Read Yambeta 2 Píɛ 2 Bible Online

2 Píɛ 2 - Yambeta bible

2 Píɛ 2

¹A kɛnɛŋ kɛ́ kalaʼ, pɔɔd pə́mmú pɛ́ɛ́lón a ndɛg yɛ Ɛ́sɛlayɛl, pə́əlígə pɔɔd lɛ́ pɔ́lɛ́ pálɛ palɔɛgɛʼ pɛbán pá Táán, Náan tɛn yoom ímuʼ aa pɔsɔ́g pə́mmú pálɛ́ɛ́ kodɛ́lɛmɛɛ́ a kɛgaágadɛ kɛáŋan, pɔ́nɔ́ pɔ́lɛ́ pálɛ pɛlág, ná pɔ́sɔ́dɛ tɔʼtilíin yɛ́ ɛdɛɔ́gɔ ɛ fɔ́lɔ́b. Pɔ́ɔsɔ́dɛ yɛ́lɛ́ na ngim na ngim, páagaaʼkananɛ pɛnyaʼ pɛ́ pɛ́lɛ́ɛ́ kunímií pɔɔd ngə́. Pɛlág pɛ́ pɛnyaʼ pɛ́ɛb pɛ́lɛ́ɛ́ kobod kuʼtəm kɛlág kɛmɔɛ́d kɛ́ kɛ́yɛ́boyááŋɛn a mabɛ́ mɔ́ɔ́bɔn. A niɛlɛ nɛɔ́bɔn nɛ́ɛn, pálɛ́ɛ́ kəə́súidin niwu nɛɔ́bɔn nɛ́ nɛándɛɛ́ kɔmɔɛ́d ndúmiʼ.

²Piíŋ áa pálɛ́ɛ́ kuyə́nií ɔlaa wɔ́ɔ́bɔn ó pinig wóow. Niə́siəd nɛɔ́bɔn nɛ́ɛn nɛ́lɛ́ɛ́ kɛɛlɛ lɛ́ pɔɔd pɔ́sɔyɔ kɔbɛ́ a kɛbán kɛ́ ngə́ yɛ́ɛnɛ yɛ́ ɛlɛɛ́ ngə́ ɛ sáád.

³Wɔnɔ́ ná ɔʼtɛ́m ó pɛlág pɛ́ɛb ólɛɛ́ agá a mɔɔnɛ́ kuunə, pálɛ́ɛ́ kubulígə na pisig pɛɔ́bɔn pɛ́ tɔgɛ́ɛ́ tó pɛnyaʼ. A pɔ́lɛ́, mbaasɔ́ yɔɔbɔn ɛlɛ ndónáán kalaʼ, niwu nɛɔ́bɔn nɛándɛ ndúmiʼ o!

⁴Kɛ́lɛ lɛ́, məŋun má maʼtom má máyɛ́ɛ́lɛ kɔbɛ́, Táán ədiʼkə́əsig mɔ́lɛ́, ayɛ́bodágɛ́dɛ a kɛnɔ kɛ́ ntɔ́b. Málɛ a kɛáŋ kɔ́gɔ́ɔg, a mbin ɛ mood a kaadɛ. Páabóŋan wɔɔ́s ó pɛyɔm.

⁵Áyɔ́ŋɛ́an tɛn lɛ́, ədiʼkə́əsig pɔɔd pá kalaʼ pá pádɛʼkólɛŋɛnɛɛ́ Táán. Yiídə́ə́ŋi kɛa kɛ́ noó kɛ́ kiɛ́mɛn nsí ngim, piim pá páyɛ́ɛ́lɛ kɔbɛ́ pááman kuwu. Əgín Nówə nyɔ́ ayɛ́ɛ agodɛ́ananɛ na pɔɔd lɛ́ pálaa a sáád áa Táán ɔyɔ́ɔ́yɛ, na pɔɔd tɛn pə́mmú páʼtáan na pábaan[3]

⁶Áyɔ́ŋɛ́an nsɔ́ɔ́ yɛ́ ayɛ́ʼkɛn na pɔɔd pá a Sodóom na Kɔmɔ́ɔl ná páyɛ́ɛ́lɛ kɔbɛ́. Yɛɛ́dómɛn pálɛ́ɛg yɛ́ɛy ɛ́baan yug, yááman kubusíŋini. Əgín mɔdɔ mɔ́lɛ́ na mɔ́lɛ́ aa mɛ́ɛ́lɔ́b. Yiílóódi a niɛlɛ nɛ́ɛn lɛ́ náan aa alɛ́ɛ́ kɛɛ́ʼkɛnɛɛ́ njəʼkə́nə́ní na ɔngɛɛlɛʼ kɔbɛ́ ungim[4]

