Read Yambeta 1 Píɛ 2 Bible Online

1 Píɛ 2 - Yambeta bible

1 Píɛ 2

¹Wɔnɔ́ ná poándɛɛ́ lɛ́ poagoob na Táán, tíən mandoŋá mááŋan má mabɛ́ miim. Púdi məlíg, na ɔlaa ó moɔ́ŋɛ́ná pusú, na yaág yɛ́ əngis, na ŋŋɔ́.

²Wɔnɔ́ ná pɔɔ́n pá podom pálɛɛ́ agonyóŋɛnɛla koŋɛ́ɛŋ aʼtóm, pəŋi tɛn póag ɔʼtɛ́m náan a maŋɛ́ɛŋ mamɔɛ́d má fɔ́lɔ́b má a ɔlaa wááŋan na Táán, agɛɛlɛ lɛ́ pəŋi pá ɔɔ́ʼkɔyɛɛ́, pógon.

³Kɛ́lɛ lɛ́, poáʼkodála wɔnɔ́ ná Sə́dúk aádɛ́ɛ́ ɔʼtɛ́m[8]

⁴Áyɛ́ʼtɛ́nɛ́an ndúmiʼ na Sə́dúk, nyɔ́lɛ́ nyɔ́ alɛɛ́ nɛdáán nɛ́ nɛ́lɛɛ́ na ɔlaa, nɛdáán nɛ́ pɔɔd pɛ́ɛ́dó. Náa, Táán əyííyid nɛ́lɛ́, lɛ́ ɔnɔ́ nɛ́ɛn nɛ́lɛ nɛŋɛʼ a əngis yə́ə́ŋ.

⁵Pəŋi, Poáyɛ́ʼtɛnɛ tɛn anɛ́ɛ́n a ɛbá ɛ́ Sə́dúk, ná ə́buúsiəd tɛn pəŋi wɔnɔ́ aʼtáán yá álɛɛ́ na ɔlaa, agowáag yoog yɛ́ Uŋun wə́ə́ŋ wə́ələndin kɔ. Náan, poagɛɛn ondáŋ ó payaaganɛʼ pɛfɔny pá pálɛɛ́ tə́ngə́d a oʼto wə́ə́ŋ, poámoyɛ́ɛlɛnɛ pɛfɔny pɛ́ pɛ́lɛɛ́ wɔnɔ́ ná Uŋun ómábodɛánɛ, pɛfɔny pɛ́ aányɔ́ga kusiəd a niiŋ nɛ́ Yə́sus Kilíʼtus.

⁶Kɛ́lɛ kidiídílə́ a Kálaʼtaʼ ɛ́ Táán lɛ́ Táán ɔnɔ́: «Taa, mbííyid nɛdáán nímuʼ nɛ́ nɛ́lɛɛ́ nɛŋɛʼ, ndagaag nɛ́lɛ́ wɔnɔ́ ɛgon yɛ́ oʼto ó noádɛʼ a pálɛ́ɛg ɛ Siyɔ́ɔŋ. Nyɔ́ amáág oʼto na nyɔ́lɛ́, adɛndɛ́ɛ́ kəə́lə́ʼkəni.»

⁷Kólɛ́ aa ndábodɛ́anɛ lɛ́, a pəŋi pá polɛɛ́ pəə́liʼtiniʼ, nɛ́lɛ nɛdáán nɛ́ nɛ́aboɛ́bɛ. Náa, a pá pə́diə́gəə́liʼtinií, «Nɛdáán nɛ́ pawáagaʼ toádɛʼ pɛ́ɛ́dó, nɛ́lɛ́ nɛ́go aa nɛ́yáán nɛdáán nɛ́ nígumíníníí noádɛʼ.

⁸Nɛ́lɛ tɛn nɛdáán nɛ́ mbúʼtə́n, nɛdáán nɛ́ pɔɔd pálɛ́ɛ́ kudə́əŋən a nɛ́lɛ́[9]» Pálɛ́ɛ́ kubúʼtən a nɛ́lɛ́ lɛ́ pə́yíín koóbɛn nkə kɛ́ kɛ́lɛɛ́ kidiídílə́ a Kálaʼtaʼ. Táá nkə kɛ́ Táán yiídə́nígi aa kɛ́ɛg lɛ́ kɛ́lɛ́ɛ́ koboyɛ́ɛlɛ.

