Read Yambeta Yiífínínin 13 Bible Online

Yiífínínin 13 - Yambeta bible

Yiífínínin 13

¹A ngim yɛ́ɛy mbáság kodála nnyam yəə́giim ɛ́lon a noom nó ɛbá fiɛ́d. Ɛyɛ́ɛ na nto ɛ́ʼtáan na ɛ́baan, modɔŋ mówád. Ɛ́nɛ́ ɛdɔŋ ɛ́yɛ́ɛ na nodám nó puʼkúm, əngiŋ əʼtiídílə́ a nto. Əngiŋ yɛ́ɛy ayɛ́ɛ pɛdog na Táán.

²Nnyam ɛgo yɛ́ nyɛɛ́dála yɛɛ́ŋwáŋanan ngɔʼ. Ambaan yə́ə́ŋ áyɛ́ɛ wɔnɔ́ á ŋəŋúug Unuʼ wə́ə́ŋ wɔnɔ́ wó ngangó. Tɛlagɔ́ɔŋ yaáság komoyɛ́ʼkɛn toɛn wɔnɔ́ nyɔ́lɛ́nyɔ́amɔɛ́d. Ɛyɛ́moyɛ́ʼkɛn tɛn noʼkóm nuə́ŋ nó nɛlaamɛʼ, ɛmáamoyɛ́ʼkɛn tɛn ɛ́fɔlɛ́ ɛ́ nɛlaamɛʼ[76]

³Oʼto wó nnyam yɛ́ɛy úmmuʼ óyɛ́ɛ wɔnɔ́ pə́yímubúəd lɛ́ ígu. Náa, nfə́ŋ yəəŋ ɛyɛ́ɛ yoóʼkoom. Pɔɔd pá a nsí ngim páyáwándáá, pááság kuyə́ən nnyam.

⁴Ungim ayɛ́ɛ əgiim ədúmə əndu a udi ó tɛlagɔ́ɔŋ lɛ́ yiísiə́d ngab ɛ toɛn tuə́ŋ agɛɛ́ʼkɛn na nnyam. Páyɛ́ɛ əgiim ədúmə tɛn əndu a udi wó nnyam, pə́əsəə pɔ́nɔ́: Ánɛ aa alɛɛ́ náanɛ wɔnɔ́ nnyam əə́? Ánɛ aa alɛɛ́ ogonɔɛyɛ pɛdá na yɛ́lɛ́ ə́?

⁵Páyɛ́moyɛ́ʼkɛn toɛn tó kosɔyɔ agɛɛlɛ lɛ́ yáágany, ádóga Táán. Páyɛ́moyɛ́ʼkɛn tɛn toɛn a əʼtin á məə́ ábaan na məə́ mábaan lɛ́ yɛ́ɛlɛ nkə kiim kɛ́ aányɔ́ŋɛn.

⁶Yəə́bə́ə́ kodóga Táán, yɔɔ́sɔyɔ niiŋ niə́ŋ kɔbɛ́, na kɛnɔ kɛ́ Táán alɛɛ́ kɔ kɛ́, na pɔɔd piim pá pálɛɛ́ kɔ a mɔɛn kɛ́.

⁷Páyɛ́moyɛ́ʼkɛn toɛn lɛ́ ɛ́nɔɛyɛ ndɛg ɛ Táán, ɛ́ɛboónyɔŋ[77] Páyɛ́moyɛ́ʼkɛn tɛn toɛn lɛ́ álaamɛ əʼkúu əngim, na pɔɔd piim, na əʼkíí əngim, na mɔnɔŋ miim.

⁸Pɔɔd piim pá a nsí pálɛ́ɛ́ kudum əndu a udi wə́ə́ŋ agomonyáadɛ. Áay lɛ́ ungim nyɔ́ niiŋ niə́ŋ nɛ́dɛɔ́gɔ nidilídə́ə́n a kálaʼtaʼ yɛ ɔlaa pɛ́go pɛ́ nsí ɛyásáŋɛ́ɛ́. Kálaʼtaʼ ɛgo yɛ́ɛy ɛlɛ ɛ Mɔɔ́n o nodóm nyɔ́ páyóón.

⁹Nyɔ́ alɛɛ́ na ntóɛŋ ɛgoob, yóób lɛ́:

¹⁰Mɔɔd nyɔ́ alɛɛ́ lɛ́ alɛ́ɛ́ kosɔd a yoog yɛ njaan, alɛ́ɛ́ kosɔd a yɛ́lɛ́. Nyɔ́ alɛɛ́ lɛ́ pálɛ́ɛ́ koon na ɛyafág ɛ́ pɛdá, pálɛ́ɛ́ komoyóon na yɛ́lɛ́[78] Kólɛ́ aa ndɛg ɛ Táán igódíí lɛ́ ɛ́nóʼtan, idindiógi ongoo a kəə́liʼtiniʼ.

