Read Yambeta 1 Píɛ 3 Bible Online

1 Píɛ 3 - Yambeta bible

1 Píɛ 3

¹Yoom tɛn ímuʼ na pəŋi pagɛ́ɛd, puóbɛn panom pááŋan[15] Puməʼkəə́siəd náan, ɔmbɔ́ panom pááŋan pə́mmú pɛ́ɛn kɔ pá pə́dínjə́liʼtinií tɔgɛ́ɛ́ tó Táán, ná páadála niə́siəd nɛáŋan, pə́əgəə́liʼtini. Kɛ́dɛáyag kuunə lɛ́ póbodɛ́anɛ yoom na yoom

²lɛ́, páadála niə́siəd nɛáŋan wɔnɔ́ ná nɛ́lɛɛ́ fiɛ́d na kibuu, na wɔnɔ́ ná polɛɛ́ agonyáadɛ panom pááŋan.

³Pudinjúúnə kɔdɛ́ɛ kó na mɔɛn na mɔɛn, kɔdɛ́ɛ kó na mɔlɛɛ́ndɛŋ náanɛ wɔnɔ́ koósóbini kó tuyə́ən, kəə́níigən pɔnjɔ́ŋ na palanga pá kóol, na pisig pɛ́ pilə́ə́ pɛ́ pɛ́adɛ́a, əguunə lɛ́ pádála wɔnɔ́ ná poádɛ́ɛ́[16]

⁴Ndóo, kɔdɛ́ɛ koáŋan kóɛn a ntɛ́m yaaŋan a kaadɛ. Pugóódi lɛ́ póɛn piwiiyiʼ pɛ́ pagɛ́ɛd, pagɛ́ɛd pá pálɛɛ́ na ntɛ́m yəə́b a kaadɛ. Táá, ombod ó kɔdɛ́ɛ wó ódɛálɛáŋɛ́ɛ́ aa wóow. Wólɛ́ aa ólɛɛ́ a əngis á Táán kɛa kɛ́ kɛnasáŋ kɛ́ yoom.

⁵Táá mɔlɛɛ́ndɛŋ mó pagɛ́ɛd pá kalaʼ pá páyáágɛn ɔʼtɛ́m na Táán, páamɛna pɛda na nyɔ́lɛ́ páyɛ́ɛ páálɛŋ na mólɛ́ aa móom. Páyɛ́ɛ póóbɛn panom pɔ́ɔ́bɔn.

⁶Ɔmbɔ́ Sáála, náan tɛn aa ayɛ́ɛ́lɛ. Ayɛ́ɛ yoóbɛn onom, Ábɛlaam. Aámodɔ́ŋɔnɔ ɔnɔ́: «Máasaʼ[17]» Pəŋi pá nɛ́gɔŋ yɛ́ɛnɛ poagɛɛn lɛ́ polɛ pɔɔ́n pə́ə́ŋ ná pomɛ́ɛ́lɛ kɔŋɛʼ tɛn wɔnɔ́ nyɔ́lɛ́, posɔ́mɛ́g maŋɔ́.

⁷Yoom ímuʼ tɛn náan na pəŋi panɔ́mɛɛd. Laaláan kɔŋɛʼ na pagán pááŋan, poágaálɛŋ lɛ́ pɔ́lɛ́ póʼkóodi toɛn wɔnɔ́ pəŋi. Púbuyə́gəʼkəəŋəni, poábonyáadɛ[18] lɛ́ pɔ́lɛ́ tɛn, ondáŋ na pəŋi, pógóódi lɛ́ pɔ́ɔŋ ɔlaa ó pɛnɛŋ piim wó Táán aáboyɛ́ʼkɛn a náan iyó. Pomaʼkɛɛlɛ náan, yoom yɛ́ ɛ́lɛɛ́ ɛ́gaádádɛg agɛɛlɛ lɛ́ Táán adɛnjóób pɛɔ́sɔ́gɔ́lɔ́n pɛáŋan, ɛ́dɛágɛɛn kɔ.

⁸Agɛɛn əyibəni kóam kó tɔgɛ́ɛ́ nɛ́gɔŋ, ndabodɛ́anɛ na pəŋi piim nyɔʼkɔ́: Póɛn ɔʼtɛ́m wááŋan úmmuʼ, poágaáyóbanan. Pɔ́nyɔ́ŋanan wɔnɔ́ pɔɔ́n pá niŋŋí, póɛn na ntɛ́m ɛlaŋ, podɛnjábágɛ́dánɛ́ɛ́ a udi ó pɔsɔ́g pɔɔd.

⁹Mɔɔd amaʼkoboyɛ́ɛlɛ nkə kɛ́ kɛ́lɛɛ́ kɛbɛ́, pudiímuə́gúníí. Mɔɔd amaʼkoboodóga, podɛɛ́moodóga tɛn nyɔ́lɛ́, ɔ́sɔ́gɔ́lɔ́nɛ́an agá Táán lɛ́ ámoyɛ́ʼkɛn mawɔʼ[19] lɛ́ nkə kɛ́ ayɛ́boodɔ́ŋɔn a kɛ́lɛ́ aa kɛ́ɛg lɛ́ ná áboyɛ́ɛlɛ kɔŋɛʼ.

¹⁰Nkə kɛ́ kɛ́lɛɛ́ kidiídílə́ a Kálaʼtaʼ ɛ Táán áa kɛ́ɛnɛ kɛ́lɛɛ́ lɛ́: «Wɛ nyɔ́ waányɔ́ŋɛn lɛ́ ólaa kɔŋɛʼ, wɛ nyɔ́ waányɔ́ga na mədúg má a ɔlaa wááŋ, nuŋ unuʼ wááŋ, odɛsɔ́yɛ́la kɔbɛ́, tɔgɛ́ɛ́ tó pɛnyaʼ tódɛnjɛ́ɛ́n tɛn a unuʼ wááŋ.

