Read Yambeta 1 Píɛ 1 Bible Online

1 Píɛ 1 - Yambeta bible

1 Píɛ 1

¹Mɛ Píɛ nyɔ́ ndɛɛ́ mɔɔ́n o maʼtom o Yə́sus Kilíʼtus aa mbə́budílən nufuuʼ nóonɛ. Mbə́budílən pəŋi pá Táán əyíbuyííyid, pəŋi pá poɛ́fám a nigúu nɛ́ Ɔlɔ́ma niim lɛ́ póonɛ a kɛsom kɛ́ nsí kɛ́ Pɔ́ɔŋ, pə́mmú a Kalasíi, pɔsɔ́g pə́mmú a Kaʼpadóos, pə́mmú a Əsíi, pɔsɔ́g pə́mmú tɛn a Piʼtiníi. Polɛ alaa kɔ́gɔ́ɔg wɔnɔ́ pɛnɔɔŋɛʼ[1]

²Táán Sɛ wəəs əyíbuyííyid əgín wɔnɔ́ ná yiídə́nígə́ni kɔ kalaʼ. Ayɛ́boyɛ́ɛ́lɛ lɛ́ póɛn tə́ngə́d pə́ə́ŋ a toɛn tó Uŋun wə́ə́ŋ lɛ́ ná puóbɛn Yə́sus Kilíʼtus, maŋɔ́ mə́ə́ŋ máyɛboósɔgɛn[2] Táán áboyɛ́ɛlɛ kɔŋɛʼ, áaboyɛ́ʼkɛn tɛn kiwiiyiʼ a fug áaá!

³Tɛ́nyádɛan Táán, Sɛ o Sə́dúk wəəs Yə́sus Kilíʼtus. A ɔʼtɛ́m wə́ə́ŋ ólaŋ wó əyíbilóódi, ayɛ́bɛyɛ́ʼkɛn ɔlaa wó ongwa ná ayóndɛ́gɛ Yə́sus Kilíʼtus a pɛlóŋ. Kólɛ́ aa tɛlɛɛ́ agomɛna pɛda na nyɔ́lɛ́ wɔnɔ́ pɔɔd pá pálɛɛ́ na ɔlaa.

⁴Náan, polɛ agaáboŋ lɛ́ polɛ́ɛ́ kɔɔŋ tugúm tó Táán yɛɛ́ngɛ́gɛ́nɛ́nɛ́ɛ́ pɔɔd pə́ə́ŋ a mɔɛn. Tólɛ tugúm tó tódɛɔ́gɔ tó kolɛáŋɛ́ɛ́, tódiɛn tó túəgəə́filəni, ɔmbɔ́ tó tóasoo.

⁵Wɔnɔ́ ná kɛ́lɛɛ́ lɛ́ poágɛn oʼto na nyɔ́lɛ́, alɛ əbuúnuŋ a toɛn tuə́ŋ lɛ́ ná áboyɔ́ɔyɛ. Alɛ ndúmiʼ a kɛnɛŋ kɛ́ a nɛman lɛ́ əəbuúloodi lɛ́ pomɔ́ɔy.

⁶Polɛ agɔnyɔ́ga na kɛ́lɛ́, ɔmbɔ́ ná nɛ́gɔŋ yɛ́ɛnɛ pugóódi lɛ́ póɛn na ɔʼtɛ́m kogany a ɛyaa ɛ́ kɛnɛŋ, póonɛ mbod yɛ ntɔ́b ngim.

⁷Ntɔ́b yɛ́ɛy ɛlɛ lɛ́ ná Táán óloodi lɛ́ poágɛn fɔ́lɔ́b oʼto na Yə́sus. Pálɛ asánɛ kóol a yug agɛɛlɛ lɛ́ pálɛŋ nga ɛlɛ ŋŋɛʼ. Náan tɛn aa pálɛɛ́ kɛɛlɛɛ́ na kəə́liʼtiniʼ koáŋan kó kómááyɛn kóol yɛ́ ɛdɛálaalɛɛ́ a pɛnɛŋ piim. Páasánɛ kəə́liʼtiniʼ koáŋan a ntɔ́b əguloodi lɛ́ kólɛ kuə́yísiə́n. Náan Táán aabonyáadɛ, áaboyɛ́ʼkɛn nugəm, áyɛbobágɛdɛ[3] a wɔɔ́s wó Yə́sus Kilíʼtus alɛ́ɛ́ koólodií a əngis á pɔɔd.

