Read Yambeta Yiífínínin 8 Bible Online

Yiífínínin 8 - Yambeta bible

Yiífínínin 8

¹Ná Mɔɔ́n o nodóm yɛɛ́gábɛn sɛʼtáam[43] yɛ annam áʼtáan na ábaan, kɛnɔ kíílə́ndin sáb a mbálámɔɛn yoom ɛ́ kɛsom kɛ́ áwaʼ.

²Mbáság kodála məŋun má maʼtom máʼtáan na mábaan má mɛ́ɛ́dɛ́lɛ́mɛn a udi ó Táán. Páyɛ́boyɛ́ʼkɛn musə́ə́ móʼtáan na móbaan.

³Uŋun ó maʼtom wúmmú wááság kiim adɛ́lɛm a ɛbá ɛ́ kibóŋ kɛ́ pɛfɔny. Wííguminin kɛa kɛ́ pɔ́ɔgɔ́lɔnɛ ɛdɛm a kɛ́lɛ́. Páyɛ́ɛ́lɛ kɛa kɛ́go na kóol. Pááság komoyɛ́ʼkɛn ɛ́fɔlɛ́ ɛ́ molɔʼ lɛ́ áfɔnya a kibóŋ kɛ́ pɛfɔny kɛ́ kɛ́yɛ́ɛ a udi ó noʼkóm nó nɛlaamɛʼ. Kibóŋ kɛ́go, páyɛ́ɛ́lɛ kɛ́lɛ́ tɛn na kóol. Kɛ́yɛ́ɛ lɛ́ ná kɛfɔny kɛ́ɛg kɛ́bag a mɔɛn, ondáŋ na pɛɔ́sɔ́gɔ́lɔ́n pɛ́ pɔɔd pá páagoob páyɛ́ɛ agɛɛlɛ[44]

⁴Moógin má ɛlɔʼ máyɛ́ɛ əgiim mádɛ́ɛmɛn kɔ a ombɔg wó uŋun ó maʼtom agobag a udi ó Táán ondáŋ na pɛɔ́sɔ́gɔ́lɔ́n pɛ́ pɔɔd pá páyɛ́ɛ agoob na Táán páyɛ́ɛ agɛɛlɛ.

⁵A ngim yɛ́ɛy, uŋun ó maʼtom wááság kusiəd kɛa kɛ́ kogɔ́lɔnɛ ɛdɛm kɛ́ɛg, wə́yə́ə́gi kɛ́lɛ́ na yug yɛ́ wísiə́d kɔ a kibóŋ kɛ́ pɛfɔny, wáádagɛ́dɛ a nsí. Pombambany puə́bə́ə́ kudə́əŋən, aŋŋo yə́əlumə, mbálámɔɛn yəə́bəgə na toɛn. Nsí yaáság kəə́nyigid tɛn[45]

⁶Məŋun má maʼtom máʼtáan na mábaan má mígóodi musə́ə́ tɛn móʼtáan na móbaan[46] mə́ə́bə́ə́ kaáboŋɛn kogo.

⁷Sɔ́g o na oʼto na oʼto aáság kogo isə́ə́ yə́ə́ŋ. Noó nuídə́əŋ a nsí nubuúbúlə́ na yug na maŋɔ́. Kɛsaa kɛ́ nsí kímuʼ a pɛsaa pɛ́dáád kɛáság koga yug, kɛɔ́gɔ́lɔ. Kiɛd tɛn kímuʼ a piɛd pɛ́dáád pɛ́ a nsí kɛ́ɛ́gɔ́lɔ. Mbɛ́n ngim tɛn yɛ́ ɛyɛ́ɛ əguləbi yaáság koman kogɔ́lɔ[47]

⁸Uŋun ó maʼtom wó annam ábaan wááság kogo yə́ə́ŋ isə́ə́. Yoom ɛgo ɛ́yɛ́ɛ wɔnɔ́ kɛa kɛ́ kiʼtóg kɛ́ oʼkon kɛ́ kɛ́yɛ́ɛ alola aa pɛ́ɛ́dágɛ́dɛ a noom nó ɛbá fiɛ́d. Kɛsaa kɛ́ noom kímuʼ a pɛsaa pɛ́dáád kɛáság kaan maŋɔ́.

⁹Moom mó mólɛɛ́ alaa a məní, ímuʼ a módáád yííwú. Siʼtíməʼ tɛn mmuʼ a pəsiʼtíməʼ pádáád yɛɛ́lɛáŋ.

¹⁰Uŋun ó maʼtom wó annam ádáád wááság kogo yə́ə́ŋ isə́ə́. Kiʼtóg kɛ́ yəə́dədəʼ kɛáság kiim kɛ́gásɛg kɔ́gɔ́ɔg a mbálámɔɛn, kiə́də́əŋ a nsí. Kɛ́yɛ́ɛ alola wɔnɔ́ tɔ́sɛláam. Yídə́ə́ŋə́nən kɛsaa kɛ́ toom tó a nsí kímuʼ, na kɛsaa tɛn kɛ́ puní kímuʼ a pɛsaa pɛ́dáád.

¹¹Niiŋ nɛ́ yəə́dədəʼ yɛ́ɛy nɛ́yɛ́ɛ lɛ́: Kɛnɔanɔa. Kɛsaa kɛ́ puní kímuʼ a pɛsaa pɛ́dáád kɛáság kaan a unuʼ wɔ́nɔ́ piɛ́bɛ́b. Pɔɔd piíŋ píígú lɛ́ puní póyɛ́ɛ poándaanɔ.

¹²Uŋun ó maʼtom wó annam ə́niʼ wááság kogo tɛn yə́ə́ŋ isə́ə́. Pááság kobáam kɛsaa kɛ́ wɔɔ́s kímuʼ a pɛsaa pɛ́dáád, páábáám kɛsaa kɛ́ wəə́ kímuʼ a pɛsaa pɛ́dáád. Pɛ́ɛ́báám tɛn yəə́dədəʼ ímuʼ a muə́dədəʼ módáád. Kɛsaa kɛ́ moom móom kímuʼ a pɛsaa pɛ́dáád kíídə́əŋ mbin. Náan aa kisəə kɛ́ wɔɔ́s kɛ́ɛ́dɔ́ɔ́, mbin imə́yiʼkini kulim na udúg agaáyɛn[48]

¹³Náa ndáadɛ́ʼtɛg anɛ́ɛ́n kə́mmú. Nyɛɛ́dála kifíŋ kɛ́afɛ́ɛ kɔ a mɔɛmɔɛ́n. Kɛ́yɛ́ɛ kɔ́gɔ́ɔg a mɔɛmɔɛ́n. Mbáság koob kɛ́alɔɛgɛ nɛŋo a mɔɛn, kɛɔ́nɔ́: «Kɔbɛ́ o! Kɔbɛ́ kólɛ kɔ o! Kɔbɛ́ kólɛ́ɛ́ kɛɛn kɔ na pɔɔd pá a nsí ná musə́ə́ mó məŋun má maʼtom mə́mmú mádáád mólɛ́ɛ́ kodáŋɛ́ɛ́!»