Read Yambeta Yiífínínin 18 Bible Online

Yiífínínin 18 - Yambeta bible

Yiífínínin 18

¹A ngim yɛ́ɛy nyɛɛ́dála uŋun ó maʼtom tɛn wúmmú wə́əgiim úsuu a mɔɛn. Óyɛ́ɛ na toɛn togóʼkóón a nsí, nugəm nuə́ŋ noáság komoáŋɛ nsí.

²Óyáág nɛŋo na toɛn, wɔ́nɔ́: «Pabɛlɔ́ɔn yəə́də́əŋ ó! Pabɛlɔ́ɔn, pálɛ́ɛg yɛ́ nkóʼkóón yəə́də́əŋ! Yaándɛ nɛ́gɔŋ yɛ́ɛnɛ kɛnɔ kɛ́ məŋun má mabɛ́ málɛɛ́ alaa. Kɔ́gɔ́ɔg aa mbod ɛ məŋun má mabɛ́ ngim yɛɛnɛ́nɛ́ɛ́ ələndin. Kɔ aa mbod ɛ pɛsag ngim yɛ́ ɛlɛ́ɛ́ pifuə́, pɛsag pɛ́ pɛbɛ́ piim piɛ́nɛ́nɛ́ɛ́ ələndin.

³Ɛɛ́ɛ, pɔɔd pá a mɔnɔŋ miim pɛ́ɛ́ŋoáŋan maloʼ má nɛbambɛɛ niə́ŋ nɛ́ toɛn. Puʼkúm pó a nsí puə́búlímən na nyɔ́lɛ́. Pɛɛlɛ undunə́ píígúmi a pɛnasáŋ pɛ́ moom mó ayɛ́ɛ agaálɛŋ na mólɛ́.»

⁴Njóób nɛŋo nímmú nɛ́ɔsɔyɔ kɔ́gɔ́ɔg a mɔɛn, nɛɔ́nɔ́: «Pəŋi ndɛg yaam, lónáan a pálɛ́ɛg yɛ́ɛy agɛɛlɛ lɛ́ pudisiə́d ngab a mabɛ́ mə́ə́ŋ, ná ntɔ́b tɛn yɛ́ igódíí lɛ́ ɛ́moóboan ɛdɛyɛ́bodɔ́bɔ pəŋi

⁵lɛ́ mabɛ́ mə́ə́ŋ máʼkaábona súʼtə́ə́ mámɛ́ɛn alon a mbálámɔɛn. Táán ədiə́bəlini niə́siəd niə́ŋ nɛ́ nɛbɛ́.

⁶Ɛlɛ́an na nyɔ́lɛ́ wɔnɔ́ ná nyɔ́lɛ́ tɛn ayɛ́ɛ́lɛ na pəŋi. Kɔbɛ́ kó ayɛ́boyɛ́ɛ́lɛ pəŋi, púmuyúúlisini nyɔ́lɛ́ náan pɛnɛŋ pɛ́baan. A kilən kɛ́ nyɔ́lɛ́ ayɛ́ɛ agoŋóɛyanɛ pɔsɔ́g maloʼ mə́ə́ŋ, púmuyə́əgini nyɔ́lɛ́ má máánas agaáyɛn mə́ə́ŋ pɛnɛŋ pɛ́baan.

⁷Púmuúloodi ŋwɛ́g, póomoyɛ́ʼkɛn ntɔ́b yɛ́ imíig wɔnɔ́ nugəm nó ayáyɛ́ʼkɛ́nɛ́ɛ́. Ntɔ́b yɛ́ɛy ɛ́sɛʼtan tɛn na tugúm tó ɔyɔ́ɔ́ŋ lɛ́ alɛ əgəə́səə nyɔ́lɛ́nyɔ́amɔɛ́d ɔnɔ́: “Ndɛ a noʼkóm nó nɛlaamɛʼ wɔnɔ́ nkúm, ntɛɔ́gɔ kidí kɛ́ ɔʼkɛ́ɛd, ntɛndɛ́ɛ́ kɛɛn a ɔndɛɛ.”

⁸Kólɛ́ aa pálɛ́ɛ́ komogɔ́lɔnɛɛ́ a yug. Ntɔ́b ngim yɛ́ páyɛ́ngɛ́g lɛ́ yəəŋ ɛlɛ́ɛ́ kumuə́suginin a nkó a wɔɔ́s əgín úmmuʼ súg. Ntɔ́b ɛgo yɛ́ɛy aa yɛ́ɛnɛ ɛlɛɛ́ lɛ́: Məyíi, kugu, ɔndɛɛ, lɛ́ Sə́dúk Táán nyɔ́ amámoyɔ́mɛ alɛ na toɛn[103]»

⁹Ná puʼkúm pó a nsí pólɛ́ɛ́ kodála moógin mó yug yɛ́ pálɛ́ɛg yɛ́ ɛlɛɛ́ ɔgɔ́lɔ, pólɛ́ɛ́ komoólɛɛ, póagaányam a kidíídí kiə́ŋ. Pólɛ́ pó puíbúlímən na nyɔ́lɛ́, pumə́əsiəd ngab a tugúm tuə́ŋ.

