Read Yambeta Yiífínínin 10 Bible Online

Yiífínínin 10 - Yambeta bible

Yiífínínin 10

¹A ngim yɛ́ɛy, mbáság kodála uŋun ó maʼtom wúmmú wó óyɛ́ɛ na toɛn wə́əgiim úsuu a mbálámɔɛn. Óyɛ́ɛ uʼkúbə́ə́n na kɛbɛd, kɛán kiə́gíngílídiə́n a oʼto wə́ə́ŋ. Udi wə́ə́ŋ óyɛ́ɛ anom wɔnɔ́ wɔɔ́s. Ambaan yə́ə́ŋ wɔnɔ́ mogon mó yug.

²Wíguminin ɛyaa ɛ́ kálaʼtaʼ igúbínə́ə́n a ombɔg, ongoo wə́ə́ŋ ó nɛnom a noom nó ɛbá fiɛ́d, ó kɛmɛs a nsí.

³Óyáág nɛŋo na toɛn wɔnɔ́ ngangó aa ɛlɛɛ́ əguumə. Əgín ná óyáág nɛŋo, mbambany ɛ́ʼtáan na ɛ́baan yaáság kudə́əŋ.

⁴Ná mbambany yɛ́ɛy ɛ́ʼtáan na ɛ́baan yiídə́əŋ, njaʼkanyɔ́ŋɛn kudilə nkə kɛ́ ɛyɛ́ɛ əgusəə mbáság koob nɛŋo níəgiim nísuu a mɔɛn nɛɔ́nɔ́ na mɛ: Udiʼtílə nkə kɛ́ pombambany póʼtáan na póbaan póonɛ puə́səə. Kɛ́lɔb əgín na wɛɛ́nyɔ́əsíŋ.

⁵Uŋun ó maʼtom wó nyɛɛ́dála oʼtɛ́lɛ́máán ongoo úmmuʼ a məní wúmmú a nsí wááság kudə́əmini ombɔg wə́ə́ŋ ó nɛnom a mɔɛn,

⁶ómácɛ́mɛ́ɛ́ a niiŋ nɛ́ Táán nyɔ́ alɛɛ́ a ɔlaa a pəliə́g. A niiŋ nɛ́ Táán nyɔ́ ayɛ́ɛ́lɛ mɔɛn na yiim yɛ́ ɛ́lɛɛ́ kɔ, nyɔ́lɛ́ nyɔ́ ayɛ́ɛ́lɛ tɛn nsí na yiim yɛ́ ɛ́lɛɛ́ kɔ, amɛ́ɛ́lɛ noom nó ɛbá fiɛ́d na yiim tɛn yɛ́ ɛ́lɛɛ́ kɔ. Uŋun ó maʼtom wóow wísə́ə́ wɔ́nɔ́: Oʼkag wúndigi kə́mmú laálá ó!

⁷Náa, əgín ná uŋun ó maʼtom wó annam áʼtáan na ábaan wə́əgəə́bə́ə́ kogo isə́ə́ yə́ə́ŋ, nkə kɛ́ kɛ́yɛ́ɛ kɛɔsɛ́gáán, nkə kɛ́ Táán yɛɛ́fɛ́ga kɛ́lɛ́ɛ́ kaáyɛ́ɛlɛ əgín wɔnɔ́ ná yiísə́ə́ kɔ kalaʼ na pəgudin pə́ə́ŋ, palɔɛgɛʼ pɛbán pə́ə́ŋ[57]

⁸Nɛŋo nɛ́ njóób níəgiim nísuu a mɔɛn nɛáság kiiʼkini kusəə nɛɔ́nɔ́ na mɛ: Tod, úsiəd kálaʼtaʼ yɛ́ɛy yɛ́ ɛlɛɛ́ nkúbínə́ə́n a ombɔg wó uŋun ó maʼtom wó údə́níí lɛ́, ongoo úmmuʼ a noom nó ɛbá fiɛ́d, wúmmú a nsí.

⁹Mbáság kaáyɛʼtɛnɛ a ɛbá yɛ́ uŋun ó maʼtom wóow, nyɔʼkɔ́ na wólɛ́ wɛ́nyɛɛ́ʼkɛn ɛyaa ɛ́ kálaʼtaʼ yɛ́ɛy. Úyínyuúlísíni wɔ́nɔ́ na mɛ: Siəd yɛ́lɛ́, ónɛ! Yaagoónɔɛn a kaadɛ! Náa, a unuʼ, yəəgusóbin wɔnɔ́ woóŋ.

¹⁰Mbáság kusiəd kálaʼtaʼ a ombɔg wó uŋun ó maʼtom, mbánɛ́. A unuʼ wáam, ɛyɛ́ɛ əgusob wɔnɔ́ woóŋ. Náa, ná nyɛɛ́mɛ́n, ɛyɛ́ɛ agono a kaadɛ káam[58]

¹¹Náa pɔ́nɔ́ na mɛ: Kíəguunə lɛ́ ólɔɛgɛnɛ na pɔɔd kə́mmú pɛbán pɛ́ Táán yɛɛ́fɛ́ga lɛ́ nyɔ́lɛ́ alɛ́ɛ́ kɛɛlɛnɛ ɛ́fɔlɛ́ ɛ́ mɔnɔŋ, na ɛ́fɔlɛ́ yɛ́ əʼkúu, na pɔɔd pá a ɛ́fɔlɛ́ yɛ́ əʼkíí, na ɛ́fɔlɛ́ ɛ́ puʼkúm.