Read Yambeta 1 Sɛ́aŋ 4 Bible Online

1 Sɛ́aŋ 4 - Yambeta bible

1 Sɛ́aŋ 4

¹Pɔɔ́n pá mbáa, pudiyə́líʼtíníí ungim nyɔ́ alɛɛ́ əgusəə lɛ́ nyɔ́lɛ́ alɛ na Uŋun wó Ufúlúʼtú. Yaŋáan amoyásɔsɛn agolɛŋ nga uŋun wóow wó ɔnɔ́ nyɔ́lɛ́ alɛ na wólɛ́ ólɛ uŋun wó wə́əgiim na Táán[20] lɛ́ palɔɛgɛʼ pɛbán pá pɛnyaʼ páʼkosambɛd a nsí.

²Nkə kɛ́ kíəbuúloodi lɛ́ wóonɛ Uŋun ólɛ ó Táán kɛ́lɛ lɛ́: Ungim nyɔ́ əmə́líʼtíníí lɛ́ Yə́sus Kilíʼtus alɛ fɔ́lɔ́b Táán, náa ayáán mɔɔd, nyóon náan aa alɛɛ́ na Uŋun ó Táán.

³Náa, nyɔ́ ədiə́gəə́liʼtinií lɛ́ Yə́sus ayáán mɔɔd, nyóon ɔdɛɔ́gɔ na uŋun wó wə́əgiim na Táán, alɛ na wó ólɛɛ́ agonɔɛyɛ Kilíʼtus. Olɛ wó páyɛ́bodɛánɛ lɛ́ wə́əgiim a nsí. Ɔmmɔɛ́d ogo aa wóonɛ wándɛɛ́ kɔ.

⁴Náa, pəŋi pɔɔ́n páam, pəŋi pá polɛɛ́ agoob na Táán, poɔ́nyɔŋ palɔɛgɛʼ pɛbán pá pɛfaa póob lɛ́, nyɔ́ alɛɛ́ na pəŋi amááyɛn nyɔ́ alɛɛ́ a nsí.

⁵Pɔ́lɛ́ pálɛ pɔɔd pá a nsí, pálɛ agosɔyɔ tɛn a nɛ́ pɔɔd pá a nsí. Pá pálɛɛ́ pá nsí, pálɛ agoboyóób tɛn.

⁶A pəsi, tɛlɛ pá páagoob na Táán. Nyɔ́ aálɛŋ Táán aabɛyóob. Nyɔ́ ɔdɛɔ́gɔ o Táán, nyóon adɛábɛyóob. Taa, náan aa tɛlɛɛ́ agolɛŋ uŋun óyaán áa ólɛɛ́ ó sáád, óyaán áa ódɛɔ́gɔ a ngə́ ɛ sáád.

⁷Pɔɔ́n pá mbáa, tɛ́nyɔ́ŋanan pəsi na pəsi lɛ́ na Táán áa nnyɔ́ŋánán ɛ́lɛɛ́ əgiim. Nyɔ́ alɛɛ́ na nnyɔ́ŋánán, nyóon alɛ mɔɔ́n o Táán, aálɛŋ Táán.

⁸Nyɔ́ ɔdɛɔ́gɔ na nnyɔ́ŋánán, nyóon andɛŋɛn Táán lɛ́ Táán alɛ nnyɔ́ŋánán.

⁹Tɛ́dálaan wɔnɔ́ ná Táán əyíbilóódi lɛ́ amábɛnyɔ́ŋɛn. Ayɛ́bɛdómɛn kɛmbóg kiə́ŋ kɛ́ Mɔɔ́n a nsí agɛɛlɛ lɛ́ pəsi tɛ́ɔŋ ɔlaa a ngim yəəŋ[21]

¹⁰Táá nkə aa kɛ́lɛɛ́ nnyɔ́ŋánán: Kɛ́lɛ lɛ́, adɛ́njaŋ pəsi aa tɛɛ́nyɔ́ŋɛn Táán, ndóo. Nyɔ́lɛ́ aa ayɛ́bɛnyɔ́ŋɛn pəsi, əmə́yiim ádom Mɔɔ́n wəəŋ lɛ́ yáyɛ́ʼkɛn a idúg ɛ́ kɛfɔny agɛɛlɛ lɛ́ nyɔ́lɛ́ ə́biílisin mabɛ́ mə́ə́s[22]

¹¹Pɔɔ́n pá mbáa, Táán amaʼkɛbɛnyɔ́ŋɛn anɛ́ɛ́n pəsi náan, kíəguunə tɛn lɛ́ tɛ́nyɔ́ŋanan pəsi na pəsi.

