Read Yambeta Yiífínínin 14 Bible Online

Yiífínínin 14 - Yambeta bible

Yiífínínin 14

¹Mbáság kiiʼkini kodɛ́ʼtɛg kə́mmú. Nyɛɛ́dála Mɔɔ́n o nodóm alɛ oʼtɛ́lɛ́máán a oʼkon ó Siyɔ́ɔŋ a mɔɛn. Ayɛ́ɛ kɔ na ɔ́ndɛd ɛ tɔ́ɔ́sɛn na əʼtin á tɔ́ɔ́sɛn ə́niʼ, na tɔ́ɔ́sɛn ɛ pɔɔd íniʼ pá páyɛ́ɛ na niiŋ niə́ŋ, na nɛ́ Sɛ wəəŋ nidilídə́ə́n a udi[79]

²Njóób nɛŋo níəgiim nɛ́lon kɔ́gɔ́ɔg a mbálámɔɛn. Nɛ́yɛ́ɛ əgulumə wɔnɔ́ mbag ɛ́ məní, wɔnɔ́ pombambany aa pólɛɛ́ əgudə́əŋən na toɛn. Nɛŋo nɛ́ njóób nɛ́yɛ́ɛ wɔnɔ́ molóŋ áa pɔɔd pálɛɛ́ agogo, náa mólɛɛ́ agodaŋ.

³Ɛ́fɔlɛ́ ɛ́ pɔɔd yɛ́ɛy yɛ́dɛ́lɛmɛm a udi ó noʼkóm nó nɛlaamɛʼ, na a udi tɛn ó pasaá pá pɔɔd póob na ponyam póob púniʼ. Páyɛ́ɛ ədúmə kɛlɛ́ɛ́ kɛ́ kɛwa. Mɔɔd na mɔɔd adɛʼkɛ́ɛ ogaaʼkan kudúmə kɛlɛ́ɛ́ kɛ́go ná kɛ́sánɛn əgín lɛ́ ɔ́ndɛd ɛ tɔ́ɔ́sɛn mmuʼ, na əʼtin á tɔ́ɔ́sɛn ábaan, na tɔ́ɔ́sɛn ɛ pɔɔd íniʼ pá Mɔɔ́n o nodóm ayááŋɛn a nsí.

⁴Págo póob pə́diʼkə́əbúlimən na pagɛ́ɛd, pə́yə́gə́ʼkíí. Pálɛ əguyə́njən Mɔɔ́n o nodóm kɛnɔ kiim kɛ́ amɛ́ɛn. Páyɛ́bowɛ́ɛ́na a kɛgaágadɛ kɛ́ pɔɔd agɛɛlɛ lɛ́ pɛ́ɛn pɔɔd pá na oʼto na oʼto págoʼtɔm kɛɛ́ʼkɛn na Táán pɔ́lɛ́ ná Mɔɔ́n o nodóm.

⁵Pɛnyaʼ pɛ́dɛ́njag kolon a nnuʼ yɔɔbɔn[80] Pɔ́dɛɔ́gɔ na yoom yɛ́ mɔɔd alɛɛ́ ogoboóbɛn a yɛ́lɛ́.

⁶A ngim yɛ́ɛy, mbáság kodála uŋun ó maʼtom wúmmú wáafɛ́ɛ́ kɔ a mɔɛmɔɛ́n. Óyɛ́ɛ kɔ́gɔ́ɔg laálá a mɔɛn. Óyɛ́ɛ na Tɔsɔm Tólaŋ tó tólɛɛ́ a pəliə́g. Wígóodi lɛ́ ólaamɛnɛ ungim nyɔ́ a nsí tólɛ́. Áay lɛ́ na pɔɔd pá a mɔnɔŋ miim, na a əʼkúu əngim, na a əʼkíí əngim, na mbod ngim.

