Read Yambeta Yiífínínin 9 Bible Online

Yiífínínin 9 - Yambeta bible

Yiífínínin 9

¹Uŋun ó maʼtom wó annam áʼtáan wááság kogo yə́ə́ŋ isə́ə́. Nyɛɛ́dála yəə́dədəʼ yə́əgiim ɛ́gásɛg a mbálámɔɛn yááság kudə́əŋ a nsí. Páyɛ́moyɛ́ʼkɛn kíi ɛ niɛ́ nɛ́ nɛ́lɛɛ́ miɛ́ɛ́ŋ a nsí.

²Yííbúən niɛ́ nɛ́ nɛ́lɛɛ́ miɛ́ɛ́ŋ nɛ́go nɛ́ɛn moógin mááság kiim mábag púuu. Máyɛ́ɛ wɔnɔ́ moógin má kɛa kɛ́ yug kɛ́ kɛgóón[49] Moógin móom máyɛ́ɛ́lɛ kɛnɔ kɛáság kəə́súʼkin, wɔɔ́s údiiʼkíni konom kə́mmú.

³Pɛdaan pɛ́ɛ́lón a moógin móom pɛáság kolam nsí ngim. Páyɛ́ʼkɛn pɛdaan pɛ́ɛb toɛn lɛ́ pɛ́dáaŋanan wɔnɔ́ mogɔ́sɔ́ɔ́[50]

⁴Páyɛ́bosáŋɛ́nɛ́nɛ lɛ́ pɛ́dɛʼtɔ́bɛd ombɛ́n ɔmbɔ́ úmmuʼ, ɔmbɔ́ kiɛd, ɔmbɔ́ əgín yoom na yoom ímuʼ yɛ́ ɛ́lɛɛ́ agolog a nsí. Pɛ́dáaŋan əgín pɔɔd pá póʼkódií kɛbɛɛ kɛ́ Táán a udi[51]

⁵Pádɛʼkáaboyɛ́ʼkɛn toɛn lɛ́ pɛóna pɔɔd póob. Náa, pígóodi əgín toɛn tóonɛ lɛ́ píbuúyəʼkəni məə́ náan málaŋ máʼtáan. Kogany kó pɔɔd páyɛ́ɛ agoob kɛnɛŋ kɛ́ pɛdaan pɛ́ɛb pɛ́máboodá kóyɛ́ɛ wɔnɔ́ kɛnɛŋ kɛ́ ɛgɔ́sɔ́ɔ́ ɛ́mágoodá.

⁶A məə́ móom máʼtáan, pɔɔd pálɛ́ɛ́ kuunə lɛ́ pə́gu, pə́ʼkú. Pálɛ́ɛ́ kodɔ́ŋɔnɔ kugu, kugu kúdiim[52]

⁷Pɛdaan pɛ́ɛb pɛ́yɛ́ɛ wɔnɔ́ ponyambɛlɛʼ pó páʼkoboŋɛnɛɛ́ agɛɛn pɛdá na pólɛ́. Pɛ́nyáŋɛnɛn moom mógo a nto wɔnɔ́ todám tó puʼkúm tó páyɛ́ɛ́lɛ na kóol. Nti yɔɔbɔn ɛyɛ́ɛ wɔnɔ́ ɛ pɔɔd.

⁸Pɛ́yɛ́ɛ na tuyə́ən tolanda wɔnɔ́ tó ɔʼkɛ́ɛd, əngiŋ yɔ́ɔ́bɔn a unuʼ wɔnɔ́ yɛ́ ngangó.

⁹Mugog moɔ́bɔn móyɛ́ɛ wɔnɔ́ pə́ə́níig kilə́ə́ kɛ́ pisúg kɛ́ pɛdá. Nɛŋo nɛ́ nɛ́yɛ́ɛ agolon a nfaáan yɔɔbɔn nɛ́yɛ́ɛ əgulumə wɔnɔ́ pɛʼkálɛ́ɛd pɛ́ ponyambɛlɛʼ pólɛɛ́ əgudulə na ɔʼtɛ́d agɛɛn kó pɛdá[53]

¹⁰Pígóodi pɔ́lɛ́ piim nsɛ́n a unni yɛ́ páadáaŋanan na yɛ́lɛ́ wɔnɔ́ mogɔ́sɔ́ɔ́. A nni yɔɔbɔn yɛ́ɛy aa toɛn tó kuyə́njəbəni pɔɔd a məə́ móom máʼtáan tóyɛ́ɛ.

¹¹Uŋun ó maʼtom wó páyɛ́ʼkɛn niɛ́ nɛ́ nɛ́lɛɛ́ miɛ́ɛ́ŋ nɛ́ɛn aa óyɛ́ɛ nkúm yɔɔbɔn. Niiŋ niə́ŋ a tɔgɛ́ɛ́ tó Yúdɛn nɛ́yɛ́ɛ lɛ́ «Abadɔ́ɔŋ», a tó kɛlɛ́ɛg lɛ́ «Aʼpolɛyɔ́ɔŋ», áay lɛ́ «Onjósag.»

¹²Ntɔ́b ɛ na oʼto na oʼto yaáʼkosan. Yimmú ɛ́baan áa yɛ́ɛnɛ yəə́ndəgimií a ngim.