¹¹A ngim yɛ́ɛy, mbáság kodála nnyam yimmú yəə́giim ɛ́lon a nsí. Ɛyɛ́ɛ na modɔŋ móbaan wɔnɔ́ mó mɔɔ́n o nodóm. Náa, ɛyɛ́ɛ agosɔyɔ wɔnɔ́ tɛlagɔ́ɔŋ.

¹²Yiígóodi toɛn tó nnyam ɛ na oʼto na oʼto tuim. Ɛyɛ́ɛ əgugud na toɛn tógo tóod a udi wó nnyam yɛ́ɛy. Ɛyɛ́ɛ́lɛ lɛ́ nsí ngim na ungim agá nyɔ́ alɛɛ́ kɔ, ə́dúmin nnyam yɛ́ɛy əndu agonyáadɛ. Nnyam ɛgo yɛ́ɛy yɛ́ píídúmin əndu, ɛyɛ́ɛ yɛ́ pííbuə́d a oʼto lɛ́ ígu. Nfə́ŋ ɛyɛ́ɛ yoóʼkoom.

¹³Nnyam ɛgo yɛ́ɛy yɛ annam ábaan ɛyɛ́ɛ́lɛ pɛa pɛ́ pɛbán pɛ́gosan mɔɔd oʼto. Ɛyɛ́ɛ́lɛ sɛ́ɛb lɛ́ yug yíim ísuu a mɔɛn əgudə́əŋ a nsí, pɔɔd páadɛ́ʼtɛg.

¹⁴Ɛyɛ́ɛ́lɛ tɛn piə́wúunəniʼ pɛ́ pɛbán pɛ́ páyɛ́moyɛ́ʼkɛn toɛn lɛ́ yɛ́ɛlɛ a udi wó nnyam ɛ na oʼto na oʼto, ɛmɛ́ɛ yɛɛlɛ lɛ́ pɔɔd pá a nsí pə́nim ngə́. Yɛɛ́bód ɛmɛ́ɛ́lɛ lɛ́ pɔɔd pámaaŋan kílíngə́lingə a kɛŋwáŋánán kɛ́ nnyam yɛ́ pííbúəd na ɛyafág ɛ́ pɛdá lɛ́ ígu, náa ɛlɛɛ́ a ɔlaa.

¹⁵Páyɛ́ʼkɛn nnyam yɛ annam ábaan yɛ́ɛy toɛn lɛ́ yɛ́ɛlɛ lɛ́ kílíngə́lingə kɛ́ɛg kɛ́ kɛ́yɛ́ɛ a kɛŋwáŋánán kɛ́ nnyam ɛ na oʼto na oʼto kíɛn a ɔlaa, kíbə́ə́ kosɔyɔ ná kiɛ́ʼkɛn toɛn lɛ́ póóna ungim nyɔ́ ayɛ́ɛ agosáŋɛnɛ kumudúmin əndu agomonyáadɛ.

¹⁶Yɛɛ́fány lɛ́ ungim, yɛɛn ɔmbɔ́ moóngaa oó lɛ́ osaá, ɔmbɔ́ pɔɔd pá tugúm oó lɛ́ pasɔ́gasɔ́gá, ɔmbɔ́ pɛɔ́lɛ́ oó lɛ́ pá pɔ́dɛɔ́gɔ pɛɔ́lɛ́, ungim yɛ́ɛn na kɛbɛɛ a ombɔg ó nɛnom, ɔmbɔ́ lɛ́ a udi.

¹⁷Mɔɔd adiɛnɛn na kɛbɛɛ kɛ́ɛg, ɔdɛɔ́gɔ ogowɛɛn yoom, andɛg tɛn. Niiŋ nɛ́ nnyam, oó lɛ́ nɔ́mbɔʼ ɛ niiŋ niə́ŋ áa ɛyɛ́ɛ kɛbɛɛ kɛ́go.

¹⁸Áanɛ kɛ́lɛ kɛbán kɛ́ nsiŋ. Nyɔ́ alɛɛ́ na nsiŋ yɔ́ɔŋ yisí yɛ́ ɛlɛɛ́ kɔ a nɔ́mbɔʼ yɛ nnyam yɛ́ɛy lɛ́ ɛlɛ nɔ́mbɔʼ yɛ́ yəə́səə niiŋ nɛ́ mɔɔd. Ɛlɛ ɔ́ndɛd ɛ́ʼtáan na úmmuʼ na əʼtin ádáád na móʼtáan na úmmuʼ.