Read Yambeta Yiífínínin 21 Bible Online

Yiífínínin 21 - Yambeta bible

Yiífínínin 21

¹A ngim yɛ́ɛy anɛ́ɛ́n, mbáság kodála mɔɛn yɛ́ ngwa na nsí yɛ́ ngwa lɛ́ mɔɛn ɛ kalaʼ ɛyɛ́ɛ yəə́ʼkusə́ngilid, ɔmbɔ́ tɛn nsí ɛ kalaʼ. Noom nó ɛbá fiɛ́d nódɛʼkɛ́ɛ kɔ kə́mmú.

²Nyɛɛ́dála Yolósalɛm yɛ́ ngwa, pálɛ́ɛg yɛ́ yaágoob na Táán yəə́giim ísuu a mɔɛn. Táán áa əyíím ámoodom. Ɛyɛ́ɛ wɔnɔ́ ɔʼkɛ́ɛd wo mban nyɔ́ amálɛ́ŋɛ́ɛ́ agɛɛn əgəə́bun na onom.

³Mbáság koob nɛŋo nɛ́ɔsɔyɔ na toɛn. Nɛ́yɛ́ɛ əgiim nɛ́dɛ́ɛmɛn a noʼkóm nó nɛlaamɛʼ, nɛɔ́nɔ́: «Taa, Táán əə́ndəgiim ələndin nɛ́gɔŋ yɛ́ɛnɛ a kɛgaágadɛ kɛ́ pɔɔd. Alɛ́ɛ́ kolaa na pɔ́lɛ́, pálɛ́ɛ́ kɛɛn ndɛg yəəŋ. Nyɔ́lɛ́nyɔ́amɔɛ́d alɛ́ɛ́ kɛɛn na pɔ́lɛ́. Alɛ́ɛ́ kɛɛn Táán yɔɔbɔn.

⁴Alɛ́ɛ́ koman kubuúŋiənə pɛlɛɛ a əngis. Kugu kódɛndɛ́ɛ́ kɛɛn kɔ kə́mmú, mandɛɛ mádiɛn kɔ, pɔɔd pádɛányámɛ́ɛ́ kə́mmú, pádɛánɛ́ɛ́ lɛ́ pɛbán pɛ́ kalaʼ piim pídiə́giʼkini kɛɛn kɔ kə́mmú[124]»

⁵Nyɔ́ yiíləndinin a noʼkóm nó nɛlaamɛʼ aáság kusəə ɔnɔ́: «Nɛ́gɔŋ yɛ́ɛnɛ mbáʼkɛɛlɛ, moom muim moándɛ mowa.» Náa ɔnɔ́ na mɛ kə́mmú: «Tilə wɔʼkɔ́: Tɔgɛ́ɛ́ tóonɛ tólɛ tóam, tólɛ fɔ́lɔ́b. Tódɛɔ́gɔ tɔgɛ́ɛ́ tó mɔɔd kaag isuŋ a tólɛ́.»

⁶Aáság kiiʼkini kusəə kə́mmú ɔnɔ́: «Nɛ́gɔŋ yɛ́ɛnɛ, kiim kɛándɛ kɛmanáán. Mɛ áa ndɛɛ́ usúid yuudi, mɛ usúgəniʼ ngim. Ndɛ a niə́bə́ə na a niyibəniʼ. Nyɔ́ alɛɛ́ na nɛŋɔ́ɛd, ndamoyɛ́ʼkɛn isim yɛ́ ɔlaa lɛ́ áŋo. Ndamoyɛ́ʼkɛn yɛ́lɛ́ a náan iyó[125]

⁷Ndagɛɛ́ʼkɛn yɛ́lɛ́ na ungim nyɔ́ yɛɛ́lón ombɔg a mɔɛn. Mɛ ndɛ́ɛ́ kɛɛn Táán wəəŋ. Nyɔ́lɛ́ alɛ́ɛ́ kɛɛn mɔɔ́n waam nyɔ́ ɔnɔ́mɛɛd[126]

⁸Náa, a pá pálɛɛ́ piɛ́yɛ́y, pá pɔ́dɛɔ́gɔ əgəə́liʼtinií, na pá pálɛɛ́ agɛɛlanɛ pɛbán pɛ́ masoo, na pá páagoóna pɔɔd, na pá pə́əbúlimən na pagɛ́ɛd ɔmbɔ́ lɛ́ na panɔ́mɛɛd pá pɔ́dɛɔ́gɔ pɔ́ɔ́bɔn, na pɔɔd pá páagɛɛlanɛ pɛnon, na pá pálɛɛ́ əguyə́ən ambog, na pɔɔd pá pɛnyaʼ piim, pɔ́lɛ́ póob piim oʼkɔɔ wɔ́ɔ́bɔn ólɛ a noom nó nóalola yug na a ndus[127] Taa, kugu kó annam ábaan áa kóog aá.»

