Read Yambeta Yiífínínin 22 Bible Online

Yiífínínin 22 - Yambeta bible

Yiífínínin 22

¹Uŋun ó maʼtom wááság kindoodi anɛ́ɛ́n noom nó məní má máagɛɛ́ʼkɛnanan ɔlaa. Nóyɛ́ɛ sə́ngə́lə́ngə́lə́ wɔnɔ́ məə́. Nóyɛ́ɛ əgiim nólon a noʼkóm nó nɛlaamɛʼ nó Táán, noʼkóm nó Mɔɔ́n o nodóm[134]

²Məní móom máyɛ́ɛ əgusuu a kɛgaágadɛ kɛ́ kɛdom kɛ́ a pálɛ́ɛg. Kiɛd kɛ́ kɛ́agɛɛ́ʼkɛnanan ɔlaa kɛ́yɛ́ɛ a kɛnɔ kɛ́ noom nóyásálɛ́ɛ́ mbɔg ɛ́baan. Kiɛd kɛ́ɛg kɛ́yɛ́ɛ əguum pɛnɛŋ pɛówád na pɛ́baan a waag. Ɛ́nɛ́ wəə́ kíyuum. Toáŋánán tuə́ŋ tóyɛ́ɛ əgugóʼton pɔɔd pá a mɔnɔŋ miim.

³Yoom ɛ́dɛndɛ́ɛ́ kɛɛn kɔ yɛ́ ɛ́lɛ́ɛ́ kɛɛn ilumísiə́n[135] Noʼkóm nó nɛlaamɛʼ nó Táán, noʼkóm nó Mɔɔ́n o nodóm nólɛ́ɛ́ kɛɛn kɔ a pálɛ́ɛg yɛ́ɛy. Pəgudin pə́ə́ŋ pálɛ́ɛ́ kiimən kɔ əgiim amoyɛ́ʼkɛn nnyáádɛ́ na pɛɔ́sɔ́gɔ́lɔ́n.

⁴Pálɛ́ɛ́ kodála udi ó Táán. Niiŋ niə́ŋ nɛ́lɛ́ɛ́ kɛɛn nidiídílə́ a ofom wɔ́ɔ́bɔn.

⁵Mbin ɛdɛndɛ́ɛ́ kudə́əŋ kə́mmú kɔ a pálɛ́ɛg yɛ́ɛy. Pádɛndɛ́ɛ́ kuunə lɛ́ pɛ́ɛn na kisəə kɛ́ ɛláam, ɔmbɔ́ lɛ́ kɛ́ wɔɔ́s lɛ́ Sə́dúk Táán alɛ́ɛ́ kɛɛlɛ lɛ́ kisəə kiə́ŋ kíɛn na pɔ́lɛ́. Pálɛ́ɛ́ kɛɛn na nɛlaamɛʼ a pɛnɛŋ piim[136]

⁶Náa uŋun ó maʼtom wɔ́nɔ́ na mɛ: «Tɔgɛ́ɛ́ tóonɛ tólɛ tɔgɛ́ɛ́ tó fɔ́lɔ́b, tɔgɛ́ɛ́ tó mɔɔd ogódíí kaag oʼto a tólɛ́. Sə́dúk Táán nyɔ́ alɛɛ́ agɛɛ́ʼkɛn Uŋun wə́ə́ŋ na Palɔɛgɛʼ pɛbán pə́ə́ŋ, əyíím ádom uŋun wə́ə́ŋ ó maʼtom lɛ́ wíim oloodi na pəgudin pə́ə́ŋ nkə kɛ́ kɛ́agaáyɛ́ɛlɛ kɛnɛŋ sɔɔŋ.»

⁷Yə́sus alɛ əgusəə ɔnɔ́: «Taa, kɛnɛŋ sɔɔŋ nyíim! Kɔŋɛʼ na nyɔ́ alɛɛ́ agoóbɛn tɔgɛ́ɛ́ tó tólɛɛ́ a kálaʼtaʼ yɛ́ɛnɛ! Tɔgɛ́ɛ́ tó túmíim a nó Táán!»

⁸Mɛ Sɛ́aŋ njóób pɛbán pɛ́ɛb, mbáadála pɛ́lɛ́. Ná njɛ́ɛ mbáʼkoob pɛ́lɛ́, mbáadála, njɛ́ɛ́n ədə́əŋənən uŋun ó maʼtom wó úyíím əgindoodi pɛ́lɛ́ a ambaan agomonyáadɛ.

⁹Náa, óyɛ́ʼtɛánɛ wɔ́nɔ́ na mɛ: «Ndóo, odɛnyɛ́ɛ́lɛ náan[137]! Ndɛ tɛn uʼkudin wɔnɔ́ wɛ, wɔnɔ́ pomóŋŋí tɛn pááŋ palɔɛgɛʼ pɛbán pá Táán, wɔnɔ́ ungim tɛn nyɔ́ alɛɛ́ agoóbɛn tɔgɛ́ɛ́ tó tólɛɛ́ a kálaʼtaʼ yɛ́ɛnɛ. Táán áa kɛádɛ́ɛ́ lɛ́ ómonyáadɛ!»

