Read Yambeta 1 Sɛ́aŋ 5 Bible Online

1 Sɛ́aŋ 5 - Yambeta bible

1 Sɛ́aŋ 5

¹Ungim nyɔ́ əmə́líʼtíníí lɛ́ Yə́sus alɛ Məsíi, nyóon alɛ mɔɔ́n o Táán. Ungim tɛn nyɔ́ alɛɛ́ na nnyɔ́ŋánán na Táán nyɔ́ alɛɛ́ sɛ a mɔɔ́n, nyóon aanyɔ́ŋɛn tɛn pɔɔ́n pá sɛ əə́bíən.

²Tioloodi lɛ́ tɛlɛ anyɔ́ŋɛn pɔɔ́n pá Táán ná tɛlɛ anyɔ́ŋɛn Táán, tɛágɛɛlɛ nkə kɛ́ pɛcɛm piə́ŋ pɛ́lɛɛ́ əgusəə.

³Kɛ́lɛ lɛ́, tioloodi lɛ́ tɛlɛ anyɔ́ŋɛn Táán ná tɛmɛ́ngɛg pɛcɛm piə́ŋ[26] Náan aa pɛcɛm piə́ŋ pɛ́dɛɔ́gɔ pɛnasáŋ

⁴lɛ́ ungim nyɔ́ əmə́biə́níí na Táán, ɔɔ́nyɔŋ pɛbán piim pɛ́ a nsí. Yoom yɛ́ tɛnyɔŋɛ́nɛ́ɛ́ pɛbán pɛ́ a nsí aa yɛ́ɛnɛ ɛ́lɛɛ́ lɛ́ tɛmáág oʼto.

⁵Nyɔ́ ɔɔ́nyɔŋ pɛbán pɛ́ a nsí, alɛ nyɔ́ əmə́líʼtíníí lɛ́ Yə́sus alɛ Mɔɔ́n o Táán.

⁶Yə́sus Kilíʼtus aa əyíbiyíímin na məní má ɔsɔgɛn wə́ə́ŋ, na maŋɔ́ mə́ə́ŋ má yiísúb[27] Ədiʼkə́əgiim əgín na məní mɔ́lɛ́ na mɔ́lɛ́, ndóo. Əyíím lɛ́ na məní na maŋɔ́. Uŋun wó Ufúlúʼtú ólɛ agaag mbaasɔ́ lɛ́ kɛ́lɛ náan fɔ́lɔ́b lɛ́ Uŋun wólɛ́wóamɔɛ́d ólɛ fɔ́lɔ́b.

⁷Wɛ́sɛnɛg ɛlɛ anyóon ɛ́dáád yɛ́ ɛmámodɛ́lɛ́mɛn mbaasɔ́[28]

⁸Wɛ́sɛnɛg ɛgo aa yɛ́ɛnɛ ɛlɛɛ́ lɛ́: Na Uŋun, na məní, na maŋɔ́. Pɔ́lɛ́ póob piim pádáád pálɛ əgusəə əgín yoom ímuʼ.

⁹Nga ándɛ tiə́gəə́liʼtini mbaasɔ́ ɛ pɔɔd, tɛ́lɛŋaan lɛ́ ɛ Táán ɛmááyɛn ɛ pɔɔd. Ɛlɛ mbaasɔ́ yɛ́ yɛɛ́dɛ́lɛ́mɛn Mɔɔ́n wəəŋ.

¹⁰Ungim nyɔ́ amáág oʼto na Mɔɔ́n o Táán, mbaasɔ́ yɛ́ɛy ɛlɛ na nyɔ́lɛ́nyɔ́amɔɛ́d. Nyɔ́ adɛágɛnɛɛ́ oʼto na Táán, nyóon əə́səə lɛ́ Táán alɛ na pɛnyaʼ lɛ́ nyɔ́lɛ́ ədiə́liʼtinini mbaasɔ́ yɛ́ Táán aádɛ́lɛ́mɛn Mɔɔ́n wəəŋ.

¹¹Mbaasɔ́ ɛgo aa yɛ́ɛnɛ ɛlɛɛ́ lɛ́: Táán ayɛ́bɛyɛ́ʼkɛn ɔlaa ó pɛnɛŋ piim. Ɔlaa wóow, amábɛyɛ́ʼkɛn wólɛ́ a Mɔɔ́n wəəŋ.