⁸Ɔmbɔ́ ná podɛ́ʼtálaá Yə́sus ɔmmɔɛ́d na əngis yááŋan, polɛ amoonyɔ́ŋɛn. Ɔmbɔ́ tɛn ná podɛ́mmodálaá nɛ́gɔŋ, poágɛn əgín oʼto na nyɔ́lɛ́[4] Kólɛ́ aa polɛɛ́ na tɔnyɔ́g tó tuóloodi nugəm nó Táán. Tólɛ ombod wó mɔɔd ɔdɛɔ́gɔ ogolɛŋɛɛ́ wɔnɔ́ ná ə́səlií.

⁹Polɛ na tɔnyɔ́g tóod náan lɛ́ Táán amáboyɛ́ʼkɛn pɛsáábɔ́n pɛ́ɛnɛ lɛ́ pomáág oʼto na nyɔ́lɛ́. Pɛ́go aa pɛ́ɛnɛ pɛ́lɛɛ́ lɛ́ alɛ agoboyɔ́ɔyɛ.

¹⁰Kɔ́gɔ́ɔg kalaʼ, palɔɛgɛʼ pɛbán pá Táán pɛ́ɛ́lɛ́ŋ kuunə kɔŋɛʼ kɔŋɛʼ, páálɛŋ kodɛ́ʼtɛg nkə kɛ́ kɛ́yásánɛ́ɛ́, agɛɛlɛ lɛ́ pálɛŋ tuə́ aa Táán alɛ́ɛ́ kɔɔyɛɛ́ pɔɔd. Pɛ́ɛ́yáŋ alɔɛgɛ tuə́ áa Táán alɛ́ɛ́ koboyɛ́ɛlɛnɛɛ́ pəŋi kɔŋɛʼ.

¹¹Uŋun ó Kilíʼtus wó óyɛ́ɛ na pɔ́lɛ́ wɛ́ɛ́yáŋ aboólɔɛgɛnɛ ntɔ́b yɛ́ Kilíʼtus yiígóodi lɛ́ ánɛ, na nugəm nó núəgiim a ngim. Palɔɛgɛʼ pɛbán pá Táán póob pə́yúúnə tɛn kolɛŋ naanɛ́g áa pɛbán pɛ́ɛb pɛ́lɛ́ɛ́ kaáyɛ́lɛɛ́, tuə́ aa pɛ́agaáyɛ́ɛlɛ tɛn[5]

¹²Táán yɛɛ́moáŋɛ́nɛ na palɔɛgɛʼ pɛbán pə́ə́ŋ lɛ́ pɛbán pɛ́ɛb pɛ́ nyɔ́lɛ́ alɛɛ́ agobodɛ́anɛ, pɛ́dɛábodɛ́ʼtɛg pɔ́lɛ́, pɛ́lɛ pɛáŋan. Nɛ́gɔŋ yɛ́ɛnɛ, palɔɛgɛʼ Tɔsɔm Tólaŋ pámábosánɛ́nɛ tɔgɛ́ɛ́ tóod a toɛn tó Uŋun wó Ufúlúʼtú wó Táán əyíím ádom kɔ́gɔ́ɔg a mɔɛn. Ɔmbɔ́ məŋun má maʼtom má Táán mɔ́lɛ́máamɔɛ́d málɛ əguunə lɛ́ ná máálɛŋ tíʼtiib pɛbán pɛ́go pɛ́ɛb.

¹³Kólɛ́ aa pugódíí lɛ́ póɛn paábɔ́ŋɛ́náán əgugudin Táán. Pudinním ɛnɔ. Komɛna pɛda koáŋan kuim kóɛn əgín a kɔŋɛʼ kó Táán alɛ́ɛ́ koboyɛ́ʼkɛnɛɛ́ wɔɔ́s wó Yə́sus Kilíʼtus alɛ́ɛ́ koólodií.

¹⁴Poándɛ poómbaa pá páagoóbɛn Táán. Pudinjíʼkíni anɛ́ɛ́n kudə́əŋ kə́mmú a pɛbán pɛ́ pɛbɛ́ pɛ́ poyɛ́ɛ agonyóŋɛnɛla kɛɛlɛ kalaʼ kɛnɛŋ kɛ́ poyɛ́ɛ podɛ́njóób Tɔsɔm tó Táán.

¹⁵Náa, pugóódi kɛɛn pɔɔd pá niə́siəd nɛáŋan nɛ́lɛɛ́ fúlúʼtúʼtúʼtú wɔnɔ́ ná Táán nyɔ́ ayɛ́boodɔ́ŋɔn alɛɛ́ ufúlúʼtú.

