnjaaganɛʼ pɛfɔny nyɔ́ oʼkóʼkóón nyɔ́lɛ́nyɔ́əsíŋ áa alɛɛ́ ogosɔd a nɛsom nɛ́ annam ábaan. Ɔɔsɔd tɛn kɔ əgín kə́muʼ súg a waag. Adɛɔ́sɔd tɛn kɔ fiɛ́d kusiəd maŋɔ́ má nnyam agɛɛ́ʼkɛn kɛfɔny na Táán a oʼto ó mabɛ́ mə́ə́ŋ má nyɔ́lɛ́nyɔ́amɔɛ́d na a oó mabɛ́ má pɔɔd pálɛɛ́ agɛɛlanɛ pádɛálɛ́ŋɛ́ɛ́[48]

⁸Uŋun wó Ufúlúʼtú wɛ́ɛ́nyɔ́ŋɛn anyóon kuloodi lɛ́ ngə́ yɛ uʼkóó wó ufúŋiə́n a fuʼ iligi ndɔ́gɔ́ɔ́n, kɛnɛŋ kiim kɛ́ kiób kɛ́ kalaʼ kígə́ligíí.

⁹Náan alɛ kɛálɛ́ʼkán kɛ́ mədúg móonɛ má tigódíí nɛ́gɔŋ. Kíoloodi lɛ́ ngab yəəs, na ponyam pó tɛáfɔnyan Táán pódɛɔ́gɔ pógomoáŋɛ ntɛ́m ɛ pá páamoófɔnyan moom móom.

¹⁰Pɛ́ɛb pɛ́lɛ pisiə́g pɛ́ a pɛbán pɛ́ pumog pólɛ́ na pólɛ́. Pisiə́g pɛ́ a moom mó mɔɔd oʼkódií lɛ́ ánɛ, na a nkə kɛ́ oʼkódií lɛ́ áŋo, na a mbod ɛ nɛásoga ngim yɛ́ ogódíí lɛ́ yáásoga əgəə́fúŋi nkó. Pɛ́lɛ pisiə́g pɛ́ píyə́də́nígə́níí lɛ́ nisúgəniʼ nɛɔ́bɔn nɛ́lɛ́ɛ́ kɛɛn əgín a kɛnɛŋ kɛ́ Táán alɛ́ɛ́ kɛɛlɛɛ́ lɛ́ moom muim móɛn mowa.

¹¹Náa, Kilíʼtus nyɔ́lɛ́ əyíím lɛ́ ná yɛ́ɛn ɔnjaaganɛʼ pɛfɔny nyɔ́ oʼkóʼkóón ó moom mó mɔŋɛʼ mó mólɛ́ɛ́ kɛɛnɛɛ́ kɔ.[49] Uʼkóó wó yɛɛ́sɔ́d a wólɛ́ agɛɛlɛ pigólí piə́ŋ, wááyám agaáyɛn wó pɔɔd pɛ́ɛ́wáag. Ólɛ tɛn ɔŋŋɛʼ agaáyɛn piim. Ódɛɔ́gɔ tɛn uʼkóó wó wáagoob na nsí yɛ́ɛnɛ yɛ́ ɛlɛɛ́ yoom yɛ́ Táán amɛ́ɛ́lɛ.

¹²Kilíʼtus yɛɛ́sɔ́d kə́muʼ súg a pɛnɛŋ tɛn piim a uʼkóó wó ufúŋiə́n a fuʼ. Adɛʼkɔ́ɔsɔd kɔ na maŋɔ́ má pibə́b, ɔmbɔ́ na má panom pá paʼkáwoʼ agɛɛn afɔny. Náa, mə́ə́ŋ má nyɔ́lɛ́nyɔ́amɔɛ́d áa ayɛ́ʼkɛn a kɛfɔny. Náan aa ayɛ́bɛyááŋɛn a mabɛ́ mə́ə́s a kúfuʼ.