⁹Uŋun ó maʼtom úmmuʼ wó oyɛ́ɛ a ondáŋ ó məŋun má maʼtom máʼtáan na mábaan má mígóodi mocɔ́gɛ́cɔ́gɛ́ móʼtáan na móbaan mó móyɛ́ɛ muyə́gə́ə́n tɛn na las yɛ ntɔ́b ɛ́ʼtáan na ɛ́baan wááság kɛʼtɛ́anɛ wɔ́nɔ́ na mɛ: «Mɛ́ɛn ó! Nkuúloodi ɔʼkɛ́ɛd o pálɛ́ɛg, oʼkán o Mɔɔ́n o nodóm.»

¹⁰Uŋun wó Ufúlúʼtú óyɛ́nyɛɛlɛ, uŋun ó maʼtom wááság kɛnnyáŋɛn agɛɛn na mɛ a kɛa kɛ́ oʼkon lóóŋ a mɔɛn[128] Kɔ́gɔ́ɔg wááság kindoodi Yolósalɛm, pálɛ́ɛg yɛ́ yaágoob na Táán. Ɛyɛ́ɛ əgiim ísuu kɔ́gɔ́ɔg a mɔɛn, a nó Táán.

¹¹Nugəm nó Táán nyɔ́lɛ́nyɔ́amɔɛ́d nóyɛ́ɛ agonom kɔ a pálɛ́ɛg yɛ́ɛy. Ɛyɛ́ɛ agonom a ombod ó kisig kɛ́ nɛdáán nɛ́ pɔ́ɔdɔ́ŋɔn lɛ́ sɛ́asɛʼpɛ, [129] nɛdáán nɛ́ nɛ́anom wɔnɔ́ məə́.

¹²Pawaŋ pá pálɛ́ɛg ɛgo yɛ́ɛy páyɛ́ɛ pəbibə́ə́n, panyángɛ́lɛ́dáán tɛn a mɔɛn. Mədíyoog máyɛ́ɛ mówád na mábaan. Məŋun má maʼtom tɛn mówád na mábaan máyɛ́ɛ ənuŋ mədíyoog móom. Əngiŋ áyɛ́ɛ əʼtiídílə́ kɔ a mədíyoog móom. Əngiŋ yɛ́ɛy áyɛ́ɛ əngiŋ á pibúúm pɛówád na pɛ́baan pɛ́ pɔɔ́n pá Ɛ́sɛlayɛl.

¹³Mədíyoog móom máyɛ́ɛ lɛ́: Mádáád a waŋ yɛ́ ɛyɛ́ɛ agodɛ́ʼtɛg noá nó wɔɔ́s ólɛɛ́ əgiim ódɛ́ɛman. Mə́mmú mádáád a yɛ́ a noá nó kobag. Mədíyoog tɛn mə́mmú mádáád a noá nó wɔɔ́s ólɛɛ́ agɛɛn agɛɛ́mɛŋan. Mádáád tɛn a noá nó kusuu[130]

¹⁴Pawaŋ pá oʼkág ó pálɛ́ɛg yɛ́ɛy páyɛ́ɛ pagónáán a aʼtáán yówád na ábaan. Kɔ a aʼtáán yɛ́ɛy, píídílə əngiŋ á pɔɔ́n pá maʼtom pówád na pábaan pá mɔɔ́n o nodóm.

¹⁵Uŋun ó maʼtom wó óyɛ́ɛ ɔsɔyɔ na mɛ wíguminin niob a ombɔg afɛga pálɛ́ɛg, na mədíyoog, na pawaŋ pá oʼkág ó pálɛ́ɛg na nɛ́lɛ́. Niob nɛ́go nɛ́yɛ́ɛ kóol na kóol[131]

¹⁶Məbub má pálɛ́ɛg máyɛ́ɛ yoom ímuʼ na koom kuə́ŋ. Uŋun ó maʼtom wɛ́ɛ́fɛ́ga pálɛ́ɛg na niob niə́ŋ. Koom kóyɛ́ɛ kɛ́lomɛ́ʼtaʼ tɔ́ɔ́sɛn ɛ́baan na əʼtin yówád. Məbub máyɛ́ɛ tɛn náan yoom ímuʼ. Oʼtɛ́n tɛn náan yoom ímuʼ.

¹⁷Uŋun ó maʼtom wɛ́ɛ́fɛ́ga tɛn oʼkág wɔnɔ́ ná ándɛ pɔɔd páafɛga oʼtɛ́n ó yoom. Agɛɛlɛ lɛ́ uŋun ó maʼtom wɔ́ɔŋ oʼtɛ́n wó oʼkág, wɛ́ɛ́bána na nɔfɛg nóon, əʼtin ádáád.