⁷Uŋun ó maʼtom wóow óyɛ́ɛ əgusəə nɛŋo a mɔɛn wɔ́nɔ́: Tammánáan Táán! Ɛ́moyɛ́ʼkɛ́naan nugəm lɛ́ kɛnɛŋ kiə́ʼkiig kɛ́ ɔɔ́ndɔyɔmɛɛ́ pɔɔd. Túmə́ən əndu agomonyáadɛ, nyɔ́lɛ́ nyɔ́ ayɛ́ɛ́lɛ nsí na mɔɛn, na noom nó ɛbá fiɛ́d kɛ́, na musim mó puní muim.

⁸Uŋun ó maʼtom wúmmú wó annam ábaan wááság kuyə́əni sɔ́g nyóon o na oʼto na oʼto, wɔ́nɔ́: Pabɛlɔ́ɔn yəə́də́əŋ ó! Pabɛlɔ́ɔn, pálɛ́ɛg yɛ́ nkóʼkóón, yəə́də́əŋ! Yɛ́lɛ́ yɛ́ yɛɛ́ŋoɛ́yánɛ pɔɔd pá a mɔnɔŋ miim maloʼ má nɛbambɛɛ niə́ŋ nɛ́ toɛn, pámáaŋwaŋ, yəə́də́əŋ[81]!

⁹Uŋun ó maʼtom tɛn wúmmú, sɔ́g wo annam ádáád wááság kuyə́əni tɛn wóow. Wísə́ə́ nɛŋo a mɔɛn wɔ́nɔ́: Nyɔ́ əə́dúmin nnyam na kílíngə́lingə kiə́ŋ əndu agomonyáadɛ, nyɔ́ alɛɛ́ ommágámáán na kɛbɛɛ kiə́ŋ a udi, ɔmbɔ́ lɛ́ a ombɔg,

¹⁰nyóon alɛ́ɛ́ koŋo tɛn maloʼ má a ilúún ɛ́ Táán! Pálɛ́ɛ́ kɛɛg mɔ́lɛ́ a kilən kɛ́ ilúún ɛ́ Táán, fiɛ́d məbuúbúlə́ na yoom yɛ́ndɛ́ŋ. Ungim nyɔ́ alɛɛ́ agɛɛlɛ náan alɛ́ɛ́ kaánɛ a udi ó məŋun má maʼtom má málɛɛ́ tə́ngə́d lɛ́ máagoob na Táán na a udi ó Mɔɔ́n ó nodóm. Pálɛ́ɛ́ kaánɛ náan a yug yɛ́ ndus yáalola[82]

¹¹Moógin má yug yɛ́ ɛ́lɛ́ɛ́ kobogɔ́lɔnɛɛ́ málɛ́ɛ́ kobag a mɔɛn a pɛnɛŋ piim[83] Póob pá píídúm əndu a udi wó nnyam na ó kílíngə́lingə kiə́ŋ, na pá pálɛɛ́ na kɛbɛɛ kɛ́ niiŋ niə́ŋ pádɛndɛ́ɛ́ kɛɛn na kioyig na wɔɔ́s wɔnɔ́ na udúg.

¹²Kólɛ́ aa pá pálɛɛ́ agoob na Táán, pá pálɛɛ́ agɛɛlɛ nkə kɛ́ pɛcɛm piə́ŋ pɛ́lɛɛ́ əgusəə, pɔ́lɛ́ pá páágɛ́nɛ́ɛ́ oʼto na Yə́sus, pógódíí lɛ́ pánóʼtan.

¹³Mbáság koob nɛŋo nɛ́ɔsɔyɔ na mɛ. Nɛ́yɛ́ɛ əgiim nísuu a mɔɛn, nɛɔ́nɔ́: Tilə wɔʼkɔ́: Əgəə́bə́ə nɛ́gɔŋ, kɔŋɛʼ igə na pá píígú pɔ́lɛ́ a pigólí pɛ́ Sə́dúk! Uŋun wó Ufúlúʼtú ólɛ əgusəə wɔ́nɔ́: Ɛɛ́ɛ óo! Kɛ́lɛ fɔ́lɔ́b kɔŋɛʼ na pɔ́lɛ́. Pálɛ́ɛ́ kɔɔŋ kioyig a pɛnasáŋ pɛ́ pigólí pɛ́ páyɛ́ɛ́lánɛ. Kɔŋɛʼ koɔ́bɔn kuim kó páyɛ́ɛ́lánɛ kólɛ́ɛ́ kubuyə́ən a nsun.

