Read Yambeta Yiífínínin 19 Bible Online

Yiífínínin 19 - Yambeta bible

Yiífínínin 19

¹A ngim yɛ́ɛy, njóób nɛŋo nɛ́asáŋa kɔ́gɔ́ɔg a mɔɛn. Kɛ́yɛ́ɛ wɔnɔ́ ɛ́fɔlɛ́ ɛ́ pɔɔd aa ɛ́yɛ́ɛ na nɛŋo nɛ́ɛn, pə́əsəə pɔ́nɔ́: «Áləlúya![110] Nyádɛ́an Sə́dúk óo! Moom móonɛ lɛ́: Kɔɔy, nugəm, toɛn mólɛ agoob na Táán yəəs óo!

²Pɛyɔm piə́ŋ pɛ́lɛ pɛyɔm pɛ́ fɔ́lɔ́b, pɛyɔm pɛ́ sáád lɛ́ yɛɛ́sóm pɛyɔm pɛ́ pálɛ́ɛg ɛ nɛbambɛɛ yɛ́ nkóʼkóón yɛ́ɛy yɛ́ ɛyɛ́ɛ əgufiləni nsí na nɛbambɛɛ niə́ŋ. Əmə́muyə́gúníí a kidíídí kɛ́ maŋɔ́ má pəgudin pə́ə́ŋ má yiísúb.»

³Aŋŋo yɛ́ɛy yááság kiiʼkini kusəə kə́mmú yɔ́nɔ́: «Áləlúya! Nyádɛ́an Sə́dúk óo! Moógin má yug yɛ́ pə́yímubílə na yɛ́lɛ́ málɛ agobag a mɔɛn a pɛnɛŋ piim ó[111]!»

⁴Pasaá pá pɔɔd niʼtin na pə́niʼ, na ponyam púniʼ píídúm əndu a nsí, pə́ə́bə́ə́ konyáadɛ Táán nyɔ́ ayɛ́ɛ undəndínə́ə́n a noʼkóm nó nɛlaamɛʼ. Páyɛ́ɛ əgusəə pɔ́nɔ́: «Aamɛn! Áləlúya! Nyádɛ́an Sə́dúk óo!»

⁵Nɛŋo nɛáság kiim nɛ́dɛ́ɛmɛn kɔ a noʼkóm nó nɛlaamɛʼ nɛɔ́nɔ́: «Nyádɛ́an Táán wəəs óo, pəŋi piim pá polɛɛ́ pəgudin pə́ə́ŋ! Pəŋi muyənjə́g na pɛgóʼkóón pá polɛɛ́ amooyóóbɛn!»

⁶Mbáság koob nɛŋo wɔnɔ́ kiʼtúú kɛ́ pɔɔd aa kɛ́lɛɛ́ agosɔyɔ. Kɛ́yɛ́ɛ wɔnɔ́ mbag ɛ noom áa ɛlɛɛ́ əgulumə, wɔnɔ́ pombambany aa pólɛɛ́ əgudə́əŋən. Aŋŋo yɛ́ɛy áyɛ́ɛ əgusəə yɔ́nɔ́: «Áləlúya! Tɛ́nyádɛan Sə́dúk Táán wəəs o toɛn tuim lɛ́ oóloodi nɛlaamɛʼ niə́ŋ[112]

⁷Tɛ́nyɔ́ga, tíɛn na tɔnyɔ́g, tɛ́moyɛ́ʼkɛn nugəm lɛ́ kɛnɛŋ kɛ́ kubin lɛ́ Mɔɔ́n o nodóm əə́siəd mban kiə́ʼkiig. Ɔʼkɛ́ɛd wo mban aáʼkoman kaáboŋɛn.

