Read Yambeta Yiífínínin 16 Bible Online

Yiífínínin 16 - Yambeta bible

Yiífínínin 16

¹A ngim yɛ́ɛy njóób nɛŋo níəgiim nɛ́lon kɔ a uʼkóó. Nɛ́yɛ́ɛ agosɔyɔ na toɛn nɛɔ́nɔ́ na məŋun má maʼtom máʼtáan na mábaan: Ilúún ɛ́ Táán yɛ́ ɛ́lɛɛ́ a mocɔ́gɛ́cɔ́gɛ́ móom móʼtáan na móbaan, todáan əsugin yɛ́lɛ́ a nsí.

²Uŋun ó maʼtom ó na oʼto na oʼto wááság kɛɛn, wə́ə́sugin ɛcɔ́gɛ́cɔ́gɛ́ yə́ə́ŋ yɛ́ ilúún a nsí. Pɛbɛ́ pɛ́ pufə́ŋ pɛáság kolónan a nkó ɛ pɔɔd pá páyɛ́ɛ na pɛbɛɛ pɛ́ nnyam, pə́ədúmə əndu a udi ó kílíngə́lingə kiə́ŋ. Pufə́ŋ pógo póyɛ́ɛ anómanan kɛ́fɔlɛ́[90]

³Uŋun ó maʼtom wó annam ábaan wááság kusugin yə́ə́ŋ ɛcɔ́gɛ́cɔ́gɛ́ yɛ́ ilúún a noom nó ɛbá fiɛ́d. Məní mááság kaan wɔnɔ́ maŋɔ́ má kɛlóŋ kɛ́ mɔɔd. Moom muim mó móyɛ́ɛ alaa a noom moáság koman kuwu.

⁴Sɔ́g wo annam ádáád aáság kusugin yə́ə́ŋ ɛcɔ́gɛ́cɔ́gɛ́ yɛ́ ilúún a toom tó tuliʼti na a munííní. Məní mááság kaan maŋɔ́[91]

⁵Mbáság koob uŋun ó maʼtom wó óyɛ́ɛ alaamɛ məní wɔ́nɔ́ na Táán: Wɛ nyɔ́ olɛɛ́ ufúlúʼtú, wɛ nyɔ́ olɛɛ́, na wɛ nyɔ́ oyɛ́ɛ, olɛ sáád lɛ́ woóloodi a nɛyɔmɛʼ nɛáŋ lɛ́ olɛ sáád.

⁶Pɔɔd píísúb maŋɔ́ má pá páyɛ́ɛ agoob na wɛ, na má palɔɛgɛʼ pɛbán pááŋ. Maŋɔ́ aa wɛ omáboyɛ́ʼkɛn tɛn lɛ́ páŋo. Nkə kɛ́ pə́yúúnə a kɛ́ɛg o!

⁷Mbáság koob nɛŋo níəgiim nɛ́dɛ́ɛmɛn a kibóŋ kɛ́ pɛfɔny. Nɛ́yɛ́ɛ əgusəə nɛɔ́nɔ́: Ɛɛ́ɛ óo, Sə́dúk Táán o toɛn tuim, pɛyɔm pɛáŋ pɛ́lɛ fɔ́lɔ́b, pɛ́lɛ sáád!

⁸Uŋun ó maʼtom wó annam ə́niʼ wááság kusugin yə́ə́ŋ ɛcɔ́gɛ́cɔ́gɛ́ a niis nɛ́ wɔɔ́s. Pááság kɛɛ́ʼkɛn wɔɔ́s toɛn lɛ́ ógɔ́lɔnɛ pɔɔd na yug yə́ə́ŋ

⁹Yoóy yááság kolon na toɛn, yɔ́gɔ́lɔ́nɛ pɔɔd, pə́ə́bə́ə́ kosɔyɔn niiŋ nɛ́ Táán kɔbɛ́, nyɔ́lɛ́ nyɔ́ alɛɛ́ alaamɛ mbod yɛ ntɔ́b wɔnɔ́ yɛ́ɛy. Náa, pə́diʼkə́əgəə́suʼki. Pɛ́ɛ́sáŋɛ́nɛ kɛɛ́ʼkɛn nugəm na Táán[92]

¹⁰Sɔ́g wo annam áʼtáan aáság kusugin yə́ə́ŋ ɛcɔ́gɛ́cɔ́gɛ́ a noʼkóm nó nɛlaamɛʼ nó nnyam. Mbin yaáság kəə́súʼkin a pɛnɔ pɛ́ ɛyɛ́ɛ alaamɛ[93] Pɔɔd páyɛ́ɛ agaágáma pɛgɛg lɛ́ páyɛ́ɛ agoob kogany kɛ́fɔlɛ́.

¹¹A oʼto ó kogany kó páyɛ́ɛ agoob, na pufə́ŋ pó póyɛ́ɛ a nkó yɔɔbɔn, pɔɔd páyɛ́ɛ ɔsɔyɔn Táán kɔbɛ́, nyɔ́lɛ́ nyɔ́ alɛɛ́ a mɔɛn. Náa, pə́diʼkə́əgəə́suʼki pɛbán pɛɔ́bɔn pɛ́ pɛbɛ́ pɛ́ páyɛ́ɛ agɛɛlanɛ.

