Read Yambeta Yiífínínin 15 Bible Online

Yiífínínin 15 - Yambeta bible

Yiífínínin 15

¹A ngim yɛ́ɛy, nyɛɛ́dála kɔ́gɔ́ɔg a mbálámɔɛn, kɛálɛ́ʼkán kímmú. Kɛ́yɛ́ɛ wándáfúul ɛ kɛa kɛ́ kiʼtóg kɛ́ yoom: Məŋun má maʼtom máʼtáan na mábaan mííguminin ntɔ́b tɛn ɛ́ʼtáan na ɛ́baan. Ntɔ́b yɛ́ɛy ɛyɛ́ɛ las yɛ ntɔ́b lɛ́ a yɛ́lɛ́ aa Táán ayɛ́ɛ lɛ́ ə́yibənən kuloodi ilúún yə́ə́ŋ.

²Mbáság kodála yoom wɔnɔ́ noom nó ɛbá fiɛ́d nóanom wɔnɔ́ məə́. Nóyɛ́ɛ nubulə́búlə́ na yug. Nyɛɛ́dála tɛn pɔɔd pá pɛ́ɛ́nyɔ́ŋ nnyam na kílíngə́lingə kiə́ŋ, na nɔ́mbɔʼ ɛ niiŋ niə́ŋ. Píídə́ni kɔ a noom nóon nó nóyɛ́ɛ agonom wɔnɔ́ məə́. Píígóodi a ɔmbɔg, molóŋ mó Táán ayɛ́boyɛ́ʼkɛn.

³Páyɛ́ɛ ədúmə kɛlɛ́ɛ́ kɛ́ Moyíis, uʼkudin o Táán ayɛ́ɛ́ga. Páyɛ́ɛ ədúmə tɛn kɛ́ Mɔɔ́n o nodóm ayɛ́ɛ́ga. Páyɛ́ɛ ədúmə pɔ́nɔ́: Sə́dúk Táán o toɛn tuim, pigólí pɛáŋ pɛáyám ə́y! Pigólí pɛáŋ pɛ́lɛ kisig ə́! Wɛ nkúm ɛ mɔnɔŋ, pɛbán pɛáŋ pɛ́ olɛɛ́ agɛɛlɛ pɛ́lɛ sáád ə́y! Pɛ́lɛ tɛn fɔ́lɔ́b ə́y!

⁴Ánɛ aa alɛɛ́ ogolɔb lɛ́ adɛágonyáadɛ, wɛ Sə́dúk? Ánɛ aa alɛɛ́ ogosáŋɛnɛ kooyɛ́ʼkɛn nugəm lɛ́ olɛ wɛɛ́nyɔ́əsíŋ ufúlúʼtú. Mɔnɔŋ miim málɛ́ɛ́ kiimən ədúm əndu a udi wááŋ lɛ́ pɛbán pɛáŋ pɛ́ sáád pɛ́ olɛɛ́ agɛɛlɛ pɛ́alon moááŋ a əngis yɔ́ɔ́bɔn[87]

⁵A ngim yɛ́ɛy, mbáság kodála uʼkóó ó Táán wə́əgəə́buən kɔ a mɔɛn. Ɛyaa ɛ́ yoog yɛ́ ɛ́lɛɛ́ na igóó yɛ́ yóoloodi lɛ́ Táán alɛ a kɛgaágadɛ kɛɔ́bɔn[88] ɛ́yɛ́ɛ kɔ a uʼkóó wóow a kaadɛ.

⁶Məŋun má maʼtom máʼtáan na mábaan má mííguminin ntɔ́b ɛ́ʼtáan na ɛ́baan ɛgo mááság kiim málon kɔ a uʼkóó. Mííníigin pilə́ə́ pɛ́ lɛ́ɛŋ pifúlúʼtú, píəmənyə, na paʼkandá pá kóol pəə́súŋə́ə́n a nɛdáá.

⁷Nnyam mmuʼ a púniʼ pó póyɛ́ɛ kɔ, yaáság kɛɛ́ʼkɛn na məŋun má maʼtom móom máʼtáan na mábaan, mocɔ́gɛ́cɔ́gɛ́ móʼtáan na móbaan tɛn mó páyɛ́ɛ́lɛ na kóol. Ilúún ɛ́ Táán nyɔ́ alɛɛ́ a ɔlaa a pəliə́g ɛ́yɛ́ɛ kɔ a mocɔ́gɛ́cɔ́gɛ́ móom síɛ́ɛ́d.

⁸Moógin míyə́ə́g kɔ a uʼkóó síɛ́ɛ́d. Nugəm nó táán, na toɛn tuə́ŋ áa tóyɛ́ɛ alónɛ moógin móom[89] Mɔɔd adɛʼkɛ́ɛ ogosɔd a tɛ́mpɛl ná ntɔ́b ɛ́ʼtáan na ɛ́baan yɛ́ məŋun má maʼtom máʼtáan na mábaan mígóodi ɛdɛ́mman kaáyɛ́ɛlɛ.