Read Yambeta 2 Píɛ 3 Bible Online

2 Píɛ 3 - Yambeta bible

2 Píɛ 3

¹Pɔsɔ́sɔ́g páam pá ɔʼtɛ́m, nufuuʼ nóam nó annam ábaan áa nóonɛ ndə́buúdilən. A tufuuʼ tóam tóod tuim tóbaan, ndɛ agoboáyɔ́ɔ́ŋɛnɛ əgín nkə kɛ́ páyɛ́boyáʼkánánɛ agɛɛlɛ lɛ́ póɛn a ntɛ́m yaaŋan a kaadɛ na mafɛgaʼ má málɛɛ́ sáád.

²Áyɔ́ŋɛ́an nkə kɛ́ pəfúlúʼtú palɔɛgɛʼ pɛbán pá Táán píísə́ə́ kalaʼ. Poáyɔ́ɔ́ŋɛ tɛn kɛcɛm kɛ́ Sə́dúk wəəs na Ongɔɔyɛʼ wəəs. Kɛ́lɛ kɛcɛm kɛ́ pɔɔ́n pááŋan pá maʼtom páyɛ́bosánɛ́nɛ.

³Nkə kɛ́ na oʼto na oʼto kɛ́ pugódíí lɛ́ pólɛŋ aa kɛ́ɛnɛ kɛ́lɛɛ́ lɛ́: A mədúg má a nɛman, pɔɔd pálɛ́ɛ́ kiim, páalaa əgín a nɛ́ pɛbán pɛ́ pɛbɛ́ pɛ́ ɔʼtɛ́m wɔ́ɔ́bɔn wáanyóŋɛnɛla. Pálɛ́ɛ́ koboónyɛɛŋanɛ,

⁴pɔ́ɔsɔyɔ pɔ́nɔ́: «Adɛ́ Yə́sus Kilíʼtus yiísə́ə́ lɛ́ nyɔ́lɛ́ əgimbuúlini ə́? Náa alɛ ə́lə́ə́ anɛ́ɛ́n ə́? Pasɛ pə́ə́s[8] pə́ʼkuguə́ʼkən, yoom yiim íligi əgín wɔnɔ́ ná Táán ayɛ́ɛ́lɛ nsí, tuə́ ə́!»

⁵Náa, yoom ɛ́lɛ kɔ yɛ́ pálɛɛ́ əgəə́bəli a kɛsɛ́n. Kɛ́lɛ lɛ́: Kɔ́gɔ́ɔg kalaʼ, Táán yɛɛ́sɔ́yɛd əgín na nɔgɛ́ɛ́ nuə́ŋ nó unuʼ, nsí yaáság kaáyɛ́ɛlɛ, mbálámɔɛn tɛn ɛmáyɛ́lɛ́ɛ́. Na məní aa Táán ayɛ́ɛ́lɛ nsí, aáság kaádɛn lɛ́ məní ndɛ́ŋ, nsí ndɛ́ŋ.

⁶Na məní, a noó nó yiídə́ə́ŋi, nuə́yə́ə́gən a nsí ngim aa, yiíwííyi tɛn nsí ɛ kalaʼ[9]

⁷A kɛ́ kɛ́lɛɛ́ kɛ́ mbálámɔɛn ɛ nɛ́goŋ na nsí ɛ nɛ́gɔŋ, əgín tɛn a nɔgɛ́ɛ́ nuə́ŋ nóon aa əgə́sigíníí mólɛ́ lɛ́ yug ɛ́lɛ́ɛ́ koman kusíŋini. Əəbuúsigə súʼtə́ə́ a wɔɔ́s ogo ó pɛyɔm wóow, wɔɔ́s wó pá pándɛŋɛnɛɛ́ Táán pálɛ́ɛ́ kuwúú.

⁸Náa, pəŋi pɔsɔ́sɔ́g páam pá ɔʼtɛ́m, yoom ɛ́lɛ kɔ yɛ́ puʼkódií lɛ́ puə́bəli. Ɛgo aa yɛ́ɛnɛ ɛ́lɛɛ́ lɛ́: A əngis á Sə́dúk, wɔɔ́s úmmuʼ ólɛ wɔnɔ́ tɔ́ɔ́sɛn ɛ pɛag, tɔ́ɔ́sɛn tɛn ɛ pɛag wɔnɔ́ wɔɔ́s úmmuʼ[10]

⁹Pɔɔd pə́mmú pálɛ əgusəə lɛ́ Sə́dúk alɛ ayɛ́ɛn kɛɛlɛ nkə kɛ́ yɛɛ́gágɛn pɔɔd lɛ́ agɛɛlɛ. Ndóo, adɛ́njaŋ náan aa kɛ́lɛɛ́. Sə́dúk ɔdɛɔ́gɔ ayɛ́ɛn, alɛ agá agobonóʼtan lɛ́ adɛányɔ́ŋɛn lɛ́ ná úmmuʼ na úmmuʼ oólíóŋ. Alɛ anyɔ́ŋɛn agá lɛ́ ungim ágasɛ ɔlaa.

