Read Yambeta Yiífínínin 7 Bible Online

Yiífínínin 7 - Yambeta bible

Yiífínínin 7

¹A ngim yɛ́ɛy, mbáság kodála məŋun má maʼtom mə́niʼ madɛ́lɛ́máán kidə́níʼtən a modɔŋ mó nsí múniʼ. Míígúmin pigud pɛ́ a nsí yɛ́ɛnɛ píniʼ[38] agɛɛlɛ lɛ́ kímuʼ na kímuʼ kídifíŋ ɔmbɔ́ a nsí, ɔmbɔ́ a noom nó ɛbá fiɛ́d, ɔmbɔ́ əgín a kiɛd kímuʼ.

²Mbáság kodála uŋun ó maʼtom wáabag a mɔɛn a noá nó wɔɔ́s ólɛɛ́ əgiim ódɛ́ɛman. Wígóodi sɛʼtáam[39] yɛ́ páagaágan pɔɔd pɛbɛɛ na yɛ́lɛ́ a nkó əguloodi lɛ́ nyóonɛ alɛ agoob na Táán nyɔ́ alɛɛ́ a ɔlaa. Uŋun ó maʼtom wóow wɛ́ɛ́sásɛd na toɛn agodɛ́anɛ na məŋun má maʼtom mə́niʼ má Táán ayɛ́ɛ aáʼkɛɛ́ʼkɛn toɛn lɛ́ máyósag nsí na noom nó ɛbá fiɛ́d, wɔ́nɔ́:

³«Yaŋáan kudi o! Podɛnjósag nsí na noom nó ɛbá fiɛ́d ɔmbɔ́ tɛn na piɛd kɛ́ ná pəsi tɛdɛ́mman kaágan pɛbɛɛ a nti ɛ pəgudin pá Táán yəəs[40]»

⁴Nyummú aáság kɛʼtɛ́anɛ ɔmban ó pɔɔd pásɛ́g áa páagaágan pɛbɛɛ pɛ́ Táán a udi. Páyɛ́ɛ ɔ́ndɛd ɛ tɔ́ɔ́sɛn ɛ pɔɔd mmuʼ na əʼtin á tɔ́ɔ́sɛn á pɔɔd ábaan na tɔ́ɔ́sɛn íniʼ. Píísiə́də pɔɔd póob a pibúúm pɛ́ Ɛ́sɛlayɛl piim pɛówád na pɛ́baan.

⁵A kibúúm kɛ́ Yúda, píísiə́d kɔ tɔ́ɔ́sɛn ɛ pɔɔd yówád na ɛ́baan yɛ́ pɛ́ɛ́mágam na pɛbɛɛ. A kibúúm kɛ́ Lúbɛn, tɔ́ɔ́sɛn tɛn yówád na ɛ́baan, A kɛ́ Káad, tɔ́ɔ́sɛn yówád na ɛ́baan,

⁶A kɛ́ Asɛ́ɛl, tɔ́ɔ́sɛn yówád na ɛ́baan, A kɛ́ Nɛftalíi, tɔ́ɔ́sɛn yówád na ɛ́baan, A kɛ́ Manasə́ə, tɔ́ɔ́sɛn yówád na ɛ́baan,

⁷A kɛ́ Sɛmɛyɔ́ɔŋ, tɔ́ɔ́sɛn yówád na ɛ́baan, A kɛ́ Lə́fi, tɔ́ɔ́sɛn yówád na ɛ́baan, A kɛ́ Ɛsaʼkáal, tɔ́ɔ́sɛn yówád na ɛ́baan,

⁸A kɛ́ Səbulóon, tɔ́ɔ́sɛn yówád na ɛ́baan, A kɛ́ Yósɛb, tɔ́ɔ́sɛn yówád na ɛ́baan, A kɛ́ Pɛnsɛamɛ́ɛŋ, tɔ́ɔ́sɛn yówád na ɛ́baan. Táá pá pɛ́ɛ́mágam aa póob.