¹¹Túm ngim na kɔbɛ́, ɛɛlɛ agá kɔŋɛʼ, ágɔ́nɛ́gɛ́ɛ́ kɛɛlɛ lɛ́ uŋóón wɛ́ɛn kɔ

¹²lɛ́, Sə́dúk odióliogi əngis na pá páalaa a sáád, aadám ntóɛŋ na pɛɔ́sɔ́gɔ́lɔ́n pɛɔ́bɔn. Náa, əədúmin pá páagɛɛlanɛ kɔbɛ́ ngim[20]»

¹³Pəŋi pomaʼkɛɛn lɛ́ poagɛɛlɛ kɔŋɛʼ na ɔʼtɛ́m wááŋan ungim, mɔɔd ogaáʼkɛ koboyɛ́ɛlɛ kɔbɛ́ adɛágɛɛn kɔ.

¹⁴Ɔmbɔ́ puígóodi konɛ ntɔ́b lɛ́ polɛ agɛɛlɛ kɔŋɛʼ, poɔgɔɔŋ kɔŋɛʼ. Podɛʼtámmána mɔɔd, pudiyə́díí tɛn lɛ́ mɔɔd ábosósoganɛ.

¹⁵Náa, a ntɛ́m yaaŋan, nyádɛ́an Kilíʼtus, nyɔ́lɛ́ nyɔ́ alɛɛ́ nyɔ́lɛ́nyɔ́əsíŋ Sə́dúk[21] Mɔɔd əməʼkubuŋíən lɛ́ na ánɛ aa polɛɛ́ agomɛna pɛda ə́, póɛn ndúmiʼ na kusəə, pómodɛ́anɛ na ánɛ aa polɛɛ́ agomɛna pɛda.

¹⁶Náa kɛbán kímuʼ, poándamodɛ́anɛ, Wiiyíən ɔʼtɛ́m wááŋan a kaadɛ, pósɔyɔ na nyɔ́lɛ́ a tɛmbɛlɛɛŋ. Ntɛ́m yaaŋan yɛ́ɛn mmoáŋáán a kaadɛ ná polɛ agɛɛlɛ nkə kɛ́ kɛ́lɛɛ́ kɛŋɛʼ agɛɛlɛ lɛ́ pá pɔ́ɔsɔyɔ niiŋ nɛáŋan kɔbɛ́, pá pə́əbusúnə a niə́siəd nɛáŋan nɛ́ nɛŋɛʼ na Kilíʼtus, pɛ́ɛn na oʼto kono a tɔgɛ́ɛ́ toɔ́bɔn.

¹⁷Lɛŋáan lɛ́ kɛ́lɛ kɔŋɛʼ lɛ́ mɔɔd ánɛ ntɔ́b a kɔŋɛʼ kó amɛ́ɛ́lɛ ná kɛ́lɛ a nɛnyɔ́ŋɛn nɛ́ Táán, agosan yɛ́ alɛɛ́ agonɛ lɛ́ amɛ́ɛ́lɛ kɔbɛ́.

¹⁸Kɛ́lɛ fɔ́lɔ́b lɛ́ Kilíʼtus nyɔ́lɛ́nyɔ́amɔɛ́d yiígú kə́muʼ a pɛnɛŋ piim a oʼto ó mabɛ́ má pɔɔd, nyɔ́lɛ́ sáád ɛ mɔɔd, yiígú a oʼto ó pɛɛlɛ mabɛ́ lɛ́ ná ə́busúid a udi ó Táán. A pumog puə́ŋ áa páyɛ́moyóón, Táán əmə́əmuyúlisi a ɔlaa, a toɛn tó Uŋun wó Ufúlúʼtú.

¹⁹A toɛn tó Uŋun wó Ufúlúʼtú wóow aa, yiísúú sɛ́ɛb, amɛ́ɛn alɔɛgɛnɛ na məŋun má málɛɛ́ a kɛáŋ Tɔsɔm Tólaŋ.

²⁰Məŋun móom málɛ məŋun má pɔɔd pá kalaʼ pá páyɛ́ɛ́lɛ́nɛ Táán oʼto wó ɔnnasáŋ, nyɔ́lɛ́ adɛáságɛ́máá ná Nówə ayɛ́ɛ əgudim siʼtíməʼ, áabobóŋan əgín lɛ́ págasɛ ɔlaa. Əgín ngab ɛ pɔɔd sɔɔŋ súg, nto ɛ́ʼtáan na ɛ́dáád áa yɛɛ́bág a kɛʼkɔ́m, Táán amáaboyɔ́ɔyɛ na məní.

²¹Məní móom málɛ a kɛálɛ́ʼkán kɛ́ məní má ɔsɔgɛn má máaboyɔ́ɔyɛ, adɛ́njaŋ má máaboósoga pinig pɛ́ a nkó, ndóo. Kɛ́lɛ əgín agá lɛ́ pəŋi pódɔ́ɔg oʼto kodɔ́gɔ́ɔ́n a ngə́ ɛ Táán, ntɛ́m yaaŋan mmoáŋáán[22] Məní má ɔsɔgɛn móom mámáboyɔ́ɔ́yɛ a oʼto wóonɛ lɛ́ Yə́sus Kilíʼtus yɛɛ́lón a kəəniʼ ongóm,

²²aábág a mɔɛn, ələndínin a ombɔg ó nɛnom ó Táán. Məŋun má maʼtom, na məŋun má málɛɛ́ alaamɛ, na məŋun tɛn miim má málɛɛ́ kɔ na toɛn málɛ amooyóóbɛn.