Read Yambeta Yiífínínin 20 Bible Online

Yiífínínin 20 - Yambeta bible

Yiífínínin 20

¹Mbáság kodála anɛ́ɛ́n uŋun ó maʼtom wúmmú wə́əgiim úsuu a mɔɛn. Wígóodi kɛdám kɛ́ pasɛŋ a ombɔg na ilibəʼ ɛ́ niɛ́ nɛ́ nɛ́lɛɛ́ miɛ́ɛ́ŋ a nsí.

²Wíígúmin tɛlagɔ́ɔŋ, uʼkud ó kalaʼ wóow wó pɔ́ɔdɔ́ŋɔn lɛ́ Omɔlɛɔ́g, oó lɛ́ Sáʼtan, wááság komoogóda na pasɛŋ lɛ́ yɛ́ɛlɛ tɔ́ɔ́sɛn ɛ pɛag mmuʼ a pasɛŋ póob[119]

³Óyɛ́modágɛ́dɛ a niɛ́ nɛ́ nɛ́lɛɛ́ miɛ́ɛ́ŋ a nsí. A ngim yɛ́ɛy wááság kubuəg umbuús, wááfany na ilibəʼ agɛɛlɛ lɛ́ tɛlagɔ́ɔŋ idindígə kə́mmú mɔnɔŋ súʼtə́ə́ agɛɛn əgiig ná tɔ́ɔ́sɛn ɛ pɛag yɛ́ɛy mmuʼ yaáman. A ngim ɛ tɔ́ɔ́sɛn ɛ pɛag yɛ́ɛy, kígóódi lɛ́ pə́muyóndin pasɛŋ. Náa, kɛ́lɛ́ɛ́ kɛɛn əgín a ɛyaa ɛ́ kɛnɛŋ sɔɔŋ.

⁴Mbáság kodála toʼkóm tó puʼkúm[120] Páyɛ́ʼkɛn na pá pííləndinin a toʼkóm tóod toɛn lɛ́ pɔ́yɔmɛ pɔɔd. Mbáság kodála tɛn modáányɛ́ mó pɔɔd pá páyɛ́boosóma nto lɛ́ pɛ́ɛ́dɛ́lɛ́mɛn Yə́sus mbaasɔ́, pámáalɔɛgɛ tɔsɔm tó Táán. Pɔ́lɛ́ pá pə́diʼkə́dúmíí əndu a udi wó nnyam agomonyáadɛ, ɔmbɔ́ tɛn a udi ó kílíngə́lingə kiə́ŋ. Pɔ́lɛ́ pá pádɛʼkáaboóliɛdɛɛ́ kɛbɛɛ a udi, ɔmbɔ́ lɛ́ a ombɔg. Pə́yímbuúlíni a ɔlaa, páálaamɛ tɔ́ɔ́sɛn ɛ pɛag mmuʼ, ondáŋ na Kilíʼtus.

⁵Ná tɔ́ɔ́sɛn ɛ pɛag mmuʼ yɛ́ɛy ɛyɛ́ɛ idínjíig, pɛlóŋ pímmú pɛ́ʼkáag pɛ́ndɛ́ŋ pídiʼkə́əgimbuúlini a ɔlaa. Taa, koóndɛg kó pɛlóŋ kó na oʼto na oʼto aa kóog aá!

⁶Kɔŋɛʼ igə náan na pá páyɛ́ɛ a ondáŋ ó pá páyóndɛg a nɛóndɛg nɛ́ pɛlóŋ nɛ́ na oʼto na oʼto nɛ́ɛn. Pɔ́lɛ́ pándagoob na Táán. Kugu kó annam ábaan kódɛndɛ́ɛ́ koboodɔ́bɔ. Pálɛ́ɛ́ kɛɛn payaaganɛʼ pɛfɔny pá Táán na pá Kilíʼtus. Pálɛ́ɛ́ kolaamɛ ondáŋ na Kilíʼtus a tɔ́ɔ́sɛn ɛ pɛag yɛ́ɛy mmuʼ.

⁷Ná tɔ́ɔ́sɛn ɛ pɛag yɛ́ɛy mmuʼ yaáman, áay aa pálɛ́ɛ́ kolónɛɛ́ Sáʼtan a yoog yɛ njaan yɛ́ɛy yɛ́ páyɛ́moyáág a yɛ́lɛ́.

