Read Yambeta 1 Sɛ́aŋ 3 Bible Online

1 Sɛ́aŋ 3 - Yambeta bible

1 Sɛ́aŋ 3

¹Kóʼkóó! Táláan ombod wó nnyɔ́ŋánán wó Paabá amábɛnyɔ́ŋɛn ə́! Nnyɔ́ŋánán yəəŋ ɛlɛ a ombod wó amɛ́ɛ́lɛ lɛ́ tíɛn pɔɔ́n pá Táán[12] Tɛ́lɛŋ tɛn fɔ́lɔ́b náan lɛ́ tɛlɛ pɔɔ́n pə́ə́ŋ. Nkə kɛ́ kɛ́agɛɛlɛ lɛ́ pɔɔd pá a nsí yɛ́ɛnɛ pádɛɛ́bɛɛ́lɛ́ŋ áa kɛ́ɛg lɛ́ pɔ́lɛ́ pándɛŋɛn Táán.

²Pɔɔ́n pá mbáa, pəsi tɛándɛ nɛ́gɔŋ yɛ́ɛnɛ pɔɔ́n pá Táán. Kɛ́lɛ agá lɛ́ ədínjə́biíloodi moááŋ wɔnɔ́ ná tɛlɛ́ɛ́ kɛɛnɛɛ́. Nkə kɛ́ tɛlɛɛ́ palɛŋáán kɛ́lɛ lɛ́, ná Kilíʼtus alɛ́ɛ́ kimbuúlini, tɛlɛ́ɛ́ kɛɛn wɔnɔ́ nyɔ́lɛ́ lɛ́ tɛlɛ́ɛ́ komoodála əgín náanɛ moááŋ wɔnɔ́ ná alɛɛ́.

³Ungim nyɔ́ alɛɛ́ agomɛna pɛda na Kilíʼtus lɛ́ alɛ́ɛ́ kɛɛn wɔnɔ́ nyɔ́lɛ́, əmə́fúŋíí wɔnɔ́ ná Kilíʼtus nyɔ́lɛ́nyɔ́amɔɛ́d alɛɛ́ ufúŋiə́n.

⁴Ungim nyɔ́ aágɛɛlanɛ kɔbɛ́ ɔdɛɔ́gɔ agɛɛ́ngɛg pɛcɛm pɛ́ Táán anyóon. Kɛ́lɛ lɛ́, omaʼkɛɛlɛ kɔbɛ́, wəə́də́ə́ŋ kɛcɛm kɛ́ Táán.

⁵Náa, poálɛŋ lɛ́ Kilíʼtus əyíím a nsí yɛ́ɛnɛ lɛ́ ná óliogi mabɛ́ mə́ə́s má pəsi pɔɔd[13], nyɔ́lɛ́ nyɔ́ kɔbɛ́ kódɛɔ́gɔ na nyɔ́lɛ́.

⁶Kólɛ́ aa kɛ́lɛɛ́ lɛ́, ungim nyɔ́ alɛɛ́ ondadáán na nyɔ́lɛ́, unuʼ úmmuʼ na nyɔ́lɛ́, ɔdɛɔ́gɔ ugiiʼkini kɛɛlɛ kɔbɛ́ kə́mmú. Nyɔ́ alɛɛ́ agɛɛn əgín yuudi na kɛɛlɛ kɔbɛ́, nyóon oóloodi lɛ́ adɛmodálan, adɛmoólɛŋɛn tɛn.

⁷Mɔɔd ədiíbulígə, pɔɔ́n! Mɔɔd ungim nyɔ́ alɛɛ́ agɛɛlanɛ nkə kɛ́ kɛ́lɛɛ́ sáád, nyóon alɛ sáád ɛ mɔɔd wɔnɔ́ ná Kilíʼtus alɛɛ́ sáád.

⁸Náa, nyɔ́ alɛɛ́ agɛɛn yuudi na kɛɛlɛ kɔbɛ́, nyóon alɛ wo Omɔlɛɔ́g lɛ́ əgín kɔ́gɔ́ɔg a niə́bə́ə, Omɔlɛɔ́g alɛ lɛ́ alɛ ɔngɛɛlɛʼ kɔbɛ́. Táá oʼto ó kɛbán wó Mɔɔ́n o Táán əyíím a wólɛ́ aa wóow a nsí yɛ́ɛnɛ əgiim əwíiyi pigólí pɛ́ Omɔlɛɔ́g.

⁹Ungim nyɔ́ əə́ʼkəə́bíənií na Táán ɔdɛɔ́gɔ ugiiʼkini kɛɛlanɛ kɔbɛ́ kə́mmú lɛ́ masám má ɔlaa ó Táán mándɛ na nyɔ́lɛ́. Ɔdɛɔ́gɔ ugiiʼkini kɛɛn kə́mmú yuudi na kɛɛlɛ kɔbɛ́ lɛ́ əə́ʼkəə́bíən na Táán.

¹⁰Nkə kɛ́ kióloodi moááŋ lɛ́ pɔɔ́n pá Táán áa póonɛ, pá Omɔlɛɔ́g áa póob, kɛ́lɛ lɛ́: Nyɔ́ ɔdɛɔ́gɔ agɛɛlɛɛ́ pɛbán pɛ́ pɛ́lɛɛ́ sáád, ɔdɛɔ́gɔ mɔɔ́n ó Táán, ɔmbɔ́ tɛn nyɔ́ ɔdɛɔ́gɔ na nnyɔ́ŋánán na pomóŋŋí.

