Read Yambeta 1 Sɛ́aŋ 2 Bible Online

1 Sɛ́aŋ 2 - Yambeta bible

1 Sɛ́aŋ 2

¹Pɔɔ́n, ndɛ əgubuúdilən pɛbán pɛ́ɛnɛ lɛ́ ná podɛnjɛ́ɛ́lɛ kɔbɛ́. Náa, mɔɔd əməʼkudə́əŋ a kɔbɛ́, tɛ́lɛŋaan lɛ́ tigóódi ɔngaamɛnɛn[5] a udi ó Paabá. Yə́sus Kilíʼtus, sáád ɛ mɔɔd aa alɛɛ́ ɔngaamɛnɛn ogo nyóon.

²Nyɔ́lɛ́ aa ayáyɛ́ʼkɛ́nɛ́ɛ́ wɔnɔ́ idúg ɛ́ kɛfɔny agɛɛlɛ lɛ́ Táán ə́biílisin mabɛ́ mə́ə́s[6] Adɛ́njaŋ əgín mə́ə́s, ə́lisin tɛn má ungim nyɔ́ a nsí.

³A nɛɛ́ngɛg nɛ́ tɛágɛɛ́ngɛg pɛcɛm piə́ŋ áa tióloodi lɛ́ tɛmámoólɛ́ŋ.

⁴Mɔɔd nyɔ́ əə́səə ɔnɔ́: «Mbámoólɛ́ŋ», náa adɛágɛɛ́ngɛgɛɛ́ pɛcɛm piə́ŋ, nyóon alɛ na pɛnyaʼ, fɔ́lɔ́b ɛdɛɔ́gɔ na nyɔ́lɛ́.

⁵Náa, nyɔ́ alɛɛ́ əguyə́ən nkə kɛ́ alɛɛ́ əgusəə, nyóon aa alɛɛ́ anyɔ́ŋɛn fɔ́lɔ́b Táán. Táá nkə kɛ́ kíoloodi lɛ́ fɔ́lɔ́b tɛlɛ paladáán na Táán áa kɛ́ɛg.

⁶Nyɔ́ ɔnɔ́ nyɔ́lɛ́ alɛ alaa ondadáán na Yə́sus, nyóon ogóódi lɛ́ ə́yə́ən ongoo wə́ə́ŋ.

⁷Pɔɔ́n pá mbáa, kɛcɛm kɛ́ɛnɛ kɛ́ ndɛɛ́ əgubuúdilən kɛ́dɛɔ́gɔ kɛcɛm kɛ́ kɛ́lɛɛ́ kɛwa. Kɛ́lɛ kɛcɛm kɛ́ poálɛŋ kalaʼ[7] Poyóób kɛ́lɛ́ əgín kɔ a kɛnɛŋ kɛ́ puyə́bə́ə́líí koob Tɔsɔm tó Táán. Kɛcɛm kɛ́go kɛ́ɛg kɛ́ kalaʼ aa kɛ́ɛnɛ kɛ́lɛɛ́ Tɔsɔm tó poyóób.

⁸Ɔmbɔ́ náan, kɛcɛm kɛ́ɛnɛ kɛ́ ndɛɛ́ əgubuúdilən, kɛ́lɛ kɛwa. Kímólódíí a ɔlaa ó Yə́sus Kilíʼtus na a ɔlaa wááŋan tɛn. Kɛ́lɛ lɛ́, mbin yaándaaman, kɛmoámoáŋ kɛ́ fɔ́lɔ́b kɛándaanom.

⁹Nyɔ́ əə́gəə́səə lɛ́ nyɔ́lɛ́ alɛ a kɛmoámoáŋ, nyɔ́lɛ́ ogo úmmuʼ aábɛnɛn móŋŋí wəəŋ, nyóon əligi a mbin a kaadɛ sɔɔd.

¹⁰Nyɔ́ alɛɛ́ anyɔ́ŋɛn móŋŋí wəəŋ, nyóon alɛ a kɛmoámoáŋ, oʼkóodi kə́mmú yoom na yoom yɛ́ yə́əmudə́əŋi.

¹¹Náa, nyɔ́ aábɛnɛn móŋŋí wəəŋ, nyóon alɛ a mbin a kaadɛ sɔɔd. Nkə kiim kɛ́ alɛɛ́ agɛɛlɛ kɛ́lɛ a mbin. Ɔdɛɔ́gɔ agolɛŋ ə́lə́ə́ áa alɛɛ́ agɛɛn lɛ́ əngis yə́ə́ŋ álɛ əsúʼkínə́ə́n a mbin.

