Read Yambeta Síud 1 Bible Online

Síud 1 - Yambeta bible

Síud 1

¹Mɛ Síud, móŋŋí o Sɛ́ag, mɛ nyɔ́ ndɛɛ́ uʼkudin o Yə́sus Kilíʼtus aa mbə́budílən[1] pəŋi pá Táán ayɛ́boodɔ́ŋɔn, pá alɛɛ́ agobonyɔ́ŋɛn. Pəŋi pá alɛɛ́ əbuúnuŋ lɛ́ puób na Yə́sus Kilíʼtus.

²Táán ábooda mbilígɔɔ́ʼkɔn a fug, áboyɛ́ʼkɛn uŋóón, áabonyɔ́ŋɛn tɛn a fug áaá!

³Pɔsɔ́sɔ́g páam pá ɔʼtɛ́m! Ɔʼtɛ́m wáam oyɛ́ɛ ɔgɔ́lɔ a kaadɛ lɛ́ mpuúdilən nufuuʼ a nkə kɛ́ kɛ́adɛ́ʼtɛg kɔɔy kó Táán ayɛ́bɛyɔ́ɔ́yɛ pəsi piim. Kɛ́lɛ na mɛ nɛ́gɔŋ yɛ́ɛnɛ nkódánán yɛ ambaan lɛ́ mpuúdilən agɛɛlɛ lɛ́ mpoogónɛ nkó agɛɛlɛ lɛ́ poágɔ́nɛgɛ kiʼtuuliʼ a kəə́liʼtiniʼ kóonɛ kó amɛ́ʼkɛn kə́muʼ a kúfuʼ na pá páagoob na nyɔ́lɛ́.

⁴Ndɛ əgubuúdilən náan lɛ́ pɛbɛ́ pɛ́ pɔɔd pímmú pɛáʼkosɔd a ondáŋ wááŋan a nuníb. Pálɛ agobɛágɛla tɔsɔm tó nnyɔ́ŋánán tó Táán agɛɛlɛ lɛ́ pálaa ɔlaa wɔ́ɔ́bɔn wó ɔmbɛ́ wɔnɔ́ ná pálɛɛ́ anyɔ́ŋɛn, páasáŋɛnɛ Yə́sus Kilíʼtus nyɔ́ alɛɛ́ nyɔ́lɛ́nyɔ́əsíŋ Kɛlág kiə́s na Sə́dúk wəəs. Táán aáʼkoboyɛ́ʼkɛn pɔ́lɛ́ póob nsɔ́ɔ́ kalaʼ wɔnɔ́ ná kɛ́lɛɛ́ kidiídílə́ a kálaʼtaʼ a kidíídí kɛɔ́bɔn[2]

⁵Ɔmbɔ́ ná poɛ́lɛŋɛn pɛbán pɛ́ɛb piim kɔŋɛʼ kɔŋɛʼ, ndɛ anyɔ́ŋɛn koboyáyɔ́ɔ́ŋɛnɛ lɛ́, ná Sə́dúk yɛɛ́lónɛ pɔɔd pá Ɛ́sɛlayɛl a Əsíibtə, a ngim yɛ́ɛy yɛɛ́mán kuwíiyi pá pádɛʼkágaágɛ́ɛ́ oʼto na nyɔ́lɛ́.

⁶Áyɔ́ŋɛ́an kɛbán kɛ́ məŋun má maʼtom má mádɛʼkáanyɔ́gaá kolɔb a oʼtɛ́lɛm wɔ́ɔ́bɔn ó nɛlaamɛʼ wó máyɛ́ɛ a wólɛ́. Míídí oʼkɔɔ wɔ́ɔ́bɔn, Táán aáság koboyáág a kɛáŋ kɛ́ kúfuʼ, a mbin a kaadɛ agɛɛn əgiig əgín áa wɔɔ́s ó pɛyɔm.

⁷Áyɔ́ŋɛ́an nkə kɛ́ kɛ́yáyɛ́lɛ́ɛ́ a Sodóom na a Kɔmɔ́ɔl, na a pálɛ́ɛg tɛn yɛ́ ɛyɛ́ɛ ndúmiʼ na pɔ́lɛ́. Pɔɔd pá a pálɛ́ɛg yɛ́ɛy páyɛ́ɛ alaa ɔlaa wó ɔmbɛ́ wɔnɔ́ məŋun má mabɛ́ móom. Páyɛ́ɛ lɛ́, páagɛɛlɛ pɛɔg, pə́əbúlimən na pɔsɔ́g pá póʼkódií lɛ́ pə́búlimən na pɔ́lɛ́. Pálɛ agaánɛ nɛ́gɔŋ a yug ɛ́ pɛnɛŋ piim. Pálɛ agaánɛ náan əguloodi nkə kɛ́ kɛ́lɛɛ́ agoboŋ pá pə́əgəə́siəd náan.