¹⁰Pólɛ́ɛ́ kodɛ́lɛman kága laálá lɛ́ pólɛ agodammana ntɔ́b yɛ́ pálɛ́ɛg yɛ́ɛy ɛlɛ́ɛ́ konɛ́ɛ́. Pólɛ́ɛ́ kusəə poɔ́nɔ́: «Kɛ́lɛ kɛbɛ́ o! Kɛ́lɛ́ kɛbɛ́! Pabɛlɔ́ɔn, wɛ pálɛ́ɛg yɛ́ nkóón, pálɛ́ɛg ɛ toɛn! Áwaʼ mmuʼ súg yaásɛʼtan agɛɛlɛ lɛ́ Táán ágoʼpɔ́nɛsɛ[104]!»

¹¹Pɛɛlɛ undunə́ pá a nsí páyálɛ́lɛ́ɛ́ tɛn, pámányámɛ́ɛ́ a kidíídí kiə́ŋ lɛ́ mɔɔd adɛʼkɛ́ɛ agooŋɛnɛ moom moɔ́bɔn kə́mmú.

¹²Moom mógo móyɛ́ɛ lɛ́: Pisúg pɛ́ kóol, pɛ́ mɔɔnɛ́, moómóm múmmú mó móadɛ́a mɔɔnɛ́ kɛ́fɔlɛ́, moom mó kaálɛŋ nkó, pisig pɛ́ pilə́ə́ pɛ́ lɛ́ɛŋ, na pɛ́ sowáa, na pɛ́ pibógógó, na pɛ́ píəmənyə a yoóy. Mbod ɛ pɛsaa pɛ́ piɛd pɛ́ píənug kɔŋɛʼ, mbod ɛ moom ngim yɛ́ pámɛ́ɛ́lɛ na pɛfaŋ pɛ́ njoʼ, na mó pámɛ́ɛ́lɛ na nkón yɛ́ yaádɛ́a kɛ́fɔlɛ́, na mó pámɛ́ɛ́lɛ na kisúg kɛ́ pɔlɔ́ɔnsɛ, oó lɛ́ na mbod ɛ pisúg yɛndɛ́ŋ, ɔmbɔ́ lɛ́ na nɛdáán nɛ́ pɔ́ɔdɔ́ŋɔn lɛ́ máabɛlɛʼ.

¹³Mbod ɛ lamɛ́ndaʼ ngim, mbod yɛ mbɛ́n ngim yɛ́ yəə́nuʼtən, na modɛm, molɔʼ, poloʼ, pugúd, umbúb ó moom, ngəŋ; paʼkáwoʼ, todóm, ponyambɛlɛʼ na pɛʼkálɛ́ɛd pɛɔ́bɔn; pɛɔ́lɛ́ pɛmɔɛ́d, na pɛ́ píígúmən tɛn a pɛdá.

¹⁴Pɛɛlɛ undunə́ póob Píísə́ə́ pɔ́nɔ́ na pálɛ́ɛg yɛ́ɛy: «Pisig pɛ́ moom pɛ́ oyɛ́ɛ agonyóŋɛnɛla pɛ́mágoyɔ́bɔ́gɛ́ɛ́. Tugúm toáŋ tuim, na nkə kiim kɛ́ wiígóodi kiólióŋ. Odɛndɛ́ɛ́ kiiʼkini kodála yoom na yoom kə́mmú!»

¹⁵Pɛɛlɛ undunə́ pá píígúmi a undunə́ wɔ́ɔ́bɔn wóow wó páyɛ́ɛ agɛɛlɛ pálɛ́ɛ́ kodɛ́lɛman kága laálá agodammana ntɔ́b yɛ́ pálɛ́ɛg yɛ́ɛy ɛlɛ́ɛ́ konɛ́ɛ́[105] Pálɛ́ɛ́ kaálɛɛ, páagaányam

¹⁶pɔ́nɔ́: «Kɛ́lɛ kɛbɛ́ o! Kɛ́lɛ́ kɛbɛ́ na Pabɛlɔ́ɔn ó! Pabɛlɔ́ɔn, wɛ pálɛ́ɛg yɛ́ nkóón. Wɛ nyɔ́ oyɛ́ɛ wəə́níigən pisig pɛ́ pilə́ə́ pɛ́ lɛ́ɛŋ, pilə́ə́ pɛ́ mɔɔnɛ́ pɛ́awɛ́ɛ́la póʼkóʼkóʼkó. Wɛ nyɔ́ oyɛ́ɛ waálɛŋ tɛn na kóol yəə́mənyə, na musisíg tɛn mó moom múmmú mó pálɛɛ́ agɛɛlɛ na aʼtáán á mɔɔnɛ́, kɛ́lɛ kɛbɛ́ na wɛ!