⁸Alɛ́ɛ́ kɛɛn lɛ́ yɛ́ɛn əlígə mɔnɔŋ má a modɔŋ mó nsí muim múniʼ. Mɔnɔŋ mágo móom aa móom málɛɛ́ Kɔ́ɔg na Magɔ́ɔg.[121] Alɛ́ɛ́ koboógɔnyɛd lɛ́ pánɔɛyɛ ndɛg ɛ Táán pɛdá. Pálɛ́ɛ́ kɛɛn ɔmban wɔnɔ́ ɔsáyɛ́n wó a ɛbá ɛ́ noom nó ɛbá fiɛ́d.

⁹Páyáyóóŋɛ́ɛ́ ondáŋ agɛɛn a nsí ngim, pámágóʼkɛ́nɛ́ɛ́ pálɛ́ɛg yɛ́ Táán alɛɛ́ anyɔ́ŋɛn kɛ́fɔlɛ́, kɛnɔ kɛ́ ndɛg yəəŋ ɛlɛɛ́. Náa, yug yááság kiim ísuu a mɔɛn, ɛ́mábogɔ́lɔ́nɛ.

¹⁰Píísiə́d Omɔlɛɔ́g nyɔ́ ayɛ́ɛ əgubulígə, pámámodágɛ́dɛ a noom nó yug na a ndus yaálola[122] Kɛnɔ kɛ́ pɛ́ɛ́dágɛ́dɛ nnyam na nyɔ́ ayɛ́ɛ əgulígə pɔɔd lɛ́ nyɔ́lɛ́ alɛ ɔndɔɛgɛʼ pɛbán o Táán. Pálɛ́ɛ́ konɛ ntɔ́b kɔ yɛ́ nkóʼkóón na wɔɔ́s na udúg. Pálɛ́ɛ́ konɛ yɛ́lɛ́ pɛag wɔnɔ́ pɛag a pɛnɛŋ piim.

¹¹A ngim yɛ́ɛy, mbáság kodála kɛŋaŋɛʼ kɛ́ noʼkóm nufúlúʼtú, noʼkóm nó nɛlaamɛʼ na nyɔ́ yiíləndinin kɔ a nólɛ́. Nsí na mbálámɔɛn iyə́suídíí a udi wə́ə́ŋ, mɔɔd aʼtála kə́mmú.

¹²A ngim tɛn yɛ́ɛy, nyɛɛ́dála pɔɔd pá pííguə́ʼkən lɛ́ na pɔɔd pá pagóón na muyənjə́g kɛ́ padɛ́lɛ́máán a udi ó noʼkóm nó nɛlaamɛʼ. Pagálaʼtaʼ pə́yə́buə́níí. Yimmú tɛn iyə́buə́níí. Yɛ́ɛy ɛyɛ́ɛ kálaʼtaʼ yɛ ɔlaa. Pɛ́ɛ́yɔ́mɛ ɛ́nɛ́ kɛlóŋ əgín a nkə kɛ́ ayɛ́ɛ́lɛ, wɔnɔ́ tɛn kɛ́yɛ́ɛ kidiídílə́ a pagálaʼtaʼ[123]

¹³Noom nó ɛbá fiɛ́d noɛ́lónɛ pɛlóŋ piim pɛ́ pɛ́yɛ́ɛ a nólɛ́ a kaadɛ. Kugu na nigúu nɛ́ pá pə́ʼkugúú páálónɛ tɛn pɛɔ́bɔn pɛlóŋ. Pɛ́ɛ́yɔ́mɛ ungim əgín wɔnɔ́ a nkə kɛ́ ayɛ́ɛ́lɛ.

¹⁴A ngim yɛ́ɛy anɛ́ɛ́n pááság kodagɛdɛ kugu na nigúu nɛ́ pá pə́ʼkugúú a noom nó yug. Taa, kugu kó annam ábaan áa kóog kólɛɛ́ noom nó yug óo!

¹⁵Pɛ́ɛ́dágɛ́dɛ ungim nyɔ́ niiŋ niə́ŋ nɛ́dɛʼkɛ́lɛɛ́ nidiídílə́ a kálaʼtaʼ yɛ ɔlaa, a noom nó yug.