⁷A kóonɛ lɛ́ ə́díin əsíŋini pálɛ́ɛg yɛ́ɛy ɛ́baan na yug, ayɛ́ɛ́lɛ lɛ́ Lóod nyɔ́ ayɛ́ɛ kɔ mɔɔd o sáád, nyɔ́lɛ́ nyɔ́ ɔʼtɛ́m wə́ə́ŋ óyɛ́ɛ agogany na ombod wó ɔlaa ó pinig wó pɔɔd pá a Sodóom na Kɔmɔ́ɔl páyɛ́ɛ alaa, álon, yɔ́ɔy[5]

⁸Kɛ́lɛ lɛ́, mɔɔ́s miim, sáád ɛ mɔɔd yɛ́ɛy yɛ́ ɛyɛ́ɛ alaa a kɛgaágadɛ kɛɔ́bɔn ɛyɛ́ɛ agodɛ́ʼtɛg nkə kiim kɛ́ páyɛ́ɛ agɛɛlanɛ, aágoob tɛn nkə kiim kɛ́ páyɛ́ɛ agosɔyɛla. Wɔnɔ́ ná nyɔ́lɛ́ ayɛ́ɛ sáád ɛ mɔɔd, pɛbán pɛ́ pinig pɛ́ɛb piim pɛ́ páyɛ́ɛ agɛɛlanɛ pɛ́yɛ́ɛ agomoyɛ́ʼkɛn ɔʼtɛ́m kogany kɛ́fɔlɛ́.

⁹Nkə kɛ́ɛg kiim kɛ́ kɛ́yáyɛ́lɛ́ɛ́ kalaʼ kióloodi lɛ́ pá páamoyóbɛn, Sə́dúk aálɛŋ wɔnɔ́ ná alɛɛ́ ogoboyááŋɛn agɛɛlɛ lɛ́ pádɛnnɛ́ ntɔ́b. Pá páagɛɛlanɛ kɔbɛ́ pɛnɛŋ piim, ə́əbuudi lɛ́ ná áboyɛ́ʼkɛn ntɔ́b a wɔɔ́s ó pɛyɔm.

¹⁰Alɛ́ɛ́ kolaŋ kɛɛ́ʼkɛn ntɔ́b na pá pə́əyə́ən pɛbán pɛ́ pinig pɛ́ pumog poɔ́bɔn pólɛɛ́ anyɔ́ŋɛn, pɔ́dɛɔ́sɔ́dɛ́ɛ́ Nɛlaamɛʼ nɛ́ Táán. Pɔɔd póob pálɛ na nɛnom, pɔ́dɛɔ́gɔɔ́sɔ́dɛ tɛn mɔɔd, pádɛ́adammana məŋun má málɛɛ́ na nugəm a mɔɛn, páadóga mɔ́lɛ́.

¹¹Kɔmɔɛ́d lɛ́ ɔmbɔ́ məŋun má maʼtom má málɛɛ́ na toɛn agaáyɛn pɔɔd póob, mɔ́lɛ́ mɔ́dɛɔ́sɔyɔ niiŋ nɛ́ məŋun má nugəm móom kɔbɛ́ a udi ó Sə́dúk.

¹²Náa pɔɔd póob pálɛ agɛɛlɛ pɔ́lɛ́báamɔɛ́d wɔnɔ́ ponyam pó kidun pó púʼkódií nsiŋ, pó pə́əgumən ná póóna. Pálɛ agodóga nkə kɛ́ pándɛŋɛnɛɛ́, pálɛ́ɛ́ kuwu tɛn wɔnɔ́ ponyam.

¹³Kɔbɛ́ kuim kó páyɛ́ɛ́lɛ́nɛ pɔsɔ́g, kólɛ́ɛ́ kubuyímbuúlini pɔ́lɛ́. Páágɛn ɔʼtɛ́m wɔ́ɔ́bɔn ungim agɛɛlanɛ əgín pɛbán pɛ́ pɛbɛ́ pɛ́ pumog poɔ́bɔn poányɔ́ŋɛn, páagɛɛlanɛ pɛ́lɛ́ na wɔɔ́s a oʼto. Kɛnɛŋ kɛ́ pálɛ agonɛ́ɛnɛ náan ondáŋ na pəŋi, kɛ́lɛ əgubugə́mmi pɔ́lɛ́, na pɛnyaʼ pɛɔ́bɔn. Kɔmɔɛ́d lɛ́ a pəŋi kɛ́lɛ oʼto kono náan kɛ́fɔlɛ́.

¹⁴Əngis yɔ́ɔ́bɔn álɛ əgín a pagɛ́ɛd kuunə lɛ́ ná pə́búlimən na pɔ́lɛ́. Pɔ́dɛɔ́gɔ agodɔm kɛɛlɛ kɔbɛ́. Pə́əlígə pá pádɛ́ʼkónɛ́ɛ́ a ngə́ ɛ Táán, pə́yibudə́əŋi a kɔbɛ́. Ɔʼtɛ́m wɔ́ɔ́bɔn ólɛanɛ əgín a mɔɔnɛ́ kuunə. A pɛbán pɛɔ́bɔn pɛ́ pɛbɛ́ pɛ́ɛb pɛ́ páagɛɛlanɛ, Táán ɔnɔ́: Tuúdudúú na pɔ́lɛ́!