¹⁶Kɛ́lɛ lɛ́, a Kálaʼtaʼ yəəŋ, Táán alɛ əgusəə ɔnɔ́: «Pugóódi kɛɛn pəfúlúʼtú, wɔnɔ́ ná mɛ ndɛɛ́ ufúlúʼtú[6]»

¹⁷Kɛnɛŋ kɛ́ polɛ ɔgɔɔ́sɔ́gɔlɔn Táán, polɛ agomodɔ́ŋɔn poɔʼkɔ́ «Paabá.» A niiŋ anɛ́ɛ́n nɛ́ɛn, nyɔ́lɛ́ nyɔ́ ədiə́siədií ngim ɛ mɔɔd, nyɔ́ ɔɔ́yɔmɛ ungim əgín wɔnɔ́ pigólí piə́ŋ pɛ́ əə́gud, pugóódi kɛɛn, a mədúg móonɛ má puligíí a nsí, na mandoŋá má móoloodi lɛ́ polɛ agomonyáadɛ.

¹⁸Kɛ́lɛ lɛ́, poálɛŋ nkə kɛ́ Yə́sus yɛɛ́ʼpɛ́ɛ́ agɛɛlɛ lɛ́ áboyááŋɛn a ɔlaa ó tubi wó poyáʼkan na pasɛ pááŋan. Adɛ́njaŋ moom mó múdiə́ʼtə́líí náanɛ wɔnɔ́ kóol, wɔnɔ́ mɔɔnɛ́ aa yɛɛ́ʼpɛ́ɛ́ agoboyááŋɛn;

¹⁹ndóo, Kilíʼtus ayɛ́boyááŋɛ́na na maŋɔ́ mə́ə́ŋ má nyɔ́lɛ́nyɔ́amɔɛ́d. Nyɔ́lɛ́ nyɔ́ páyɛ́moyóón wɔnɔ́ mɔɔ́n o nodóm o pɛfɔny nyɔ́ alɛɛ́ kə́lə́ŋ kə́lə́ŋ, yoom na yoom yɛ́ ɛlɛɛ́ ɛbɛ́ fiɛ́d na nyɔ́lɛ́.

²⁰Táán əyímuyííyid əgín kɔ ná adɛ́nyɛ́ɛlɛ nsí na mɔɛn. Náan aa, a mədúg móonɛ má málɛɛ́ má nɛman, aáʼkobomoáŋɛnɛɛ́ nkə kɛ́ alɛɛ́, a kɔŋɛʼ koáŋan.

²¹A ngim yəəŋ áa poásán agɛɛlɛ lɛ́ póag oʼto na Táán nyɔ́ ayɛ́moyóndɛ́gɛ a pɛlóŋ, amáamoyɛ́ʼkɛn nugəm. Náan aa komɛna pɛda koáŋan kuim kólɛɛ́ na Táán, pomáyaág tɛn oʼto wááŋan na nyɔ́lɛ́.

²²Poándɛ na ntɛ́m mmoáŋáán lɛ́ polɛ agoóbɛn pafɔ́lɔ́b lɛ́ ná pɔ́nyɔ́ŋanan fɔ́lɔ́b fɔ́lɔ́b wɔnɔ́ pomóŋŋí. Pɔ́nyɔ́ŋanan anɛ́ɛ́n na toɛn pəŋi na pəŋi na ntɛ́m mmoáŋáán.

²³Polɛ pɔɔd pá Táán ayɛ́boyɛ́ʼkɛn ɔlaa wó ongwa a toɛn tó nɔgɛ́ɛ́ nuə́ŋ nó nólɛɛ́ a ɔlaa, nɔgɛ́ɛ́ nó nólɛɛ́ a pəliə́g. Poándɛ pɔɔ́n pá Táán nyɔ́ ədiə́gúú, podɛɔ́gɔ pɔɔ́n pá mɔɔd nyɔ́ əə́gu.

²⁴Kɛ́lɛ kidiídílə́ a Kálaʼtaʼ ɛ Táán lɛ́: «Mɔɔd ungim alɛ wɔnɔ́ ombɛ́n. Kɔdɛ́ɛ kuə́ŋ kólɛ wɔnɔ́ pɛsam pɛ́ fɛláwaʼ. Ombɛ́n wáayómbɛ́lɛd, pɛsam pɛ́ság kobɛlɛgɛd a nsí.

²⁵Náa, tɔgɛ́ɛ́ tó Sə́dúk tólɛ́ tólɛ a pəliə́g[7]» Tɔgɛ́ɛ́ tó Sə́dúk tógo aa tóonɛ tólɛɛ́ Tɔsɔm Tólaŋ tó páyɛ́bolɔɛ́gɛ́nɛ.