¹³A mandoŋá má pɛmbáa kɛ́lɛ lɛ́: Mɔɔd alɛ na kifuə́, pámaʼkomofáman maŋɔ́ má pibə́b na má panom pá káwoʼ, pə́əmuúmisən tɛn mɔdɔ má piŋŋí pɛ́ káwoʼ[50], moom móom múəmufúŋi nkó.

¹⁴Kɛ́maʼkɛɛn náan lɛ́ moom móom múəfúŋi fɔ́lɔ́b mɔɔd a nkó yəəŋ, pɛnɛŋ pɛ́sɛ́g anɛ́ɛ́n na maŋɔ́ má Kilíʼtus əə́? Nyɔ́lɛ́ nyɔ́ ayáyɛ́ʼkɛ́nɛ́ɛ́ nyɔ́lɛ́nyɔ́amɔɛ́d na Táán a kɛfɔny kɛ́ kɛ́lɛɛ́ fiɛ́d na kinig, a toɛn tó Uŋun ó pəliə́g. Maŋɔ́ móom málɛ mágolɔb mə́dibifúŋi a pɛbán pɛ́ pɛbɛ́ pɛ́ tɛágɛɛlanɛ a? Pɛbán pɛ́ pɛ́abɛyóon. Ndóo, mə́əbifúŋi lɛ́ ná tígudin Táán nyɔ́ alɛɛ́ na ɔlaa.

¹⁵Kólɛ́ aa Kilíʼtus yɛɛ́dɛ́lɛm a kɛgaágadɛ kɛ́ na Táán na pɔɔd a nɛálad nɛ́ nɛwa nɛ́ Táán ayɛ́ɛ́lɛ na pɔ́lɛ́. Ayɛ́ɛ́lɛ náan lɛ́ ná pá Táán yɛɛ́dɔ́ŋɔn, pɔ́ɔŋ tugúm tó tódɛndɛ́ɛ́ komanɛɛ́, nkə kɛ́ yɛɛ́gágɛn pá pálɛɛ́ pə́ə́ŋ. Pálɛ́ɛ́ kɔɔŋ kɛ́lɛ́ lɛ́ Kilíʼtus yiígú, kugu kuə́ŋ kómáyaáŋɛn pɔɔd a mabɛ́ mɔ́ɔ́bɔn má páyɛ́ɛ́lɛ a nɛálad nɛ́ na oʼto na oʼto.

¹⁶Tɔgɛ́ɛ́ tó mɔɔd ɔɔ́sɔyɔ əguloodi tuə́ áa pə́díin pɛ́lɛɛ́ ná tugúm tuə́ŋ, tóagɛɛn na toɛn əgín ná əə́ʼkugu.

¹⁷Kɛ́lɛ lɛ́, ncɛm wɔnɔ́ yɛ́ɛy ɛdɛɔ́gɔ na toɛn ná mɔɔd nyɔ́ amácɛ́máá əligi ongóm. Əgín əə́ʼkugu, áay aa nkə kɛ́ ayácɛ́mɛ́ɛ́ kɛ́agaáyɛ́ɛlɛ.

¹⁸Kólɛ́ aa nɛálad nɛ́ na oʼto na oʼto nɛ́dɛʼkáagaágódɛ́ɛ́ ná maŋɔ́ mə́dínjə́ə́sub.

¹⁹Ná Moyíis ayɛ́ɛ aáʼkobana a udi ó mɔɔd ungim, pɛcɛm pɛ́ Táán ayɛ́moyɛ́ʼkɛn, yiísiə́d maŋɔ́ má pɔɔ́n pá káwoʼ na má pibə́b pɛ́ pobon, ɔɔ́dɔ́b na məní. Əə́siəd pinum pɛ́ pibógógó pɛ́ nodóm, aágód a oʼto ó kingə́ŋ kɛ́ yɛɛ́sóm a kiɛd kɛ́ pɔ́ɔdɔ́ŋɔn lɛ́ isóob, əə́nyum a maŋɔ́ móom, aáfáman a kálaʼtaʼ ɛ pɛcɛm, aáfáman tɛn ungim na mɔ́lɛ́.