¹⁴Mbáság kiiʼkini kodɛ́ʼtɛg kə́mmú: Nyɛɛ́dála kɛbɛd fúlúʼtúʼtúʼtú. Yoom ɛ́yɛ́ɛ kɔ iləndínə́ə́n a kɛbɛd. Ɛ́yɛ́ɛ na kɛŋwáŋánán kɛ́ mɔɔd[84] Mɔɔd ogo yiíníigin nodám nó puʼkúm a oʼto, nodám nó kóol. Ayɛ́ɛ na ɛyafág ɛ́ masáŋ má ngəŋ ɛgɔ́gɛ́náán kɔŋɛʼ a ombɔg.

¹⁵Uŋun ó maʼtom wúmmú wááság kiim ólon a uʼkóó. Wísə́ə́ nɛŋo a mɔɛn na mɔɔd nyɔ́ yiíləndinin a kɛbɛd wɔ́nɔ́ na nyɔ́lɛ́: Siəd ɛyafág yááŋ ɛ́ masáŋ má ngəŋ wə́bə́ə́ kosaŋ. Moom moáʼkogon, kɛnɛŋ kɛ́ kosaŋ kiə́ʼkiig[85]

¹⁶Nyɔ́ yiíləndinin a kɛbɛd aáság kusiəd ɛyafág yə́ə́ŋ ɛ́ masáŋ, aásáŋ moom mó a nsí.

¹⁷A ngim yɛ́ɛy, uŋun ó maʼtom tɛn wúmmú wááság kiim ólon a uʼkóó wó ólɛɛ́ a mɔɛn. Wólɛ́ tɛn óyɛ́ɛ na ɛyafág ɛ́ masáŋ ɛgɔ́gɛ́náán kɔŋɛʼ.

¹⁸Wúmmú tɛn wó óyɛ́ɛ alaamɛ yug wááság kiim ólon a kibóŋ kɛ́ pɛfɔny. Wísə́ə́ nɛŋo a mɔɛn na nyɔ́ ayɛ́ɛ na ɛyafág ɛ́ masáŋ ɛgɔ́gɛ́náán, wɔ́nɔ́ na nyɔ́lɛ́: Siəd ɛbag yááŋ ɛ́ nɛboʼ, óbo piín pɛ́ a nsí lɛ́ pɛáʼkowɛ́ɛ.

¹⁹Uŋun ó maʼtom wááság kusiəd ɛbag yə́ə́ŋ ɛ́ nɛboʼ wááboó piín pɛ́ a nsí, wə́ə́sugin nyiín a nɔsá nó nogóón, nɔsá nó ilúún ɛ́ Táán.

²⁰Pááság konɔg nyiín a nɔsá. Nɔsá nóon nóyɛ́ɛ a nɛlon nɛ́ pálɛ́ɛg. Maŋɔ́ má máyɛ́ɛ agolon kɔ a nɔsá máyɛ́ɛ əgusuu nɛɛ́ŋ nɛɛ́ŋ nɛɛ́ŋ wɔnɔ́ osom ó məní. Mɛ́ɛ́dáŋána kaáyɛn ɔ́ndɛd ɛ paʼkɛ́lomɛ́ʼtaʼ ɛ́dáád. A kulim kuə́ŋ, máyɛ́ɛ mágomɛn nnyambɛlɛʼ súʼtə́ə́ a kɛnág, əgín oʼto wólɛ́ na wólɛ́ aa wóolɔbɛɛ́ a táán[86]