¹²Mɔɔd adɛ́ʼtála Táán na əngis[23] Tɛmaʼkɛɛn lɛ́ tɛlɛ agɔnyɔ́ŋanan pəsi na pəsi, áay lɛ́ Táán alɛ na pəsi. Nnyɔ́ŋánán yəəŋ yogoóloodi tɛn kɔŋɛʼ na pəsi.

¹³Táán ayɛ́bɛyɛ́ʼkɛn Uŋun wə́ə́ŋ. A wólɛ́ aa tɛlɛɛ́ agolɛŋ lɛ́ tɛlɛ na nyɔ́lɛ́, nyɔ́lɛ́ tɛn na pəsi.

¹⁴Paabá əyíím ábɛdómɛn mɔɔ́n wəəŋ agɛɛlɛ lɛ́ yíim ɔgɔɔyɛ pɔɔd piim pá a nsí. Tɛyɛ́moodála na əngis yə́ə́s, kólɛ́ aa tɛlɛɛ́ əgusəə[24]

¹⁵Nyɔ́ əmə́líʼtíníí a udi ó pɔɔd lɛ́ Yə́sus alɛ Mɔɔ́n o Táán, nyóon álɛŋ lɛ́ Táán alɛ na nyɔ́lɛ́, nyɔ́lɛ́ tɛn alɛ na Táán.

¹⁶A kiə́s, tɛálɛŋ ombod wó nnyɔ́ŋánán wó Táán abɛnyóŋɛ́nɛ́nɛ́ɛ́, timə́yəə́liʼtini yɛ́lɛ́. Táán alɛ nnyɔ́ŋánán: Nyɔ́ alɛɛ́ alaa a nnyɔ́ŋánán, nyóon alɛ na Táán, Táán tɛn alɛ na nyɔ́lɛ́.

¹⁷Nkə kɛ́ kíoloodi lɛ́ tɛlɛ anyɔ́ŋɛn fɔ́lɔ́b Táán áa kɛ́ɛnɛ kɛ́lɛɛ́ lɛ́: Wɔɔ́s wó Táán alɛ́ɛ́ kiim asómɛ́ɛ́ pɛyɔm, tɛlɛ́ɛ́ kodɛ́lɛm a udi wə́ə́ŋ tɛʼtammána. Tɛdɛndɛ́ɛ́ kodammana lɛ́ a ɔlaa wə́ə́s a nsí yɛ́ɛnɛ, tɛlɛ əgəə́siəd wɔnɔ́ ná Yə́sus əyə́siə́díí.

¹⁸Nyɔ́ Táán alɛɛ́ na nnyɔ́ŋánán na nyɔ́lɛ́, nyóon adɛágɛɛn na wɛɛ́y na Táán lɛ́ nnyɔ́ŋánán ɛ fɔ́lɔ́b ɛlɛ agɛɛlɛ lɛ́ wɛɛ́y óman. Kɛnɛŋ kɛ́ mɔɔd alɛɛ́ na wɛɛ́y, kióloodi anyóon lɛ́ alɛ agodammana lɛ́ páamoʼpɔ́nɛsɛ. Adɛ́njóób nnyɔ́ŋánán ɛ Táán áa nyóon kɔŋɛʼ kɔŋɛʼ.

¹⁹A pəsi, tɛlɛ na nnyɔ́ŋánán lɛ́ nyɔ́lɛ́ Táán yɛɛ́yáŋ abɛnyɔ́ŋɛn pəsi.

²⁰Mɔɔd əməʼkusəə ɔnɔ́: «Ndɛ anyɔ́ŋɛn Táán», náa alɛɛ́ agobɛnɛn móŋŋí wəəŋ, nyóon alɛ na pɛnyaʼ. Kɛ́lɛ lɛ́, nyɔ́ adɛányɔ́ŋɛnɛɛ́ móŋŋí wəəŋ nyɔ́ alɛɛ́ agodɛ́ʼtɛg, ɔdɛɔ́gɔ tɛn anyɔ́ŋɛn Táán nyɔ́ ɔdɛɔ́gɔ agodálaá.

²¹Táá kɛcɛm aa kɛ́ɛnɛ Kilíʼtus amábɛyɛ́ʼkɛn, ɔnɔ́: Nyɔ́ alɛɛ́ anyɔ́ŋɛn Táán, nyóon ogóódi tɛn lɛ́ ányɔ́ŋɛn móŋŋí wəəŋ[25]