¹²Pɔɔ́n páam, ndɛ əgubuúdilən agobodɛ́anɛ lɛ́ a nkə kɛ́ Kilíʼtus ayɛ́ɛ́lɛ aa Táán əmə́bulísin mabɛ́ mááŋan.

¹³Pəŋi pasɛ páam, mbə́budílən agobodɛ́anɛ nyɔʼkɔ́: «Pəŋi poálɛŋ nyɔ́ ayɛ́ɛ əgín kɔ a niə́bə́ə ná nsí ɛdɛ́njásaŋ[8]» Pəŋi panyɔmmɔ́n na pabódóm, mbə́budílən tɛn pəŋi agobodɛ́anɛ nyɔʼkɔ́: «Poɛ́nyɔ́ŋ Sáʼtan, Ɔmbɛ́ nyóon.»

¹⁴Ɛɛ́ɛ, pəŋi pɔɔ́n páam, mbə́budílən agobodɛ́anɛ lɛ́: «Poálɛŋ Mbáa.» Pəŋi pasɛ páam, mbə́budílən agobodɛ́anɛ lɛ́: «Pəŋi poálɛŋ nyɔ́ ayɛ́ɛ kɔ əgín a niə́bə́ə ná nsí ɛdɛ́njásaŋ.» Pəŋi panyɔmmɔ́n na pabódóm, mbə́budílən tɛn pəŋi agobodɛ́anɛ lɛ́: «Polɛ panasáŋ, poɛ́ngɛ́gɛn Tɔsɔm tó Táán, poɛ́nyɔ́ŋ tɛn Ɔmbɛ́ nyóon.»

¹⁵Podɛnjáág ɔʼtɛ́m a nsí yɛ́ɛnɛ na a moom muim mó mólɛɛ́ kɔ. Mɔɔd amaʼkaag ɔʼtɛ́m a nsí, adɛágɛɛn kə́mmú na ɔʼtɛ́m na Paabá

¹⁶lɛ́ pɛbán pɛ́ a nsí pɛ́ɛnɛ pɛ́ pɛ́lɛɛ́ lɛ́: Kuyə́ən nkə kɛ́ pumog pólɛɛ́ anyɔ́ŋɛn, kaag kó əngis a moom lɛ́ ná yiim yɛ́ɛn əgín na wɛ, kəə́gidən a igog a tugúm tó a nsí, pɛbán pɛ́ɛb pɛ́dɛɔ́gɔ pɛbán pɛ́ píəgiim a nó Táán. Pɛ́lɛ pɛbán pɛ́ a nsí.

¹⁷Ɛɛ́ɛ, nsí yaándaaman ó! Nkə tɛn kiim kɛ́ tɛágɛ́nɛ́ɛ́ ɔʼtɛ́m a kɛ́lɛ́ kɛándaaman. Náa, nyɔ́ alɛɛ́ agɛɛlɛ nɛnyɔ́ŋɛn nɛ́ Táán, nyóon aalaa a pəliə́g.

¹⁸Pɔɔ́n páam, taa nɛman aa nɛ́ɛnɛ nɛándɛɛ́ kɔ! Poyóób pə́əsəə lɛ́ nyɔ́ alɛ́ɛ́ kɔnɔɛyɛɛ́ Kilíʼtus alɛ́ɛ́ kiim. Ɛɛ́ɛ, piíŋ pá páamoónɔɛyɛ pándɛ kɔ nɛ́gɔŋ. Táá nkə kɛ́ kímə́bilóódi moááŋ lɛ́ nɛman aa nɛ́ɛnɛ nɛándɛɛ́ kɔ[9]

¹⁹A ondáŋ wə́ə́s áa panɔɛyɛʼ Kilíʼtus póob páálón. Náa, pádɛʼkɛ́ɛ póonɛ lɛ́ pɛ́ɛn fɔ́lɔ́b a ondáŋ wə́ə́s, ndóo. Páyɛ́ɛnɛn pá pálɛɛ́ a ondáŋ wə́ə́s ná pə́ligi na pəsi. Náa, kíígóodi lɛ́ kióloodi moááŋ lɛ́ ɔmbɔ́ úmmuʼ a ondáŋ wɔ́ɔ́bɔn adɛʼkɛ́ɛ wə́ə́s.

