Read Yau Röm 9 Bible Online

Röm 9 - Yau bible

Röm 9

¹Boinno sinom, Duichon madec nocho mata boinno au kantiwa. Mata ngoi imanang muno. O Kunkun Yaruho irotnan itmuna mata ngo tong koing tongitac. Wömai ingoroc:

²Israel nano yu woi nakain oröcnai orin nakain nogot docno sinom. Nocu yuha bongono bongono uroci moröma sinom kombingitat. O irotnaho mep tuna noc irot koböc koböc kombingitat. Nocho yu tongfat yecyecha yuot mongurac tongga Duic ima fauna Kopotorochon möpmo nocdec uunma wömai noc kombiaya angit in.

⁴Israel nano yu woi Kopotorochon torop inoha soworec soworecyi. O Kopotorocho yu ‘nakain wenai mananai’ ihoroc inogoc. O yuho wömai Kopotorochon yaguno orin toroc kiap moröma tongidocma woroc yangidung. O yuha wömai Kopotorocho yong koing matano imogoc. O Kopotorochon nongoru wömai yui osucgon sogidung. O öret socsoc böc orin yong moröng yocyochon torop wo wömai Kopotorocho yuha imogoc. O yuha wömai Kopotorocho ‘nocho son ayam sonihon oburodec asan kamoya orung itnahing’ yongo mata godingmun fat imogoc.

⁵O Kopotorochon amna moröma Abraham, Aisak, Jeköp yu wömai Israel nanohon ombu sakungni idung. O Duic yu wömai yuhon toropdecma amna öngkuboc. Duic yui Kopotoroc, o yui manomano ambarachon bigo. Worocha tongo nontho bongono bongono yuhagon yong moröng imongitnahamon, woi boinno. Kopotorocho Israel nanodec toroc kiap tingtingno tongidocma worochon matano

⁶Oro, Kopotorocho Israel nano mata godingmun fat imogocma worocho wömai yu makörengmun ongic. Muno sinom, Kopotorochon yong koing mataho wömai boinno sinom Israel nanodec öngkungbödeangoc. Wohong owi amna Israel nanohon nogot docno idangma yui ambaracho wömai Israel sinomu maeng.

⁷O ihorocgon Abrahamphon morogoni ambaracho wömai yuhon manani sinom maeng. Muno sinom, osuc Kopotorocho Abraham ingoroc inogoc, ‘Gakain morogoyai sinom yu wömai Aisakdec öngkupnahing.’

⁸Mata ngorochon foro wömai ingoroc: Managumboc godibhon kiapdec öngkup öngkupyi, yui wömai Kopotorochon managumbocni sinom muno. Managumbocni sinomu wömai owi amna Kopotorocho mata godingmun fadocma woroc kombing tobingidangma yu worocho wömai Abrahamphon morogoni sinom idang.

⁹Kopotorocho mata ingoroc godingmun fadoc: “Nocho urop bongono au erangdegot. Bongono wocin wömai nocho ehaya Sara yu mananobarac engoc.” (Stat 18:10)

¹⁰O ihorocgon, Rebekahon mananin yaima worochon fano woi öranoni Aisak yu tungugon.

¹¹Wabkarac yai yu abe maöngkui yapmu ogepmahu o yapmu wömuno abe mati idinya Kopotorocho urop Rebeka yong tuctuc mata ingoroc inongdegoc: “Mana borongomaho wömai mana mitmahon youp wabkaracno engoc.” (Stat 25:23) Oro, kiap worocho wömai ingoroc nindahac: Kopotoroc yu amna auhon toroc kiapmo angga maerangitac. Muno, yui inoin kombic kombicgon tanda managumboc mitma inong yongo eragoc.

¹³Worochon toroc wömai mata au ingoroc irim toctocyi itac: “Nocho Jeköpha toup kombigot mahong Isohai ayam tong imogot.” (Malakai 1:2)

¹⁴Oro, nonu mata woroc kombinaya amna auho ingoroc yun: Kopotorocho amna auha me imogocma woi kandoc togocha? Oro, nocu mata worochon urago ingoroc inontat: Muno sinom,

¹⁵Kopotoroc yu kandoc matogoc. Yu wömai osuc Möse ingoroc inogoc: “Nocu nakain kombic kombicgon tanmaina amna auha ang-banaya nochon fat entac. O ihorocgon nocu nakain kombic kombicgon tanmaina amna auha uroc namontac.” (Kisim Bek 33:19)

¹⁶Worocha non ingoroc kombina: Kopotorocho amna au inoha soworeantachu o munohu woi amna auhon kombic kombichu o amna auhon youpha tongga matic. Muno sinom Kopotoroc yu inoin kombic kombicgon tanda amna yangbanangitac.