¹⁵Pə́díin ngə́ ɛ sáád, pándɛ pənímə́ə́n. Pə́ndəyə́ən agá ngə́ ɛ Paláam, mɔɔ́n ó Pɔsɔ́ɔl, nyɔ́lɛ́ nyɔ́ əyə́líʼtíníí lɛ́ pámaʼkomoyɛ́ʼkɛn mɔɔnɛ́ áyɛɛlɛ kɔbɛ́.

¹⁶Náa, a kɔbɛ́ kó nyɔ́lɛ́ ɔndɔɛgɛʼ pɛbán o Táán ayɛ́ɛ́lɛ, pə́yímulóódi nsɔ́ɔ́ yəəŋ. Kɛ́lɛ lɛ́, Táán ayɛ́ɛ́lɛ lɛ́ jáʼkáas yɛ́ ɛdɛʼkɛ́ɛ agosɔyɔɔ́, ɛ́moósɔyɛdɛn na nɛŋo nɛ́ mɔɔd, yɔ́nɔ́: Tí kiyəg kɛáŋ kɛ́ɛg, odɛnyɛ́ɛ́lɛ kə́mmú[6]

¹⁷Pɔɔd póob pá páagaaʼkananɛ pɔsɔ́g pɛnyaʼ pálɛ wɔnɔ́ musim mó məní mó moáʼkoságɛ́ɛ́. Pálɛ tɛn wɔnɔ́ mbálámɔɛn yɛ́ imílígən náa noó noásán, núʼtə́əŋ. Táán əə́ʼkubusóbinini oʼkɔɔ a kɛnɔ kɛ́ kɛ́lɛɛ́ mbin na mbin. Mbin mmɔɛ́d ɛ mood.

¹⁸Pálɛ agosɔyɔ pɛa pɛ́ pɛdám pɛ́ tɔgɛ́ɛ́, nkə kɛ́laŋ kɛ́ pə́əsəə kɔ fiɛ́d. A ngə́ yɛ́ pɔɔd pálɛbɛ́dɛ́nɛ́ɛ́ a yɛ́lɛ́ aa pɔ́lɛ́ pɔ́ɔnɔ́bɛ pá póliogíníí pawa pawa a ondáŋ ó pá pə́ligíí a mbin lɛ́ ná pɛ́ɛlɛ wɔnɔ́ pɔ́lɛ́.

¹⁹Pálɛ əgusəə na pɔɔd lɛ́, páagɛɛn filí, kɔmɔɛ́d lɛ́ pɔ́lɛ́báamɔɛ́d pálɛ pɛɔ́lɛ́ pɛ́ kɔbɛ́ kó kóaboyósag, lɛ́ mɔɔd alɛ kɛɔ́lɛ́ kɛ́ yoom yɛ́ yáamoóʼkɔmɔn.

²⁰Pá pə́ʼkuliogií ongoo a pɛbán pɛ́ pinig pɛ́ a nsí yɛ́ɛnɛ lɛ́ páʼkolɛŋ Sə́dúk wəəs na Ongɔɔyɛʼ wəəs Yə́sus Kilíʼtus, náa pə́míʼkíni kəə́di lɛ́ pɛbán pɛ́ɛb píiʼkini koboónyɔŋ, oʼtɛ́lɛm wɔ́ɔ́bɔn wə́əgiiʼkini kɔyɛb agaáyɛn wó páyɛ́ɛ a wólɛ́ kalaʼ

²¹lɛ́ kɛ́mɛ́ɛ agɛɛn kɔŋɛʼ na pɔ́lɛ́ lɛ́ pádɛnjág kolɛŋ ngə́ ɛ sáád, agosan lɛ́ pálɛŋ yɛ́lɛ́, ná píiʼkini kudum ngim na yɛ́lɛ́, pə́diiʼkíni kuyə́ən kɛcɛm kɛ́ Táán kɛ́ páyɛ́boyáʼkánánɛ.

²²Nkə kɛ́ kɛ́yɛ́bobóan kióloodi lɛ́ nkə kɛ́ píísə́ə́ a nsab yɛ́ɛnɛ, kɛ́lɛ fɔ́lɔ́b. Nsab ɛgo ɛlɛ əgusəə yɔ́nɔ́: «Mbo ɛlɛ agonɛ kə́mmú tɔnɔd tuə́ŋ[7]» Na yimmú tɛn yɛ́ɛnɛ yɛ́ yəə́səə yɔ́nɔ́: «Ŋŋɔnɛá ɛlɛ lɛ́, əgín páaman komoósoga, ɛ́ság kiiʼkini kɛɛn ɔgɔɔ́dɔb a ɔnnyɛŋ.»