⁹A ngim yɛ́ɛy mbáság kodɛ́ʼtɛg kə́mmú. Nyɛɛ́dála pɔɔd miíi a ombod wó mɔɔd ɔdɛɔ́gɔ ogaáʼkɛɛ́ kobana. Pɔɔd póob pə́yíím pádɛ́ɛman pɛnɔ piim lɛ́ na a mɔnɔŋ miim, na a ndɛg ngim, na a tɔgɛ́ɛ́ tuim, na a əʼkúu əngim. Ungim yɛɛ́dɛ́lɛmɛn a udi ó noʼkóm nó nɛlaamɛʼ na a udi ó Mɔɔ́n o nodóm. Ungim yiíníigin kilə́ə́ kɛ́ kifúlúʼtú na kɛlaa a ombɔg.

¹⁰Páyɛ́ɛ asása nɛŋo a mɔɛn, pɔ́nɔ́: «Táán wəəs nyɔ́ ələndíníníí a oʼkɔɔ ɔ́ nɛlaamɛʼ áa amábɛyɔ́ɔ́yɛ pɔ́lɛ́ na Mɔɔ́n o nodóm.»

¹¹Məŋun má maʼtom miim, na pasaá, na ponyam póob púniʼ páyágoʼkɛnɛn noʼkóm nó nɛlaamɛʼ. Ungim nyóon yiídə́əŋ a nsí na əndu a udi ó noʼkóm nó nɛlaamɛʼ agonyáadɛ Táán.

¹²Páyɛ́ɛ əgusəə pɔ́nɔ́: «Aamɛn! Pɛbán pɛ́ɛnɛ lɛ́: Pɛlɛ́ɛ́ pɛ́ nnyáádɛ́, nugəm, nsiŋ, pisoyidiʼ, nnyáádɛ́, toɛn, nɛgóón, pɛ́agoob na Táán yəəs a pɛnɛŋ piim! Aamɛn!»

¹³Osaá nyummú kɔ a kɛgaágadɛ kɛɔ́bɔn aáság kusiəd tɔgɛ́ɛ́, ɔnɔ́ na mɛ: «Pɔɔd póob pá pálɛɛ́ náan na pilə́ə́ pɛ́ pifúlúʼtú əə, pa ánɛ aa pálɛɛ́ náan əə́? Ə́lə́ə́ áa pamɔɛ́d pálɛɛ́ əgiim pálón ə́?»

¹⁴Njímuyúlísíni nyɔʼkɔ́ na nyɔ́lɛ́: «Wɛ áa waálɛŋ óo, paabá!» Náa ɔnɔ́ na mɛ: «Pálɛ pɔɔd pá pɛ́ɛ́sán a pɛásɔ́sɛ́n pɛ́ pɛnasáŋ[41] Pɛ́ɛ́sóg pilə́ə́ pɛɔ́bɔn a maŋɔ́ má Mɔɔ́n o nodóm pɛáság komóaŋ.

¹⁵A oʼto wóow aa pə́də́níí a udi ó noʼkóm nó nɛlaamɛʼ nó Táán, páamonyáadɛ na udúg na wɔɔ́s a uʼkóó wə́ə́ŋ. Nyɔ́ alɛɛ́ undəndínə́ə́n a noʼkóm nó nɛlaamɛʼ adɛndɛ́ɛ́ kuliogi niis na pɔ́lɛ́.

¹⁶Njaan ɛdɛndɛ́ɛ́ koboobany kə́mmú. Nɛŋɔ́ɛd nɛ́dɛboobány. Yoóy tɛn ɛ́dɛndɛ́ɛ́ kobogɔ́lɔnɛ, ɔmbɔ́ tɛn mbod ɛ muug mó monasáŋ múmmú moɛ́ndɛ́ŋ

¹⁷lɛ́ Mɔɔ́n o nodóm nyɔ́ alɛɛ́ a ɛbá ɛ́ noʼkóm nó nɛlaamɛʼ alɛ́ɛ́ kusiəd kɛnɛŋ na pɔ́lɛ́ wɔnɔ́ ná unnuŋ mudúg alɛɛ́ agɛɛlɛ na mudúg. Alɛ́ɛ́ kubusúid agɛɛn na pɔ́lɛ́ a kɛnɔ kɛ́ musim mó məní má máagɛɛ́ʼkɛnanan ɔlaa mólɛɛ́. Táán alɛ́ɛ́ koman kubuúŋiənə pɛlɛɛ a əngis[42]»