Read Yambeta Sɛ́ag 3 Bible Online

Sɛ́ag 3 - Yambeta bible

Sɛ́ag 3

¹Pəŋi pomóŋŋí páam, kɛ́dɛɔ́gɔ kɔŋɛʼ lɛ́ póɛn pəŋi piíŋ paaʼkananɛʼ lɛ́ Táán adɛndɛ́ɛ́ kugu niis na pəŋi a wɔɔ́s ó pɛyɔm.

²Nɔgɛ́ɛ́ nóɔgɔɔ́bɔg mɔɔd ungim a unuʼ. Nyɔ́ nɔgɛ́ɛ́ nódɛ́amoyɔ́bɔgɛ́ɛ, nyóon alɛ fɔ́lɔ́b ɛ mɔɔd, alɛ ugəə́nuŋ nyɔ́lɛ́nyɔ́amɔɛ́d ungim.

³Tɛ́dála lɛ́ kɛnɛŋ kɛ́ tɛmáág kisúg na tuwoo a unuʼ wó nnyambɛlɛʼ agɛɛlɛ lɛ́ ɛ́dáŋana wɔnɔ́ ná tɛányɔ́ŋɛn, tɛlɛ agɛɛlɛ tɛn lɛ́ nkó yəəŋ ngim ɛ́bɛyóbɛn.

⁴Pódála tɛn na pəsiʼtíməʼ. Pálɛ pɛa pɛ́ piʼtóʼtólog pɛ́ moom náa, əgín na ɛyaa ɛ́ yoom aa pálɛɛ́ agodáŋananɛ pɔ́lɛ́. Ɔmbɔ́ kigud kífiŋ tɛn kɔ tuə́ na toɛn, kíənud yɛ́lɛ́, əgín na ɛyaa ɛ́ yoom náanɛ idiʼtíʼtíʼtí aa mɔɔd nyɔ́ alɛɛ́ əgufi yɛ́lɛ́ alɛɛ́ agɛɛlɛ lɛ́ íyə́ən ngə́ yɛ́ alɛɛ́ anyɔ́ŋɛn lɛ́ íyə́ən.

⁵Kɛ́lɛ tɛn náan yoom ímuʼ na nnuʼ yəəs. Ɛyayáá ɛ́ yoom yɛ́ɛy yɛ́ ɛ́lɛɛ́ a nkó yəəs, pɔ́ɔdɔ́ŋɔn lɛ́ nɔmɛm, ɛ́lɛŋɛn kaányáadɛ na nɔgɛ́ɛ́ nó alɛɛ́ alónɛ. Pudinjə́bə́líí lɛ́ ɛyaa yɛ́ ongalɛ́ngas aa yɔ́ɔgɔ́ɔ́lɛ yug a ɔdɛ.

⁶Nɔmɛm nólɛ a nkó yəəs wɔnɔ́ ongalɛ́ngas. Nólɛ́ aa nólɛɛ́ a pɛʼkab piə́s piim kɛnɔ kɛ́ kɔbɛ́ kógónɛ́nɛ́ɛ́ mban. Nólɛ́ aa núəfiləni nkó yəəs ngim. Nɔgɛ́ɛ́ nó nóalon a unuʼ wə́ə́s nóɔgɔ́ɔ́lɛ yug a ɔlaa wə́ə́s wɔnɔ́ ná ongalɛ́ngas wɔ́ɔgɔ́ɔ́lɛ yug a ɔdɛ. Məŋun má mabɛ́ aa málɛɛ́ na yug yɛ́ɛy.

⁷Moom muim mó Táán ayɛ́ɛ́lɛ: Ponyam pó kidun oo, pɛsag óo, nkud oo, pusú oo, muim móom mɔɔd alɛ ogɛɛlɛ lɛ́ mómoyóbɛn.

⁸Náa, a nɔmɛm, ngə́ ɛgomomɔ́ɔsɛ ɛdɛɔ́gɔ. Nɔmɛm nólɛ kɛbɛ́ɛ́bɛ́ kɛ́ yoom, ɛlɔg! Núdíələndin yəə́b.

⁹Na nólɛ́ aa tɛlɛɛ́ agonyáadɛ Sə́dúk na Mbáa wəəs. Əgín tɛn na nólɛ́ nógo aa tɛlɛɛ́ ɔgɔɔ́nyɔmɔnɔn pɔɔd pá Táán ayɛ́ɛ́lɛ a kɛŋwáŋánán kiə́ŋ[14]

¹⁰Ndóo óo pomóŋŋí! Tɛdɛnjɛ́ɛ́n lɛ́ na nɔmɛm nógo númuʼ tɛányáadɛ Táán, əgín tɛn na nólɛ́ tɛɔ́gɔɔ́nyɔɔmɔnɔn pɔɔd.

¹¹A isim ɛgo ímuʼ, məní mɔ́dɛɔ́gɔ mágolon lɛ́ na málaŋ na má mabɛ́.

¹²Ə́lə́ə́ áa poáʼkodálaá waád wə́əguum mólon, ɔmbɔ́ lɛ́ niín nɛ́agaam aʼkás? Yoom tɛn náan ímuʼ na məní. Isim yɛ́ ɛbɛ́ ɛ́dɛɔ́gɔ ɛ́golónɛ məní málaŋ.

¹³A ondáŋ wááŋan, mɔɔd amaʼkɛɛn kɔ nyɔ́ alɛɛ́ afɛga lɛ́ nyɔ́lɛ́ alɛ na nsiŋ kɛ́fɔlɛ́, alɛ əgəə́bisig koob kɛbán, óloodi nsiŋ yəəŋ a pɛbán pɛ́laŋ pɛ́ aágɛɛlɛ, ə́yəə́suuli tɛn nkó a nsí.

¹⁴Mɔɔd amaʼkɛɛn lɛ́ nyɔ́lɛ́ aadɛ́ʼtɛg pɔsɔ́g na əngis yɛ́ ambɛ́, aányɔ́ŋɛn əgín lɛ́ nyɔ́lɛ́ aa yɔ́ɔ́ŋɛ́ɛ́, mɔɔd nyóon náan adɛfɛ́ga lɛ́ nyɔ́lɛ́ alɛ na nsiŋ. Ndóo əmə́lígə́ə́.

¹⁵Ombod wó nsiŋ wɔnɔ́ wóow náan ódɛɔ́gɔ wó wə́əgiim na Táán. Nsiŋ yɛ́ɛy náan ɛlɛ nsiŋ yɛ́ a nsí yɛ́ɛnɛ. Ɛlɛ nsiŋ ɛ pɔɔd, nsiŋ ɛ Sáʼtan. Uŋun ó Táán ódɛɔ́gɔ na ombod wó nsiŋ wóow.

¹⁶Kɛ́lɛ lɛ́, kɛnɔ kiim kɛ́ yaág yɛ́ əngis ɛ́lɛɛ́, pɔ́dɛɔ́sɔ́dɛ́ɛ́ mɔɔd, a kɛnɔ kɛ́ɛg inyuunyugiʼ ɛ́lɛ kɔ na pɛbán pɛ́ pɛbɛ́ piim.

¹⁷Nsiŋ yɛ́ Táán alɛɛ́ agɛɛ́ʼkɛn na pɔɔd ɛlɛ ndɛ́ŋ lɛ́ mɔɔd nyɔ́ alɛɛ́ na yɛ́lɛ́ alɛ ɔʼtɛ́m sə́ngə́lə́ngə́lə́ a kaadɛ, alɛ agaag kiwiiyiʼ a kɛgaágadɛ kɛ́ pɔɔd, adɛágaábaya a pɛbán, ɔdɛɔ́gɔ na oʼto wó ɔnnasáŋ, alɛ na mbilígɔɔ́ʼkɔn na pɔsɔ́g, alɛ agɛɛlɛ pɛnɛŋ piim pɛbán pɛ́laŋ, ɔdɛɔ́gɔ na ɛsaa, ɔdɛɔ́gɔ mɔɔd wo nnuʼ ɛ́baan.

¹⁸Pɔɔd pá pálɛɛ́ piwiiyiʼ, pə́əwiiyəni pɔsɔ́g. Pɔ́lɛ́ póob náan pálɛ́ɛ́ kolon na kɛsom a pigólí pɛɔ́bɔn pɛ́ɛb.