¹¹Kɛ́lɛ lɛ́, nkə kɛ́ poyóób əgín kɔ a niə́bə́ə nɛáŋan aa kɛ́ɛnɛ kɛ́lɛɛ́ lɛ́: Tɛ́nyɔ́ŋanan pəsi na pəsi[14]

¹²Tɛdɛnyɛ́ɛ́lɛ wɔnɔ́ ná Kayɛ́ɛŋ ayɛ́ɛ́lɛ, ndóo. Kɛ́lɛ lɛ́ nyɔ́lɛ́ ayɛ́ɛ mɔɔ́n ó Sáʼtan, kólɛ́ aa ayóón móŋŋí wəəŋ. Nkə aa kɛ́yɛ́moyɛ́ɛ́lɛ lɛ́ ámoyóon ə́! Ayɛ́moyóón lɛ́ nyɔ́lɛ́ ayɛ́ɛ agɛɛlanɛ pɛbán pɛ́ pɛ́dɛʼkɛ́lɛɛ́ pɛŋɛʼ kɔmɔɛ́d lɛ́ móŋŋí nyɔ́lɛ́ ayɛ́ɛ sáád ɛ mɔɔd[15]

¹³Pomóŋŋí, kɛnɛŋ kɛ́ pɔɔd pá a nsí pálɛ agoboóbɛnɛn pudiyə́wúnə́níí[16]

¹⁴Pəsi tɛlɛ palɛŋáán lɛ́ tɛáʼkolon a kugu, tɛáʼkosɔd a ɔlaa[17] lɛ́ tɛlɛ na nnyɔ́ŋánán na pomóŋŋí pə́ə́s. Ungim nyɔ́ ɔdɛɔ́gɔ na nnyɔ́ŋánán na pomóŋŋí, alɛ kɛlóŋ.

¹⁵Ungim nyɔ́ alɛɛ́ na ɛbɛnɛn na pomóŋŋí alɛ ongoónanan. Pəŋi poálɛŋ lɛ́ ongoónanan ɔmbɔ́ úmmuʼ oʼkóodi oʼkɔɔ a ɔlaa ó pɛnɛŋ piim.

¹⁶Kugu kó Yə́sus yiígú a kidíídí kiə́s áa kómɛ́ɛ́lɛ lɛ́ pəsi tɛ́lɛŋ nkə aa kɛ́lɛɛ́ nnyɔ́ŋánán. Pəsi tɛn tigóódi lɛ́ tiɛ́ʼkɛn ɔlaa wə́ə́s, tígu a kidíídí kɛ́ pomóŋŋí pə́ə́s.

¹⁷Mɔɔd amaʼkɛɛn lɛ́ alɛ na tugúm ilubənən a nsí yɛ́ɛnɛ, náa alɛɛ́ agodɛ́ʼtɛg móŋŋí nyummú aásósog, fiɛ́d na yoom, əsiə́d kɛnɛŋ na nyɔ́lɛ́[18], tuə́ áa alɛɛ́ ugusəə lɛ́ nyɔ́lɛ́ alɛ anyɔ́ŋɛn ə́?

¹⁸Ndóo, pɔɔ́n! Tɛdɛnjɛ́ɛ́n na nnyɔ́ŋánán yɛ unuʼ na unuʼ, əgín a tɔgɛ́ɛ́, ndóo. Tíɛn na nnyɔ́ŋánán ɛ fɔ́lɔ́b, tɛágɛɛlɛ pɛbán pɛ́ píoloodi lɛ́ tɛlɛ na nnyɔ́ŋánán na pomóŋŋí pə́ə́s fɔ́lɔ́b.

¹⁹Tɛmaʼkɛɛlɛ náan, áay aa tɛágaálɛŋ lɛ́ tɛlɛ pɔɔd pá pálɛɛ́ a sáád. Áay tɛn, tɛlɛ págɛɛn adɛ́lɛm a udi ó Táán, ɔʼtɛ́m yəə́b a kaadɛ.

²⁰Kɛ́lɛ lɛ́, ɔmbɔ́ ntɛ́m yəəs ibiígud a kaadɛ, tɛálɛŋ lɛ́ Táán aálɛŋ agaáyɛn ntɛ́m yəəs, aálɛŋ piim.

²¹Pɔɔ́n pá mbáa, tɛmaʼkɛɛn lɛ́ tɛlɛ ntɛ́m a kaadɛ yəə́b, tɛdɛɔ́gɔ págɛɛn na wɛɛ́y agodɛ́lɛm a udi ó Táán.

²²Nkə kiim tɛn kɛ́ tiə́muŋíən, aabɛyɛ́ʼkɛn lɛ́ tɛlɛ agɛɛ́ngɛg pɛcɛm piə́ŋ, tɛágɛɛlɛ nkə kɛ́ kɛ́lɛɛ́ əgumugə́mmi.

²³Táá kɛcɛm kiə́ŋ áa kɛ́ɛnɛ ɔnɔ́: Tɛ́ag oʼto na Mɔɔ́n wəəŋ Yə́sus Kilíʼtus, tɛ́ɛnyɔ́ŋanan pəsi na pəsi wɔnɔ́ ná Táán ayɛ́bɛdɛánɛ[19]

²⁴Nyɔ́ aágɛɛ́ngɛg pɛcɛm piə́ŋ, nyóon aa alɛɛ́ ondadáán na Táán, Táán ondadáán tɛn na nyɔ́lɛ́. A Uŋun wó Ufúlúʼtú wó ayɛ́bɛyɛ́ʼkɛn aa tɛlɛɛ́ agolɛŋ lɛ́ Táán alɛ ondadáán na pəsi.