Read Yambeta Sɛ́ag 2 Bible Online

Sɛ́ag 2 - Yambeta bible

Sɛ́ag 2

¹Pomóŋŋí, wɔnɔ́ ná pəŋi poágɛ́nɛ́ɛ́ oʼto na Sə́dúk wəəs Yə́sus Kilíʼtus nyɔ́ alɛɛ́ na nugəm agaáyɛn ungim, podɛʼtɛ́ʼtɛg pɔɔd wɔnɔ́ pálɛ polɛ́ŋ polɛ́ŋ[5]

²Tísəə lɛ́ pɔɔd a póob pábaan lɛ́: Na o tugúm na wo osog páság kiim alon a kɛgaágadɛ kɛáŋan kɛ́ pəŋi pəə́liʼtiniʼ. Sɔ́g o tugúm alɛ na pisig pɛ́ pilə́ə́ ŋɔɔ́ŋɔɔg, langa ɛ mɔɔnɛ́ yaánom a ombɔg. Wo osog alɛ tɛn kɔ na piʼtug piə́ŋ pɛ́ pilə́ə́.

³Pomaʼkɛɛn lɛ́ sɔ́g o tugúm poámonyáadɛ, poɔʼkɔ́ na nyɔ́lɛ́ ə́ləndin a noʼkóm nólaŋ. Nyóon káag wo osog póomosɛ́ɛdɛ, poɔʼkɔ́ na nyɔ́lɛ́ ádɛ́lɛm kuə́ŋ kidə́níʼtən, oó lɛ́ yɔ́nyɔgɛlɛd a nsí a ambaan yááŋan,

⁴adɛ́ kiiyə aa kóog puə́ndəgiyəə́ pɔɔd a kɛgaágadɛ kɛáŋan a? Mafɛgaʼ má mabɛ́ má málɛɛ́ na pəŋi a ntɛ́m áa málɛɛ́ na nsɛ́ɛ́dɛ́ yɛ́ɛy náan.

⁵Pomóŋŋí páam pá ɔʼtɛ́m, óʼtánaan lɛ́ Táán áa əyííyid pá pɔɔd pálɛɛ́ agodɛ́ʼtɛg lɛ́ pálɛ na osog, amáyɛɛlɛ lɛ́ pə́gúmi a nɛag nɛ́ páágɛ́nɛ́ɛ́ oʼto na Yə́sus Kilíʼtus. Əyíbuyííyid lɛ́ ná áboyɛ́ʼkɛn Nɛlaamɛʼ nɛ́ yɛɛ́gágɛn na pá páamonyɔ́ŋɛn.

⁶Náa, pəŋi polɛ agosɛ́ɛdɛ mɔsɔ́gasɔ́gá, poányáadɛ agá pɔɔd pá tugúm. Pɔ́lɛ́ pá pálɛɛ́ əgubuúyəʼkəni, páagɛɛnan na pəŋi a puog pó pɛyɔm lɛ́ póɛn ɔyɔmɔ kɔ.

⁷Pɔ́lɛ́ pá pálɛɛ́ agowag kisig kɛ́ niiŋ nɛ́ɛn. Niiŋ nɛ́ Sə́dúk Yə́sus nɛ́ pə́əbuŋən a kidíídí kɛáŋan[6]

⁸Ɛɛ́ɛ, kɛ́lɛ kɔŋɛʼ náan lɛ́ poɛ́ngɛg kɛcɛm kɛ́ Nɛlaamɛʼ nɛ́ Táán kɛ́ɛnɛ kɛ́ kɛ́lɛɛ́ kidiídílə́ a kálaʼtaʼ yəəŋ lɛ́: «Nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d[7]»

⁹Pomaʼkɛɛn anɛ́ɛ́n lɛ́ puəsiədə pɔɔd polɛ́ŋ polɛ́ŋ, pomɛ́ɛ́lɛ kɔbɛ́. Puə́də́ə́ŋ kɛcɛm, polɛ na nsɔ́ɔ́.