⁸Náan yoom ímuʼ tɛn aa pá pálɛɛ́ a kɛgaágadɛ kɛáŋan pálɛɛ́ əgəə́siəd. A pɛlɛm pɛɔ́bɔn pɛ́ pə́əbúlimən, pálɛ agaáyóon pɔ́lɛ́báamɔɛ́d. Pálɛ agosáŋɛnɛ Nɛlaamɛʼ nɛ́ Sə́dúk, páadóga məŋun má mə́əgə́mən a mɔɛn.

⁹Ɔmbɔ́ əgín Mɛ́ʼkayɛ́ɛl, nkúm ɛ məŋun má maʼtom, adɛʼkáagɛɛlɛ mbod ɛ pɛbán wɔnɔ́ yɛ́ɛy náan. Ɔmbɔ́ a ɔsáŋ wó páyɛ́ɛ a wólɛ́ na Omɔlɛɔ́g ná páyɛ́ɛ agobɔgɔnɔn kɛlóŋ kɛ́ Moyíis, adɛʼkáadógɛd Omɔlɛɔ́g, adɛʼkáamoyɛ́ʼkɛn nsɔ́ɔ́. Yiísə́ə́ agá ɔnɔ́ na nyɔ́lɛ́: «Táán ágoʼpɔ́nɛsɛ[3]!»

¹⁰Náa, pɔɔd póob pɔ́lɛ́ pálɛ agosɔyɔ kɔbɛ́ a yoom ɛmɔɛ́d yɛ́ pándɛŋɛnɛɛ́ tuə́ áa ɛ́lɛɛ́. Nkə tɛn kɛ́ páálɛŋ a nsiŋ yɔɔbɔn ɛ ponyam pó kidun, kɛ́lɛ́ kɛ́go aa kɛ́lɛ́ɛ́ koboódagɛdɛɛ́ a kidun.

¹¹Maan na pɔ́lɛ́! Maan na pɔ́lɛ́ lɛ́ píísiə́d ngə́ ɛ Kayɛ́ɛŋ. Pálɛ pənímə́ə́n ngə́ wɔnɔ́ Paláam lɛ́ pámáág ɔʼtɛ́m a mɔɔnɛ́. Wɔnɔ́ ná Kolə́ə yiídə́ə́míni oʼto na Táán, əmə́əgu, náan tɛn aa pɔ́lɛ́ pálɛ́ɛ́ koman kuwu lɛ́ pídə́ə́míni tɛn oʼto na Táán[4]

¹²Kɛnɛŋ kɛ́ polɛ agonɛ́ɛnɛ ondáŋ na pɔ́lɛ́, pɛbán pɛɔ́bɔn pɛ́ pɛbɛ́ pɛ́ páagɛɛlanɛ pádɛób oʼto kono na pɛ́lɛ́, pɛ́lɛ əgufiləni kɛgaágadɛ kɛáŋan kɛ́ pəŋi pá polɛɛ́ agoob na Táán. Pɔ́lɛ́ pógóódi əgín kɛnɛŋ na pɔ́lɛ́báamɔɛ́d. Pálɛ wɔnɔ́ kɛnɛŋ kɛ́ mbálámɔɛn imílígən, noó núʼtə́əŋ, ɔfɛfɛm wə́əgiim úbufióŋi. Pálɛ tɛn wɔnɔ́ piɛd pɛ́ pɛ́dɛɔ́gɔ əguúmíí modámádám a kɛnɛŋ kɛ́ kuum. Piɛd pɛ́ɛb pɛ́lɛ́ɛ́ kəə́bugə. Pɛmɔɛ́d pɛáʼkaán nkón a kúfuʼ.

¹³Pááŋwáŋánan pɛmɔ́s pɛ́ noom nó nuə́ʼkiim nóyɛ́bɛ́ɛ́. Wɔnɔ́ ná ándɛ nóadagɛdanɛ pɛmɔ́s na pius a ɛbá, náan tɛn aa pɔ́lɛ́ pálɛ́ɛ́ kɛɛlɛɛ́ na pɛbán pɛɔ́bɔn pɛ́ oʼto kono. Pálɛ wɔnɔ́ muə́dədəʼ mó mólɛɛ́ əgiim múyə́yəə. Táán aboyɛ́ngɛ́gɛn oʼkɔɔ ó kúfuʼ a mbin ɛ pilíb a kaadɛ.

