Read Yambeta Yiífínínin 2 Bible Online

Yiífínínin 2 - Yambeta bible

Yiífínínin 2

¹Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Ɛfɛ́ɛs, ómodɛ́anɛ wɔʼkɔ́: Mɛ nyɔ́ nkumíníníí muə́dədəʼ móʼtáan na móbaan a ombɔg wáam ó nɛnom, mɛ nyɔ́ ndɛɛ́ agodáŋana a kɛgaágadɛ kɛ́ moom móʼtáan na móbaan mó páyɛ́ɛ́lɛ na kóol mó ándɛ páagaágan moláam kɔ, ndɛ əgusəə lɛ́:

²Mbálɛŋ pigólí pɛáŋ pɛ́ olɛɛ́ agɛɛlɛ, na ntɔ́b yɛ́ waáyɛ́ʼkɛ́nɛnɛ́ɛ́, na wɔnɔ́ ná olɛɛ́ agonóʼtan yɛ́lɛ́. Mbálɛŋ lɛ́ odɛɔ́gɔ ogɛɛn a ngim ɛ pɛbɛ́ pɛ́ pɔɔd. Oyásɔ́sɛ́nɛ́ɛ́ pá pálɛɛ́ əgusəə lɛ́ pɔ́lɛ́ pálɛ pɔɔ́n pá maʼtom, omáboobándon, omɔ́ɔ́ŋ lɛ́ pálɛ na pɛnyaʼ, pɔ́dɛɔ́gɔ pɔɔ́n pá maʼtom.

³Mbálɛŋ tɛn lɛ́ olɛ agonóʼtan kɛ́fɔlɛ́, waánɛ́ ntɔ́b a kidíídí kɛ́am oʼtambɛ́lɛd.

⁴Náa, yoom ɛ́lɛ kɔ yɛ́ ndáagoyɛ́ʼkɛn nsɔ́ɔ́ a yɛ́lɛ́. Ɛ́lɛ lɛ́: Undigi agɛnnyɔ́ŋɛn wɔnɔ́ a niə́bə́ə.

⁵Áyóŋɛ́ɛ́ ə́lə́ə́ áa umíim ódɛ́ɛmɛn əgudə́əŋ! Ə́súʼkíí mabɛ́ mááŋ, ógasɛ ondoŋá, wɛ́ɛlɛ kɔŋɛʼ wɔnɔ́ ná oyɛ́ɛ agɛɛlɛ a niə́bə́ə. Oʼkasɛnɛ ɔlaa, ndɛ́ɛ́ kiim kɛnɔ kɛ́ olɛɛ́, nság kuliogi ɛláam yááŋ a kɛa kɛ́ píídə́nígi kɔ.

⁶Náa, nkə kɛ́ kímíʼkə́mmi na wɛ kɛ́lɛ lɛ́: Wɔnɔ́ mɛ, olɛ abɛnɛn nkə kɛ́ pɔɔd pá pálɛɛ́ a ondáŋ ó Nɛʼkoláa páagɛɛlanɛ[7]

⁷Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ. Pá pálɛ́ɛ́ kolónɛ́ɛ́ ombɔg a mɔɛn, ndɛ́ɛ́ koboyɛ́ʼkɛn modámádám mó kiɛd kɛ́ ɔlaa kɛ́ kɛ́lɛɛ́ a pɔlɛ́m pó Táán lɛ́ pánɛ[8]

⁸Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Simíilinə, ómodɛ́anɛ wɔʼkɔ́: Mɛ áa ndɛɛ́ usúid yuudi, mɛ usúgəniʼ ngim. Mɛ nyɔ́ nyiígú náa mbə́ʼkimbuúlinií a ɔlaa ndɛ əgusəə lɛ́:

⁹«Mbálɛŋ ntɔ́b yɛ́ olɛɛ́ a yɛ́lɛ́. Mbálɛŋ osog wááŋ kɔmɔɛ́d lɛ́ a noá na Táán olɛ na tugúm ə́y! Mbálɛŋ tuə́ áa pálɛɛ́ agosɔyɔ niiŋ nɛáŋ kɔbɛ́. Pɔɔd póob pá pálɛɛ́ agosɔyɔ niiŋ nɛáŋ kɔbɛ́ pálɛ əgusəə pɔ́nɔ́ pɔ́lɛ́ pálɛ Yúdɛn kɔmɔɛ́d lɛ́ pɛnyaʼ. Pálɛ ɛgɔny ɛ́ pɔɔd pá páagoob na Sáʼtan.»