²⁰Náa a pəŋi, Kilíʼtus ayɛ́boyɛ́ʼkɛn Uŋun wó Ufúlúʼtú a ombod wóonɛ lɛ́ poálɛŋ nkə kiim[10]

²¹Nga mbə́budílən, adɛ́njaŋ lɛ́ pondɛŋɛn fɔ́lɔ́b ɛgo, ndóo. Náa, a oʼto wóonɛ lɛ́ mbálɛŋ lɛ́ poálɛŋ áa mbə́budílən. Poálɛŋ tɛn lɛ́ kɛnɔ kɛ́ fɔ́lɔ́b ɛlɛɛ́, pɛnyaʼ pɛ́dɛɔ́gɔ kɔ.

²²Mɔɔd o pɛnyaʼ anyóon ánɛ? Mɔɔd o pɛnyaʼ aa nyóonɛ alɛɛ́ nyɔ́ ɔnɔ́ Yə́sus ɔdɛɔ́gɔ Kilíʼtus. Taa nyɔ́lɛ́ nyóon aa alɛɛ́ agonɔɛyɛ Kilíʼtus, nyɔ́lɛ́ nyɔ́ əə́ʼtəm Sɛ na Mɔɔ́n.

²³Kɛ́lɛ lɛ́, nyɔ́ əə́ʼtəm Mɔɔ́n, nyóon oʼkóodi tɛn Sɛ. Nyɔ́ alɛ́ɛ́ kolɛŋɛɛ́ lɛ́ Mɔɔ́n áa nyóonɛ, nyóon tɛn aa alɛɛ́ na Sɛ[11]

²⁴A pəŋi, pugóódi lɛ́ poɛ́ngɛg a ntɛ́m yaaŋan, nkə kɛ́ poyóób əgín kɔ́gɔ́ɔg a niə́bə́ə. Nkə kɛ́ɛg kɛ́ poyóób əgín kɔ́gɔ́ɔg a niə́bə́ə kɛ́maʼkolɔb a ntɛ́m yaaŋan, pəŋi tɛn poagɛɛn paladáán na Mɔɔ́n, póyɛɛn tɛn paladáán na Sɛ.

²⁵Táá nkə kɛ́ Kilíʼtus nyɔ́lɛ́nyɔ́amɔɛ́d ayɛ́bɛgágɛn a kɛ́ɛg. Kɛ́go aa kɛ́ɛnɛ kɛ́lɛɛ́ ɔlaa ó pɛnɛŋ piim.

²⁶Taa, nkə kɛ́ nyiísə́ə́ lɛ́ ndəbuúdilən a kɛ́lɛ́ aa kɛ́ɛg a kɛbán kɛ́ɛnɛ kɛ́ pá pálɛɛ́ anyɔ́ŋɛn lɛ́ páboónanɛ ngə́.

²⁷A pəŋi, kídíəguunə lɛ́ páboyáʼkananɛ yoom na yoom. Pugóódi Uŋun wó Kilíʼtus ayɛ́boyɛ́ʼkɛn. Kɛ́lɛ lɛ́, Uŋun wóow wó ayɛ́boyɛ́ʼkɛn, ólɛ agoboyáʼkananɛ piim. Ólɛ agoboyáʼkananɛ pafɔ́lɔ́b, ódɛɔ́gɔ na pɛnyaʼ. Pólɔb anɛ́ɛ́n paladáán na Kilíʼtus wɔnɔ́ ná óyɛ́boyáʼkánánɛ.

²⁸Náan anɛ́ɛ́n pɔɔ́n páam, pugóódi lɛ́ púləndin paladáán na Kilíʼtus agɛɛlɛ lɛ́ a nimbuúlini niə́ŋ, tɛdɛʼtámmána kɛɛn a udi wə́ə́ŋ, tiə́lis fiɛ́d na oʼto kono, tɛndɛɔ́ndɛ́ɔn.

²⁹Wɔnɔ́ ná poálɛŋ lɛ́ nyɔ́lɛ́ alɛ sáád, lɛŋáan tɛn lɛ́ ungim nyɔ́ alɛɛ́ agɛɛlɛ nkə kɛ́ kɛ́lɛɛ́ sáád alɛ mɔɔ́n o Táán.