Read Yambeta Yiífínínin 6 Bible Online

Yiífínínin 6 - Yambeta bible

Yiífínínin 6

¹A ngim yɛ́ɛy, mbáság kodála Mɔɔ́n o nodóm aágábɛn ɛlɔʼ ɛ́ sɛʼtáam ɛ na oʼto na oʼto ɛ pasɛʼtáam páʼtáan na pábaan[33] Mbáság koob nnyam mmuʼ a póob pó póyɛ́ɛ kɔ púniʼ yaágaag nɛŋo wɔnɔ́ mbambany yɔ́nɔ́: «Mɛ́ɛn ó!»

²Mbáság kodɛ́ʼtɛg. Nnyambɛlɛʼ yɛ́ nyɛɛ́dála ɛyɛ́ɛ nfúlúʼtú. Nyɔ́ yɛɛ́bágɛdɛn a yɛ́lɛ́ ayɛ́ɛ na kiʼtimbə a ombɔg pááság komoyɛ́ʼkɛn nodám nó puʼkúm. Alɛ nyɔ́ yɛɛ́lón ombɔg a mɔɛn. Alɛ agɛɛn lɛ́ ná yíiʼkini kɛɛn alon ombɔg a mɔɛn.

³Ná Mɔɔ́n o nodóm yɛɛ́gábɛn ɛlɔʼ yɛ́ annam ábaan mbáság koob nnyam yɛ annam ábaan yəə́səə nɛŋo a mɔɛn yɔ́nɔ́: «Mɛ́ɛn ó!»

⁴Nnyambɛlɛʼ yimmú yaáság kiim. Ɛyɛ́ɛ mbógógó. Páyɛ́ʼkɛn na mɔɔd nyɔ́ yɛɛ́bágɛdɛn a yɛ́lɛ́ toɛn tóonɛ lɛ́ yɛ́ɛn oliogi uŋóón a nsí ná pɔɔd pə́ə́bə́ə́ koónanan. Páyɛ́moyɛ́ʼkɛn tɛn kɛlanda kɛ́ ɛyafág ɛ́ pɛdá.

⁵Ná Mɔɔ́n o nodóm yɛɛ́gábɛn ɛlɔʼ yɛ́ annam ádáád mbáság koob nnyam yɛ annam ádáád yəə́səə nɛŋo a mɔɛn yɔ́nɔ́: «Mɛ́ɛn ó!» Mbáság kodɛ́ʼtɛg. Nnyambɛlɛʼ yɛ́ nyɛɛ́dála ɛyɛ́ɛ nfiídidiʼ[34] Nyɔ́ yɛɛ́bágɛdɛn a yɛ́lɛ́ ayɛ́ɛ na nɔfɛg a ombɔg.

⁶Mbáság koob yoom ɛgo wɔnɔ́ nɛŋo níəgiim nɛ́dɛ́ɛmɛn kɔ a kɛgaágadɛ kɛ́ ponyam póob púniʼ nɛɔ́nɔ́: «Nɔfɛg nó ngəŋ númuʼ a pɛsáábɔ́n pɛ́ wɔɔ́s ó pigólí kilúd. Tɔfɛg tɛn tó mɔnás tódáád a pɛsáábɔ́n tɛn pɛ́ wɔɔ́s ó pigólí kilúd. Náa, məgúd na maloʼ, odɛʼtɔ́bɔ.»

⁷Ná Mɔɔ́n o nodóm yɛɛ́gábɛn ɛlɔʼ yɛ́ annam ə́niʼ mbáság koob nnyam yɛ annam ə́niʼ yəə́səə nɛŋo a mɔɛn yɔ́nɔ́: «Mɛ́ɛn ó!»

⁸Mbáság kodɛ́ʼtɛg. Nnyambɛlɛʼ yɛ́ nyɛɛ́dála ɛyɛ́ɛ na nkó wɔnɔ́ toáŋánán tó tudom. Nyɔ́ yɛɛ́bágɛdɛn a yɛ́lɛ́ ayɛ́ɛ niiŋ lɛ́ «kugu.» Nigúu nɛ́ pá pə́ʼkugúú níəgiim nímuyə́ən a ngim. A pɛsaa pɛ́ nsí píniʼ páyɛ́boyɛ́ʼkɛn kímuʼ lɛ́ pálaamɛ kɔ. Kɔ a kɛsaa kɛ́ɛg, páyɛ́ɛ agoóna pɔɔd a pɛdá, páaboyóóna na njaan. Pɔɔd pə́əgu mabámbany na tɛn lɛ́ ponyam pó pobɛ́ pómáboonɛ́[35]

