Read Yambeta Yiífínínin 3 Bible Online

Yiífínínin 3 - Yambeta bible

Yiífínínin 3

¹Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Salɛdɛ́ɛs, ómodɛ́anɛ wɔʼkɔ́: Táá nkə kɛ́ mɛ nyɔ́ ndɛɛ́ na məŋun má Táán máʼtáan na mábaan, na muə́dədəʼ móʼtáan na móbaan mbə́səə áa kɛ́ɛnɛ: Mbálɛŋ pigólí pɛáŋ pɛ́ olɛɛ́ agɛɛlɛ: Olɛ əgugə́mən lɛ́ olɛ ongóm kɔmɔɛ́d lɛ́ olɛ kɛlóŋ.

²Ondig óo! Kónɛ ngab yɛ́ uligíí na yɛ́lɛ́, yɛ́ yándɛɛ́ ndúmiʼ na kugu lɛ́ ntɛɔ́gɔ aa adála ímuʼ na ímuʼ yɛ́ olɛɛ́ agɛɛlɛ a əngis á Táán waam yɛ́ ɛ́lɛɛ́ ɛŋɛʼ, óomananɛ kɔŋɛʼ.

³Áyóŋɛ́ɛ́ anɛ́ɛ́n wɔnɔ́ ná oyóób tɔsɔm, na wɔnɔ́ ná páyɛ́goyɛ́ʼkɛn tólɛ́. Ɛɛlɛ nkə kɛ́ tólɛɛ́ əgusəə. Ə́súʼkíí mabɛ́ mááŋ, ógasɛ ɔlaa. Udiondigin a ɛnɔ, ndɛ́ɛ́ kiim wɔnɔ́ ungiíbən lɛ́ odɛndɛ́ɛ́ kolɛŋ kɛnɛŋ kɛ́go kɛ́ ndɛ́ɛ́ kiimií a kɛ́lɛ́. Ndɛ́ɛ́ kugubúbi kugubúbiə́n[17]

⁴Náa, áay a Salɛdɛ́ɛs kɛnɔ kɛ́ olɛɛ́, olɛ na ngab ɛ pɔɔd kɔ yɛ́ idiʼkə́əfilənií pilə́ə́ pɛɔ́bɔn. Pálɛ́ɛ́ kuníig pilə́ə́ pɛ́ pifúlúʼtú agɛɛn ondáŋ na mɛ lɛ́ páyɛ́ɛ́lɛ wɔnɔ́ ná pígóodi lɛ́ pɛ́ɛlɛ.

⁵Náan, pá pálɛ́ɛ́ kolónɛ́ɛ́ ombɔg a mɔɛn pálɛ́ɛ́ kuníig pilə́ə́ pɛ́ pifúlúʼtú. Ntɛndɛ́ɛ́ kuyúnjugəni əngiŋ yɔ́ɔ́bɔn a kálaʼtaʼ yɛ ɔlaa. Ndɛ́ɛ́ kusəə a udi ó Sɛ waam na məŋun mə́ə́ŋ má maʼtom lɛ́ pálɛ pɔɔd páam[18]

⁶Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ.

⁷Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Filədələfíi, ómodɛ́anɛ wɔʼkɔ́: Táá nkə kɛ́ mɛ nyɔ́ ndɛɛ́ ufúlúʼtú, mɛ nyɔ́ ndɛɛ́ Táán ɛ fɔ́lɔ́b, mɛ nyɔ́ ndɛɛ́ na ilibəʼ yɛ́ nkúm Tə́fid a ombɔg, mɛ nyɔ́ ndɛɛ́ lɛ́ mbəʼkubuən wɛndɛ́ŋ ɔdɛɔ́gɔ ugubuəg. Mbəʼkubuəg wɛndɛ́ŋ adiɛn kɔ ugubuən mbə́səə áa kɛ́ɛnɛ[19]:

⁸Mbálɛŋ pigólí pɛáŋ pɛ́ olɛɛ́ agɛɛlɛ. Mbálɛŋ lɛ́ uʼkóodi toɛn, náa oyɛ́njoóbɛn a nkə kɛ́ njɛ́godɛánɛ, udiʼkə́əgiʼtəm. Óób anɛ́ɛ́n lɛ́ mɛ njígubuə́nin udíyoog wó mɔɔd na mɔɔd ɔdɛɔ́gɔ ugubuəgií.

⁹Taa, náan aa ndɛ́ɛ́ kɛɛlɛɛ́ na pɔɔd póob pá ɛgɔny ɛ́ Sáʼtan, pɔɔd pá pɛnyaʼ póob pá pálɛɛ́ əgusəə lɛ́ pɔ́lɛ́ pálɛ Yúdɛn kɔmɔɛ́d lɛ́ iyó. Ndɛ́ɛ́ kɛɛlɛ lɛ́ píim ədúm əndu a udi wááŋ, pálɛŋ lɛ́ ndɛ agoonyɔ́ŋɛn[20]

¹⁰Wɔnɔ́ ná oyɛ́njoóbɛn a nkə kɛ́ njɛ́godɛánɛ lɛ́ ónóʼtan ntɔ́b, mɛ tɛn ndɛ́ɛ́ kuguúnuŋ a kɛnɛŋ kɛ́ ntɔ́b yɛ́ ɛlɛ́ɛ́ kiimií a nsí ngim. Ntɔ́b yɛ́ɛy ɛlɛ́ɛ́ kɛɛn kɔ agɛɛlɛ lɛ́ pádála wɔnɔ́ ná pɔɔd pá a nsí pálɛɛ́.

