Read Yambeta 1 Píɛ 4 Bible Online

1 Píɛ 4 - Yambeta bible

1 Píɛ 4

¹Wɔnɔ́ ná kɛ́lɛɛ́ lɛ́ Kilíʼtus ayánɛ́ɛ́ a nkó[23], pəŋi poáboŋɛn na mafɛgaʼ yoom ímuʼ wɔnɔ́ nyɔ́lɛ́ agonɛ ntɔ́b. Pólɛŋ poɔʼkɔ́: Nyɔ́ amánɛ́ɛ́ a nkó yəəŋ, aásaalɛg na kɔbɛ́.

²Kólɛ́ aa, Əgəə́bə́ə nɛ́gɔŋ, agɛɛnanan a mədúg má puligíí a ɔlaa a nsí yɛ́ɛnɛ, puə́siəd wɔnɔ́ ná Táán alɛɛ́ anyɔ́ŋɛn, púdi nkə kɛ́ pumog poáŋan poányɔ́ŋɛn.

³Kɛ́lɛ lɛ́, a kɛnɛŋ kɛ́ kalaʼ, poɛ́sánɛ ɛ́fɔlɛ́ ɛ́ kɛnɛŋ agɛɛlanɛ pɛbán pɛ́ pandɛŋ Táán pálɛɛ́ anyɔ́ŋɛn kɛɛlanɛ. Poɛ́dɔ́gɛ́mɛn kɛɛlanɛ pɛbán pɛ́ɛnɛ, wɔnɔ́: Kubúlimən na pagɛ́ɛd ɔmbɔ́ lɛ́ na panɔ́mɛɛd pá pɔ́dɛɔ́gɔ pááŋan, kaag ɔʼtɛ́m kó kɔbɛ́ a moom, koŋo kó maloʼ máság koboŋwáŋɛ, poánɛ, poáŋo kɛ́fɔlɛ́ a pɛsɛɛn, poányáadɛ pɛbán pɛ́ ambog. Oʼto kono igə na pəŋi.

⁴Nɛ́gɔŋ yɛ́ɛnɛ, pandɛŋ Táán pálɛ əgəə́wúunəni lɛ́ pundigi agolaŋ kɛɛlanɛ pɛbán pɛ́ pɛbɛ́ na pɔ́lɛ́, pálɛ agoboodóga.

⁵Náa, a nkə kɛ́ɛg kiim kɛ́ páagɛɛlɛ, pálɛ́ɛ́ kodɛ́lɛm a udi ó Táán, nyɔ́lɛ́ nyɔ́ aándɛɛ́ ongaábɔ́ŋɛ́náán agoyɔmɛ pá poóm na pá píígú.

⁶A kólɛ́ aa Tɔsɔm Tólaŋ tóyálɔɛ́gɛ́ɛ́ tɛn ɔmbɔ́ na pá píígú lɛ́ ná ɔmbɔ́ páboóyɔmɛ a pɛbán pɛ́ páyɛ́ɛ́lánɛ a nɛ́ pɔɔd ná páyɛ́ɛ a ɔlaa, náa nɛ́gɔŋ yɛ́ɛnɛ, Uŋun wó Ufúlúʼtú wáʼkoboyɛ́lɛɛ́ lɛ́ pálaa ɔlaa ó Táán.

⁷Nɛman nɛ́ nsí nɛándɛ ndúmiʼ. Laaláan anɛ́ɛ́n na nsiŋ, uŋun wááŋan udinním ɛnɔ agɛɛlɛ lɛ́ poɔ́sɔ́gɔlɔn Táán.

⁸Kɛ́ na oʼto na oʼto kɛ́lɛ lɛ́, pɔ́nyɔ́ŋanan kɛ́fɔlɛ́ pəŋi na pəŋi lɛ́, nnyɔ́ŋánán yagɛɛlɛ lɛ́ Táán ə́lisin pɔɔd mabɛ́ miíŋ.[24]

⁹A pəŋi na pəŋi, sɔ́g amaʼkɛɛn a nó sɔ́g, ə́muúsiəd kɔŋɛʼ, əʼtugímə.

¹⁰Táán amáboyɛ́ʼkɛ́nan lɛ́ na wɛ ogo, nkə kɛ́ waágɛɛ́bɛ pɔsɔ́g na kɛ́lɛ́. Póɛn anɛ́ɛ́n wɔnɔ́ pɔɔd pá páadáŋananɛ pɔsɔ́g a mbod ɛ kɔŋɛʼ ngim yɛ́ Táán amáboyɛ́ʼkɛn lɛ́ pɛ́ɛlɛ.