¹⁷Áwaʼ mmuʼ súg yaásɛʼtan agɛɛlɛ lɛ́ Táán áman kusíŋini tugúm toáŋ!» Pəduləʼ siʼtíməʼ piim, na ungim nyɔ́ alɛɛ́ əgugud kɔ yɛɛ́dɛ́lɛm laálá. Ɔmbɔ́ tɛn pɔɔd pá siʼtíməʼ ɛlɛɛ́ agonyáŋɛna, na pá ɔlaa wɔ́ɔ́bɔn ólɛɛ́ əgín a pigólí pɛ́ pálɛɛ́ agɛɛlɛ kɔ pɛ́ɛ́dɛ́lɛm tɛn laálá.

¹⁸Ná pɛ́ɛ́dála moógin má máyɛ́ɛ agobag kɛnɛŋ kɛ́ pálɛ́ɛg ɛyɛ́ɛ əgusúiŋ, páyáfɛ́mɛ́ɛ́ nɛŋo a mɔɛn pɔ́nɔ́: «Pálɛ́ɛg yimmú yɛ́ páyɛ́ɛ págofɛg na pálɛ́ɛg yɛ́ɛnɛ yɛ́ nkóʼkóón ɛdɛɔ́gɔ!»

¹⁹Páyɛ́ɛ əgəə́súbən ummúndúŋ a oʼto, páagaálɛɛ, páagaányam, pɔ́nɔ́: «Kɛ́lɛ kɛbɛ́ o! Kɛ́lɛ́ kɛbɛ́ na Pabɛlɔ́ɔn ó! Pabɛlɔ́ɔn, wɛ pálɛ́ɛg yɛ́ nkóón. Kɛ́lɛ kɛbɛ́ na wɛ nyɔ́ na tugúm toáŋ oyɛ́ɛ́lɛ lɛ́ ungim nyɔ́ alɛɛ́ na siʼtíməʼ a noom ə́gúmi. Áwaʼ mmuʼ súg yaásɛʼtan agɛɛlɛ lɛ́ Táán ə́gusíŋini[106]!»

²⁰Nyɔ́gáan oó, pəŋi pá polɛɛ́ a mɔɛn! Nyɔ́gáan wɔnɔ́ ná pə́ə́síŋíni pálɛ́ɛg[107]! Nyɔ́gáan tɛn pəŋi pá polɛɛ́ agoob na Táán. Pəŋi pɔɔ́n pá maʼtom, pəŋi palɔɛgɛʼ pɛbán pá Táán, nyɔ́gáan lɛ́ Táán amámoyɛ́ʼkɛn nsɔ́ɔ́ a kɔbɛ́ kó ayɛ́boyɛ́ɛ́lɛ.

²¹Áay anɛ́ɛ́n áa uŋun ó maʼtom wúmmú wó óyɛ́ɛ na toɛn wísiə́d kiʼtóg kɛ́ nɛdáán kɛ́ kɛ́yɛ́ɛ agono. Nɛ́yɛ́ɛ wɔnɔ́ nɛdáán nɛ́ kɔɔb moom. Wɛ́ɛ́dágɛ́dɛ nɛdáán nɛ́ɛn a noom nó ɛbá fiɛ́d, wɔ́nɔ́: «Wɛ Pabɛlɔ́ɔn, pálɛ́ɛg yɛ́ nkóʼkóón. Náan tɛn na toɛn áa pálɛ́ɛ́ kogoódagɛdɛɛ́. Mɔɔd adɛndɛ́ɛ́ kogoyɔ́ɔŋ kə́mmú.

²²Pádɛndɛ́ɛ́ koob mɔɔd aágo ɛlóŋ kə́mmú áay. Pádɛób mɔɔd əə́dúmə pɛlɛ́ɛ́. Pádɛndɛ́ɛ́ tɛn koob mɔɔd aágo nudəə, ɔmbɔ́ isə́ə́. Áay ná olɛɛ́, pádɛndɛ́ɛ́ tɛn kodála mɔɔd aágɛɛlɛ ombod ó pigólí ɔmbɔ́ óyaán. Ɔmbɔ́ kɔɔb kó moom a nɛdáán pádɛndɛ́ɛ́ koob mɔɔd ɔɔ́gɔɔb moom kə́mmú áay.

²³Ɔmbɔ́ kisəə kɛ́ ɛláam kɛ́dɛndɛ́ɛ́ konom áay. Ɔmbɔ́ kɛgɛ́ʼkɛ́ kɛ́ kisiəd kɛ́dɛndɛ́ɛ́ kaáyáág áay a pálɛ́ɛg yɛ́ɛy lɛ́ pɛɛlɛʼ undunə́ pááŋ páyɛ́ɛ pɛgóʼkóón pɛ́ pɔɔd a nsí. Na tɛn lɛ́ pɛnon pɛáŋ pɛ́yɛ́ɛ́lɛ lɛ́ pɔɔd pá a mɔnɔŋ miim má a nsí pə́nim ngə́[108]»

²⁴Nkə kɛ́ɛg kiim kɛ́lɛ́ɛ́ kogoóboan wɛ Pabɛlɔ́ɔn lɛ́ áay aa maŋɔ́ má palɔɛgɛʼ pɛbán pá Táán mə́yə́súbíí, na má pá páagoob na nyɔ́lɛ́ kɛ́, na má pɔɔd piim pá páyóón a nsí yɛ́ɛnɛ[109]