Read Yambeta Sɛ́ag 5 Bible Online

Sɛ́ag 5 - Yambeta bible

Sɛ́ag 5

¹Nɛ́gɔŋ yɛ́ɛnɛ, lɛŋáan kodam ntóɛŋ, pəŋi pɔɔd pá tugúm, óʼtánaan nkə kɛ́ ndábodɛ́anɛ. Ányámɛ́an, álɛ́lɛ́an lɛ́ polɛ́ɛ́ konɛ ntɔ́b yɛ́ ɛmábosán oʼto.

²Tugúm toáŋan tólɛ iyó. Nɛnɛ́ nɛ́lɛ́ɛ́ konɛ pilə́ə́ pɛáŋan.

³Mɔgɔ́g málɛ́ɛ́ kugumin kóol yaaŋan na mɔɔnɛ́ mááŋan[18] Mɔgɔ́g móom málɛ́ɛ́ koboyɛ́ʼkɛn nsɔ́ɔ́. Málɛ́ɛ́ koboonɛ wɔnɔ́ ná ándɛ yug yáanɛ mɔɔd. Ɔmbɔ́ ná aáʼkolɔbɛɛ́ sɔɔŋ lɛ́ nsí ɛ́man, pəŋi polɛ agaágɔnyan əgín tugúm.

⁴Poɛ́sáŋɛ́nɛ kɔsáábɔn pɔɔd pá píígúd a malɛ́m mááŋan[19] Poyɛ́ɛ́lɛ kɔbɛ́ kó kogóʼkóón. Aŋŋo yɔ́ɔ́bɔn á mandɛɛ yáʼkɛɛn əgiig a nó Táán nyɔ́ alɛɛ́ Sə́dúk wo nsí na mɔɛn.

⁵Pəŋi polɛ agonɛ wááŋan ɔlaa a nsí, poágɛɛlɛ nkə kiim kɛ́ polɛɛ́ anyɔ́ŋɛn. Polɛ agonɛ́ɛnɛ kɔŋɛʼ, poásɛs, pɔsɔ́g pə́əgu.

⁶Poyɛ́ʼkɛn nsɔ́ɔ́ na mɔɔd nyɔ́ adɛʼkáagɛɛlɛɛ́ kɔbɛ́, poábod pomámoyóón. Nyɔ́lɛ́ adɛʼkáayag kaánɔna ɔmbɔ́ kaánɔna.

⁷Pomóŋŋí, nóʼtánaan ntɔ́b agɛɛn əgiig a kɛnɛŋ kɛ́ Sə́dúk wəəs Yə́sus Kilíʼtus alɛ́ɛ́ kimbuúlinií. Táláan na pəgud malɛ́m, pɔ́dɛɔ́gɔ agaábáam, pálɛ agoboŋ tɔɔ́ tó na oʼto na oʼto agɛɛlɛ lɛ́ págóna moom moɔ́bɔn. A ngim yɛ́ɛy ná pə́ə́bə́ə́ kobóŋan lɛ́ túmmú túdə́əŋ, moom móom móyam[20]

⁸Pəŋi tɛn póɛn náan wɔnɔ́ pɔ́lɛ́. Pónóʼtan, podɛsɛ́mbɛ́lɛ́dɛ nkó lɛ́ kimbuúlini kó Sə́dúk wəəs koándɛ ndúmiʼ.

⁹Pomóŋŋí, púdi kɔɔ́nyɔɔmɔnɔn pəŋi na pəŋi ná Táán adɛnjɔ́ɔ́ŋ ɛgom na pəŋi a wɔɔ́s ó pɛyɔm. Sə́dúk Yə́sus Kilíʼtus nyɔ́ alɛ́ɛ́ kɛbɛɛ́yɔmɛɛ́ aa nyóonɛ aándɛɛ́ ndúmiʼ.

¹⁰Pomóŋŋí, siə́dəən ongoo ó palɔɛgɛʼ pɛbán pá Táán, pɔ́lɛ́ pá páyɛ́ɛ agosɔyɔ a niiŋ nɛ́ Sə́dúk. Pɛ́ɛ́nɛ́ ntɔ́b, páánóm ɔʼtɛ́m, páánóʼtan. Nóʼtánaan tɛn náan wɔnɔ́ pɔ́lɛ́.

