Read Yambeta Yiífínínin 12 Bible Online

Yiífínínin 12 - Yambeta bible

Yiífínínin 12

¹Kiʼtóʼtólog kɛ́ kɛálɛ́ʼkán kɛ́ɛ́lón a mbálámɔɛn: Ɔʼkɛ́ɛd yɛɛ́lón kɔ unnígə́ə́n wɔɔ́s wɔnɔ́ kilə́ə́, wəə́ a ambaan yə́ə́ŋ, nodám nó puʼkúm a oʼto wə́ə́ŋ na muə́dədəʼ mówád na móbaan.

²Ɔʼkɛ́ɛd ogo nyóon ayɛ́ɛ na nium. Ayɛ́ɛ agaányam lɛ́ ayɛ́ɛ agoob kogany. Ɔsánɛ oyɛ́ɛ wə́ʼkumuúgumin.

³Kɛálɛ́ʼkán tɛn kímmú kɛáság kolon əgín kɔ a mbálámɔɛn: Kɛa kɛ́ kɛdám kɛ́ nnyam kɛ́awɛ́ɛ́la póʼkóʼkóʼkó wɔnɔ́ yug. Pálɛ agodɔ́ŋɔn nnyam ɛgo yɛ́ɛy lɛ́ tɛlagɔ́ɔŋ. Ɛyɛ́ɛ na nto ɛ́ʼtáan na ɛ́baan, modɔŋ mówád. Ɛ́nɛ́ oʼto óyɛ́ɛ na nodám nó puʼkúm[69]

⁴Tɛlagɔ́ɔŋ yɛ́ɛy ɛyóólɛd kɛsaa kɛ́ muə́dədəʼ mó a mbálámɔɛn kímuʼ a pɛsaa pɛ́dáád na unni wə́ə́ŋ, əə́súb a nsí. Ɛyɛ́ɛ́n adɛ́lɛm a udi wó ɔʼkɛ́ɛd nyóon nyɔ́ ayɛ́ɛ a ɔsánɛ lɛ́ əgín ná əə́bíən, ɛ́nɛ mɔɔ́n[70]

⁵Ɔʼkɛ́ɛd nyóon yiíbíən mɔɔ́n ɔnɔ́mɛɛd. Nyɔ́lɛ́ aa alɛ́ɛ́ kolamɛɛ́ mɔnɔŋ má a nsí miim. Alɛ́ɛ́ kolaamɛ a nɛsɔ́njaa a mɔɛn, áyɛɛn na pɔ́lɛ́ a kɛnɔ kɛ́ nníɛn ɛlɛɛ́[71] Náa, píísiə́d mɔɔ́n nyóon pááság kɛɛn na nyɔ́lɛ́ a ɛbá ɛ́ Táán, kɛnɔ kɛ́ noʼkóm nuə́ŋ nó nɛlaamɛʼ nólɛɛ́.

⁶Ɔʼkɛ́ɛd nyɔ́lɛ́ yɛɛ́dɛ́da agɛɛn a kɛnɔ kɛ́ kifələ́ə́n, kɛnɔ kɛ́ Táán əyímusóbíníni oʼkɔɔ lɛ́ ná kɔ́gɔ́ɔg ámoomɛ́nɛ súʼtə́ə́ tɔ́ɔ́sɛn ɛ mədúg mmuʼ na ɔ́ndɛd ɛ́baan na əʼtin á mədúg ádáád.

⁷Pɛdá pɛáság kudə́əŋ anɛ́ɛ́n kɔ́gɔ́ɔg a mbálámɔɛn. Nkúm ɛ məŋun má maʼtom yimmú niiŋ lɛ́ Mɛ́ʼkayɛ́ɛl[72], ɛyɛ́ɛ na məŋun mə́ə́ŋ má maʼtom agonɔɛyɛ tɛlagɔ́ɔŋ. Tɛlagɔ́ɔŋ ɛyɛ́ɛ agoboónɔɛyɛ tɛn pɔ́lɛ́ na mə́ə́ŋ məŋun má maʼtom.

⁸Náa, Mɛ́ʼkayɛ́ɛl na məŋun mə́ə́ŋ má maʼtom, pɛ́ɛ́nyɔ́ŋ tɛlagɔ́ɔŋ. Tɛlagɔ́ɔŋ ɛdɛʼkɛ́ɛ kə́mmú na oʼkɔɔ a mɔɛn. Ɔmbɔ́ tɛn məŋun mə́ə́ŋ má maʼtom.