¹⁴A kɛbán kɛɔ́bɔn aa Ɛ́nɔ́g nyɔ́ əyíím ndáŋ ɛ́ʼtáan na ɛ́baan a ngim yɛ Ádam yɛɛ́yáŋ alɔɛgɛ ná yiísə́ə́ lɛ́: «Taa, Sə́dúk əgiim na pɔʼtɔ́ɔ́sɛn na pɔʼtɔ́ɔ́sɛn pá məŋun mə́ə́ŋ má maʼtom

¹⁵agɛɛlɛ lɛ́ yáag mbaasɔ́ na pɔɔd piim a nsí. Alɛ́ɛ́ kɛɛ́ʼkɛn nsɔ́ɔ́ na pɔɔd a tɔgɛ́ɛ́ toɔ́bɔn tó oʼto wó ɔnnasáŋ na mabɛ́ miim má pálɛɛ́ agɛɛlɛnɛ Táán[5]»

¹⁶Pɔɔd póob pálɛ əgín kudugimə na kudugimə, nkɔ́d na nkɔ́d. Ɔlaa wɔ́ɔ́bɔn ólɛ əgín a isóbín ɛ́ pumog. Pálɛ agosɔyɔ na kaábágɛdɛ kuim, pə́əgəə́súidən pɔɔd na tɔgɛ́ɛ́ tó kɛliɛ́g agɛɛlɛ lɛ́ páboníɛn.

¹⁷A pəŋi pɔsɔ́sɔ́g páam pá ɔʼtɛ́m, áyɔ́ŋɛ́an nkə kɛ́ pɔɔ́n pá maʼtom pá Sə́dúk wəəs Yə́sus Kilíʼtus pɛ́ɛ́yáŋ aboólɔɛgɛnɛ.

¹⁸Páyɛ́bodɛánɛ pɔ́nɔ́: «A nɛman, pɔɔd pálɛ́ɛ́ koboónyɛɛŋanɛ, páalaa ɔlaa wó a isóbín ɛ́ pumog[6]»

¹⁹Pɔ́lɛ́ págo aa pálɛɛ́ agaag ɛsaa a kɛgaágadɛ kɛ́ pəʼkilíʼtɛn. Pálɛ na pusiŋ pó pɔɔd, póʼkóodi Uŋun wó Ufúlúʼtú.

²⁰Náa, a pəŋi pɔsɔ́sɔ́g páam, pógon ɔlaa wááŋan a kəə́liʼtiniʼ koáŋan kó kólɛɛ́ kufúŋiə́n agaáyɛn náan. Poɔ́sɔ́gɔlɔn Táán na toɛn tó Uŋun wó Ufúlúʼtú.

²¹Puə́gumənən a nnyɔ́ŋánán ɛ Táán, poágɛɛ́yɛgan oʼto a kɔdɛ́ɛ ɔʼtɛ́m kó Sə́dúk wəəs Yə́sus Kilíʼtus lɛ́ aaboyɛ́ʼkɛn ɔlaa ó pɛnɛŋ piim.

²²Póɛn na mbilígɔɔ́ʼkɔn na pá pə́ligíí nsun a kidun[7]

²³Póɛlɛ lɛ́ pálón a yug, pɔ́ɔy. A pɔsɔ́g tɛn pɛ́ndɛ́ŋ, púsiəd tɛn mbilígɔɔ́ʼkɔn na pɔ́lɛ́. Kɛbán kímuʼ, pólóʼkɔd, podɛɛ́boyábɛ́lɛ́dɛ́ɛ́, ɔmbɔ́ tɛn pilə́ə́ pɛɔ́bɔn podɛnjábɛ́lɛ́dɛ́ɛ́ pɛ́lɛ́. Pɛ́lɛ na pifii pɛ́ maáyɛ́ɛ́lánɛ́ mɔ́ɔ́bɔn má a isóbín ɛ́ pumog.

²⁴Tiɛ́ʼkɛnaan nugəm na Táán, nyɔ́lɛ́ nyɔ́ alɛɛ́ kɛmbóg kímuʼ, nyɔ́lɛ́ nyɔ́ ayɛ́bɛyɔ́ɔ́yɛ a ngim ɛ Yə́sus Kilíʼtus, Sə́dúk wəəs! Nyɔ́lɛ́ aa alɛɛ́ əbuúnuŋ agɛɛlɛ lɛ́ pudiʼtə́əŋ a kɔbɛ́, áyɛboyɛ́ɛlɛ lɛ́ pódɛ́lɛm fiɛ́d na ɛgom a udi wə́ə́ŋ, na tɔnyɔ́g tuim. Nugəm, nɛgóón, toɛn, nɛlaamɛʼ, moom móom mólɛanɛ kɔ na nyɔ́lɛ́ kalaʼ, móɛn əgín na nyɔ́lɛ́ nɛ́gɔŋ yɛ́ɛnɛ na a pəliə́g! Aamɛn.