Read Yambeta Yiífínínin 11 Bible Online

Yiífínínin 11 - Yambeta bible

Yiífínínin 11

¹Pááság kɛnyɛɛ́ʼkɛn niob nɛ́ kofɛga na nɛ́lɛ́. Nɛ́yɛ́ɛ wɔnɔ́ kingə́ŋ. Náa pɔ́nɔ́ na mɛ: «Tɛ́ɛ́mɛn ófɛga Tɛ́mpɛl ɛ Táán na kibóŋ kɛ́ pɛfɔny. Óbana tɛn pɔɔd pá pálɛɛ́ agonyáadɛ Táán kɔ[59]

²Náa, yáa ɛ Tɛ́mpɛl ngim yɛ́ ɛlɛɛ́ a táán, údi yɛ́lɛ́. Odɛfɛ́ga yɛ́lɛ́ lɛ́ páyɛ́ʼkɛn na pandɛŋ Táán. Pálɛ́ɛ́ kugíʼtən pálɛ́ɛg yɛ́ yaágoob na Táán. Pálɛ́ɛ́ kugíʼtən yɛ́lɛ́ məə́ əʼtin ábaan na mábaan[60]»

³Ayɛ́ɛ́n na tɔgɛ́ɛ́ yuudi, ɔnɔ́: Ndɛ́ɛ́ kodom pawɛ́sɛnɛg páam pábaan. Pálɛ́ɛ́ kəə́níig pilə́ə́ pɛ́ ɔndɛɛ. Pálɛ́ɛ́ kolɔɛgɛ pɛbán pɛ́ Táán a tɔ́ɔ́sɛn ɛ mədúg yɛ́ɛy mmuʼ na ɔ́ndɛd ɛ mədúg ɛ́baan na əʼtin á mədúg ádáád.

⁴Pawɛ́sɛnɛg póob pábaan áa pálɛɛ́ əʼtíŋ á olifiyə́ə ábaan na pɛa pɛ́ kudə́nigəni moláam tɛn pɛ́baan. Pə́də́ni kɔ a udi ó Sə́dúk wo nsí[61]

⁵Mɔɔd əməʼkuunə lɛ́ áboyɛ́ɛlɛ pɔ́lɛ́ kɔbɛ́, yug yáalon a nnuʼ yɔɔbɔn ná ɛ́gɔ́lɔnɛ pabɛnɛn pɔ́ɔ́bɔn. Taa, náan aa ungim nyɔ́ alɛ́ɛ́ kuunə lɛ́ áboyɛ́ɛlɛ kɔbɛ́, alɛ́ɛ́ kugu.

⁶Pógóódi toɛn tóonɛ lɛ́ pə́buəg mbálámɔɛn agɛɛlɛ lɛ́ noó núdiʼtə́əŋ a kɛnɛŋ kiim kɛ́ pə́gə́ligíí alɔɛgɛ pɛbán a niiŋ nɛ́ Táán. Pógóódi tɛn tó kɛɛlɛ lɛ́ məní máán maŋɔ́, na tó kɛɛlɛ tɛn lɛ́ mbod yɛ ntɔ́b ngim ídə́əŋ a nsí wɔnɔ́ ná páanyɔ́ŋɛn na a kɛnɛŋ kiim tɛn kɛ́ páanyɔ́ŋɛn[62]

⁷Ná pálɛ́ɛ́ koman kɛɛ́ʼkɛn mbaasɔ́, nnyam yɛ́ ɛlɛ́ɛ́ kiim ɛ́lon a niɛ́ nɛ́ nɛ́lɛɛ́ miɛ́ɛ́ŋ, ɛlɛ́ɛ́ koboónɔɛyɛ, ɛ́ɛboónyɔŋ, ɛ́ɛboyóóna[63]

⁸Pɛlóŋ pɛɔ́bɔn pɛ́lɛ́ɛ́ kɛɛn a kɛdom kɛ́ a pálɛ́ɛg yɛ́ nkóón, kɛnɔ kɛ́ pɛ́ɛ́báŋan Sə́dúk wɔɔbɔn Yə́sus a ɔmbásá. Pálɛ́ɛg ɛgo yɛ́ɛy pɛ́ɛ́lóg əngiŋ á komoósoolɛ pɔ́nɔ́: Sodóom, oó lɛ́ Əsíibtə[64]

⁹Pɔɔd pá a mɔnɔŋ miim, na a əʼkíí əngim, na a əʼkúu əngim pálɛ́ɛ́ kiimən. Pálɛ́ɛ́ kɛɛlɛ mədúg mádáád na kɛsom páadɛ́ʼtɛg pɛlóŋ pɛɔ́bɔn, pə́diə́líʼtíníí lɛ́ pə́buúni.

¹⁰Pɔɔd pá a nsí pálɛ́ɛ́ kɔnyɔ́ga na nkə kɛ́ kɛ́lɛ́ɛ́ koboóboanɛɛ́. Pálɛ́ɛ́ kɛɛn a tɔnyɔ́g, pɔsɔ́g póonɛ páagɛɛ́ʼkɛn pɔsɔ́g pə́mmú moom. Pɔsɔ́g tɛn póob páaboyɛ́ʼkɛn tɛn pɔ́lɛ́ lɛ́ palɔɛgɛʼ pɛbán pá Táán póob pábaan pá páyɛ́ɛ əgubuyə́bi pə́ndigi.