¹⁷Mösehon bapiyadec wömai Kopotorocho Isip nanohon king ingoroc inogoc: “Noc ‘owi amna ambaracho nakain gesö moröma auya nakain maho sa guroc danong ongbödengga moröma itun’ yongo goc temongma uuna king itaroc.” (Kisim Bek 9:16)

¹⁸Worocha wömai woroc: Kopotoroc yu kombiuna angit inahai wömai yu amna au angbanauna inoin fat entac. O Kopotorocho kombiuna angit inai wömai yu amna au irotno foc tong akep imuna yu Kopotorocha me imontac.

¹⁹Oro, sondecma amna auho ingoroc nanun: Amna au Kopotorochon kombic kombicno körengmun onggongno woi maec. Worochai foro yaöha sinom Kopotorocho non wömuno noniha mata youpdec ningat fongontac? Oro nocho amna ihorocnoma mata urago ingoroc imontat:

²⁰Gocu numa yo? Gocu tingtinga Kopotoroc inong faim? Yapmu tobic tobicyi worocho wömai amna ino tobigocma ingoroc mainun: Gocho foro yaöha noc ihorocno tobiroc yo?

²¹Wö tobic tobic amna yu guroc docno tungu sogitmuna inoin ibibono tanto wö yai tobiantac. Tungu auma wömai nacno socsocha ogepma tobiantac o auma totnongec gitgitha komong tobiantac.

²²Oro Kopotoroc yu kiap worocotmagon tongitac. Yu woi ecegono orin gesöno moröma wömuno toctoc owi amna indac indacha kombihac. Wontucmuno toctoc owi amna yu urop gorong onggonga arangarang yongga idang mahong Kopotorocho yu abe yangbanango urago wömuno karupgon maimic. Muno, yui önggöngyino bongono ubarago sumboditac mahong mit wömai dongyun obukonahing.

²³O Kopotoroc yu inoin yaguno wairuru kiap mitimobaracma wo owi amna inoha soworeiima indac indacha kombihac. Tongo yu torop wo osucgon erangga ‘idit itonggong koing sogitnahing’ yongo soworengdegoc.

²⁴Oro torop wo wömai nonu Duichon suraro idamon. Kopotorocho non auma Yuda nanohon toropdecma ninong yogoc, o auma bumbumyi nanohon toropdecma ninong yuna yuot ebomon.

²⁵Worochon matano wömai Kopotorocho yong tuctuc amna Hosea yuhon bapiyadec ingoroc yogoc: “Sonu osuc nakain torop maididung mahong nocho son kanong yoya sonu nakain owi amnanai itnahing, O osuc nocho sontha makombigot mahong wömai nocho sontha toup sinom kombingga nakain torop itnahing.” (Hosea 2:23)

²⁶“Osuc nocho yu inogot, ‘sonu nochon toropnai muno!’ Oro mit wömai owi amnaho kanonahing, ‘sonu Kopotoroc Itonggong Morömo yuhon managumbocni.” (Hosea 1:10)

²⁷Oro Aisaia yu Israel nanoha uroci kombingga ingoroc yogoc: “Israel nano yui torop moröma sinom, top sonorocnohon toroc ip mahong Kopotorocho torop obugugon soworeuna batip itnahing.”

²⁸“Wömai yaöha, Kopotoroc Moröma yu wömai guroc owi amna ambarac mata youpdec fohong yungo urago wontuc-muno iban imangoc.” (Aisaia 10:22)

²⁹Aisai yu kurömna sinom ingoroc yogoc: “Gesö Morömo Kopotoroc yu non maningbanaicanu wömai morogo noni au maip. Tuna nonu ambarac obukong-bödenam. Woi taun Sodom orin taun Gomora obukongdup togomorocma worochon toroc nontho tonam.” (Aisaia 1:9) Israel nano yu makombing tobigung

³⁰Worocha non ingoroc kombina: Bumbumyi nano yu ‘Kopotorocho yangamin nongnongo itna’ yongo youp au matongidung mahong Kopotorocho yu yangbanauna yu Yesuha kombing tobing imongidang. Worocha tongga yui Kopotorocho yangamin nongnongo idang.

³¹Wohong Israel nano yu ‘nongnongo itna’ yongo nongoru gendichon mongorec youp moröma sinom tongidung mahong yui Kopotorocho yangamin nongnongo maeng.

³²Wömai yaha? Yu Kopotorocha kombing tobing imongo ‘yuhogon tuna nonu nongnongo owi amna itnahamon’ yongo makombigung. Muno, yui kombingidung, ‘noniu youp noniha tongga nonu Kopotorocho yangamin nongnongo owi amna itnahamon.’ Kombic kombic ihorocnoha tongga yui dubogo ‘amna dongyun möcmöc sop’ worocdec möngkengga mögung.

³³Worochon matano ingoroc irim toctocyi itac: “Aarut, nocho Saion sa urongodec ‘amna dongyun möcmöc sop’ au tong siantat. Tongo sop worocdec wömai amnaho dubogo möngkengga mut sorop sorop tongga mönahing. Wohong amna au yu kombing tobic tobicno yudec siantac-ma yuho wömai öngahu o mithu yangam fapfap matic, muno yu ogep engoc.” (Aisaia 8:14)