¹⁰Wɔɔ́s wó Sə́dúk alɛ́ɛ́ kimbuúlinií ólɛ́ɛ́ kiim ólon kiʼpus wɔnɔ́ ná ándɛ ungiíbən əə́búbi pɔɔd. A wɔɔ́s ogo wóow, mbálámɔɛn ɛlɛ́ɛ́ kəə́fúgid na toɛn, ná ísə́ngilid. Moom muim mó mólɛɛ́ kɔ́gɔ́ɔg a mɔɛn mólɛ́ɛ́ koman kusúiŋ a yug. Táán alɛ́ɛ́ koyɔmɛ nsí na moom muim mó mólɛɛ́ kɔ.[11]

¹¹Wɔnɔ́ ná kɛ́lɛɛ́ anɛ́ɛ́n náan lɛ́ moom muim mólɛ́ɛ́ kuwu, pólɛŋ anɛ́ɛ́n koob tuə́ áa pugódíí lɛ́ póɛlɛ! Pugóódi kəə́siəd kɔŋɛʼ a udi ó Táán, pugóódi lɛ́ pómonyáadɛ.

¹²Póbóŋaan nimbuúlini nɛ́ Táán, poágɔ́nɛgɛ kɛɛlɛ lɛ́ wɔɔ́s wə́bisig kiim. Wɔɔ́s wóow, Táán alɛ́ɛ́ kɛɛlɛ lɛ́ yug ɛ́man kogɔ́lɔnɛ mbálámɔɛn. Moom muim mó mólɛɛ́ kɔ mólɛ́ɛ́ koman kusə́ngilid na yug yɛ́ɛy, ɔmbɔ́ ímuʼ ɛ́dɛndɛ́ɛ́ kolɔb.

¹³Náa, Táán ayɛ́bɛgágɛn lɛ́ nyɔ́lɛ́ alɛ́ɛ́ kɛɛlɛ mbálámɔɛn yɛ́ ngwa, na nsí yɛ́ ngwa[12] Kɔ́gɔ́ɔg, əgín pɛbán pɛ́ sáád áa pɛ́lɛ́ɛ́ kaáyɛ́lɛɛ́. Táá, nkə kɛ́ tɛlɛɛ́ agobóŋan a kɛ́ɛg.

¹⁴Kólɛ́ aa ndáabodɛ́anɛ na pəŋi pɔsɔ́sɔ́g páam lɛ́, wɔnɔ́ ná polɛ́ɛ́ agobóŋan wɔɔ́s ogo wóow wó Sə́dúk alɛ́ɛ́ kimbuúlini, ágɔ́nɛ́gɛ́an na toɛn toáŋan tuim agɛɛlɛ lɛ́ óboóboan polɛ Sálábádábádá a əngis á Táán, fiɛ́d na ɛgom a nkó yaaŋan, ntɛ́m tɛn yaaŋan wiiy a kaadɛ.

¹⁵Áyágɛ́an a oʼto lɛ́: Sə́dúk wəəs alɛ əgín agobonóʼtan náan kɛ́fɔlɛ́ lɛ́ ná áboyɔ́ɔyɛ. Kɛ́lɛ́ kɛ́go aa móŋŋí wəəs na sɔ́sɔ́g wəəs Póol ayɛ́bodɛánɛ a tufuuʼ tó əyíbudílən a nsiŋ yɛ́ Táán ayɛ́moyɛ́ʼkɛn.

¹⁶Əgín náan aa alɛɛ́ agosɔyɛla a tufuuʼ tuə́ŋ tuim kɛnɛŋ kɛ́ alɛɛ́ əgusəə kɛbán kɛ́ɛg kɛ́ nimbuúlini nɛ́ Sə́dúk. Pɛbán pímmú pɛ́lɛ kɔ a tufuuʼ tuə́ŋ pɛ́ pɛágány koob. Náan aa pɔɔd pá póʼkódií nsiŋ, pá pádɛ́ʼkónɛ́ɛ́ a kəə́liʼtiniʼ pálɛɛ́ agogasanɛ pɛ́lɛ́, wɔnɔ́ ná pálɛɛ́ agɛɛlanɛ na pɛnɔ tɛn pímmú a Kálaʼtaʼ ɛ Táán. A niɛlɛ nɛɔ́bɔn nɛ́ɛn, pálɛ agaáyóon pɔ́lɛ́báamɔɛ́d.

¹⁷Pəŋi pɔsɔ́sɔ́g páam pá ɔʼtɛ́m, táá mbaŋ áa yɛ́ɛy mbáboyáágánan. Álɛ́ŋɛ́an anɛ́ɛ́n óo! Pudiyə́díí lɛ́ pɔɔd pá páagɛɛlanɛ kɔbɛ́ páboónanɛ ngə́ na masɛd mɔ́ɔ́bɔn ná póʼtiɛngɛlɛd a oʼtɛ́lɛm wó ɔnnasáŋ wó pugódíí a Táán.

¹⁸Ə́gumə́nə́níən na Sə́dúk wəəs Yə́sus Kilíʼtus na toɛn, nyɔ́lɛ́ nyɔ́ alɛɛ́ tɛn Ongɔɔyɛʼ wəəs lɛ́ ná pómoólɛŋ kə́mmú agaáyɛn náan, áaboyɛ́ɛlɛ tɛn kɔŋɛʼ agaáyɛn náan. Tɛ́moyɛ́ʼkɛnaan nugəm nɛ́goŋ yɛ́ɛnɛ na a pɛnɛŋ piim! Aamɛn.