¹⁰Odɛʼtámmána ntɔ́b yɛ́ olɛ́ɛ́ konɛ́ɛ́. Óób lɛ́: Omɔlɛɔ́g alɛ́ɛ́ kɛɛlɛ lɛ́ pə́gumən ngab yimmú a ondáŋ wááŋan, páboolɔ́gɔ a puog pó njaan agoboásɔsɛn. Alɛ́ɛ́ kɛɛlɛ náan lɛ́ ná púdum ngim na Táán. Pálɛ́ɛ́ kobonɛ́ɛyɛ ntɔ́b náan mədúg mówád[9] Udisúúli ɔmbɔg súʼtə́ə́ a kugu koáŋ, ndɛ́ɛ́ kooyɛ́ʼkɛn nodám nó ɔlaa.

¹¹Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ. Pá pálɛ́ɛ́ kolónɛ́ɛ́ ombɔg a mɔɛn, pádɛndɛ́ɛ́ kugu, kugu kó annam ábaan.

¹²Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Pɛlɛgáam, ómodɛ́anɛ wɔʼkɔ́: Mɛ nyɔ́ ndɛɛ́ na ɛyafág ɛ́ pɛdá, ɛyafág yɛ́ ɛ́lɛɛ́ ɛsɛábɛ́sɛábɛ, ɛgɔ́gɛ́náán toá tuim kɔŋɛʼ ndɛ əgusəə lɛ́:

¹³Mbálɛŋ kɛnɔ kɛ́ɛg kɛ́ olɛɛ́ alaa kɔ. Kɔ áay aa Sáʼtan adɛ́gɛ́nɛ́ɛ́ oʼkɔɔ wə́ə́ŋ ó nɛlaamɛʼ. Náa, wɛ uyə́gúmə́nə́níí əgín na mɛ. Udiʼkóoliogi ongoo agaag kó waágɛ́nɛ́ɛ́ oʼto na mɛ ɔmbɔ́ ná páyóón Antɛʼpáas, wɛ́sɛnɛg yaam ɛ fɔ́lɔ́b kɔ áay a pəŋi, kɛnɔ kɛ́ Sáʼtan agónɛ́nɛ́ɛ́ oʼkɔɔ wə́ə́ŋ.

¹⁴Náa, pɛbán pɛ́lɛ kɔ pɛ́ ndáagoyɛ́ʼkɛn nsɔ́ɔ́ a pɛ́lɛ́. Pɛ́lɛ lɛ́: Olɛ na pɔɔd a ondáŋ wááŋ pá pálɛɛ́ əguyə́ən nkə kɛ́ Paláam ayáʼkánánɛ pɔɔd a kɛnɛŋ kɛ́ pɛmbáa. Ayáʼkánánɛ Paláag kɛɛlɛ lɛ́ pɔɔ́n pá Ɛ́sɛlayɛl pə́də́əŋ a kɔbɛ́, pánɛ manám má ponyam pó pááfɔnya a pɛbán pɛ́ ambog, pɛ́ɛlɛ pɛɔg[10]

¹⁵Olɛ tɛn na pɔɔd a ondáŋ wááŋ pá pɛ́lɛɛ́ əguyə́ən tɔʼtilíin ɛ Nɛʼkoláa[11]

¹⁶Ə́súʼkíí anɛ́ɛ́n mabɛ́ mááŋ ógasɛ ɔlaa. Oʼkasɛnɛ ɔlaa, ndəgəə́bisig kiim ná mpoónɔɛyɛ na ɛyafág ɛ́ pɛdá yɛ́ ɛ́lɛɛ́ na mɛ a unuʼ.

¹⁷Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ. Pá pálɛ́ɛ́ kolónɛ́ɛ́ ombɔg a mɔɛn, ndɛ́ɛ́ koboyɛ́ʼkɛn moom mó konɛ mó mólɛɛ́ moɔsɛ́gáán. Moom mó konɛ mó pɔ́ɔdɔ́ŋɔn lɛ́ máan.[12] Ndɛ́ɛ́ koboyɛ́ʼkɛn tɛn nɛdáán nɛ́ nifúlúʼtú na niiŋ nɛ́ nɛwa nidilídə́ə́n kɔ. Nɛ́lɛ́ɛ́ kɛɛn niiŋ nɛ́ mɔɔd na mɔɔd adɛálɛŋɛɛ́, əgín wɔʼkɔ́ nyɔ́ ndáamoyɛ́ʼkɛn nɛ́lɛ́.

