Read Yau Mak 7 Bible Online

Mak 7 - Yau bible

Mak 7

¹Oro, Farisi orin nongoru gendic fandat fandat amna au yu Yerusalem taun imu fauna Yesuot ebung.

²Engmuya yagungmai Yesuhon youp amnani yu oburo masacti nacno nagung. Yu ihoroc togungmaha tongga yu Yuda nanohon gendicno gumandung.

³Farisi orin Yudanano ambarac yu obu masati wömai nacno manongidung. Muno yu ombu sakungnihon gendic tanmuya oburo sac tonggagon nacno fogito nongidung.

⁴O ihorocgon yu maketdecma böcnon enggai wömai yu osuc ombu sakungnihon toroc kiapdec yamuc gungidung. Tongo mit wömai nacno nongidung. Yu wömai ombu sakungnihon gendicno koböcma tan tongidung. Gendic auma wömai ingoroc tongidung, wö, waga, ting feret, woroc ombu sakungnihon toroc kiapdec sac tongga mit wömai youp imongidung.

⁵Oro, Farisi orin nongoru gendic fandat fandat amna yu inoin gendicnoha kombingga Yesu ingoroc inong ac togung, “Gakain youp amnayai yu foro yaha ombu sakungnonihon gendicno gumanda oburo masacwi nacno nongidang?”

⁶Ihoroc yuya Yesuho mata ökene ingoroc iban imogoc, “Son imanang amna! Sonthon duc mata soni orin toroc kiap soni woi yaitni. Kopotorochon yong tuctuc amna Aisaia yu sontha kurömna sinom ingoroc yogoc: ‘Owi amna ngorocho wömai duchogon noc yong moröng namongidang mahong irot kombic kombicnoho nocha makombing namongidang.

⁷Ihoroc tongo yuhon yong moröng kiap woi yapmu boyömo. O yuhon gendicno woi amnahon gendicgon Kopotorochon muno.’ (Aisaia 29:13)

⁸“Son urop Kopotorochon nongoru imu fauna amnahon gendic matagon kokorengidang.

⁹Boinno sinom sonu Kopotoroc tongu imongga yuhon nongoru kombic kombicbaracho dongyu fauya sonthon gendicsonigon tannidang.

¹⁰Möseho wömai Kopotorochon nongoru ingoroc kamogoc: ‘Son muyu mac nandöng soni gending imongitnung.’ (Kisim Bek 20:12) O nongoru mata au ingoroc: ‘Amna auho macnohu o fanohu mata wöntucmuno inontacanu wömai suraroho yu wuya ompun.’ (Kisim Bek 21:17)

¹¹“Nongoru ihoroc itac mahong sonthon gendic soni wömai ingoroc itac, ‘Amna au yu ogep mönenghu o yapmu au mac nandöng tongfat yecyecha sigocma wo sogida Kopotorochon ececha siun.’

¹²Oro amna au yu gendic woroc tarantacanu wömai yu macni faniha magending imic, muno sinom.

¹³Sonthon gendic soni worocho wömai Kopotorochon nongoru sinom wo taun weuna gendic sonihogon moröma itac. Son toroc kiap ihorocno koböcma tongidang.” Yapmu manomano auho amna Kopotorocho yangamin dou bet fadidang

¹⁴Oro, Yesu yu wönggon owi amna inong yuna engsuran tuya ingoroc inogoc, “Kombiarut, son mata ngo kombing tuctuc tarut!

¹⁵Yapmu au sumonma amnahon irotnon ohontacma worocho wömai yu Kopotorocho yangamin matun bet faditac. Wohong yapmu amnahon irotdecma sumon öantacma worocho wömai amna Kopotorocho yangamin tun betfaditac,” Yesu yu ihoroc yogoc.

¹⁷Tongo mit yu owi amna doun fauya bucin önguna youp amnaniho ‘mata tepmo worochon foro kombina’ yongo Yesu inong ac togung.

¹⁸Inuya Yesuho inogoc, “Sonthon kombic kombic soni abe mepmo itachu nuhun. Worocha son mata worochon foro makombing. Kombiarut, manomano sumon idangma worocho wömai amna dugo ganang ohongga modibin ida sumon ohongitac. Manomano ihorocnoho wömai amnahon irot kombic kombicnodec mahic.” Oro Yesu mata wo yogocma worochon foro wömai ingoroc: Non ogep nacno ambarac nongidamon. Nacnoha tongga non Kopotorocho yangamin mabet fatnin.

²⁰Oro Yesuho mata sakaun fiuna yogoc, “Manomano amnahon irot kombic kombicnodecma öantacma worocho wömai tuna yu Kopotorocho yangamin betni entac.