⁸Pə́mə́muníígi pisig pɛ́ pilə́ə́. Kɛ́yɛ́ɛ kilə́ə́ kɛ́ lɛ́ɛŋ, kíəwəŋə, kɛmoáŋáán a kúfuʼ. Kɛ́lɛ lɛ́ lɛ́ɛŋ ɛlɛ pigólí pɛ́laŋ pɛ́ pá páagoob na Táán pámɛ́ɛ́lɛ.»

⁹Uŋun ó maʼtom ó Táán wááság kɛʼtɛ́anɛ wɔ́nɔ́ na mɛ: «Tilə wɔʼkɔ́: Kɔŋɛʼ na pəŋi pá polɛɛ́ pɔdɔ́ŋɔ́nɔ́ɔ́n a kɛsɛɛn kɛ́ Mɔɔ́n o nodóm alɛɛ́ agɛɛlɛ[113]» Úyíʼkíni kɛʼtɛ́anɛ wɔnɔ́ na mɛ: «Tɔgɛ́ɛ́ tóonɛ tólɛ tɔgɛ́ɛ́ tó Táán nyɔ́lɛ́nyɔ́amɔɛ́d.»

¹⁰Mbáság kɛɛn əmudə́əŋənən na əndu a ambaan agomonyáadɛ. Náa, wólɛ́ óyɛ́ʼtɛánɛ wɔ́nɔ́: «Ndóo, odɛnyɛ́ɛ́lɛ nkə kɛ́ɛg[114]! Mɛ ndɛ tɛn agá uʼkudin wɔnɔ́ wɛ, wɔnɔ́ pomóŋŋí pááŋ pá pɛ́ngɛ́gɛ́nɛ́ɛ́ pafɔ́lɔ́b pá Yə́sus yɛɛ́moáŋɛ́nɛ pɔɔd. Táán áa ugódíí lɛ́ údúmin əndu a udi agomonyáadɛ.» Fɔ́lɔ́b ɛgo yɛ́ Yə́sus yɛɛ́moáŋɛ́nɛ pɔɔd aa yɛ́ɛnɛ ɛlɛɛ́ a nkə kɛ́ palɔɛgɛʼ pɛbán pá Táán pálɛɛ́ əgusəə.

¹¹A ngim yɛ́ɛy, nyɛɛ́dála mbálámɔɛn mbuənə́ə́n. Nnyambɛlɛʼ nfúlúʼtú yaáság kiim ɛ́lon kɔ. Nyɔ́ yɛɛ́bágɛdɛn a yɛ́lɛ́ ayɛ́ɛ niiŋ lɛ́ Obasáád, Obafɔ́lɔ́b. Alɛ agoyɔmɛ pɔɔd, aánɔɛyɛ a sáád[115]

¹²Əngis yə́ə́ŋ ayɛ́ɛ alola wɔnɔ́ yug. Ayɛ́ɛ na ɛ́fɔlɛ́ ɛ́ todám tó puʼkúm a oʼto. Niiŋ nɛ́ píídílə a nkó yəəŋ nɛ́yɛ́ɛ niiŋ nɛ́ əgín nyɔ́lɛ́nyɔ́əsíŋ yɛɛ́lɛŋɛn.

¹³Yiíníigin lɛnkóod ndɛɔ́dɔ́ɔ́n na maŋɔ́. Ayɛ́ɛ niiŋ lɛ́: Nɔgɛ́ɛ́ nó Táán.

¹⁴Pasɔ́njaa pá a mɔɛn páyɛ́ɛ əgiim pə́muyə́ən a nsun a ponyambɛlɛʼ pó pufúlúʼtú. Páyɛ́ɛ na pisig pɛ́ pilə́ə́ pɛ́ lɛ́ɛŋ pifúlúʼtú a nkó. Pɛ́yɛ́ɛ pɛmoáŋáán a kúfuʼ.