⁹Na nyɔ́lɛ́ na məŋun mə́ə́ŋ má maʼtom, páyɛ́boodó a táán. Yɛ́lɛ́ kiʼtóg kɛ́ tɛlagɔ́ɔŋ, uʼkud ó kalaʼ. Yɛ́lɛ́ yɛ́ pálɛɛ́ agodɔ́ŋɔn lɛ́ Omɔlɛɔ́g, ɔmbɔ́ lɛ́ Sáʼtan. Yɛ́lɛ́ yɛ́ ɛlɛɛ́ əgulígə pɔɔd pá a nsí ngim. Ɛɛ́ɛ, páyɛ́moodó a nsí na məŋun mə́ə́ŋ má maʼtom[73]

¹⁰Mbáság koob nɛŋo nɛ́ɔsɔyɔ kɔ́gɔ́ɔg a mbálámɔɛn nɛɔ́nɔ́: Táán ɔmɔ́ɔ́yɛ pɔɔd nɛ́gɔŋ, oóloodi toɛn tuə́ŋ. Nɛ́gɔŋ yɛ́ɛnɛ aa aágon Nɛlaamɛʼ niə́ŋ! Nɛ́lɛ nɛ́gɔŋ a ombɔg ó Məsíi wəəŋ nyɔ́ əyííyid lɛ́ páʼkomoodo nyɔ́ ayɛ́ɛ ɔsɔ́mɛna pomóŋŋí pə́ə́s pəə́liʼtiniʼ. Páʼkomoodo a táán, əndigi tɛn kə́mmú a mɔɛn, ogo nyɔ́ ayɛ́ɛ agodɛ́lɛman a udi ó Táán na udúg na wɔɔ́s agobosɔ́mɛna[74]

¹¹Náa, maŋɔ́ má mɔɔ́n o nodóm áa máyɛ́ɛ́lɛ lɛ́ pomóŋŋí pə́ə́s pəə́liʼtiniʼ pámoónyɔŋ. A oʼto tɛn wó mbaasɔ́ yɛ́ pɛ́ɛ́dɛ́lɛ́mɛn Tɔsɔm tó Táán áa páyɛ́moónyɔ́ŋ. Pádɛʼkáamaʼkɛ ɔlaa wɔ́ɔ́bɔn, páʼtammána kugu.

¹²Kólɛ́ aa pugódíí lɛ́ pɔ́nyɔ́ga, wɛ mbálámɔɛn ná pəŋi pá polɛɛ́ kɔ! Náa, sɔ́ɔ́lɛʼ igə na wɛ nsí! Sɔ́ɔ́lɛʼ igə na noom nó ɛbá fiɛ́d! Omɔlɛɔ́g əmíim ə́suu káag ná polɛɛ́. Alɛ na ilúún yiim lɛ́ aálɛŋ lɛ́ mədúg mə́ə́ŋ mə́ndigi miíŋ.

¹³Ná tɛlagɔ́ɔŋ ɛyálɛ́mbɛ́dɛ́ɛ́ lɛ́ páʼkomoodo a nsí, yɛɛ́láʼtɛ ɔʼkɛ́ɛd nyóon nyɔ́ yiíbíən mɔɔ́n ɔnɔ́mɛɛd.

¹⁴Náa, páyɛ́ʼkɛn nfaáan ɛ́baan wɔnɔ́ yɛ onom o kifíŋ na ɔʼkɛ́ɛd ogo nyóon. Páyɛ́moyɛ́ʼkɛn yɛ́lɛ́ lɛ́ ná áfɛ́ɛ, yɛ́ɛn a kɛnɔ kɛ́ kifələ́ə́n. Kɛnɔ kɛ́ píísóbíni lɛ́ kiə́ŋ. Laálá na uʼkud. Pálɛ́ɛ́ komoomɛ́nɛ kɔ́gɔ́ɔg pɛag pɛ́dáád na kɛsom[75]

¹⁵Uʼkud wɛ́ɛ́nɔ́da məní a unuʼ. Máyɛ́ɛ agɛɛn wɔnɔ́ noom a ngim yɛ ɔʼkɛ́ɛd nyóon agɛɛlɛ lɛ́ mə́musúʼkin.

¹⁶Náa, nsí ɛyɔ́ɔ́yɛ ɔʼkɛ́ɛd. Iyə́buə́níí yaáság komɛn noom nóon nó tɛlagɔ́ɔŋ yɛɛ́nɔ́da.

¹⁷Na ilúún yɛ́ɛy yiim yɛ́ tɛlagɔ́ɔŋ yiígóodi na ɔʼkɛ́ɛd nyóon, iyúúlíni agɛɛn anɔɛyɛ pɔɔ́n pá ɔʼkɛ́ɛd nyóon pə́mmú pɛ́ndɛ́ŋ. Pɔɔ́n págo póob aa póonɛ pálɛɛ́ pɔɔd pá páagɛɛ́ngɛg pɛcɛm pɛ́ Táán, pə́əyə́ən pafɔ́lɔ́b pá Yə́sus yɛɛ́lónɛ.

¹⁸Tɛlagɔ́ɔŋ ɛyɛ́ɛ́n adɛ́lɛm a kɛnɔ kɛ́ ɔsáyɛ́n óyɛ́ɛ, a ɛbá ɛ́ noom nó ɛbá fiɛ́d.