Read Yambeta Yiífínínin 1 Bible Online

Yiífínínin 1 - Yambeta bible

Yiífínínin 1

¹A kálaʼtaʼ yɛ́ɛnɛ, pɛbán pɛ́ pɛ́yɛ́ɛ pɛɔsɛ́gáán áa pɛ́lɛɛ́ kɔ, náa Yə́sus Kilíʼtus yiífínin pɛ́lɛ́. Táán ayɛ́moyɛ́ʼkɛn lɛ́ ná ámoáŋɛnɛ pəgudin pə́ə́ŋ pɛ́lɛ́, pálɛŋ nkə kɛ́ kɛnɛŋ sɔɔŋ kɛ́lɛ́ɛ́ kaáyɛ́lɛɛ́. Kilíʼtus ayɛ́ʼtómɛn uŋun wə́ə́ŋ ó maʼtom lɛ́ wíim agɛʼtɛ́anɛ na mɛ Sɛ́aŋ uʼkudin wəəŋ pɛbán pɛ́ɛb, ndɛŋ.

²Mɛ Sɛ́aŋ ndɛ wɛ́sɛnɛg lɛ́ nkə kɛ́ɛg kiim kɛ́ nyɛɛ́dála na mɛ əngis[1] kɛ́lɛ tɔgɛ́ɛ́ tó Táán. Ndɛ wɛ́sɛnɛg tɛn lɛ́ nkə kiim kɛ́ Yə́sus Kilíʼtus yɛɛ́moáŋɛ kɛ́lɛ fɔ́lɔ́b.

³Kɔŋɛʼ na nyɔ́ alɛɛ́ abana kálaʼtaʼ yɛ́ɛnɛ a udi ó pɔɔd. Kɔŋɛʼ na pá pálɛɛ́ agoob, páagaáyɛ́ngɛg tɛn tɔgɛ́ɛ́ tó Táán tó tólɛɛ́ tudiídílə́ kɔ. Tólɛ tɔgɛ́ɛ́ tó toálón a unuʼ ó Táán. Kɛnɛŋ kɛ́ pɛbán pɛ́ɛb kaáyɛ́ɛlɛ kɛándɛ ndúmiʼ.

⁴Mɛ Sɛ́aŋ aa mbə́budílən nufuuʼ nóonɛ. Mbə́budílən pəŋi pá polɛɛ́ a mogony mó pəə́liʼtiniʼ móʼtáan na móbaan mó mólɛɛ́ a Əsíi: Táán áboyɛ́ɛlɛ kɔŋɛʼ á! Áboyɛ́ʼkɛn tɛn wiiy aá! Nyɔ́lɛ́ nyɔ́ ayɛ́ɛ, nyɔ́ alɛɛ́, na nyɔ́ alɛ́ɛ́ kiimií[2] aá! Məŋun tɛn máʼtáan na mábaan má mə́də́níí a udi wó oʼkɔɔ wə́ə́ŋ ó nɛlaamɛʼ máboyɛ́ɛlɛ kɔŋɛʼ, máyɛboyɛ́ʼkɛn tɛn wiiy aá!

⁵Yə́sus Kilíʼtus nyɔ́ alɛɛ́ wɛ́sɛnɛg ɛ sáád áboyɛ́ɛlɛ tɛn kɔŋɛʼ, áaboyɛ́ʼkɛn wiiy aá! Nyɔ́lɛ́ nyɔ́ alɛɛ́ a pəliə́g, nyɔ́lɛ́ o na oʼto na oʼto ogoóndɛg a pɛlóŋ. Nyɔ́lɛ́ nkúm ɛ puʼkúm pó a nsí. Kilíʼtus alɛ abɛɛnyɔ́ŋɛn. A maŋɔ́ mə́ə́ŋ má yiísúb a ɔmbásá, ayɛ́bɛyááŋɛn a mabɛ́.

⁶Ayɛ́bɛyɛ́ɛ́lɛ lɛ́ tíɛn a nɛlaamɛʼ niə́ŋ, tɛ́yɛɛn tɛn payaaganɛʼ pɛfɔny pá pə́əgudin Táán Sɛ wəəŋ. Moom móonɛ lɛ́: Nugəm, toɛn, móɛn pɛnɛŋ piim na nyɔ́lɛ́ aa! Aamɛn.

⁷Taa, ogo aa nyóonɛ alɛɛ́ əgiim ə́suu a kɛbɛd a kaadɛ. Ungim alɛ́ɛ́ komoodála. Ɔmbɔ́ tɛn pá pə́yímunə́ən toɛn na nɛɔŋ, pálɛ́ɛ́ komoodála[3] Mɔnɔŋ miim má a nsí málɛ́ɛ́ kɛɛn a ɔndɛɛ a kidíídí kiə́ŋ. Ɛɛ́ɛ! Náan aa kɛ́lɛ́ɛ́ kɛɛnɛɛ́! Aamɛn.

⁸Sə́dúk Táán o toɛn tuim ɔnɔ́: «Mɛ áa ndɛɛ́ usúid yuudi, mɛ usúgəniʼ ngim. Ndɛ nyɔ́ alɛɛ́, nyɔ́ ayɛ́ɛ, na nyɔ́ alɛ́ɛ́ kiimií. Ndɛ Táán o toɛn tuim.»