¹⁵Ɛyafág ɛ́ pɛdá ɛgɔ́gɛ́náán kɔŋɛʼ ɛ́yɛ́ɛ agolon a unuʼ wə́ə́ŋ. Na yɛ́lɛ́ aa alɛ́ɛ́ kobáámɛ́ɛ́ mɔnɔŋ. Alɛ́ɛ́ koboólaamɛ a nɛsɔ́njaa a mɔɛn, áyɛɛn na pɔ́lɛ́ a kɛnɔ kɛ́ nníɛn ɛlɛɛ́. Alɛ́ɛ́ kubuugin wɔnɔ́ nyiín a nɔsá nó ilúún ɛ́ Táán nyɔ́ alɛɛ́ na toɛn tuim[116]

¹⁶Niiŋ nɛ́yɛ́ɛ nidiídílə́ kɔ a lɛnkóod yəəŋ na a ombɛɛn wə́ə́ŋ. Nɛ́yɛ́ɛ lɛ́: «Nkúm ɛ puʼkúm, Sə́dúk ɛ pəsə́dúg.»

¹⁷A ngim yɛ́ɛy mbáság kodála uŋun ó maʼtom wúmmú kidə́níʼtən a niis nɛ́ wɔɔ́s. Wɛ́ɛ́sásɛd nɛŋo a mɔɛn wɔ́nɔ́ na pɛsag pɛ́ pɛ́yɛ́ɛ agofɛ́ɛ́la kɔ́gɔ́ɔg a mɔɛmɔɛ́n: «Mɛ́naan óo! Mɛ́naan agaágɔnyɛd a wɔɔ́n wó oʼkóón ó Táán!

¹⁸Mɛ́naan áa anɛ pɛlóŋ pɛ́ puʼkúm, na pɛlóŋ pɛ́ pasɔ́njaa na pɛ́ puʼkúm poɔ́bɔn. Mɛ́naan áa anɛ pɛlóŋ pɛ́ ponyambɛlɛʼ na pɛ́ pɔɔd pá ponyambɛlɛʼ. Mɛ́naan áa anɛ pɛlóŋ pɛ́ pɔɔd piim pá pálɛɛ́ pɛɔ́lɛ́ na pá pálɛɛ́ filí, na pɛ́ poómbaa na pɛ́ pasaá[117]»

¹⁹Mbáság kodála nnyam na puʼkúm pó a nsí na pasɔ́njaa pɔ́ɔ́bɔn paágɔ́nyɛ́dáán agonɔɛyɛ nyɔ́ yɛɛ́bágɛdɛn a nnyambɛlɛʼ yɛ́ nfúlúʼtú, na pasɔ́njaa pə́ə́ŋ.

²⁰Píígúmin nnyam na nyɔ́ ayɛ́ɛ əgulígə pɔɔd lɛ́ nyɔ́lɛ́ alɛ ɔndɔɛgɛʼ pɛbán. Nyɔ́lɛ́ nyɔ́ ayɛ́ɛ́lɛ piə́wúunəniʼ pɛ́ pɛbán a əngis yɛ́ nnyam, pɛbán pɛ́ yiílígə pɔɔd pá páyɛ́ɛ na kɛbɛɛ kɛ́ nnyam, pá píídúm əndu a udi ó kílíngə́lingə kiə́ŋ agomonyáadɛ. Na nnyam, na nyɔ́ ayɛ́ɛ əgulígə pɔɔd lɛ́ nyɔ́lɛ́ alɛ ɔndɔɛgɛʼ pɛbán, páyɛ́bodágɛ́dɛ a noom nó yug na a ndus yaálola[118]

²¹Páyóóna pasɔ́njaa piim pá pɛ́ɛ́lɔ́b. Páyɛ́boyóóna na ɛyafág ɛ́ pɛdá yɛ́ ɛ́yɛ́ɛ agolon a unuʼ ó nyɔ́ yɛɛ́bágɛdɛn a nnyambɛlɛʼ yɛ́ nfúlúʼtú. Pɛsag piim pɛ́yɛ́boonɛ́, piə́yíid.