¹¹Nyɔ́ Táán amɛ́ʼkɛn lɛ́ álɔɛgɛ Tɔsɔm tuə́ŋ, álɔɛgɛ tólɛ́. Nyɔ́ alɛɛ́ na oʼtom ógɛɛlɛ, yáyɛ́ʼkɛn agɛɛlɛ oʼtom wóow na toɛn tuim tó Táán amámoyɛ́ʼkɛn lɛ́ ná pɔɔd pámoyɛ́ʼkɛn nugəm a pɛbán piim, a oʼto ó Yə́sus Kilíʼtus. Nyɔ́lɛ́ nyɔ́ alɛɛ́ na nugəm, na toɛn a pɛnɛŋ piim! Aamɛn.

¹²Pɔsɔ́sɔ́g páam pá ɔʼtɛ́m, pudiyə́wúnə́níí a yug yɛ́ polɛɛ́ agogáma káag wɔnɔ́ kɛ́lɛ nkə kɛ́ kɛ́dɛʼkɛ́lɛɛ́ lɛ́ kɛ́boóboan.

¹³Nyɔ́gáan agá lɛ́ polɛ əgusiəd ngab a ntɔ́b ɛ Yə́sus Kilíʼtus agɛɛlɛ lɛ́ wɔɔ́s wó pɔɔd pálɛ́ɛ́ kodálaá nugəm nuə́ŋ na əngis, pəŋi póɛn na tɔnyɔ́g tó tómáboosán oʼto.

¹⁴Kɔŋɛʼ na pəŋi, ná páaboodóga lɛ́ pomáág oʼto na Kilíʼtus. Kɔŋɛʼ na pəŋi lɛ́ Uŋun wó ólɛɛ́ na nugəm, Uŋun ó Táán ólɛ na pəŋi.

¹⁵Úmmuʼ na úmmuʼ a pəŋi adɛnnɛ́ ntɔ́b yɛ́ ɛlɛɛ́ a oʼto wóonɛ lɛ́ amóón mɔɔd, oó lɛ́ əmííbə, amɛ́ɛ́lɛ kɔbɛ́, ɔɔ́sɔ́d a kɛbán kɛ́ kɛ́dɛ́amodɛ́ʼtɛgɛɛ́.

¹⁶Náa, mɔɔd amaʼkonɛ ntɔ́b a oʼto wóonɛ lɛ́ alɛ kilíʼtɛn, adɛnjóób oʼto kono na yɛ́lɛ́. Ndóo, yɛ́ʼkɛn agá pisoyidiʼ na Táán a niiŋ nɛ́ɛn nɛ́ ogódíí lɛ́ alɛ o Kilíʼtus.

¹⁷Táá kɛnɛŋ kɛ́ pɛyɔm aa kɛ́ɛnɛ kiə́ʼkiigií. Na ndɛg ɛ Táán áa pɛáyaŋ Əgəə́bə́ə. Kíməʼkəə́bə́ə́ na pəsi əə, na pá pámɛ́ɛ́lɛ oʼto wó ɔnnasáŋ na Tɔsɔm Tólaŋ tó Táán anɛ́ɛ́n óo, kɛ́lɛ́ɛ́ kɛɛn tuə́ a nɛmananɛ ə́?

¹⁸Kɛ́lɛ kidiídílə́ a Kálaʼtaʼ ɛ Táán lɛ́: «Kɛágány lɛ́ sáád ɛ mɔɔd yɔ́ɔy əə! A pá pándɛŋɛnɛɛ́ anɛ́ɛ́n Táán óoʼ, na pá páagɛɛlanɛ mabɛ́ óoʼ, kɛɔ́bɔn əə kɛ́lɛ́ɛ́ kɛɛn tuə́ ə́[25]?»

¹⁹Kólɛ́ aa, pá pálɛɛ́ agonɛ ntɔ́b lɛ́ Táán áa aányɔ́ŋɛn náan, pɛ́ɛn yuudi na kɛɛlɛ kɔŋɛʼ, pɛ́ɛ́yɛg oʼto wɔ́ɔ́bɔn ungim na nyɔ́ ayɛ́boyɛ́ɛ́lɛ, lɛ́ nyɔ́lɛ́ adɛágasɛ unuʼ a nkə kɛ́ aágagɛn pɔɔd.