¹²Nyɔ́ alɛɛ́ na Mɔɔ́n, nyóon alɛ na ɔlaa. Nyɔ́ ɔdɛɔ́gɔ na Mɔɔ́n o Táán, nyóon oʼkóodi ɔlaa[29]

¹³Nkə kɛ́ɛnɛ kiim, mbə́budílən kɛ́lɛ́ agɛɛlɛ lɛ́ pólɛŋ lɛ́ polɛ na ɔlaa ó pɛnɛŋ piim, pəŋi pá poágɛ́nɛ́ɛ́ oʼto na Mɔɔ́n o Táán.

¹⁴Nkə kɛ́ kɛ́lɛɛ́ agɛɛlɛ lɛ́ tɛdɛnjɛ́ɛ́n na wɛɛ́y a udi wə́ə́ŋ áa kɛ́ɛnɛ kɛ́lɛɛ́ lɛ́: Tɛálɛŋ lɛ́ tɛmaʼkomoyɔ́sɔ́gɔlɔn lɛ́ ábɛyɛ́ʼkɛn nkə kɛ́ kɛ́lɛɛ́ a ngə́ yɛ́ alɛɛ́ anyɔ́ŋɛn, aabɛyɛ́ʼkɛn.

¹⁵Wɔnɔ́ ná tɛálɛŋ náan lɛ́ alɛ agoob pɛɔ́sɔ́gɔ́lɔ́n piə́s, tɛ́lɛŋ tɛn lɛ́ nkə kɛ́ tɛlɛɛ́ əgumuŋíən, tɛándɛ na kɛ́lɛ́.

¹⁶Mɔɔd amaʼkodála móŋŋí wəəŋ aágɛɛlɛ kɔbɛ́ kó kólɛɛ́ kɔbɛ́ kódɛ́agɛɛnɛɛ́ na mɔɔd a kugu, yɔ́sɔ́gɔlɔn a kidíídí kiə́ŋ, Táán agɛɛ́ʼkɛn móŋŋí wəəŋ nyóon ɔlaa, ná kɛ́lɛ fɔ́lɔ́b lɛ́ kólɛ kɔbɛ́ kó kódɛ́agɛɛnɛɛ́ na mɔɔd a kugu. Náa, kɔbɛ́ kúmmú kólɛ kɔ kó kóagɛɛn na mɔɔd a kugu. Adɛ́njaŋ a ombod wóow aa ndɛɛ́ əgusəə lɛ́ poɔ́sɔ́gɔlɔn Táán a kidíídí kɛ́ mɔɔd nyɔ́ amɛ́ɛ́lɛ.

¹⁷Nkə kɛ́ kɛbɛ́ kiim kɛ́ mɔɔd aágɛɛlɛ kɛ́lɛ kɔbɛ́. Náa, kɔbɛ́ kuim kódɛágɛɛn na mɔɔd a kugu.

¹⁸Tɛálɛŋ lɛ́ ungim nyɔ́ aándɛɛ́ mɔɔ́n o Táán, ədiə́giiʼkini kɛɛlɛ kə́mmú kɔbɛ́ lɛ́ Mɔɔ́n o Táán əəmuúnuŋ[30], Ɔmbɛ́ ɔdɛɔ́gɔ ogomoyɛ́ɛlɛ yoom kə́mmú.

¹⁹Pəsi tɛálɛŋ lɛ́ tɛándagoob na Táán. Náa, ungim nyɔ́ alɛɛ́ wo nsí əligi a kɛáŋ kɛ́ Ɔmbɛ́.

²⁰Tɛálɛŋ tɛn lɛ́ Mɔɔ́n o Táán əyíím a nsí, amáabɛyɛ́ʼkɛn nsiŋ agɛɛlɛ lɛ́ tɛ́lɛŋ Táán o fɔ́lɔ́b. Tɛlɛ tɛn paladáán unuʼ úmmuʼ na Táán o fɔ́lɔ́b nyóon. Tɛlɛ paladáán na nyɔ́lɛ́ a ngim ɛ Mɔɔ́n wəəŋ Yə́sus Kilíʼtus, nyɔ́lɛ́ nyɔ́ alɛɛ́ Táán o fɔ́lɔ́b, nyɔ́lɛ́, ɔlaa ó pɛnɛŋ piim.

²¹Mɛ pɔɔ́n, ə́núŋíən áaá! Pudinjə́njən ambog aá!