Read Yambeta 1 Sɛ́aŋ 1 Bible Online

1 Sɛ́aŋ 1 - Yambeta bible

1 Sɛ́aŋ 1

¹Nkə kɛ́ tɛyóób nyɔ́ ayɛ́ɛ aándɛ kɔ a niə́bə́ə[1] ɔɔ́sɔyɔ, nkə kɛ́ tɛɛ́dála na əngis yə́ə́s, kɛ́ tɛɛ́lɛ́ŋ komaʼkanɛ, tɛɔ́dɔ́bɔ na ɔmbɔg yə́ə́s, kɛ́lɛ kɛbán kɛ́ nɔgɛ́ɛ́ nó ɔlaa.

²Ɔlaa wóow aa Táán ayɛ́ɛ́lɛ lɛ́ wóloodi, tɛádála wólɛ́, tɛlɛ agodɛ́lɛmɛn wólɛ́ mbaasɔ́. Kólɛ́ aa tɛlɛɛ́ agoboólaamɛnɛ ɔlaa ó pɛnɛŋ piim wó óyɛ́ɛ a ɛbá yɛ́ Mbáa, náa aáʼkolɛŋ kɛbɛmoáŋɛnɛɛ́ wólɛ́[2]

³Nkə kɛ́ɛg kɛ́ tɛɛ́dála, tɛmáyoob, kɛ́lɛ́ kɛ́go aa tɛlɛɛ́ agoboólɔɛgɛnɛ na pəŋi tɛn agɛɛlɛ lɛ́ pəŋi tɛn póɛn paladáán unuʼ úmmuʼ na pəsi. Unuʼ wə́ə́s úmmuʼ wóow ólɛ lɛ́: Tɛlɛ unuʼ úmmuʼ na Mbáa, unuʼ tɛn úmmuʼ na Mɔɔ́n wəəŋ Yə́sus Kilíʼtus.

⁴Mbə́budílən pɛbán pɛ́ɛb agɛɛlɛ lɛ́ tɔnyɔ́g tuə́s tó pəsi piim[3] tóɛn a kúfuʼ.

⁵Tɔsɔm tó tɛyóób na Yə́sus aa tóonɛ tɛlɛɛ́ agoboólɔɛgɛnɛ. Kɛ́lɛ lɛ́: Táán alɛ kɛmoámoáŋ, mbin ɛdɛɔ́gɔ na nyɔ́lɛ́.

⁶Timəʼkusəə tɛɔʼkɔ́ tɛlɛ paladáán na Táán náa tɛlɛɛ́ agodáŋana a mbin, timə́lígə́ə́, sáád ɛdɛɔ́gɔ a nkə kɛ́ tɛlɛɛ́ agɛɛlɛ.

⁷Náa, tɛmaʼkolaa ɔlaa wó a kɛmoámoáŋ wɔnɔ́ ná Táán nyɔ́lɛ́nyɔ́amɔɛ́d alɛɛ́ a kɛmoámoáŋ, áay lɛ́ pəsi na pəsi tɛlɛ unuʼ úmmuʼ, maŋɔ́ má Mɔɔ́n wəəŋ Yə́sus Kilíʼtus mámábɛsɔ́gɛn mabɛ́ miim.

⁸Timəʼkusəə tɛɔʼkɔ́ tiʼkóodi mabɛ́, timə́lígə́ə́ pəsibáamɔɛ́d. Sáád tɛn ɛdɛɔ́gɔ na pəsi.

⁹Náa, timəʼkəə́liʼtini mabɛ́ mə́ə́s a əngis á pɔɔd, Táán əəbiílisin mɔ́lɛ́, əəbifúŋi lɛ́ nyɔ́lɛ́ alɛ sáád, adɛágasɛ tɛn unuʼ a nkə kɛ́ əə́səə[4]

¹⁰Timəʼkusəə tɛɔʼkɔ́ tɛdɛɔ́gɔ pɛɛlɛ mabɛ́, tiə́səə anyóon lɛ́ Táán alɛ na pɛnyaʼ, Tɔgɛ́ɛ́ tuə́ŋ tɛn tódɛɔ́gɔ na pəsi.