⁹Ná Mɔɔ́n o nodóm yɛɛ́gábɛn ɛlɔʼ yɛ́ annam áʼtáan mbáság kodála kibóŋ kɛ́ pɛfɔny. Kɔ a kibóŋ kɛ́ɛg yisí, nyɛɛ́dála məŋun má pɔɔd pá páyóóna a oʼto wóonɛ lɛ́ pííyə́ən tɔsɔm tó Táán, pámáadɛ́lɛmɛn tólɛ́ mbaasɔ́.

¹⁰Máyɛ́ɛ agosɔyɔ nɛŋo a mɔɛn mɔ́nɔ́: «Wɛ Sə́dúk nyɔ́ olɛɛ́ ufúlúʼtú, wɛ nyɔ́ olɛɛ́ Sə́dúk ɛ fɔ́lɔ́b, waabóŋan súʼtə́ə́ naanɛ́g agɛɛlɛ lɛ́ óyɔmɛ pɔɔd pá a nsí ná páálɛba wɔnɔ́ ná páyɛ́bɛyóóna ə́!»

¹¹Páyɛ́ʼkɛ́nan na məŋun móom miim pilə́ə́ pɛ́ pifúlúʼtú, pɔ́nɔ́ na mɔ́lɛ́ máyaŋ koboŋ kə́mmú sɔɔŋ, súʼtə́ə́ ondáŋ wɔ́ɔ́bɔn ósɛʼtan na pomóŋŋí pɔ́ɔ́bɔn na pɔsɔ́sɔ́g pɔ́ɔ́bɔn pá pigólí pá páaboyóóna tɛn yoom ímuʼ wɔnɔ́ pɔ́lɛ́.

¹²Mbáság kodɛ́ʼtɛg. Ná Mɔɔ́n o nodóm yɛɛ́gábɛn ɛlɔʼ yɛ́ annam áʼtáan na úmmuʼ nsí yaáság kəə́nyigid na toɛn. Wɔɔ́s wə́bə́ə́ kiílin wɔnɔ́ məlín. Wəə́ wáawɛ́ɛ́la ungim póʼkóʼkóʼkó wɔnɔ́ maŋɔ́.

¹³Muə́dədəʼ moáság kiim mógásɛg a mɔɛn, muə́də́əŋ a nsí wɔnɔ́ ná modámádám mó kiɛd mó módɛ́ʼkónɛ́ɛ́ mólɛɛ́ əgudə́əŋən kɛnɛŋ kɛ́ kigud kɛ́lɛ əgufiŋ na toɛn.

¹⁴Mbálámɔɛn yaáság kəə́mus wɔnɔ́ ná ándɛ kɛgaan kíəgəə́mus. Nkon ngim yaáság kuliogon kɛnɔ kɛ́ ɛyɛ́ɛ, na maaloʼ miim kɛ́[36]

¹⁵Na puʼkúm pó a nsí, na pɔɔd pá pagóón, na puʼkúm pó pasɔ́njaa, na pɔɔd pá tugúm, na pɔɔd pá toɛn, na pɔɔd pɛ́ndɛ́ŋ piim, na pɛɔ́lɛ́, na pá pɔɔd pá pádɛʼkɛ́lɛɛ́ pɛɔ́lɛ́ kɛ́ pɛ́ɛ́dɛ́da agɛɛn ɔgɔɔsɛman a pɛbaŋ a kaadɛ na a aʼtáán yisí yá álɛɛ́ a nkon.

¹⁶Páyɛ́ɛ əgusəə na nkon na aʼtáán kɛ́ pɔ́nɔ́: «Púbidə́əŋənən óo! Púbigúbə ná nyɔ́ ələndíníníí a noʼkóm nó nɛlaamɛʼ adɛɛ́bɛɛdála, na tɛn lɛ́ Mɔɔ́n o nodóm nyɔ́ aáʼkoóbɛ́ɛ́ ilúún, adɛɛ́bɛɛdála

¹⁷lɛ́, wɔɔ́s wó oʼkóʼkóón wɔ́ɔ́bɔn ó koob ilúún wándɛ kɔ. Ánɛ aa aágaáʼkɛ ə́[37]!»