²¹Wömai yaha, amnahon irot kombic kombicdec wömai manomano wontucmuno ingoroc öngkungga ididang: Owi amna göra kiaphu o usem toctoc kiaphu o amna dong omom toctochon kiaphu o oimna tong samborec toctochon kiaphu

²²o gipmo toroc kiaphu o wontucmuno toctoc kiaphu o nucno inong yucyuc kiaphu o kombing bunbun kiaphu o nucnohon manomanoha yang ibip toroc kiaphu o mata mene yocyoc kiaphu o inoin manogon töctöc kiaphu o önggöngyi toctoc kiaphu

²³toroc kiap ihorocnoho wömai amnahon irot kombic kombicdecma öngkungga amna Kopotorocho yangamin tu bet faditac,” Yesu yu nacnohon gendic sicsicha mata ihoroc yogoc. Bumbumyi nanoho toropdecma owi auho Yesu kombing tobing imogoc

²⁴Yesu yu böcsa wo imun fauna bumbumyi nanohon gurocin ongmuna Tair taundec böc auhon ögoc. Tongo yu owi amna yang useng öpgon woce idoc mahong böc morömpho karupgon Yesuho woce itacno kombigung.

²⁵Ihoroc kombingmuya owi au yu ihorocgon Yesuhon fatno kombingga wohogon yuot engmuna orungo forodec goruc yemoc tongga idoc. Owi wo yu bumbuyi nanohon toropdecma Fonisia taun Siria kantridec woce öngkuboc. Yuhon weno wömai dogu boyömpho sogitsogityi idoc. Worocha tongga owi worocho engmuna ‘Yesuho dogu boyömo dong yarun’ yongo Yesu dönac orongi inogoc.

²⁷Ihoroc inuna Yesuho inogoc, “Kombiharoc, osuc wömai managumbocho nacno nongbödeuya mit wömai sapho naarut. Non managumbochon nacno yongo sap imonaya yuho nocnocno woi angit maec.”

²⁸Yesuho ihoroc yuna owiho mata urago ingoroc iban imogoc, “Moröma goc boinno yaroc mahong managumbocho wömai nacno föro docno docno dou muya sapho abam girarema nongidang.”

²⁹Ihoroc yuna Yesuho inogoc, “Mayain goc mata urago ogepma sinom iban namparoc. Worocha goc ongga ahi, dogu boyömpho urop weya imun fahac.”

³⁰Ihoroc inuna owi wo böcnon ongmuna agocmai dogu boyömpho wenoi imun fauna onggoc. Tuna weno yu abamdec dungga idoc. Yesuho amna au onggimo tongo o dugo mepmo yu tun orokogoc

³¹Oro mit Yesu yu Tair sa guroc wo imun fauna Saidon taun woce onggoc. Tongo uyapno sakaun fiuna guroc mano ‘ten taun’ Galili yamuc öngkoringdec woce ongga idoc.

³²Woce idina owi amna auho amna au yangada Yesuot tebung. Amna wo onggimo tongo o dugo ihorocgon mep tuna mata mepmogon yongidoc. Tuna nucniho ‘Yesuho oburo yudec out tohun’ yongo Yesu dönac inogung.

³³Inuya Yesuho amna wo yangada obmukusuc aram oke ongmunya yu oburo karamutno yait yait amna worochon onggimodec soregoc. O ihorocgon irubo oburodec sunmuna amna worochon monbirodec taboc.

³⁴Ihoroc tongo daro onoce momdec foringmun uunto sum orongi wodingmuna amna ingoroc inogoc, “Efata”, Mata worochon foroi ‘onggimo dugo tumpun.’

³⁵Ihoroc yuna wohogon amna woroc-hon onggimo tumboc. O monbiroho yungan tuna mata tuctugo yogoc.

³⁶Tongo Yesuho owi amna wocin idungma ‘son fat ngo muyu yong fandat tongoninga’ ihoroc inogoc. Wohong muno woi, owi amna yu Yesu ‘muno’ inogocma wo makombii yuhon fatno moröma sinom yong fandat tonggung.

³⁷Wömai yaha, Yesu yu youpno inobarac sinom tuna owi amna wo yangga toup borongdedungmaha fatno moröma yong fandat tonggung. Yu wömai yogung, “Yuhon youpno ambarac ogepmagon. Yu youp moröma sinom tongitacmai amna onggimo tongtongniho onggimo tumang. O dugo mepmoho dugo doun yungan tang,” ihoroc yong tonggung.