Read Yambeta 2 Píɛ 1 Bible Online

2 Píɛ 1 - Yambeta bible

2 Píɛ 1

¹Mɛ Sɛmɛyɔ́ɔŋ Píɛ, uʼkudin na mɔɔ́n o maʼtom o Yə́sus Kilíʼtus aa mbə́budílən nufuuʼ nóonɛ. Mbə́budílən pəŋi pá poágɛ́nɛ́ɛ́ oʼto na nyɔ́lɛ́ wɔnɔ́ pəsi. Náan alɛ kɛa kɛ́ kɛdám kɛ́ kɛbán a pəsi na pəŋi. Ayɛ́bɛyɛ́ɛ́lɛ náan lɛ́ alɛ agɛɛlɛ pɛbán a sáád, nyɔ́lɛ́ nyɔ́ alɛɛ́ Yə́sus Kilíʼtus, Táán wəəs na Ongɔɔyɛʼ wəəs.

²Táán áboyɛ́ɛlɛ kɔŋɛʼ, áaboyɛ́ʼkɛn tɛn kiwiiyiʼ a fug lɛ́ poáʼkomoólɛŋ, poáʼkolɛŋ tɛn Yə́sus Kilíʼtus, Sə́dúk wəəs.

³Táán, a toɛn tuə́ŋ, ayɛ́bɛyɛ́ʼkɛn nkə kiim kɛ́ kíəbiyúunən agɛɛlɛ lɛ́ tɛ́laa wɔnɔ́ ná alɛɛ́ anyɔ́ŋɛn. Ayɛ́bɛyɛ́ɛ́lɛ náan lɛ́ tiɛ́lɛŋɛn nyɔ́ ayɛ́bɛɛdɔ́ŋɔn lɛ́ tísiəd ngab a nugəm nuə́ŋ na a kɔdɛ́ɛ ɔʼtɛ́m kuə́ŋ.

⁴Náan aa ayɛ́bɛyɛ́ʼkɛn pɛa pɛ́ pisig pɛ́ piʼtóg pɛ́ moom pɛ́ ayɛ́bɛgágɛn lɛ́ aabɛyɛ́ʼkɛn agɛɛlɛ lɛ́ ná poágɛɛn na mólɛ́, póɔŋ ngab a ɔlaa ó Táán, póoman a pɛbán pɛ́ pɛbɛ́ pɛ́ nsí yɛ́ɛnɛ ɛlɛɛ́ anyɔ́ŋɛn, pɛbán pɛ́ pɛ́ayósag pɔɔd.

⁵Kólɛ́ aa, ndábodɛ́anɛ na pəŋi lɛ́, wɔnɔ́ ná poágɛ́nɛ́ɛ́ oʼto na Kilíʼtus, poágɔ́nɛgɛ lɛ́ pósáayɛ a nɛag oʼto nɛáŋan nɛ́ɛn, kɛɛlɛ kó pɛbán pɛ́laŋ. A ngim ɛ pɛbán pɛ́laŋ, pósáayɛ kuunə kolɛŋ nkə kɛ́ Táán alɛɛ́ anyɔ́ŋɛn.

⁶A ngim tɛn ɛ kolɛŋ nkə kɛ́ Táán alɛɛ́ anyɔ́ŋɛn, pósáayɛ kəə́siəd a nɛmɔɔd. A ngim tɛn yɛ́ɛy ɛ niə́siəd a nɛmɔɔd, pósáayɛ kəə́bis a kəə́liʼtiniʼ. A ngim ɛ kəə́bis a kəə́liʼtiniʼ, pósáayɛ kəə́siəd wɔnɔ́ ná Táán alɛɛ́ anyɔ́ŋɛn.

⁷A ngim igəə́siəd wɔnɔ́ ná Táán alɛɛ́ anyɔ́ŋɛn, pósáayɛ nnyɔ́ŋánán pəŋi na pəŋi, wɔnɔ́ pɔɔ́n pá niŋŋí. A nnyɔ́ŋánán yaaŋan yɛ́ɛy wɔnɔ́ pɔɔ́n pá niŋŋí, pósáayɛ nnyɔ́ŋánán na ungim.

⁸Taa, mandoŋá má pugódíí lɛ́ póɛn na mɔ́lɛ́ a móom aá. Puməʼkudəgi mandoŋá móom a kɛgaágadɛ kɛáŋan, kɛ́agɛɛlɛ lɛ́ podɛnjɛ́ɛ́n na ɔlɛáŋ, póɛlɛ agá pɛbán pɛ́laŋ. Kɛ́yɛɛlɛ tɛn lɛ́ póyám agolɛŋ kó Sə́dúk wəəs Yə́sus Kilíʼtus.

⁹Náa, nyɔ́ ɔdɛɔ́gɔ na mandoŋá móom, alɛ wɔnɔ́ mɔɔd nyɔ́ alɛɛ́ na woog, mɔɔd nyɔ́ əə́giim ə́duʼtum, yəə́bə́líni lɛ́ Táán əyímulísin mabɛ́ mə́ə́ŋ má kalaʼ.

¹⁰Kólɛ́ aa ndábodɛ́anɛ na pəŋi pomóŋŋí páam lɛ́ poágɔ́nɛgɛ kəə́bis a ngə́ yɛ́ɛy əguloodi lɛ́ Táán áa ayɛ́boodɔ́ŋɔn, əmə́əbuyíiyid tɛn. Pomaʼkɛɛlɛ náan, podɛndɛ́ɛ́ kudə́əŋ a kɔbɛ́.