¹⁰Kɛ́lɛ lɛ́, ɔmbɔ́ mɔɔd yɛɛ́ngɛg pɛcɛm pɛ́ Táán piim náa əə́də́əŋ kímuʼ súg, aándɛ na nsɔ́ɔ́ a pɛmɔɛ́d piim.

¹¹Kɛ́lɛ lɛ́, Táán ogo úmmuʼ nyɔ́ yiísə́ə́ lɛ́: «Udiʼtə́əŋ a kɛdaŋ», əgín tɛn nyɔ́lɛ́ ogo aa yiísə́ə́ tɛn lɛ́: «Odɛnjóón mɔɔd[8]» Kɛ́lɛ anyóon lɛ́ uməʼkəə́nuŋ uʼtə́əŋ a kɛdaŋ náa omóón mɔɔd, wəə́ʼkudə́əŋ kɛcɛm.

¹²Kólɛ́ aa ndábodɛ́anɛ na pəŋi nyɔʼkɔ́: Puə́ndəsəə, oó lɛ́ poándagɛɛlɛ kɛbán, póɛlɛ poágaáyɔ́ɔ́ŋɛ lɛ́ Táán alɛ́ɛ́ koboóyɔmɛ, áabaasɛ a pɛcɛm pɛ́ɛb a mɔɛn lɛ́ pɛ́lɛ pɛcɛm pɛ́ píəbiidí filí.

¹³Kɛ́lɛ lɛ́ a wɔɔ́s ó pɛyɔm, wɛ nyɔ́ odɛʼkɛ́ɛ əgusiədií maan na pɔsɔ́g, Táán adɛndɛ́ɛ́ tɛn kogooda maan. Náa, nyɔ́ ayɛ́ɛ ugusiəd maan na pɔsɔ́g, adɛádammana tɛn kə́mmú lɛ́ Táán adɛndɛ́ɛ́ konas na nyɔ́lɛ́ a pɛyɔm.

¹⁴Pomóŋŋí, kusəə na unuʼ na unuʼ lɛ́ omáág oʼto na Táán, odiɛlɛ pɛbán pɛ́ píoloodi lɛ́ omáág fɔ́lɔ́b oʼto na nyɔ́lɛ́ kólɛ iyó. Kaag kó oʼto kóog náan kódɛ́agoyɔ́ɔyɛ.

¹⁵Tísəə lɛ́ woómóŋŋí o kəə́liʼtiniʼ nyummú, alɛ lɛ́ kilə́ə́ kɛ́ kuníig ɔdɛɔ́ŋ, mɔɔ́s miim, yoom ɛ́ konɛ adiɛn na yɛ́lɛ́.

¹⁶Náa sɔ́g nyummú a ondáŋ wááŋan ɔnɔ́ na nyɔ́lɛ́: «Áoó áaá! Úúli kɔŋɛʼ á! Lɛŋ kəə́gub kilə́ə́ áaá! Niŋiʼ nídiíguugúmin aá! Ónɛ́ɛnɛ tɛn kɔŋɛʼ, úyíid aá!» Pomaʼkomodɛ́anɛ əgín náan na unuʼ na unuʼ yoom na yoom podɛmoyɛ́ʼkɛn, pomámoɛ́bɛ a igə kímuʼ áay aáŋ?

¹⁷Kɛ́lɛ náan yoom ímuʼ na mɔɔd nyɔ́ alɛɛ́ əgusəə na unuʼ na unuʼ lɛ́ amáág oʼto na Táán adiɛlɛ pɛbán pɛ́ píoloodi. Kəə́liʼtiniʼ kóog náan kólɛ iyó.

¹⁸Mɔɔd alɛ ugusəə lɛ́: «Mɔɔd nyóonɛ amáág oʼto na Táán, náa ɔdɛɔ́gɔ agɛɛlɛ pɛbán pɛ́ píoloodi. Nyummú nyóon kága nyɔ́lɛ́ alɛ agɛɛlɛ pɛbán pɛ́ píoloodi lɛ́ amáág oʼto na Táán.» Náa ndə́muyúlisini na nyɔ́lɛ́ nyɔʼkɔ́ əə: «Wɛ índoodi tuə́ áa olɛɛ́ ogaag oʼto na Táán, odiɛlɛ pɛbán pɛ́ píoloodi! A mɛ, pɛbán pɛ́ ndɛɛ́ agɛɛlɛ aa píoloodi lɛ́ mbáág oʼto na Táán.