¹¹Poádála ə́! Tɛlɛ agoboógany pɔ́lɛ́ nɛ́gɔŋ lɛ́ pɛ́ɛ́nóm ɔʼtɛ́m. Adɛ́ poyóób kɛbán kɛ́ Síob wɔnɔ́ ná yɛɛ́nóʼtan ntɔ́b ɔ́? Adɛ́ poálɛŋ tɛn wɔnɔ́ ná Sə́dúk ayɛ́moyɛ́ɛ́lɛ kɔŋɛʼ a oʼto wóow lɛ́ yɛɛ́nóʼtan ntɔ́b ɔ́? Kɛ́lɛ lɛ́, Sə́dúk alɛ na ɔʼtɛ́m wó mbilígɔɔ́ʼkɔn. Alɛ əguloodi tɛn náan[21]

¹²Pomóŋŋí, nkə kɛ́ mbándabodɛ́anɛɛ́, púsiəd kɛ́lɛ́ kɔŋɛʼ. Kɛnɛŋ kɛ́ poándagɛɛlɛɛ́ yoom, podɛyácɛ́mɛ́ɛ́. Podɛyácɛ́mɛ́ɛ́ mɔɛn, podɛyácɛ́mɛ́ɛ́ tɛn ɔmbɔ́ nsí. Podɛyácɛ́mɛ́ɛ́ yoom na yoom. Kɛnɛŋ kɛ́ kɛbán kɛ́lɛɛ́ kɔ, nkə kɛ́ pumə́líʼtíníí lɛ́ «ɛɛ́ɛ» kɛ́lɔb lɛ́ pumə́líʼtíníí. Kɛ́ poásáŋɛ́nɛ poɔʼkɔ́ «ndóo» kɛ́lɔb tɛn lɛ́ poásáŋɛ́nɛ agɛɛlɛ lɛ́ podɛnjɛ́ɛ́n na nsɔ́ɔ́ a udi ó Táán[22]

¹³Wɛ nyɔ́ olɛɛ́ a ntɔ́b, ɔ́sɔ́gɔ́lɔ́nɛ́ɛ́ Táán a ntɔ́b yaaŋ. Wɛ nyɔ́ olɛɛ́ a tɔnyɔ́g, túmən Táán pɛlɛ́ɛ́ agomonyáadɛ.

¹⁴Nyɔ́ alɛɛ́ abany, ɔ́dɔ́ŋɔn padɛ́lɛm yuudi pá a ɛgɔny ɛ́ pəə́liʼtiniʼ. Pɔ́ɔ́sɔ́gɔlɔn Táán a kidíídí kiə́ŋ, pə́muusiŋ məgúd a niiŋ nɛ́ Sə́dúk[23]

¹⁵A pɛɔ́sɔ́gɔ́lɔ́n pɛ́ɛb, pámaʼkɛɛn lɛ́ pámáág oʼto na Táán, Sə́dúk aagoómɛ mɔɔd nyóon, kobany kuə́ŋ kóaman, ə́əmuúlisin kɔbɛ́ kuim kó ayɛ́ɛ́lɛ.

¹⁶Kólɛ́ aa ndábodɛ́anɛ nyɔʼkɔ́: Wɛ nyɔ́ omɛ́ɛ́lɛ kɔbɛ́, ə́sə́ə́líí na sɔ́g. Na wɛ ogo wɔ́sɔ́gɔlɔn a kidíídí kɛ́ sɔ́g agɛɛlɛ lɛ́ Táán áboyóómɛ. Pɛɔ́sɔ́gɔ́lɔ́n pɛ́ mɔɔd nyɔ́ alɛɛ́ sáád pɛ́lɛ na toɛn kɛ́fɔlɛ́.

¹⁷Áyɔ́ŋɛ́an Ɛlɛ́as. Ɛlɛ́as ayɛ́ɛ mɔɔd wɔnɔ́ pəsi. Ná ɔyɔ́sɔ́gɔ́lɔ́nɛ́ɛ́ Táán na ɔʼtɛ́m wə́ə́ŋ ungim lɛ́ noó núdiʼtə́əŋ, kɛ́yɛ́ɛ́lɛ pɛag pɛ́dáád na kɛsom noó núʼtə́əŋ a kɛnɔ kɛ́go kɛ́ɛg.

¹⁸A ngim yɛ́ɛy, ná əyíʼkíni kɔɔ́sɔ́gɔlɔn Táán lɛ́ núdə́əŋ, tɔɔ́ toáság kimbuúlini, moom muə́bə́ə́ kiiʼkini kiim mólog a nsí[24]

¹⁹Pomóŋŋí, nyummú a kɛgaágadɛ kɛáŋan əməʼkuliog a ngə́ ɛ sáád náa sɔ́g nyummú amámoyɛ́ɛ́lɛ lɛ́ yíiʼkini kimbuúlini a yɛ́lɛ́,

²⁰pólɛŋ lɛ́ nyóon nyɔ́ amɛ́ɛ́lɛ náan lɛ́ ɔngɛɛlɛʼ kɔbɛ́ álon a ngə́ yɛ́ɛy yɛ́ ayɛ́ɛ əə́ʼkunim a yɛ́lɛ́, amámolónɛ anyóon a kugu. Nyóon nyɔ́ amɛ́ɛ́lɛ náan, Táán alɛ́ɛ́ kumuúlisin ɛ́fɔlɛ́ ɛ́ mabɛ́ má ayɛ́ɛ́lánɛ[25]