⁹Mɛ Sɛ́aŋ, móŋŋí waaŋan a oʼto wóonɛ lɛ́ tɛlɛ paladáán a Yə́sus, tɛlɛ a nɛlaamɛʼ nɛ́ Táán. Ndɛ agonɛ ntɔ́b wɔnɔ́ pəŋi, ndáanóʼtan tɛn yɛ́lɛ́ wɔnɔ́ pəŋi. Pə́yíʼkumin, pámɛ́ʼtóm a ɔsaa a oloʼ ó Páʼtɛ́mos[4] a oʼto wóonɛ lɛ́ ndɛ alɔɛgɛ Tɔsɔm tó Táán, ndə́əsəə fɔ́lɔ́b yɛ́ Yə́sus əyíndoodi.

¹⁰A wɔɔ́s ó kɛɛ́ʼkɛn nugəm na Sə́dúk[5], Uŋun wó Ufúlúʼtú óyɛ́nyɛɛlɛ, mbáság koob nɛŋo nɛ́asáŋa na toɛn a ngim yaam wɔnɔ́ isə́ə́.

¹¹Nɛ́yɛ́ɛ əgusəə nɛɔ́nɔ́: Nkə kɛ́ɛg kɛ́ olɛɛ́ agodɛ́ʼtɛg, tilə kɛ́lɛ́ a kálaʼtaʼ, ódómɛn mogony mó pəə́liʼtiniʼ móʼtáan na móbaan móonɛ lɛ́: Yɛ́ a Ɛfɛ́ɛs, yɛ́ a Simíilinə, yɛ́ a Pɛlɛgáam, yɛ́ a Tiəʼtíil, yɛ́ a Salɛdɛ́ɛs, yɛ́ a Filədələfíi na yɛ́ a Lawodisə́ə.

¹²Mbáság kaágasɛ agodála ánɛ aa alɛɛ́ agosɔyɔ na mɛ. Ná njágásɛ́ɛ́, nyɛɛ́dála moom móʼtáan na móbaan mó ándɛ páagaábɛgan moláam kɔ a mɔɛn. Páyɛ́ɛ́lɛ moom mógo móom na kóol.

¹³Kɔ a kɛgaágadɛ kɛ́ moom móom, nyɛɛ́dála tɛn yoom kɔ na kifílí kɛ́ mɔɔd. Ayɛ́ɛ na kɛlanda kɛ́ ntaa, na kandá ɛ kóol nsúŋə́ə́n a nɛdáá.

¹⁴Ayɛ́ɛ na tuyə́ən fúlúʼtúʼtúʼtú a oʼto wɔnɔ́ ndɛb, wɔnɔ́ kɛbɛd. Əngis yə́ə́ŋ ayɛ́ɛ agonom wɔnɔ́ yug.

¹⁵Ambaan yə́ə́ŋ áyɛ́ɛ pələ́gədəgədə wɔnɔ́ kisúg kɛ́ pɔlɔ́ɔnsɛ kɛ́ póósóbíni, pámáasánɛ a yug. Nɛŋo niə́ŋ nɛ́yɛ́ɛ əgulumə wɔnɔ́ mbag ɛ məní.

¹⁶Yiíguminin muə́dədəʼ móʼtáan na móbaan a ombɔg wə́ə́ŋ ó nɛnom. Ɛyafág ɛ́ pɛdá ɛ́yɛ́ɛ agolon a unuʼ wə́ə́ŋ. Ɛyɛ́ɛ sɛábɛ́sɛábɛ, ɛgɔ́gɛ́náán toá tuim kɔŋɛʼ. Udi wə́ə́ŋ óyɛ́ɛ agonom wɔnɔ́ wɔɔ́s wó a kɛnɛŋ kɛ́ tóɛf.

¹⁷Ná njɛ́moodála, njímudə́ə́ŋə́nən sondooŋ a ambaan wɔnɔ́ mɔɔd nyɔ́ əə́ʼkugúú. Aáság kudə́əmini ombɔg wə́ə́ŋ ó nɛnom amɛ́njaábɛ́gɛn a nkó, ɔnɔ́: Odɛʼtámmána! Mɛ áa ndɛɛ́ usúid yuudi, mɛ usúgəniʼ ngim[6]

¹⁸Ndɛ nyɔ́ alɛɛ́ ongóm. Nyiígú, náa nɛ́gɔŋ yɛ́ɛnɛ ndɛ ongóm a pɛnɛŋ piim. Mɛ áa ndɛɛ́ na ilibəʼ ɛ́ kugu na ɛ́ nigúu nɛ́ pá pə́ʼkugúú.

¹⁹Wɛ, tilə anɛ́ɛ́n nkə kɛ́ olɛɛ́ agodɛ́ʼtɛg. Údilə ɔmbɔ́ nkə kɛ́ kɛ́lɛɛ́ agaáyɛ́ɛlɛ nɛ́gɔŋ, ɔmbɔ́ tɛn nkə kɛ́ kɛ́lɛ́ɛ́ kaáyɛ́lɛɛ́ a ngim.

²⁰Taa yisí yɛ́ ɛlɛɛ́ a muə́dədəʼ móʼtáan na móbaan mó wɛɛ́dála a ombɔg wáam ó nɛnom, na moom tɛn móʼtáan na móbaan mó páyɛ́ɛ́lɛ na kóol mó ándɛ páagaábɛgan moláam kɔ a mɔɛn áa yɛ́ɛnɛ ɛlɛɛ́ lɛ́: Muə́dədəʼ móom móʼtáan na móbaan mólɛ məŋun má maʼtom má mogony mó pəə́liʼtiniʼ móʼtáan na móbaan. Moom tɛn mó kaábɛgan moláam móom móʼtáan na móbaan mólɛ mogony mó pəə́liʼtiniʼ móom móʼtáan na móbaan.