Read Yambeta 2 Sɛ́aŋ 1 Bible Online

2 Sɛ́aŋ 1 - Yambeta bible

2 Sɛ́aŋ 1

¹Wɛ kɛgóʼkóón kɛ́ ɔʼkɛ́ɛd kɛ́ Táán əyííyid, wɛ áa mbə́gudílən nufuuʼ nóonɛ, mɛ osaá o kəə́liʼtiniʼ. Mbə́budílən lɛ́ na wɛ na pɔɔ́n pááŋ[1] pá ndɛɛ́ anyɔ́ŋɛn a fɔ́lɔ́b. Adɛ́njaŋ mɛnyɔ́əsíŋ áa ndɛɛ́ agobonyɔ́ŋɛn, ndóo, ɔmbɔ́ tɛn pɔsɔ́g pá páálɛŋ pafɔ́lɔ́b, pálɛ agobonyɔ́ŋɛn

²lɛ́ fɔ́lɔ́b ɛlɛ na pəsi, yaagɛɛn əgín tɛn na pəsi a pɛnɛŋ piim.

³Táán Sɛ pɔ́lɛ́ na Yə́sus Kilíʼtus, Mɔɔ́n o Paabá pábɛyɛ́ʼkɛn mawɔʼ á! Pábɛdɛ́ɛ́lɛn ɔʼtɛ́m, páyɛbɛyɛ́ʼkɛn kiwiiyiʼ agɛɛlɛ lɛ́ tɛ́laa a pafɔ́lɔ́b, tɛ́ɛnyɔ́ŋanan aá!

⁴Nyɛɛ́nyɔ́ga kɛ́fɔlɛ́ ná nyɛɛ́bóan lɛ́ a pɔɔ́n pááŋ, pɔsɔ́g pə́mmú pálɛ agodáŋana a ngə́ ɛ sáád, ngə́ yɛ́ Paabá alɛɛ́ agɛbɛdɛ́anɛ lɛ́ tíyə́ən.

⁵Wɛ kɛgóʼkóón kɛ́ ɔʼkɛ́ɛd, táá nkə kɛ́ ndɛɛ́ əguguŋíən nɛ́gɔŋ aa kɛ́ɛnɛ kɛ́lɛɛ́ lɛ́: Tɛ́nyɔ́ŋanan pəsi na pəsi. Nkə kɛ́ɛg kɛ́ ndɛɛ́ əgusəə kɛ́dɛɔ́gɔ kɛcɛm kɛ́ kɛ́lɛɛ́ kɛwa, ndóo. Kɛ́lɛ kɛcɛm kɛ́ páyɛ́bɛyɛ́ʼkɛn əgín kɔ a niə́bə́ə[2]

⁶Taa, nnyɔ́ŋánán aa yɛ́ɛnɛ ɛlɛɛ́ lɛ́ tɛ́dáŋana a ngə́ ɛ pɛcɛm piə́ŋ. Kɛcɛm kɛ́go kɛ́ poyóób əgín kɔ a niə́bə́ə aa kɛ́ɛnɛ kɛ́lɛɛ́ lɛ́ pólaa a nnyɔ́ŋánán áaá!

⁷Ndɛ əgusəə náan lɛ́ pɔɔd pá pɛnyaʼ páʼkosambɛd a nsí. Pɔ́dɛɔ́gɔ anyɔ́ŋɛn kəə́liʼtini lɛ́ Yə́sus Kilíʼtus əyíím fɔ́lɔ́b a nsí, ayáyáánɛ́ɛ́ mɔɔd. Taa, nyɔ́ alɛɛ́ əgusəə náan, nyóon aa alɛɛ́ mɔɔd o pɛnyaʼ á! Ɔnnɔɛyɛʼ Kilíʼtus aá!

⁸Pólóʼkɔd na pəŋibáamɔɛ́d agɛɛlɛ lɛ́ pigólí pɛáŋan[3] pídisúú məní, náa, pɛ́lon na pɛsáábɔ́n a kúfuʼ.

⁹Ungim nyɔ́ aʼtɛ́lɛmɛnɛɛ́ əgín áa nkə kɛ́ Kilíʼtus ayáʼkánánɛ, aágaábɛgan piə́ŋ a mɔɛn, nyóon ɔdɛɔ́gɔ unuʼ úmmuʼ na Táán. Nyɔ́ aádɛ́lɛm əgín áa nkə kɛ́ Kilíʼtus ayáʼkánánɛ, nyóon aa alɛɛ́ unuʼ úmmu na Sɛ, unuʼ tɛn úmmuʼ na Mɔɔ́n.

¹⁰Mɔɔd əməʼkuuyíimin na tɔʼtilíin yɛ́ ɛlɛɛ́ ndɛ́ŋ, pudiímusíəd kɔŋɛʼ, ɔmbɔ́ ɔɔ́ɔ, odɛɛ́modɛánɛ.

¹¹Wɛ nyɔ́ wəə́muúsoyidi wɔʼkɔ́: «Ɔɔ́ɔ oo!» Wɛ nyóon olɛ a ngim yəəŋ a nkə kɛ́ alɛɛ́ agɛɛlɛ.

¹²Ndigi na ɛ́fɔlɛ́ ɛ́ pɛbán kə́mmú ɛ́gobodɛ́anɛ. Náa, ntɛnyɔ́ŋɛnɛn kubuúdilən pɛ́lɛ́ áanɛ a nufuuʼ na kɛlɛyɔ́ɔŋ. Ndɛ agomɛna pɛda lɛ́ ndəəgiim káag kɛnɛŋ sɔɔŋ. Áay pəsi na pəŋi tɛɔsɔyɔ na udi na udi agɛɛlɛ lɛ́ tɔnyɔ́g tuə́s tóɛn a kúfuʼ.

¹³Pɔɔ́n pá woómóŋŋí nyɔ́ ɔʼkɛ́ɛd[4] tɛn nyɔ́ Táán əyííyid pɔ́nɔ́ nkuúsoyidi á!