¹¹Náa, ná mədúg móom mádáád na kɛsom mɛ́ɛ́mán, uŋun wó ɔlaa wó úyíím ná Táán alɛɛ́ wɛ́ɛ́sɔ́d a pɔ́lɛ́, pááság kodɛ́ɛman[65] Ungim nyɔ́ ayɛ́boodála, ɔyɔ́ɔ́ŋ wɛɛ́y kɛ́fɔlɛ́.

¹²Palɔɛgɛʼ pɛbán pá Táán póob pábaan pááság koob nɛŋo níəgiim nísuu kɔ́gɔ́ɔg a mɔɛn nɛɔ́nɔ́ na pɔ́lɛ́: «Mɛ́naan óo! Púim póbag ó!» Pɛ́ɛ́bág a mɔɛn pɔ́lɛ́ a kɛbɛd a kaadɛ[66] Páyɛ́ɛ agobag náan pabɛnɛn pɔ́ɔ́bɔn páabodɛ́ʼtɛg.

¹³Əgín a kɛnɛŋ tɛn kɛ́go kɛ́ɛg, nsí iyə́nyígídíí na toɛn. Ná nsí iyə́nyígídíí náan, kɛowád kɛ́ pálɛ́ɛg kímuʼ kííbúmbug, tɔ́ɔ́sɛn ɛ pɔɔd ɛ́ʼtáan na ɛ́baan yəə́wú. Pá pə́diʼkə́əgúú pɔ́yɔ́ɔ́ŋ ngililiʼ. Páyɛ́ʼkɛn nugəm na Táán nyɔ́ alɛɛ́ a mɔɛn.

¹⁴Ntɔ́b yɛ annam ábaan áa yɛ́ɛy yaáʼkosánɛ́ɛ́. Taa, kɛnɛŋ sɔɔŋ yɛ annam ádáád yíim ó!

¹⁵Uŋun ó maʼtom wó annam áʼtáan na ábaan wááság kogo tɛn yə́ə́ŋ isə́ə́. Pɛdám pɛ́ aŋŋo pɛáság kosɔyɛd kɔ́gɔ́ɔg a mɔɛn pɛɔ́nɔ́: «Nɛlaamɛʼ nɛ́ a nsí nɛándagoob nɛ́gɔŋ yɛ́ɛnɛ na Sə́dúk wəəs óo! Na Məsíi yəəŋ yɛ́ əyííyid ó! Nɛlaamɛʼ niə́ŋ nɛ́lɛ́ɛ́ kɛɛn a pəliə́g[67]!»

¹⁶Pasaá pá pɔɔd niʼtin na pə́niʼ pá pííləndinin a udi ó Táán a toʼkóm toɔ́bɔn tó puʼkúm pááság kudə́əŋ pigúbíʼkub. Páyɛ́ɛ agonyáadɛ Táán

¹⁷pɔ́nɔ́: Sə́dúk Táán o toɛn tuim, tɛmágoyɛ́ʼkɛn pisoyidiʼ. Wɛ nyɔ́ olɛɛ́, wɛ nyɔ́ oyɛ́ɛ. Tɛagonyáadɛ lɛ́ woóloodi toɛn toáŋ tó togóón agɛɛlɛ lɛ́ ógon Nɛlaamɛʼ nɛáŋ.

¹⁸Mɔnɔŋ máyóób ilúún na wɛ. Náa, kuliŋ koáŋ áa kúmólódíí na pɔ́lɛ́. Kɛnɛŋ kɛ́ koyɔmɛ pá píígú aa kɛ́ɛnɛ kiə́ʼkiigií. Kɛnɛŋ kɛ́ kɔsáábɔn pəgudin pááŋ, palɔɛgɛʼ pɛbán pááŋ na pá pálɛɛ́ agoob na wɛ, na pá pálɛɛ́ agoódammana, pɛ́ɛn ɔmbɔ́ pasaá óo, ɔmbɔ́ poómbaa, kɛnɛŋ kɛ́ pɛsáábɔ́n áa kɛ́ɛnɛ kiə́ʼkiigií. Taa, kɛnɛŋ kɛ́ kuwíiyi pá pálɛɛ́ əwíiyi nsí aa kɛ́ɛnɛ kiə́ʼkiigií[68]

¹⁹Uʼkóó ó Táán wó ólɛɛ́ kɔ́gɔ́ɔg a mɔɛn wááság kəə́buən. Igóó yɛ́ yóoloodi nɛsɔ́g nɛ́ Táán yɛɛ́lád na pɔɔd yááság kolon kɔ a Tɛ́mpɛl. Əə́bə́ə́ kubəgə a mbálámɔɛn, aŋŋo yáasáŋa, pombambany púədə́əŋən, nsí imə́nyígídíí, noó nó aʼtáán nuə́də́əŋ.