⁹Náa a pəŋi, lɛŋáan lɛ́ polɛ ndɛg yɛ́ əyííyid. Polɛ payaaganɛʼ pɛfɔny pá pə́əgudin Táán nyɔ́ alɛɛ́ nkúm. Polɛ ndɛg yɛ́ ɛlɛɛ́ tə́ngə́d a oʼto wə́ə́ŋ, ndɛg ɛ Táán. Əyíbuyííyid lɛ́ ná pólɔɛgɛ pisig pɛ́ pɛbán pɛ́ amɛ́ɛ́lɛ, nyɔ́lɛ́ nyɔ́ ayɛ́boolónɛ a mbin, agoboyáág a kɛmoámoáŋ kɛ́ kwə́ləəŋ[10]

¹⁰Pəŋi pá podɛʼkɛ́lɛɛ́ kalaʼ ndɛg ɛ Táán, nɛ́gɔŋ yɛ́ɛnɛ poándɛ pə́ə́ŋ. Pəŋi pá Táán ədiʼkə́siədií maan na pəŋi a niə́bə́ə, nɛ́gɔŋ yɛ́ɛnɛ, aáʼkobooda maan[11]

¹¹Pəŋi pɔsɔ́sɔ́g páam pá ɔʼtɛ́m álɛ́ŋɛ́an lɛ́ a nsí yɛ́ɛnɛ, polɛ pɔɔd pá pálɛɛ́ agosan, polɛ pəən. Kólɛ́ aa ndábodɛ́anɛ lɛ́, sɛ́gɔɔ púdi pɛbán pɛ́ pɛbɛ́ pɛ́ pumog pólɛɛ́ agonyóŋɛnɛla, pɛbán pɛ́ pɛ́yɛ́ɛ agoboónɔɛyɛ.

¹²Niə́siəd nɛáŋan a kɛgaágadɛ kɛ́ pɔɔd pá pándɛŋɛnɛɛ́ Táán níɛn niə́siəd nɛ́laŋ, agɛɛlɛ lɛ́, ɔmbɔ́ pɔ́ɔ́sɔyɔ niiŋ nɛáŋan kɔbɛ́ lɛ́ pɔ́nɔ́ polɛ agɛɛlanɛ kɔbɛ́, pádála pɛbán pɛ́laŋ pɛ́ poágɛɛlɛ, pányáadɛ Táán a wɔɔ́s wó alɛɛ́ kodɔ́bɛdɛɛ́ ntɛ́m yɔɔbɔn.

¹³Puóbɛn ungim nyɔ́ alɛɛ́ na nɛlaamɛʼ. Póboyóbɛn a niiŋ nɛ́ Sə́dúk. Puóbɛn nkúm yɛ́ nkóʼkóón yɛ́ yaálaamɛ ungim.

¹⁴Puóbɛn tɛn pəgufulunɛ́ɛ. Nkúm yɛ́ nkóʼkóón áa iyíbudə́nígi lɛ́ pɔ́ʼpɔ́nɛsɛ pá páagɛɛlanɛ kɔbɛ́, páagany pá páagɛɛlanɛ kɔŋɛʼ[12]

¹⁵Kɛ́lɛ lɛ́, nɛnyɔ́ŋɛn nɛ́ Táán nɛ́lɛ lɛ́ póɛlɛ pɛbán pɛ́laŋ, agɛɛlɛ lɛ́ pɔɔd pá pɔ́dɛɔ́gɔ na nsiŋ, pándɛŋ yoom, pɔ́lɔg nnuʼ yɔɔbɔn.

¹⁶Ə́siə́díən wɔnɔ́ pɔɔd pá pándɛɛ́ filí a oʼto wɔ́ɔ́bɔn. Náa, kɛbán kímuʼ, kɛ́dɛnjɛ́ɛ́n na pəŋi lɛ́ wɔnɔ́ ná poándɛɛ́ filí, póɔsɛm a ngim yɛ́ɛy əgubə́ə́ kɛɛlanɛ pɛbán pɛ́ pɛbɛ́. Ə́siə́díən wɔnɔ́ pɔɔd pá pálɛɛ́ əgugudin Táán.