¹⁸Pɛ́ɛ́bágɛ pawaŋ pá oʼkág ogo na aʼtáán yá pɔ́ɔdɔ́ŋɔn lɛ́ sɛ́asɛʼpɛ. Pálɛ́ɛg yɛ́lɛ́yɛ́amɔɛ́d ɛyɛ́ɛ kóol na kóol mmɔɛ́d, yaánom wɔnɔ́ məə́.

¹⁹Pɛ́ɛ́lɛ́ŋ aʼtáán yá pɛ́ɛ́gónɛn oʼkág ó pálɛ́ɛg a yɛ́lɛ́ na mbod yɛ aʼtáán əngim yá yáadɛ́a. Aʼtáán yɛ́ɛy áyɛ́ɛ lɛ́: A kɛgon kɛ́ na oʼto na oʼto: Sɛ́asɛʼpɛ. A kɛ́ annam ábaan: Səfíil. A kɛ́ annam ádáád: Kalɛsɛdowáan. A kɛ́ annam ə́niʼ: Ɛmɛlóodɛ.

²⁰A kɛ́ annam áʼtáan: Salɛdowáan. A kɛ́ annam áʼtáan na úmmuʼ: Kɔlɛnalíin. A kɛ́ annam áʼtáan na ábaan: Kilisolíid. A kɛ́ annam áʼtáan na ádáád: Pəlíil. A kɛ́ annam áʼtáan na ə́niʼ: Toʼpáas. A kɛ́ annam yówád: Kɛlɛsoʼpaláas. A kɛ́ annam yówád na úmmuʼ: Ɛyasɛ́ɛntɛ. A kɛ́ annam yówád na ábaan: Əməʼtíistə.

²¹Mədíyoog mówád na mábaan máyɛ́ɛ tɛn mɔlɛɛ́ndɛŋ mówád na móbaan. Páyɛ́ɛ́lɛ ɛ́nɛ́ udíyoog na ɛlɛɛ́ndɛŋ ímuʼ súg. Kɛdom kɛ́ pálɛ́ɛg kɛ́yɛ́ɛ kóol na kóol, kɛ́anom sə́ngə́lə́ngə́lə́ wɔnɔ́ məə́[132]

²²Náa, kɔ a pálɛ́ɛg yɛ́ɛy, ntɛʼkáadála tɛ́mpɛl lɛ́ Sə́dúk, Táán o toɛn tuim na Mɔɔ́n o nodóm áa pálɛɛ́ tɛ́mpɛl yɔɔbɔn.

²³Kɔ a pálɛ́ɛg yɛ́ɛy, kɛ́dɛʼkɛ́ɛ əguunə lɛ́ wɔɔ́s ónom, ɔmbɔ́ tɛn wəə́ lɛ́ nugəm nó Táán nóyɛ́ɛ agonom kɔ. Ɛláam yə́ə́ŋ áa yɛ́ɛy ɛ́yɛ́ɛ Mɔɔ́n o nodóm.

²⁴Mɔnɔŋ miim málɛ́ɛ́ kodáŋana a kisəə kiə́ŋ a kaadɛ. Puʼkúm pó a nsí púyiimən kɔ na tugúm toɔ́bɔn.

²⁵Mədíyoog má pálɛ́ɛg málɛ́ɛ́ kolɔb maás wɔɔ́s ungim. Mamɔɛ́d mádɛndɛ́ɛ́ kəə́buəg kə́mmú lɛ́ udúg ódɛndɛ́ɛ́ kudə́əŋ kə́mmú.

²⁶Pálɛ́ɛ́ kiimən kɔ na nugəm nó mɔnɔŋ, na tugúm toɔ́bɔn.

²⁷Ímuʼ na ímuʼ yɛ́ ɛ́dɛɔ́gɔ ɛmoáŋáán ɛ́dɛndɛ́ɛ́ kosɔd kɔ. Ɔmbɔ́ tɛn úmmuʼ na úmmuʼ nyɔ́ alɛɛ́ agɛɛlanɛ pɛbán pɛ́ pɛbɛ́, oó lɛ́ nyɔ́ alɛɛ́ na pɛnyaʼ adɛndɛ́ɛ́ kosɔd kɔ. Əgín pá niiŋ nɛɔ́bɔn nɛ́lɛɛ́ nidilídə́ə́n a kálaʼtaʼ yɛ ɔlaa ɛ Mɔɔ́n o nodóm áa pálɛ́ɛ́ kosɔ́dɛ́ɛ́ a pálɛ́ɛg yɛ́ɛy[133]