Read Yambeta Yiífínínin 5 Bible Online

Yiífínínin 5 - Yambeta bible

Yiífínínin 5

¹Nyɛɛ́dála kálaʼtaʼ mmúmúsə́ wɔnɔ́ kɛgaan, a ombɔg ó nɛnom ó sɔ́g nyɔ́ yiíləndinin a noʼkóm nó nɛlaamɛʼ. Kálaʼtaʼ ɛgo ɛyɛ́ɛ ntiídílə́ a toá tuim tóbaan. Pɛ́ɛ́máda na ɛlɔʼ a pɛnɔ pɛ́ʼtáan na pɛ́baan agɛɛlɛ lɛ́ mɔɔd adɛsándɛn yɛ́lɛ́[27]

²Mbáság kodála uŋun ó maʼtom ó toɛn wáalɔɛgɛ nɛŋo a mɔɛn, wɔ́nɔ́: Ánɛ aa əmíig nyóonɛ lɛ́ ágábɛna ɛlɔʼ agosandɛn kálaʼtaʼ ə́?

³Náa, ɔmbɔ́ a mbálámɔɛn, ɔmbɔ́ a nsí yɛ́ɛnɛ a mɔɛn, ɔmbɔ́ a nsí a kaadɛ[28], mɔɔd adɛʼkɛ́ɛ kɔ nyɔ́ əyíigin ogosandɛn kálaʼtaʼ yɛ́ɛy, áadála nkə kɛ́ kɛ́lɛɛ́ kɔ.

⁴Nyɛɛ́lɛ́ɛ́ kɛ́fɔlɛ́ lɛ́ mɔɔd adɛʼkɛ́ɛ kɔ nyɔ́ ayɛ́ɛ ogosandɛn kálaʼtaʼ yɛ́ɛy agodála nkə kɛ́ kɛ́lɛɛ́ kɔ.

⁵Náa kɛsaá kɛ́ mɔɔd kímmú kɛ́ kɛ́yɛ́ɛ kɔ áay kɛ́agɛʼtɛ́anɛ kɛɔ́nɔ́: Odɛndɛ́ɛ́! Taa, ngangó yɛ ndɛg ɛ Yúda aa yɛ́ɛnɛ. Kindindilíŋ kɛ́ Tə́fid a kibúúm kɛ́ puʼkúm[29] Yɛɛ́lón ombɔg a mɔɛn. Nyɔ́lɛ́, aagábɛna pɛnɔ pɛ́ ɛlɔʼ pɛ́ɛb pɛ́ʼtáan na pɛ́baan əgubuən kálaʼtaʼ.

⁶Mbáság kodála anɛ́ɛ́n Mɔɔ́n o nodóm kidə́níʼtən a ɛbá ɛ́ noʼkóm nó nɛlaamɛʼ a kɛgaágadɛ kɛ́ ponyam póob púniʼ na pasaá pá pɔɔd póob. Ayɛ́ɛ wɔnɔ́ páyɛ́mosɛ́gɛd kɛnág. Ayɛ́ɛ na modɔŋ móʼtáan na móbaan, əngis tɛn áʼtáan na ábaan. Əngis yɛ́ɛy áyɛ́ɛ məŋun má Táán máʼtáan na mábaan má yɛɛ́dóm a nsí ngim[30]

⁷Mɔɔ́n o nodóm nyóon aáság kaáyɛʼtɛnɛ əgiim əsiəd kálaʼtaʼ yɛ́ nyɔ́ yiíləndinin a noʼkóm nó nɛlaamɛʼ yiíguminin a ombɔg ó nɛnom.

⁸Əgín tɛn ná Mɔɔ́n o nodóm yiísiə́d kálaʼtaʼ, ponyam póob púniʼ na pasaá pá pɔɔd póob niʼtin na pə́niʼ pááság kiim əmudúmin əndu a udi. Ɛ́nɛ́ mɔɔd ayɛ́ɛ na ɛlóŋ a ombɔg, na ɛcɔ́gɛ́cɔ́gɛ́ yɛ́ páyɛ́ɛ́lɛ na kóol, ɛlɔʼ kɔ a kaadɛ síɛ́ɛ́d. Ɛlɔʼ yɛ́ɛy ɛ́yɛ́ɛ pɛɔ́sɔ́gɔ́lɔ́n pɛ́ pɔɔd pá páagoob na Táán páyɛ́moyɛ́ʼkɛn.

⁹Páyɛ́ɛ ədúmə kɛlɛ́ɛ́ kɛ́ kɛwa, pɔ́nɔ́: Wɛ áa olɛɛ́ nyóonɛ lɛ́ págoyɛ́ʼkɛn kálaʼtaʼ ná ógábɛna ɛlɔʼ. Páyɛ́goyóón. A maŋɔ́ mááŋ má wiísúb, oyááŋɛn pɔɔd pá a ndɛg ngim, na a tɔgɛ́ɛ́ tuim, na a mɔnɔŋ miim, na a əʼkúu əngim lɛ́ ná óboyɛ́ʼkɛn na Táán.

¹⁰Oyɛ́boyɛ́ɛ́lɛ lɛ́ pɛ́ɛn pɔɔd pá a nɛlaamɛʼ nɛáŋ, pɛ́ɛn payaaganɛʼ pɛfɔny pá pə́əgudin Táán wəəs. Pálɛ́ɛ́ kɛɛn puʼkúm pó a nsí yɛ́ɛnɛ[31]

¹¹Náan aa nyɛɛ́dɛ́ʼtɛg kə́mmú, mbáság koob aŋŋo yá ɛ́fɔlɛ́ ɛ́ məŋun má maʼtom. Máyágoʼkɛnɛn noʼkóm nó nɛlaamɛʼ na ponyam póob na pasaá pá pɔɔd póob. Məŋun má maʼtom móom máyɛ́ɛ ɔmban ó pɔʼtɔ́ɔ́sɛn pá pɔʼtɔ́ɔ́sɛn[32]

¹²Máyɛ́ɛ ədúmə nɛŋo a mɔɛn, mɔ́nɔ́: Mɔɔ́n o nodóm nyɔ́ páyóón, nyɔ́lɛ́ aa kɛásɛʼtan lɛ́ pámoyɛ́ʼkɛn toɛn, tugúm, nsiŋ, nɛgóón, nnyáádɛ́, nugəm na pɛlɛ́ɛ́ pɛ́ komonyáadɛ.

¹³Mbáság koob tɛn moom muim mó Táán ayɛ́ɛ́lɛ a mbálámɔɛn kɔ́gɔ́ɔg a mɔɛn, na a nsí yɛ́ɛnɛ a mɔɛn, na a nsí a kaadɛ, na a noom nó ɛbá fiɛ́d. Yiim agá yɛ́ɛy yɛ́ Táán ayɛ́ɛ́lɛ a nsí na a mɔɛn yə́əmudúmən pɛlɛ́ɛ́ yɔ́nɔ́: Moom móonɛ lɛ́: Pɛlɛ́ɛ́, nnyáádɛ́, nugəm na toɛn móɛn na nyɔ́ ələndíníníí a noʼkóm nó nɛlaamɛʼ. Móɛn na Mɔɔ́n o nodóm a pɛnɛŋ piim.

¹⁴Ponyam póob púniʼ poáság kəə́liʼtiniʼ poɔ́nɔ́: Aamɛn! Pasaá pá pɔɔd póob pááság kudum əndu a nsí agonyáadɛ Táán.