Read Yambeta Yiífínínin 4 Bible Online

Yiífínínin 4 - Yambeta bible

Yiífínínin 4

¹A ngim yɛ́ɛy, Táán aáság kindoodi yoom yímmú. Nyɛɛ́dála umbuús umbuənə́ə́n a mbálámɔɛn. Nɛŋo nɛ́ nyɛɛ́yáŋ agoob nɛ́ɔsɔyɔ na mɛ, nɛ́asáŋa wɔnɔ́ isə́ə́ nɛáság kusəə nɛɔ́nɔ́ na mɛ: «Mɛ́ɛn óbag áanɛ, ndəguúloodi nkə kɛ́ kɛ́lɛ́ɛ́ kiimií a ngim.»

²Uŋun wó Ufúlúʼtú wááság kɛnyɛɛlɛ lɛ́ ntála noʼkóm nó nɛlaamɛʼ nó Táán kɔ a mbálámɔɛn, mɔɔd undəndínə́ə́n kɔ a nólɛ́.

³Mɔɔd ogo nyɔ́ yiíləndinin a nólɛ́ ayɛ́ɛ əgumənyə wɔnɔ́ nɛdáán nɛ́ pɔ́ɔdɔ́ŋɔn lɛ́ sɛ́asɛʼpɛ, na nɛ́ pɔ́ɔdɔ́ŋɔn lɛ́ salɛdowáan. Kɛán kɛ́yágoʼkɛnɛn noʼkóm nó nɛlaamɛʼ. Kɛ́yɛ́ɛ əgumənyə tɛn wɔnɔ́ nɛdáán nɛ́ pɔ́ɔdɔ́ŋɔn lɛ́ ɛmɛlóod[23]

⁴Toʼkóm tó nɛlaamɛʼ tɛn túmmú niʼtin na túniʼ tóyágoʼkɛnɛn nóon. Pasaá pá pɔɔd tɛn niʼtin na pə́niʼ pííləndinin kɔ a tólɛ́. Pííníigin pilə́ə́ pɛ́ pifúlúʼtú na todám tó kóol a oʼto.

⁵A noʼkóm nó nɛlaamɛʼ nóon nó nóyɛ́ɛ a kɛgaágadɛ, mbálámɔɛn ɛyɛ́ɛ əgubəgə kɔ, aŋŋo yɔ́ɔsɔyɔ kɔ, pombambany púədə́əŋən. Moláam móʼtáan na móbaan móyɛ́ɛ alola na toɛn kɔ a udi ó noʼkóm nó nɛlaamɛʼ nóon. Moláam móom móyɛ́ɛ məŋun má Táán máʼtáan na mábaan[24]

⁶A udi ó noʼkóm nóon, yoom ɛ́yɛ́ɛ kɔ wɔnɔ́ noom nó ɛbá fiɛ́d, məní mə́ə́ŋ sə́ngə́lə́ngə́lə́ wɔnɔ́ məə́ má máámoáŋ. Kɔ a kɛgaágadɛ kɛ́ɛg, ponyam púniʼ póyágoʼkɛnɛn noʼkóm nóon. Ponyam pógo póyɛ́ɛ na əngis kíligidigidi a udi na a ngim kɛ́.

⁷Nnyam ɛ na oʼto na oʼto yɛɛ́ŋwáŋanan ngangó. Yɛ annam ábaan wɔnɔ́ kɛyɔ́ŋ kɛ́ káwoʼ. Sɔ́g wo annam ádáád ayɛ́ɛ na udi ó mɔɔd. Wo annam ə́niʼ amáaŋwáŋanan kifíŋ kɛ́ kɛ́afɛ́ɛ[25]

⁸Ponyam póob puim púniʼ puígóodi nfaáan ɛ́ʼtáan na úmmuʼ, ɛ́ʼtáan na úmmuʼ. Nfaáan yɔɔbɔn ɛyɛ́ɛ na əngis kíligidigidi a mɔɛn na yisí kɛ́. Póyɛ́ɛ ədúmə wɔɔ́s ungim na udúg ungim poɔ́nɔ́: Sə́dúk Táán o toɛn tuim alɛ Ufúlúʼtú, alɛ Ufúlúʼtú, alɛ Ufúlúʼtú! Nyɔ́lɛ́ nyɔ́ ayɛ́ɛ, nyɔ́ alɛɛ́, nyɔ́ alɛ́ɛ́ kiimií[26]!

⁹Kɛnɛŋ kiim kɛ́ ponyam póob púniʼ póyɛ́ɛ agɛɛ́ʼkɛn nugəm, póanyáadɛ, póagɛɛ́ʼkɛn pisoyidiʼ na nyɔ́ yiíləndinin a noʼkóm nó nɛlaamɛʼ, nyɔ́lɛ́ nyɔ́ alɛɛ́ a ɔlaa a pɛnɛŋ piim,

¹⁰pasaá pá pɔɔd niʼtin na pə́niʼ pá páyɛ́ɛ kɔ, páyɛ́ɛ əgiim ədúmə əndu a udi wə́ə́ŋ, páamonyáadɛ, nyɔ́lɛ́ nyɔ́ alɛɛ́ a ɔlaa a pɛnɛŋ piim. Páyɛ́ɛ agodagɛdanɛ todám toɔ́bɔn a udi ó noʼkóm nó nɛlaamɛʼ, pɔ́ɔsɔyɔ pɔ́nɔ́:

¹¹Sə́dúk Táán wəəs! Na wɛ áa kɛásɛʼtan lɛ́ págoyɛ́ʼkɛn nugəm, na nnyáádɛ́, na toɛn lɛ́ wɛ áa oyɛ́ɛ́lɛ moom muim. A nɛnyɔ́ŋɛn nɛáŋ áa yiim ɛ́yáyɛ́lɛ́ɛ́ wɔnɔ́ ná ɛ́lɛɛ́ kɔ.