Read Yambeta 3 Sɛ́aŋ 1 Bible Online

3 Sɛ́aŋ 1 - Yambeta bible

3 Sɛ́aŋ 1

¹Wɛ sɔ́g waam wó ɔʼtɛ́m Kayúus[1] nyɔ́ ndɛɛ́ anyɔ́ŋɛn a fɔ́lɔ́b áa mɛ osaá ó kəə́liʼtiniʼ mbə́gudílən nufuuʼ nóonɛ.

²Sɔ́g waam wo ɔʼtɛ́m, ndɛ anyɔ́ŋɛn lɛ́ pɛbán pɛáŋ piim pɛ́dáŋana kɔŋɛʼ, wɛ́ɛn ɔnnasáŋ a nkó wɔnɔ́ ná olɛɛ́ ɔnnasáŋ a uŋun.

³Ná pomóŋŋí pə́ə́s pə́yíím əgiig áanɛ, nyɛɛ́nyɔ́ga kɛ́fɔlɛ́ na nkə kɛ́ páyɛ́bɛdɛánɛ. Píísə́ə́ lɛ́ wɛ nyóon odɛɔ́gɔ agoʼtiɛngɛlɛd a ngə́ ɛ sáád, olɛ əgín agodáŋana a yɛ́lɛ́.

⁴Yoom yɛ́ndɛ́ŋ ɛ́dɛɔ́gɔ yɛ́ yáagɛnyɛɛ́ʼkɛn tɔnyɔ́g agaáyɛn kɛnɛŋ kɛ́ mbóób lɛ́ pɔɔ́n páam pálɛ agodáŋana a ngə́ ɛ sáád.

⁵Sɔ́g waam wó ɔʼtɛ́m, a nkə kɛ́ olɛɛ́ agɛɛlɛ a kidíídí kɛ́ pomóŋŋí pááŋ pá pálɛɛ́ kɔmɔɛ́d pɛnɔɔŋɛʼ, olɛ agodáŋana əgín a ngə́ ɛ kəə́liʼtiniʼ koáŋ.

⁶Páyɛ́godɛ́lɛ́mɛn mbaasɔ́ a udi wó ɛgɔny ɛ́ pəə́liʼtiniʼ pɔ́nɔ́ olɛ na nnyɔ́ŋánán na pɔ́lɛ́. Sɛ́gɔɔ, mbágoyɔ́sɔ́gɔ́lɔ́nɛ́ɛ́, óboɛ́bɛ na nkə kɛ́ kíəbuyúunən agɛɛlɛ lɛ́ pɛ́ɛn yuudi, pɛ́ɛlɛ oʼtom wɔ́ɔ́bɔn. Óboɛ́bɛ a ombod wó wə́əgə́mmi Táán.

⁷Kɛ́lɛ lɛ́, agɛɛlɛ pigólí pɛ́ Kilíʼtus aa píísiə́d ngə́, fiɛ́d kodam ombɔg na pandɛŋ Táán.

⁸Kíəguunə anɛ́ɛ́n lɛ́ pəsi tɛábɛ́gɛn mbod ɛ pɔɔd yɛ́ɛy náan ombɔg a ngim, əguloodi lɛ́ pəsi tɛn tɛlɛ a ngim ɛ pɛbán pɛ́ pɛ́lɛɛ́ sáád.

⁹Nyiídílən ɛgɔny yááŋan ɛ́ pəə́liʼtiniʼ ɛsom ɛ́ nufuuʼ. Náa, wɔnɔ́ ná Tɛoʼtɛlɛ́ɛf nyɔ́lɛ́ alɛɛ́ anyɔ́ŋɛn əgín lɛ́ nyɔ́lɛ́ aa álamɛɛ́, oʼkóodi kɛnɛŋ na nkə kɛ́ mbə́səə.

¹⁰Kólɛ́ aa nyɔʼkɔ́: Ná ndə́əgiim, ndɛ́ɛ́ kolónanɛ nkə kiim kɛ́ kɛbɛ́ kɛ́ alɛɛ́ agɛɛlɛ. Nyɔ́lɛ́ nyɔ́ alɛɛ́ agoyósag niiŋ niə́s, aábɛsóman pɛbán a nkó. Aʼtɛ́lɛmɛn anɛ́ɛ́n əgín lɛ́ kɛ́ɛg, alɛ annyɔ́ŋɛn kusiəd pomóŋŋí pə́ə́s kɔŋɛʼ. Ɔmbɔ́ pɔsɔ́g pá pálɛɛ́ anyɔ́ŋɛn kubuúsiəd kɔŋɛʼ, alɛ agobosáŋɛnɛnɛ lɛ́ pə́diyíbusíəd. Alɛ əgusəə lɛ́ nyɔ́ əə́buúsiəd kɔŋɛʼ, aamooŋɛŋ a ɛgɔny ɛ́ pəə́liʼtiniʼ.

¹¹Sɔ́g waam wo ɔʼtɛ́m! A wɛ, udinjə́ən nkə kɛ́ kɛ́lɛɛ́ kɛbɛ́, yə́ən kɛ́ kɛ́lɛɛ́ kɛŋɛʼ. Mɔɔd nyɔ́ alɛɛ́ agɛɛlɛ kɔŋɛʼ alɛ mɔɔd nyɔ́ alɛɛ́ agoob na Táán, kɔmɔɛ́d lɛ́ nyɔ́ alɛɛ́ agɛɛlɛ kɔbɛ́ andɛŋɛn Táán.

¹²A noá na Təmiʼtiliyúus, ungim alɛ əgusəə lɛ́ alɛ mɔɔd olaŋ. Sáád yɛ́ alɛɛ́ agɛɛlɛ yoóloodi lɛ́ kɛ́lɛ náan fɔ́lɔ́b. Ɔmbɔ́ tɛn pəsi, tɛmámodɛ́lɛ́mɛn mbaasɔ́ náan. Waálɛŋ tɛn lɛ́ mbaasɔ́ yəəs ɛlɛ mbaasɔ́ ɛ fɔ́lɔ́b.

¹³Ndigi na ɛ́fɔlɛ́ ɛ́ pɛbán kə́mmú ɛ́gobodɛ́anɛ. Náa, ntɛnyɔ́ŋɛnɛn kubuúdilən pɛ́lɛ́ áanɛ a nufuuʼ na kɛlɛyɔ́ɔŋ

¹⁴lɛ́ ndɛ agomɛna pɛda lɛ́ kɛnɛŋ sɔɔŋ tɛadɛ́ʼtɛganan. Áay, pəsi na pəŋi tɛɔsɔyɔ na udi na udi.

¹⁵Kiwiiyiʼ kíɛn na wɛ áaá! Pɔsɔ́sɔ́g pááŋ pɔ́nɔ́ nkuúsoyidi á. Úbiísoyidini tɛn pɔsɔ́sɔ́g pə́ə́s póʼkáag aá! Úbuúsoyidəni úmmuʼ úmmuʼ á!