¹⁸Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Tiəʼtíil, ómodɛ́anɛ wɔʼkɔ́: Mɛ mɔɔ́n ó Táán, mɛ nyɔ́ əngis yáam álɛɛ́ agonom wɔnɔ́ kɛgan kɛ́ yug, ambaan yáam wɔnɔ́ kisúg kɛ́ pɔlɔ́ɔnsɛ kɛ́ póósóbóni, ndɛ əgusəə lɛ́:

¹⁹Mbálɛŋ pigólí pɛáŋ pɛ́ olɛɛ́ agɛɛlɛ. Mbálɛŋ lɛ́ olɛ na nnyɔ́ŋánán na pɔɔd, waágɛn oʼto fɔ́lɔ́b fɔ́lɔ́b na mɛ, olɛ na ɔʼtɛ́m a pigólí pɛ́am, olɛ agonóʼtan. Mbálɛŋ lɛ́ nkə kɛ́ olɛɛ́ agɛɛlɛ nɛ́gɔŋ kɛ́mááyɛn nkə kɛ́ wɛɛ́yáŋ agɛɛlɛ kalaʼ.

²⁰Náa, yoom ɛ́lɛ kɔ yɛ́ ndáagoyɛ́ʼkɛn nsɔ́ɔ́ a yɛ́lɛ́. Ɛ́lɛ lɛ́: Udíín Sɛsabɛ́ɛl[13], ɔʼkɛ́ɛd nyóon nyɔ́ alɛɛ́ əgəə́səə lɛ́ nyɔ́lɛ́ alɛ ɔndɔɛgɛʼ pɛbán o Táán. Umudíin lɛ́ ə́lígə pəgudin páam, aáboyáʼkananɛ lɛ́ pɛ́ɛlɛ pɛɔg, pánɛ manám má ponyam pó pááfɔnya a pɛbán pɛ́ ambog.

²¹Njímudíin kɛnɛŋ lɛ́ ná yə́suʼki, ágasɛ ɔlaa wə́ə́ŋ. Náa, ɔdɛɔ́gɔ anyɔ́ŋɛn kəə́suʼki ɔlaa wə́ə́ŋ ó pɛɔg wóow.

²²Óób lɛ́, ndɛ́ɛ́ komoódagɛdɛ a mɔdɛ́gɛ́n mó alɛ́ɛ́ kaánɛ a mólɛ́. Pɔsɔ́sɔ́g tɛn pə́ə́ŋ pá pɛɔg pə́diə́suʼkini ɔlaa wóow wó alɛɛ́ agoboyáʼkananɛ, ndaboyɛ́ʼkɛn tɛn pɔ́lɛ́ ntɔ́b yɛ́ nkóʼkóón.

²³Ndɛ́ɛ́ koóna tɛn pɔɔ́n pə́ə́ŋ. Náan, mogony mó pəə́liʼtiniʼ muim mólɛ́ɛ́ kolɛŋ lɛ́ ndɛ nyɔ́ aálɛŋ ɔʼtɛ́m ó mɔɔd na mafɛgaʼ mə́ə́ŋ a kaadɛ kɛ́. Ndɛ́ɛ́ kɛɛlɛ na ɛ́nɛ́ mɔɔd əgín wɔnɔ́ ná yiígúd[14]

²⁴Náa, pəŋi pá a Tiəʼtíil pá podɛɔ́gɔ əguyə́nií tɔʼtilíin yɛ́ɛy, pəŋi pá podɛaʼkananɛɛ́ nkə kɛ́ pɔɔd póob pálɛɛ́ agodɔ́ŋɔn lɛ́ «pɛbán pɛ́ nuníb pɛ́ Sáʼtan[15]», táá nkə kɛ́ ndáabodɛ́anɛ aa kɛ́ɛnɛ: Ntɛábonyáŋɛnɛ kɛnó kímmú kɛ́ndɛ́ŋ.

²⁵Náa, nkə kɛ́ waándɛɛ́ na kɛ́lɛ́, kumin kɛ́lɛ́ kɔŋɛʼ súʼtə́ə́ a kɛnɛŋ kɛ́ ndɛ́ɛ́ kiimií.

²⁶Pá pálɛ́ɛ́ kolónɛ́ɛ́ ombɔg a mɔɛn, pá pálɛ́ɛ́ kɛɛlɛɛ́ nɛnyɔ́ŋɛn nɛ́am súʼtə́ə́ a nɛman, ndɛ́ɛ́ koboyɛ́ɛlɛ lɛ́ pálaamɛ mɔnɔŋ.

²⁷Pálɛ́ɛ́ kodáŋananɛ mɔ́lɛ́ a nɛsɔ́njaa a mɔɛn, páyɛɛn na pɔ́lɛ́ a kɛnɔ kɛ́ nníɛn ɛlɛɛ́. Pálɛ́ɛ́ koboyááda wɔnɔ́ pidín.

²⁸Toɛn tó Sɛ waam ayɛ́nyɛɛ́ʼkɛn, pɔ́lɛ́ tɛn pálɛ́ɛ́ kɛɛn na tólɛ́ náan yoom ímuʼ. Ndɛ́ɛ́ koboyɛ́ʼkɛn tɛn yəə́dədəʼ ɛ́ koany[16]

²⁹Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ.