Read Yambeta Sɛ́ag 4 Bible Online

Sɛ́ag 4 - Yambeta bible

Sɛ́ag 4

¹Poálɛŋ yoom yɛ́ ɛ́lɛɛ́ agoboyɛ́ɛlɛ lɛ́ póɛn əgín piʼtuuliʼ na piʼtuuliʼ, əgín masáŋ na masáŋ. Kɛ́lɛ lɛ́ poágɛn ntɛ́m yaaŋan kɛ́fɔlɛ́ a pɛbán pɛ́ pɛbɛ́. Wɔnɔ́ ná pɛbán pɛ́ɛb pɛ́lɛɛ́ agono a ntɛ́m yaaŋan, kólɛ́ tɛn aa pəŋi polɛɛ́ piʼtuuliʼ na piʼtuuliʼ.

²Polɛ ndúmiʼ na koon mɔɔd kɛnɛŋ kɛ́ pumúúnə kɛɛn na yoom podɛɔ́ŋ. Polɛ tɛn lɛ́ kɛnɛŋ kɛ́ pomáág ɔʼtɛ́m a yoom náa pumúúnə podɛɔ́ŋ, poɔlɔb əgín masáŋ na masáŋ, piʼtuuliʼ na piʼtuuliʼ. Lɛŋáan lɛ́ nkə kɛ́ polɛɛ́ əguunə, podɛɔ́gɔ ɔɔgɔɔŋ kɛ́lɛ́ lɛ́ podɛɔ́gɔ əguŋíən na Táán.

³Pɛnɛŋ pímmú ándɛ puə́muŋíən adɛboyɛ́ʼkɛn lɛ́ podɛɔ́gɔ agolɛŋ kumuŋíən. Polɛ əgumuŋíənə moom mó mólɛɛ́ mɔŋɛʼ əgín áa pəŋibáamɔɛ́d.

⁴Polɛ əgulígə Táán wɔnɔ́ pagɛ́ɛd pá pɔ́dɛɔ́gɔ agoóbɛnɛɛ́ panom pɔ́ɔ́bɔn. Poálɛŋ lɛ́ mɔɔd nyɔ́ amáág ɔʼtɛ́m a pɛbán pɛ́ a nsí, ɔdɛɔ́gɔ ogolɔb fiɛ́d kobɛnɛn Táán. Uməʼkusəə lɛ́ pɛbán pɛ́ a nsí aa wəə́yə́ən, ólɛŋ lɛ́ Táán ɔdɛɔ́gɔ ogɛɛn tɛn a ngim yaaŋ.

⁵Podɛfɛ́ga lɛ́ nkə kɛ́ Kálaʼtaʼ ɛ Táán ɛ́lɛɛ́ əgusəə kɛ́lɛ nsíísí iyó, ndóo! Kɛ́lɛ kidiídílə́ kɔ lɛ́: «Táán alɛ na nifúb a uŋun wə́ə́ŋ wó ólɛɛ́ na pəsi.

⁶Ɔdɛɔ́gɔ əgín lɛ́ nifúb, alɛ agɛbɛyɛ́ʼkɛn kə́mmú mawɔʼ má mámááyɛn yoom yiim, əgín wɔnɔ́ ná kɛ́lɛɛ́ kidiídílə́ a kálaʼtaʼ yəəŋ lɛ́: Táán alɛ agonɔɛyɛ pá pálɛɛ́ agaábágɛdɛ. Náa, na pá pə́mə́súúlíí nkó a nsí, ooloodi lɛ́ nyɔ́lɛ́ aádɛ́ɛ́ ɔʼtɛ́m[15]»

⁷A oʼto wóow a ndɛɛ́ əgusəə na pəŋi lɛ́ puə́suuli nkó a udi ó Táán, pósáŋɛnɛ ngə́ yɛ Omɔlɛɔ́g, aaboodɛ́da.

⁸Póɛn ná Táán alɛɛ́, əəbuyə́súidin[16] Pəŋi pɛɛlɛ mabɛ́, ásɔ́gɛ́an ɔmbɔg. Pəŋi pá polɛanɛɛ́ ntɛ́m ɛ́baan, ásɔ́gɛ́nɛ́an ntɛ́m yaaŋan.

⁹Poáyáág ɔmbɔg a aʼtam, pólɛɛ a kidíídí kɛ́ mabɛ́ mááŋan má poágɛɛlanɛ. Pudiyíʼkíni koŋɔnɔ kə́mmú, poányam. Podɛnnyɔ́ga, póɛn ntɛ́m a kaadɛ suúúm.

¹⁰Ə́súlíən nkó a udi ó Sə́dúk ná nyɔ́lɛ́ ábobágɛdɛ pəŋi.

¹¹Pomóŋŋí, podɛsɔ́yɔ niiŋ nɛ́ sɔ́g kɔbɛ́ lɛ́ wɛ nyɔ́ wɔɔ́sɔyɔ niiŋ nɛ́ sɔ́g kɔbɛ́, ólɛŋ lɛ́ pɛcɛm pɛ́ Táán áa olɛɛ́ ɔgɔɔ́gɔ́dɔ náan wɔʼkɔ́ pɛ́lɛ pɛbɛ́. A kɛnɛŋ kɛ́ɛg kɛ́ wɛ wɔɔ́ndɔgɔɔ́gɔ́dɔɔ́ pɛcɛm náan lɛ́ pɛ́lɛ pɛbɛ́, udiə́giiʼkini kɛɛ́ngɛg pɛ́lɛ́ kə́mmú, wɔɔ́ndɔyɔmɛ pɛ́lɛ́.

¹²Wɛ aa nyóon ánɛ aa wɔɔ́ndɔyɔmɛɛ́ sɔ́g mɔɔd əə́? Táán nyɔ́lɛ́nyɔ́əsíŋ áa ayáágan pɛcɛm. Əgín tɛn nyɔ́lɛ́nyɔ́əsíŋ áa alɛɛ́ lɛ́ ɔ́yɔmɛ pɔɔd. Nyɔ́lɛ́nyɔ́əsíŋ aa alɛɛ́ ogɔɔyɛ mɔɔd, ɔmbɔ́ lɛ́ ogomoyóon.

¹³Álɛ́ŋɛ́an, pəŋi pá polɛɛ́ əgusəə poɔʼkɔ́: «Naánɛ́ yɛ́ɛnɛ, ɔmbɔ́ lɛ́ na koany ndagɛɛn a pálɛ́ɛg yɛ́ɛy kága, nyɛ́ɛn agɛɛlɛ kɔ waag ɔmbɔ́ úmmuʼ, ndáagɛɛlɛ undunə́. Ndɔɔgɔɔŋ mɔɔnɛ́ kɔ kɛ́fɔlɛ́.»

¹⁴Poálɛŋ nkə kɛ́ kɛ́aboóboan na koany a[17]? Óbáan lɛ́ ɔlaa wááŋan ólɛ wɔnɔ́ moógin mó mólɛɛ́ lɛ́ əgiim móbág kuə́ŋ, mólɛ púuu. Ɛyaa ɛ́ kɛnɛŋ sɔɔŋ, múndigi kə́mmú, muə́ʼkəə́yúnjugəni.

¹⁵Nkə kɛ́ pugóódi lɛ́ púsəə kɛ́lɛ lɛ́: «Sə́dúk amaʼkɛnyɛɛ́ʼkɛn ɔlaa, ndagɛɛlɛ yɛ́ɛnɛ, nnyɛɛlɛ tɛn yɛ́ɛnɛ.»

¹⁶Nisəə nɛáŋan nɛ́dɛɔ́gɔ nɛŋɛʼ. Polɛ agá agaábágɛdɛ, puə́gəə́gidən a igog.

¹⁷Wɛ nyɔ́ olɛɛ́ ogɛɛlɛ kɔŋɛʼ náa odɛɔ́gɔ agɛɛlɛɛ́ kólɛ́, waáʼkɛɛlɛ kɔbɛ́.