¹³Uŋun ó maʼtom wó annam áʼtáan na úmmuʼ wááság kogo yə́ə́ŋ isə́ə́. Njóób nɛŋo níəgiim nɛ́dɛ́ɛmɛn a nkoŋ ɛ kibóŋ kɛ́ pɛfɔny íniʼ. Kibóŋ kɛ́go kɛ́yɛ́ɛ a udi ó Táán. Páyɛ́ɛ́lɛ kɛ́lɛ na kóol[54]

¹⁴Nɛŋo nɛ́ɛn nɛ́ɛ́dɛánɛ na uŋun ó maʼtom wó annam áʼtáan na úmmuʼ wó óyɛ́ɛ na isə́ə́, nɛɔ́nɔ́: «Ondínə məŋun má maʼtom mə́niʼ má málɛɛ́ a kɛáŋ a noom nó nogóón nó pɔ́ɔdɔ́ŋɔn lɛ́ Ɛfɛláad.»

¹⁵Pááság kondinə məŋun má maʼtom móom mə́niʼ má máyɛ́ɛ maábɔ́ŋɛ́náán lɛ́ a kɛnɛŋ kɛ́ɛg kɛ́ a wɔɔ́s ogo wóow, a wəə́ tɛn wóow wó a waag wóow, málɛ́ɛ́ koóna ngab ɛ pɔɔd kiig kɛsaa kímuʼ a pɛsaa pɛ́dáád pɛ́ pɔɔd piim pá a nsí.

¹⁶Pááság kɛʼtɛ́anɛ ɔmban ó pasɔ́njaa pá pálɛɛ́ agonɔɛyɛ pɛdá a ponyambɛlɛʼ a mɔɛn. Páyɛ́ɛ mbulugudu ɔ́ndɛd ɛ pamɛlɛyɔ́ɔŋ ɛ́baan.

¹⁷Táá wɔnɔ́ ná nyɛɛ́dála ná pə́yíndoodi. Ponyambɛlɛʼ na pasɔ́njaa pá pɛ́ɛ́bágɛdɛn a pólɛ́, pííníigin pilə́ə́ pɛ́ pɛdá pɛ́ pisúg, pɛ́awɛ́ɛ́la póʼkóʼkóʼkó wɔnɔ́ yug, pulúum pulúum wɔnɔ́ kɛnɛŋ kɛ́ mbálámɔɛn yaámoáŋ, ntógan yɛ aʼkán wɔnɔ́ ndus yɛ́ páʼkogɔ́ɔ́lɛɛ́[55] Ponyambɛlɛʼ póyɛ́ɛ na nto wɔnɔ́ yɛ ngangó. Yug ɛ́yɛ́ɛ agolon a nnuʼ yɔɔbɔn, na moógin kɛ́, na ndus yaálola.

¹⁸Pííwííyi kɛsaa kɛ́ pɔɔd kímuʼ a pɛsaa pɛ́dáád. Pə́yíbuwííyi na pɛbɛ́ pɛ́ moom pɛ́ɛb pɛ́dáád pɛ́ pɛ́yɛ́ɛ agolon a nnuʼ yɔɔbɔn lɛ́ na yug, na moógin, na ndus yɛ́ ɛlɛɛ́ alola

¹⁹lɛ́ toɛn tó ponyambɛlɛʼ a nnuʼ yɔɔbɔn na a nni yɔɔbɔn aa tólɛɛ́. Kɛ́lɛ lɛ́ nni yɔɔbɔn ɛlɛ wɔnɔ́ nkud, igóódi tɛn nto. Na yɛ́lɛ́ aa pálɛɛ́ agɛɛlɛ mɔɔd kɔbɛ́.

²⁰A noá na pɔɔd pá pɛ́ɛ́lɔ́b, pɔɔd pá pɛa pɛ́ pɛbán pɛ́ pɛbɛ́ pɛ́ɛb pɛ́dɛʼkáagoónɛ́ɛ́, pɔ́lɛ́ pə́diʼkə́əgəə́suʼki pɛbán pɛɔ́bɔn pɛ́ páyɛ́ɛ́lɛ na ɔmbɔg yɔ́ɔ́bɔn. Páyɛ́ɛ́n yuudi agonyáadɛ məŋun má mabɛ́, na ambog kuyə́ən. Páyɛ́ɛ́n tɛn yuudi na konyáadɛ na pɛɔ́sɔ́gɔ́lɔ́n na pɛ́ kisúg kɛ́ mɔɔnɛ́, na pɛ́ kisúg kɛ́ pɔ́ɔdɔ́ŋɔn lɛ́ pɔlɔ́ɔnsɛ pílíngə́lingə pɛ́ páyɛ́ɛ́lɛ na kóol, na pɛ́ páyɛ́ɛ́lɛ na aʼtáán, ɔmbɔ́ lɛ́ pɛ́ píídím na kiɛd. Moom móom módiɛn moom mó móadɛ́ʼtɛganan, ɔmbɔ́ lɛ́ mó móagoóbanan, oó lɛ́ mó móadáŋana[56]

²¹Pə́diʼkə́əgəə́suʼki koóna pɔɔd, na pɛnon kɛɛlɛ, pə́diə́súʼkíí ɔlaa ó pɛɔg, ɔmbɔ́ tɛn wiib.