²⁰Ayɛ́ɛ agɛɛlɛ náan, ɔɔ́sɔyɔ ɔnɔ́: «Maŋɔ́ móonɛ málɛ maŋɔ́ má a nɛálad nɛ́ Táán amɛ́ɛ́lɛ na pəŋi, ɔnɔ́ pónyáadɛ[51]»

²¹Yɛɛ́fáman tɛn maŋɔ́ móom a kiób kɛ́ Táán, aáfáman a moom muim mó móyɛ́ɛ kɔ a kaadɛ, moom mó pálɛɛ́ agonyáadɛ Táán na mólɛ́.

²²A noá na pɛcɛm, na maŋɔ́ aa pálɛɛ́ əfúŋi moom muíŋ. Táán tɛn ɔdɛɔ́gɔ ugulisin pɔɔd mabɛ́ mɔ́ɔ́bɔn ná maŋɔ́ mə́diə́súbin[52]

²³Kɛ́maʼkɛɛn lɛ́ moom mó mólɛɛ́ pɛálɛ́ʼkán pɛ́ nkə kɛ́ kɛ́lɛɛ́ fɔ́lɔ́b a mɔɛn, náan aa múəgəə́fúŋi, moom mó mólɛɛ́ fɔ́lɔ́b a mɔɛn múəguunə anɛ́ɛ́n pɛfɔny pɛ́ pɛ́mááyɛn pɛ́ɛb.

²⁴Kɛ́lɛ lɛ́, adɛ́njaŋ a uʼkóó wó óyáwáágɛ́ɛ́ na ɔmbɔg á pɔɔd aa Kilíʼtus yɛɛ́sɔ́d, wólɛ́ wó ólɛɛ́ agá kɛálɛ́ʼkán kɛ́ uʼkóó ó fɔ́lɔ́b. Yɛɛ́sɔ́d a mbálámɔɛn mmɔɛ́d, alɛ oʼtɛ́lɛ́máán kɔ nɛ́gɔŋ a udi ó Táán a niiŋ niə́s.

²⁵Adɛʼkɔ́ɔsɔd kɔ lɛ́ ná yáyɛ́ʼkɛnan nyɔ́lɛ́nyɔ́amɔɛ́d a kɛfɔny na Táán pɛnɛŋ piíŋ wɔnɔ́ ná Ɔnjaaganɛʼ pɛfɔny nyɔ́ oʼkóʼkóón o Yúdɛn alɛɛ́ ɔsɔ́dɔn maag miim a uʼkóó na maŋɔ́ má ponyam.

²⁶Kɛ́mɛ́ɛ agɛɛn náan, ná yiígóodi lɛ́ ánɛ ntɔ́b pɛnɛŋ piíŋ Əgəə́bə́ə əgín wɔnɔ́ ná Táán ayɛ́ɛ́lɛ nsí. Əgusəə fɔ́lɔ́b, a niɛn aman aa yɛɛ́lón kə́muʼ súg a pɛnɛŋ piim lɛ́ ná ə́wíiyi mabɛ́ má pɔɔd a kɛfɔny kɛ́ ayáyɛ́ʼkɛ́nɛ́ɛ́ nyɔ́lɛ́nyɔ́amɔɛ́d.

²⁷Mɔɔd ungim ogóódi lɛ́ ə́gu kə́muʼ súg, ná yɛ́ɛn adɛ́lɛm a pɛyɔm a udi ó Táán.

²⁸Náan tɛn aa Kilíʼtus ayáyɛ́ʼkɛ́nɛ́ɛ́ kə́muʼ súg a kɛfɔny agɛɛlɛ lɛ́ óliogi mabɛ́ má pɔɔd piíŋ[53] Alɛ́ɛ́ kiiʼkini kiim álon kə́mmú a pɛnɛŋ pɛ́baan, adɛ́njaŋ kə́mmú a oʼto ó mabɛ́ má pɔɔd kuliogi, náa əgiim ɔgɔɔyɛ pá pálɛɛ́ agobóŋan nimbuúliniʼ niə́ŋ.