¹⁰Wááság kusəə kə́mmú wɔ́nɔ́ na mɛ: «Tɔgɛ́ɛ́ tóonɛ tó tólɛɛ́ a kálaʼtaʼ yɛ́ɛnɛ tólɛ tɔgɛ́ɛ́ tó túmíim a nó Táán, odɛnjɔ́ɔ́sɛg tólɛ́ lɛ́ kɛnɛŋ kɛ́ pɛbán pɛ́ɛb kaáyɛ́ɛlɛ kɛándɛ ndúmiʼ.»

¹¹Nyɔ́ alɛɛ́ ɔmbɛ́ yɛ́ɛnanan yuudi agɛɛlɛ kɔbɛ́. Nyɔ́ alɛɛ́ alaa a pinig yɛ́ɛn yuudi alaa a pinig. Náa, nyɔ́ alɛɛ́ sáád yágɔ́nɛgɛ kolaa a sáád. Nyɔ́ alɛɛ́ a ngə́ ɛ Táán yágɔ́nɛgɛ kɛɛn yuudi a yɛ́lɛ́[138]

¹²Yə́sus yiísə́ə́ tɛn kə́mmú ɔnɔ́: Taa, kɛnɛŋ sɔɔŋ nyíim! Ndəəgiim na pɛsáábɔ́n a ombɔg agɔsáábɔn ɛ́nɛ́ mɔɔd əgín wɔnɔ́ a pigólí piə́ŋ pɛ́ ayɛ́ɛ́lɛ.

¹³Mɛ áa ndɛɛ́ usúid yuudi, mɛ usúgəniʼ ngim. Ndɛ a niə́bə́ə na a niyibəniʼ[139]

¹⁴Kɔŋɛʼ na pá pálɛɛ́ agosog pilə́ə́ pɛɔ́bɔn lɛ́ ná pɛ́ɛn filí lɛ́ pánɛ modámádám mó kiɛd kɛ́ ɔlaa[140], pɔ́sɔd a pálɛ́ɛg, pɔ́ɔsɔd kɔ agosan yɛ́ a mədíyoog.

¹⁵Náa, pɛɛlanɛʼ pɛbán pɛ́ pɛbɛ́, pɛɛlɛʼ pɛnon, pá pə́əbúlimən na pagɛ́ɛd ɔmbɔ́ lɛ́ na panɔ́mɛɛd pá pɔ́dɛɔ́gɔ pɔ́ɔ́bɔn, poónanan, pə́yə́ən ambog, ungim nyɔ́ alɛɛ́ anyɔ́ŋɛn pɛnyaʼ oó lɛ́ nyɔ́ alɛɛ́ na pɛ́lɛ́, ungim nyóon alɛ́ɛ́ kɛɛn a táán.

¹⁶Mɛ Yə́sus aa mbíim mpodómɛn uŋun wáam ó maʼtom lɛ́ wíim aboyásɛnɛn nkə kɛ́ɛg kiim na pəŋi pá a mogony mó pəə́liʼtiniʼ. Ndɛ kindindilíŋ kɛ́ Tə́fid a kibúúm kɛ́ puʼkúm. Ndɛ yəə́dədəʼ ɛ́ koany[141]

¹⁷Uŋun wó Ufúlúʼtú na ɔʼkɛ́ɛd o pálɛ́ɛg nyóon pááság kusəə pɔ́nɔ́: «Mɛ́ɛn ó!» Wɛ tɛn nyɔ́ omóób, úsəə tɛn náan wɔʼkɔ́: «Mɛ́ɛn ó!» Nyɔ́ nɛŋɔ́ɛd nɛ́amoobany, yíim! Nyɔ́ aányɔ́ŋɛn məní má ɔlaa, yíim əsiəd a náan iyó[142]!

¹⁸Mɛ Sɛ́aŋ, ungim nyɔ́ amóób tɔgɛ́ɛ́ tó Táán tóonɛ tó tólɛɛ́ a kálaʼtaʼ yɛ́ɛnɛ, ndamoyááganan mbaŋ lɛ́, nyɔ́ alɛ́ɛ́ kaábɛgɛɛ́ yoom kɔ, Táán alɛ́ɛ́ komosáayɛnɛ ntɔ́b yɛ́ ɛlɛɛ́ ntiídílə́ a kálaʼtaʼ yɛ́ɛnɛ.

¹⁹Nyɔ́ alɛ́ɛ́ kuliogií yoom a tɔgɛ́ɛ́ tó Táán tóonɛ tó tólɛɛ́ a kálaʼtaʼ yɛ́ɛnɛ[143], nyóon, Táán alɛ́ɛ́ komogábɛn ngab yɛ́ ɛlɛɛ́ ntilídə́ə́n a kálaʼtaʼ yɛ́ɛy lɛ́ ɔgɔɔŋ. Ngab ɛgo yɛ́ɛy ɛlɛ yɛ́ ugódíí a kiɛd kɛ́ ɔlaa na a pálɛ́ɛg yɛ́ yaágoob na Táán.

²⁰Nyɔ́ aádɛ́lɛ́mɛn nkə kɛ́ɛg kiim mbaasɔ́ lɛ́ kɛ́lɛ fɔ́lɔ́b alɛ əgusəə ɔnɔ́: Ɛɛ́ɛ, kɛnɛŋ sɔɔŋ nyíim o! Aamɛn! Ɛɛ́ɛ, Sə́dúk Yə́sus mɛ́ɛn o[144]!

²¹Sə́dúk Yə́sus áboyɛ́ɛlɛ pəŋi piim kɔŋɛʼ aa!