¹²Uŋun ó maʼtom wó annam áʼtáan na úmmuʼ wááság kusugin kiə́ŋ kilən a noom nó nogóón nó pɔ́ɔdɔ́ŋɔn lɛ́ Ɛfɛláad. Noáság koság agɛɛ́ʼkɛn ngə́ na puʼkúm pó puyíím pódɛ́ɛmɛn a noá nó ándɛ wɔɔ́s wə́əgiim ódɛ́ɛman[94]

¹³Mbáság kodála məŋun má mabɛ́ mádáád má mɛ́ɛ́ŋwáŋanan tuboó, máalon lɛ́ úmmuʼ a unuʼ ó tɛlagɔ́ɔŋ[95], wúmmú a wó nnyam, wó annam ádáád a unuʼ wó ɔndɔɛgɛʼ pɛbán o pɛnyaʼ.

¹⁴Məŋun móom máyɛ́ɛ məŋun má máyɛ́ɛ agoob na Omɔlɛɔ́g. Mə́ə́bə́ə́ kɛɛlɛ piə́wúunəniʼ pɛ́ pɛbán. Miim móom mádáád málɛ agɛɛn ná puʼkúm pó a nsí yɛ́ɛnɛ ngim pólɛɛ́ agɛɛlɛ lɛ́ máboógonyɛd ná pánɔɛyɛ Táán o toɛn tuim pɛdá a wɔɔ́s wə́ə́ŋ wó oʼkóʼkóón wó yiídə́nígi.

¹⁵Sə́dúk alɛ əgusəə ɔnɔ́: Taa, a wɔɔ́s wáam wó ndɛ́ɛ́ kiimií, ndɛ́ɛ́ kubúbi pɔɔd wɔnɔ́ ungiíbən[96]! Kɔŋɛʼ na nyɔ́ adɛndɛ́ɛ́ kunímíí ɛnɔ, əə́nuŋ pilə́ə́ piə́ŋ agɛɛlɛ lɛ́ adɛndɔ́b nsun iyó, adɛnjááŋ lɛ́ pámámoodála náan.

¹⁶Məŋun má mabɛ́ mɛ́ɛ́gónyɛd puʼkúm a kɛnɔ kɛ́ pálɛɛ́ agodɔ́ŋɔn a tɔgɛ́ɛ́ tó Yúdɛn lɛ́: Alɛmagɛdɔ́ɔŋ[97]

¹⁷Uŋun ó maʼtom wó annam áʼtáan na ábaan wááság kusugin kiə́ŋ kilən a ɔfɛfɛm. Kiʼtóg kɛ́ nɛŋo kɛáság kosɔyɛd kɔ a uʼkóó a kaadɛ. Nɛ́yɛ́ɛ əgiim nɛ́lon a noʼkóm nó nɛlaamɛʼ. Nɛ́yɛ́ɛ əgusəə nɛɔ́nɔ́: Kɛándɛ kɛmanáán óo!

¹⁸Mbálámɔɛn yəə́bə́ə́ anɛ́ɛ́n kubəgə, aŋŋo yáasáŋa, pombambany púədə́əŋən, nsí imə́nyígídíí na toɛn a ombod wó kɛ́dɛ́njaŋɛɛ́ kaáyɛ́ɛlɛ pɛ́go pɛ́ mɔɔd alɛɛ́ a nsí.

¹⁹Pálɛ́ɛg yɛ́ nkóʼkóón yɛɛ́sáálɛg pɛsaa pɛ́dáád. Pabálɛ́ɛg pá pəliʼti pá a əʼkúu əngim pámɛ́ɛ páman kubumbug. Táán aáság kaáyɔ́ɔ́ŋɛ Pabɛlɔ́ɔn, pálɛ́ɛg yɛ́ nkóʼkóón. Ayɛ́moŋoɛ́yɛ maloʼ má a kilən kiə́ŋ kɛ́ kɛ́lɛɛ́ agodogan na ilúún yə́ə́ŋ[98]

²⁰Məní mɛ́ɛ́mɛ́n maaloʼ miim, nkon ngim yəə́sə́ngílid.

²¹Pɛsom pɛ́ məní má máyɛ́ɛ máʼkaána aʼtáán[99] pɛáság kudə́əŋənən pɔɔd. Aʼtáán á məní yɛ́ɛy áyɛ́ɛ agono kɛ́fɔlɛ́. Ntɔ́b yɛ́ɛy yɛ aʼtáán á məní ɛyɛ́ɛ́lɛ lɛ́ pɔɔd pɔ́sɔyɔn Táán kɔbɛ́ lɛ́ ɛyɛ́ɛ kɛa kɛ́ kɛnasáŋ kɛ́ ntɔ́b ɛ kúfuʼ.