¹⁷Póɛn na nnyáádɛ́ na ungim, pɔ́nyɔ́ŋɛn pomóŋŋí pááŋan pá kəə́liʼtiniʼ. Tammánáan Táán, nyádɛ́an nkúm yɛ́ nkóʼkóón.

¹⁸Pəŋi pá polɛɛ́ əgugudin pɔsɔ́g, na pəŋi aa mbɔ́ndɔsɔyɔɔ́ nɛ́gɔŋ. Puóbɛn pəsə́dúg pááŋan na nnyáádɛ́ ngim. Podɛnjɛ́ɛ́n na nnyáádɛ́ əgín na pɔsɔ́g pá pálɛɛ́ ntɛ́m ngwiyə́ə́n, pá pálɛɛ́ paŋɛʼ na pəŋi, ndóo, pónyáadɛ tɛn pá pálɛɛ́ pabɛ́ na pəŋi

¹⁹lɛ́ kɛ́lɛ fɔ́lɔ́b lɛ́ kɛnɛŋ kɛ́ mɔɔd alɛɛ́ agonɛ ntɔ́b a náan iyó, náa alɛɛ́ agonóʼtan yɛ́lɛ́ a niiŋ nɛ́ Táán, kɛ́lɛ kisig na nyɔ́lɛ́ kɛ́fɔlɛ́ a əngis á Táán.

²⁰Pádɛágany mɔɔd ná alɛ agonóʼtan mbáámanan a oʼto ó kɛbán kɛ́ alɛɛ́ na ɔsɛd a kɛ́lɛ́. Náa, mɔɔd amaʼkɛɛlɛ kɔŋɛʼ, náa páamonɛ́ɛyɛ ntɔ́b, amaʼkonóʼtan ntɔ́b yɛ́ɛy, kɛ́lɛ kɔŋɛʼ a əngis á Táán.

²¹Ɔlaa wó Táán ayɛ́boodɔ́ŋɔn a wólɛ́ aa wóow lɛ́ Kilíʼtus nyɔ́lɛ́nyɔ́amɔɛ́d yɛɛ́nɛ́ ntɔ́b a kidíídí kɛáŋan, əmə́əbuúloodi ngə́ ɛ kuyə́ən tuúb tuə́ŋ.

²²Nyɔ́lɛ́ nyɔ́ adɛʼkáagɛɛlɛɛ́ ɔmbɔ́ kɔbɛ́ nyɔ́ adɛʼkáasómɛ́ɛ́ pɛnyaʼ a unuʼ wə́ə́ŋ ɔmbɔ́ wɔɔ́s[13];

²³nyɔ́lɛ́ nyɔ́ pɛ́ɛ́dóga ədiə́yúlísíníí kɛdog ɔmbɔ́ kímuʼ, nyɔ́ pɛ́ɛ́nɛ́ɛ́yɛ ntɔ́b, ondoodi mɔɔd ɛnoónó a udi, yiísiə́d agá piim amɛ́ʼkɛn na Táán nyɔ́ a pɛyɔm piə́ŋ, ədiə́guúlinií ngim na mɔɔd.

²⁴Nyɔ́lɛ́ nyɔ́ əyə́lúlíí nyɔ́lɛ́nyɔ́amɔɛ́d mabɛ́ mə́ə́s a nkó yəəŋ, a ɔmbásá, əə́gú, agɛɛlɛ lɛ́ tɛ́saalanan kɛlaa na mabɛ́ mə́ə́s, tɛ́ɛsɔd a ɔlaa ó sáád. A oʼto ó pufə́ŋ pó Kilíʼtus aa poáŋan poáʼkoómɛ́ɛ́.

²⁵Kɛ́lɛ lɛ́, poyɛ́ɛ kalaʼ wɔnɔ́ todóm tó tuíním ngə́[14], náa nɛ́gɔŋ yɛ́ɛnɛ Táán əə́ʼkimbuúlinií na pəŋi, puə́ndəyə́nií Kilíʼtus nyɔ́ əə́buúnuŋ, nyɔ́lɛ́ nyɔ́ odióliogií niis na pəŋi.