¹⁹Wɛ umə́líʼtíníí lɛ́ Táán alɛ əgín úmmuʼ ngɔ́ɔ́? Ɛɛ́ɛ, kɛ́lɛ kɔŋɛʼ náan, ɔmbɔ́ tɛn məŋun má mabɛ́ máálɛŋ náan, málɛ əguliminə a udi wə́ə́ŋ na wɛɛ́y[9]»

²⁰Kiyəg kɛ́ mɔɔd wɔnɔ́ wɛ! Nkuúloodi lɛ́ kaag oʼto kóog náan odiɛlɛ nkə kɛ́ kíoloodi kólɛ iyó ó[10]?

²¹Sɛʼkóón wəəs Ábɛlaam oóo! Tuə́ áa kɛ́yáyɛ́lɛ́ɛ́? Adɛ́ a oʼto wó nkə kɛ́ ayɛ́ɛ́lɛ aa yɛɛ́lón sáád a əngis á Táán á? Adɛ́ a oʼto wóonɛ lɛ́ yiísiə́d mɔɔ́n wəəŋ agɛɛn afɔnyɛn Táán a kibóŋ kɛ́ pɛfɔny á[11]?

²²Tála áay lɛ́ pɛbán pɛ́ Ábɛlaam ayɛ́ɛ agɛɛlɛ pɛ́yɛ́ɛ agodáŋana ondáŋ na kaag kuə́ŋ kó oʼto na Táán. A niɛlɛ niə́ŋ nɛ́ɛn aa kaag oʼto kuə́ŋ na Táán koɛ́lón kibuu fiɛ́d.

²³Náan aa nkə kɛ́ kíyə́dílə́ə́ a Kálaʼtaʼ ɛ Táán kɛ́yáás. Kíyə́dílə́ə́ kɔ lɛ́: «Ábɛlaam ayáág oʼto na Táán, kólɛ́ aa Táán ayɛ́moyɛ́ʼkɛn kilumiʼ, amáamodɔ́ŋɔn lɛ́ sɔ́g wəəŋ[12]»

²⁴Lɛŋáan anɛ́ɛ́n lɛ́ adɛ́njaŋ əgín a nɛag nɛ́ oʼto na Táán nɛ́lɛ́ na nɛ́lɛ́ aa mɔɔd alɛɛ́ ugusəə lɛ́ nyɔ́lɛ́ aalon sáád a əngis á Táán, ndóo. Ogóódi lɛ́ yáábɛg tɛn pɛbán pɛ́ aágɛɛlɛ.

²⁵Kɛ́lɛ tɛn náan yoom ímuʼ na kɛdáŋanaʼ kɛ́ ɔʼkɛ́ɛd kímmú, niiŋ lɛ́ Ɛlaáab. Yɛɛ́lón sáád a əngis á Táán a oʼto wó nkə kɛ́ ayɛ́ɛ́lɛ. Yɛɛ́lɛ́ŋ kusiəd pɔɔd pá Yúdɛn iyíím ɛ́dom, aáság kubuúloodi ngə́ yɛ ndɛ́ŋ lɛ́ pásan kɔ mɔɔd adɛboodála[13]

²⁶Kɛ́lɛ lɛ́, ndɛ anyɔ́ŋɛn lɛ́ pólɛŋ poɔʼkɔ́: Wɔnɔ́ ná kɛ́lɛɛ́ lɛ́ kɛnɛŋ kɛ́ uŋun wáʼkolónɛ́ɛ́ a nkó ɛ mɔɔd, mɔɔd nyóon aándɛ kɛlóŋ, náan aa kaag oʼto tɛn na Táán kólɛɛ́. Kɛnɛŋ tɛn kɛ́ mɔɔd amáág oʼto na Táán, náa ɔdɛɔ́gɔ agɛɛlɛɛ́ pɛbán pɛ́ píoloodi, kəə́liʼtiniʼ kuə́ŋ tɛn kólɛ kuwúən.