Read Yambeta Yiífínínin 17 Bible Online

Yiífínínin 17 - Yambeta bible

Yiífínínin 17

¹A ngim yɛ́ɛy, uŋun ó maʼtom wúmmú a məŋun má maʼtom máʼtáan na mábaan má máyɛ́ɛ na mocɔ́gɛ́cɔ́gɛ́ móom móʼtáan na móbaan wááság kiim agɛʼtɛ́anɛ wɔ́nɔ́: Mɛ́ɛn o! Ndəguúloodi wɔnɔ́ ná pálɛ́ɛ́ koyɔmɛɛ́ kɛdáŋanaʼ kɛ́ ɔʼkɛ́ɛd kɛ́ kɛgóón. Kɛdáŋanaʼ kɛ́go kɛ́ɛg aa kɛ́ɛnɛ kɛ́lɛɛ́ pálɛ́ɛg yɛ́ nkóʼkóón yɛ́ pɛ́ɛ́wáag a ɛbá yɛ́ ɛ́fɔlɛ́ ɛ́ puní.

²Puʼkúm pó a nsí puíbúlímən na nyɔ́lɛ́, pɔɔd pááŋoáŋan tɛn maloʼ má nɛbambɛɛ niə́ŋ mámáyɛboŋwáŋɛ[100]

³Uŋun wó Ufúlúʼtú óyɛ́nyɛɛlɛ, uŋun ó maʼtom wááság kɛɛn na mɛ a kɛnɔ kɛ́ kifələ́ə́n. Nyɛɛ́dála ɔʼkɛ́ɛd kɔ undəndínə́ə́n a nnyam mpógógó. Nnyam ɛgo yɛ́ɛy ɛyɛ́ɛ na nto ɛ́ʼtáan na ɛ́baan, modɔŋ mówád. Əngiŋ á kodóga Táán əʼtiídílə́ a nkó yəəŋ.

⁴Ɔʼkɛ́ɛd yiíníigin pisig pɛ́ pilə́ə́ pɛ́awɛ́ɛ́la. Pɛ́yɛ́ɛ póʼkóʼkóʼkó. Mɔlɛɛ́ndɛŋ muə́ŋ móyɛ́ɛ kóol na kóol. Ayálɛŋɛn tɛn na musisíg mó moom múmmú moɛ́ndɛ́ŋ mó móyɛ́ɛ adɛ́a. Yiíguminin tɛn a ombɔg wə́ə́ŋ kilən kɛ́ páyɛ́ɛlɛnɛ na kóol. Kilən kɛ́ɛg kɛ́yɛ́ɛ kiyə́gə́ə́n na moom mó oʼto kono, moom mó pinig mó ɔlaa wə́ə́ŋ ó nɛbambɛɛ.

⁵Niiŋ nɛ́yɛ́ɛ nidilídə́ə́n a udi wo ɔʼkɛ́ɛd ogo nyóon. Nɛ́yɛ́ɛ niiŋ nɛ́ yisí yəəŋ ɛyɛ́ɛ ngɔɔsɛ́gáán. Niiŋ nɛ́go nɛ́ɛn nɛ́yɛ́ɛ lɛ́: Pabɛlɔ́ɔn, kɛgóʼkóón, ŋŋí o pɛdáŋanaʼ na o pɛbán pɛ́ oʼto kono pɛ́ a nsí.

⁶Nyɛɛ́dála ɔʼkɛ́ɛd ogo ayɛ́ɛ oŋŋwáŋáán. Yɛɛ́ŋó maŋɔ́ má pɔɔd pá páyɛ́ɛ agoob na Táán, na má pawɛ́sɛnɛg pá Yə́sus mááság komoŋwáŋɛ. Ná njɛ́moodála, njə́wúnə́níí kɛ́fɔlɛ́.

⁷Náa uŋun ó maʼtom wɔ́nɔ́ na mɛ: A igə aa wəə́gəə́wúunəni ə́? Ndagɛɛlɛ lɛ́ ólɛŋ yisí yɛ́ ɛlɛɛ́ a kɛbán kɛ́ ɔʼkɛ́ɛd nyóon na a kɛ́ nnyam yɛ́ɛy yɛ nto ɛ́ʼtáan na ɛ́baan, na modɔŋ mówád yɛ́ ɛmonyáŋɛ́nɛ́nɛ́ɛ́.

⁸Nnyam yɛ́ɛy yɛ́ wɛɛ́dála ɛyɛ́ɛ a ɔlaa náa yindigií kə́mmú nɛ́gɔŋ a ɔlaa. Igóódi lɛ́ yíim ɛ́lon a niɛ́ nɛ́ nɛ́lɛɛ́ miɛ́ɛ́ŋ[101] a nsí ɛ́ság kɛɛnanan lɛ́ ílíoŋ. Pɔɔd pá niiŋ nɛɔ́bɔn nɛ́dɛɔ́gɔ nidiídílə́ a kálaʼtaʼ yɛ ɔlaa pɛ́go pɛ́ nsí ɛyásáŋɛ́ɛ́ pálɛ́ɛ́ kəə́wúunəni ná pálɛ́ɛ́ kodálaá nnyam yɛ́ɛy lɛ́ ɛyɛ́ɛ a ɔlaa yindigi tɛn kə́mmú a wólɛ́. Náa ɛlɛ́ɛ́ kimbuúlini.