¹¹Kɛnɛŋ sɔɔŋ nyíim. Nkə kɛ́ ugódíí, kumin kɛ́lɛ́ kɔŋɛʼ agɛɛlɛ lɛ́ wɛndɛ́ŋ ədinjíím əsiəd nodám noáŋ nóonɛ lɛ́ waálón ombɔg a mɔɛn.

¹²Ungim nyɔ́ alɛ́ɛ́ kolónɛ́ɛ́ ombɔg a mɔɛn, ndɛ́ɛ́ komoyɛ́ɛlɛ lɛ́ yɛ́ɛn ɛgon yɛ́ a uʼkóó ó Táán waam Adɛndɛ́ɛ́ kolon kə́mmú kɔ agɛɛn a táán. Ndɛ́ɛ́ kudilid niiŋ nɛ́ Táán waam a nkó yəəŋ. Ndɛ́ɛ́ kudilid tɛn kɔ niiŋ nɛ́ Yolósalɛm, pálɛ́ɛg yɛ́ ngwa yɛ́ ɛlɛɛ́ əgiim ísuu a mɔɛn, a nó Táán waam Ndɛ́ɛ́ kudilid tɛn niiŋ nɛ́am nɛ́ nɛwa a nkó yəəŋ[21]

¹³Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ.

¹⁴Tilən uŋun ó maʼtom wó ɛgɔny ɛ́ pəə́liʼtiniʼ yɛ́ a Lawodisə́ə, ómodɛ́anɛ wɔʼkɔ́: Táá nkə kɛ́ mbə́səə áa kɛ́ɛnɛ, mɛ nyɔ́ ndɛɛ́ Aamɛn, kíɛn əgín náan oo! Mɛ wɛ́sɛnɛg ɛ sáád, wɛ́sɛnɛg ɛ fɔ́lɔ́b, mɛ nyɔ́ ndɛɛ́ lɛ́, yoom yiim yɛ́ Táán ayɛ́ɛ́lɛ, a mɛ áa ɛ́yáyɛ́lɛ́ɛ́, ndɛ əgusəə lɛ́:

¹⁵Mbálɛŋ pigólí pɛáŋ pɛ́ olɛɛ́ agɛɛlɛ. Mbálɛŋ lɛ́ olɛ lɛ́: Odiɛn usiododo, onjáa. Kɛ́mɛ́ɛ agɛɛn kɔŋɛʼ lɛ́ wɛ́ɛn ɔmbɔ́ usiododo, oó lɛ́ woáyáa!

¹⁶Wɔnɔ́ ná olɛɛ́ agá agoyámba koyámbáán, odiɛn usiododo, onjáa, ndagoónoda.

¹⁷Olɛ əgusəə wɔʼkɔ́: «Ndɛ na tugúm, njágónyánɛ́ɛ́ moom kɛ́fɔlɛ́, ntɛɔ́gɔ na yoom yɛ́ ímíndiəmin.» Sɔ́ɔ́lɛʼ na wɛ kɛ́fɔlɛ́! Olɛ kɛsaángaa, náa odɛɔ́gɔ agolɛŋ náan. Olɛ na osog, na woog, nsun iyó.

¹⁸Kólɛ́ aa ndɛɛ́ əguguuləb lɛ́ wíim agooŋɛnɛ kóol na mɛ yɛ́ páánámɛn a yug ná wɛ́ɛn na tugúm. Wíim agooŋɛnɛ tɛn pilə́ə́ pɛ́ pifúlúʼtú, úníig agɛɛlɛ lɛ́ odɛnjááŋ lɛ́ olɛ nsun iyó. Ówɛɛn tɛn toan wáyáág a əngis agɛɛlɛ lɛ́ wíiʼkini kodɛ́ʼtɛganan.

¹⁹Mɛ, ungim nyɔ́ ndɛɛ́ anyɔ́ŋɛn, ndamosásan, ndamobáam[22] Náa wɛ, ə́súʼkíí anɛ́ɛ́n mabɛ́ mááŋ, ógasɛ ɔlaa!

²⁰Taa, mɛ áa nyóonɛ ntɛ́lɛ́mɛ́nɛ́ɛ́ a udíyoog, ndɛ ɔgɔʼtɔn. Nyɔ́ aágoob nɛŋo nɛ́am, ə́yimbuənin udíyoog, ndɔɔsɔd a noádɛʼ nuə́ŋ. Tɛanɛ́ɛnɛ ondáŋ.

²¹Pá pálɛ́ɛ́ kolónɛ́ɛ́ ombɔg a mɔɛn, ndɛ́ɛ́ koboyɛ́ʼkɛn oʼkɔɔ lɛ́ pálaamɛ ondáŋ na mɛ, əgín wɔnɔ́ ná mɛ nyiísiə́d tɛn oʼkɔɔ a kolaamɛ ondáŋ na Sɛ waam ná njíím ndon ombɔg a mɔɛn.

²²Nyɔ́ alɛɛ́ na ntóɛŋ, yóób nkə kɛ́ Uŋun ólɛɛ́ agodɛ́anɛ na mogony mó pəə́liʼtiniʼ.