¹¹Isuŋ ɛ́dɛɔ́gɔ, Táán alɛ́ɛ́ kubuúbuənin poangás, nɛsɔd nɛ́ a Nɛlaamɛʼ nɛ́ Sə́dúk wəəs na Ongɔɔyɛʼ wəəs Yə́sus Kilíʼtus alɛɛ́ kɔ nkúm a pɛnɛŋ piim.

¹²Kólɛ́ aa ndɛ́ɛ́ koboyáyɔ́ɔ́ŋɛnɛ pɛnɛŋ piim pɛbán pɛ́ɛb, ɔmbɔ́ ná polɛŋɛ́nɛ́ɛ́ pɛ́lɛ́ kalaʼ, puə́gumənən tɛn kɔ na toɛn a pasáád pá páyɛ́boyáʼkánánɛ.

¹³Náa, mɛ ndaafɛg lɛ́ kɛ́lɛ sáád lɛ́ mpoáyɔ́ɔ́ŋɛnɛ pɛbán pɛ́ɛb kɛnɛŋ kiim kɛ́ nkə́ligíí a ɔlaa, agɛɛlɛ lɛ́ pudinním ɛnɔ

¹⁴lɛ́ mbálɛŋ lɛ́ kugu kóam kúndigi laálá. Náan aa Sə́dúk wəəs Yə́sus Kilíʼtus əyíndoodi.

¹⁵Ndagɛɛlɛ anɛ́ɛ́n nkə kiim kɛ́ kíəgəə́yúunə agɛɛlɛ lɛ́ pólɛŋ pɛbán pɛ́ɛb lɛ́ ɔmbɔ́ mbə́gú, púdíin poáyɔ́ɔ́ŋanɛ pɛ́lɛ́ pɛnɛŋ piim.

¹⁶Ná tɛyɛ́bodɛánɛ lɛ́ Sə́dúk wəəs Yə́sus Kilíʼtus alɛ́ɛ́ kimbuúlini na toɛn tuim, kɛ́dɛʼkɛ́ɛ pɛbán kɛ́ tɛmáána kaanáán na nsiŋ yəəs wɔnɔ́ məʼtəən. Ndóo, kɛ́lɛ kɛbán kɛ́ tɛɛ́dála nugəm nuə́ŋ moááŋ na əngis yə́ə́s.

¹⁷Tɛyɛ́ɛ ondáŋ na nyɔ́lɛ́ ná Táán Sɛ ayɛ́moyɛ́ʼkɛn nugəm, amáamonyáadɛ. Kɛ́yásánɛ́ɛ́ a wɔɔ́s wó Táán nyɔ́ alɛɛ́ nugəm nó nómááyɛn nugəm nuim, yiísə́ə́ ɔnɔ́ na nyɔ́lɛ́: «Taa, nyóonɛ alɛ mɛ Mɔɔ́n wo ɔʼtɛ́m nyɔ́ kímíʼkə́mmi lɛ́ nyíiyid.»

¹⁸Nɛŋo nɛ́ɛn, pəsibáamɔɛ́d tɛyóób nɛ́lɛ́ níəgiim nísuu a mɔɛn ná tɛyɛ́ɛ na nyɔ́lɛ́ kɔ a oʼkon a mɔɛn, oʼkon wó ólɛɛ́ pulúʼkə́n pó Táán[1]

¹⁹Náan aa tiyə́líʼtíníí kɔŋɛʼ kɔŋɛʼ nkə kɛ́ palɔɛgɛʼ pɛbán pá Táán píísə́ə́ a kidíídí kɛ́ Kilíʼtus. Támáan ntóɛŋ kɔŋɛʼ kɔŋɛʼ, puób nkə kɛ́ɛg kɛ́ Píísə́ə́. Tɔgɛ́ɛ́ tóod tólɛ wɔnɔ́ ɛláam yɛ́ yáanom a mbin a kaadɛ súʼtə́ə́ koany koáyɛnɛ, pɔɔd pádɛ́ʼtɛganan. Kɛ́lɛ́ɛ́ kɛɛn a ntɛ́m yaaŋan əgín wɔnɔ́ a kɛnɛŋ kɛ́ ándɛ kisəə kɛ́ koany kɛ́ na oʼto na oʼto kíəgiim kɛ́dɛ́ɛmɛn.

²⁰Yoom ɛ́ na oʼto na oʼto yɛ́ pugódíí lɛ́ pólɛŋ aa yɛ́ɛnɛ ɛ́lɛɛ́ lɛ́: Nkə kɛ́ kɛ́lɛɛ́ kidiídílə́ a Kálaʼtaʼ ɛ Táán, nkə kɛ́ palɔɛgɛʼ pɛbán pá Táán píísə́ə́, mɔɔd ɔdɛɔ́gɔ ogoob a nsiŋ yəəŋ ɛ nyɔ́lɛ́nyɔ́amɔɛ́d, ɔdɛɔ́gɔ ogaáyásɛnɛn kɛ́lɛ́ a nyɔ́lɛ́nyɔ́amɔɛ́d.[2]

²¹Ndɛ əgusəə náan lɛ́, adɛ́njaŋ mɔɔd a nɛnyɔ́ŋɛn niə́ŋ áa ayɛ́ɛ yaáyɛ́ɛ́ŋɛn kolɔɛgɛ pɛbán pɛ́ Táán, Uŋun wó Ufúlúʼtú aa óyɛ́ɛ óboyɛ́ɛlɛ lɛ́ pɔ́sɔyɔ a niiŋ nɛ́ Táán.