⁹Taa áanɛ nɛ́gɔŋ, kíəguunə lɛ́ mɔɔd álɛŋ, áyɛɛn na nsiŋ. Nto ɛ́ʼtáan na ɛ́baan yɛ́ɛy ɛlɛ nkon ɛ́ʼtáan na ɛ́baan yɛ́ ɔʼkɛ́ɛd nyóon ələndíníníí a yɛ́lɛ́. Nto yɛ́ɛy ɛlɛ tɛn puʼkúm póʼtáan na póbaan.

¹⁰Puʼkúm póʼtáan pundigi kə́mmú a nɛlaamɛʼ. Mmuʼ aa ɛlɛɛ́ alaamɛ nɛ́gɔŋ. Sɔ́g wo annam áʼtáan na úmmuʼ. Wo annam áʼtáan na ábaan ɛdɛ́njɛ́ɛ kɔ. Náa, ná yɛ́lɛ́ ɛlɛ́ɛ́ kiimií, ɛdɛndɛ́ɛ́ kuʼtə́ə a nɛlaamɛʼ niə́ŋ.

¹¹Nnyam yɛ́ ɛyɛ́ɛ a ɔlaa náa yindigií nɛ́gɔŋ a ɔlaa, yɛ́lɛ́ aa ɛlɛɛ́ yɛ́lɛ́yɛ́amɔɛ́d nkúm yɛ annam áʼtáan na ádáád. Yɛ́lɛ́ tɛn mmɔɛ́d ɛlɛ a ondáŋ wó nto ɛ́ʼtáan na ɛ́baan. Ɛ́lɛ lɛ́ ílíoŋ a kúfuʼ.

¹²Modɔŋ mówád mó wɛɛ́dála mólɛ puʼkúm pówád[102] pó púdísiədií nɛlaamɛʼ. Náa, pálɛ́ɛ́ koboyɛ́ʼkɛn nɛlaamɛʼ lɛ́ pálaamɛ ondáŋ na nnyam áwaʼ mmuʼ súg.

¹³Pɔ́lɛ́ póob pówád pálɛ́ɛ́ kɛɛn əgín na mafɛgaʼ má kɛɛlɛ əgín yoom ɛgo ímuʼ. Pálɛ́ɛ́ kaag toɛn toɔ́bɔn tuim na nɛlaamɛʼ nɛɔ́bɔn niim əgugudin nnyam.

¹⁴Pálɛ́ɛ́ kɔnɔɛyɛ Mɔɔ́n o nodóm pɛdá. Náa, Mɔɔ́n alɛ́ɛ́ koboónyɔŋ lɛ́ nyɔ́lɛ́ alɛ Sə́dúk ɛ pəsə́dúg. Nkúm ɛ puʼkúm. Alɛ́ɛ́ koboónyɔŋ, nyɔ́lɛ́ ondáŋ na pá yɛɛ́dɔ́ŋɔn, pá əyííyid, pá pálɛɛ́ amooyóóbɛn.

¹⁵Náa uŋun ó maʼtom wɔ́nɔ́ kə́mmú na mɛ: Puní póob pó wɛɛ́dála, kɛnɔ kɛ́ kɛdáŋanaʼ kɛ́ɛg kɛ́lɛɛ́, pɔɔd aa pálɛɛ́nɔ. Piʼtúú pɛ́ pɔɔd, pɔɔd pá mɔnɔŋ na pá əʼkíí yɛ́ a nsí.

¹⁶Modɔŋ mówád mó wɛɛ́dála, na nnyam yɛ́ɛy kɛ́, pɔ́lɛ́ piim pálɛ́ɛ́ kobɛnɛn kɛdáŋanaʼ kɛ́ɛg. Pálɛ́ɛ́ kusiəd nkə kiim kɛ́ ogódíí. Pálɛ́ɛ́ kumuudi nsun iyó. Pálɛ́ɛ́ konɛ pumog puə́ŋ. Nkə kɛ́ a nkó yəəŋ kɛ́ kɛ́lɛ́ɛ́ kolɔb, pálɛ́ɛ́ kogɔ́lɔnɛ a yug

¹⁷lɛ́ Táán ayáág a ɔʼtɛ́m wɔ́ɔ́bɔn lɛ́ pɛ́ɛlɛ nkə kɛ́ nyɔ́lɛ́ alɛɛ́ anyɔ́ŋɛn. Pálɛ́ɛ́ kɛɛn na mafɛgaʼ əgín mágo mə́muʼ. Pálɛ́ɛ́ kogod unuʼ wɔ́ɔ́bɔn úmmuʼ lɛ́ páág toɛn tó nɛlaamɛʼ nɛɔ́bɔn niim əgugudin nnyam yɛ́ɛy súʼtə́ə́ əgiig a kóonɛ lɛ́ nkə kɛ́ Táán yiísə́ə́ kɛ́as.

¹⁸Ɔʼkɛ́ɛd anɛ́ɛ́n nyóon nyɔ́ wɛɛ́dála, nyɔ́lɛ́ aa alɛɛ́ pálɛ́ɛg yɛ́ nkóʼkóón yɛ́ ɛlɛɛ́ alaamɛ puʼkúm pó a nsí.