Read Yau 1 Timoti 2 Bible Online

1 Timoti 2 - Yau bible

1 Timoti 2

¹Oro nocho yapmu moröma ingoroc gantiwa. Goc muyu Duichon suraro kiring imiya yu owi amna ambaracha dönac youp tongo iditnung. Woi dogu kopothon gesöno tohongga ‘Kopotorocho owi amna tongfat yehun’ yongo dönac yarut. O manomano ambaracha ecec inongitnung.

²Yu muyu gavmantha orin surarohon dugo ambaracha ‘Kopotoroc yu tongfat yehun’ yongo dönac youp tongitnung. Ihoroc tuya yu non angit ningtoreuya non ambaracho irot gucdec ogep iditnahamon. Tongo non Kopotorochon toroc kiap ogepma tanmanaina ogepma iditnahamon.

³Dönac yocyoc kiapmo ihorocnoho wömai Kopotoroc, itonggong koing tun öngung nimoc nimoc amna noni, yuho yangamin angit sinom itac.

⁴Fatmata ogepma woi itonggongon mata boinno itac. Worocha tongga Kopotorocho ‘owi amna ambarac fatmata ogepma kombinung’ yongo itonggong koing imoc imocha kombihac.

⁵Boinno sinom, Kopotoroc yu tunguhogon itac. O yuot guroc amnaot amna bonipma tungugon itacma woi Yesu Duic, amna worocgon.

⁶Yu inoin itonggongno owi amna ambarac dogu kopothon oburodecma wöcwöcha imun fadoc. Bongono wocin wömai Kopotorocho ingoroc nindagoc, yu owi amnani inoha fogit fogitha kombingitac.

⁷Tongo Kopotorocho ‘noc yuhon duc orin aposel itiwa’ yongo soworeng namuna nocho bumbumyi nanonot ongga kombing tobic tobic kiap tungu boinno itacma wo yong fandat inong tongitat. Noc boinno yat, imanang mayot. Amnahon nongoru matano

⁸Oro amnaha wömai nocho ingoroc kombihat. Amna suraro böcsa danong idangma yu muyu oburo tuu fadauna dönac youp tongitnung. Woi irot kombutot tongga nucnoha mataho emoc tongga muno, yu muyu Kopotorocho yangamin kunkun ida dönac youp tongitnung. Owihon nongoru matano

⁹Oro owiha wömai nocu ingoroc kombihat: Owi yu tec tohomumöcno ogepma fohongyu möngitnung. Wohong yui möneng moröma monda tec boru wöngnacno önggöngyi wöc wöcno woi angit maic. O yu önggöngyi tongmuya bigo sakemo imong echon echon tongo goreng wöngnacno önggöngyi orin golho bigodec tongfat itninga.

¹⁰Wohong owi Duichon ma sogit sogityi yu muyu toroc kiap ogepma tongitnung. Kiap ihorocnoho wömai yuhon tong fatfatno ogepma edengoc.

¹¹O ihorocgon owi yu inoha kombiuya ohuna öpgon iditnung. Tongo ‘Kopotorochon mata tuctugo kombina’ yongo kombic kombic youp tongitnung.

¹²Owi auho suraro fatmata ogepma yong silip toctocha wömai nocho ‘muno sinom’ yat. O owi auho amna au moröm tong imontacma wömai angit maec. Muno, owiho öpgon ito amnaho unennegon iditnung.

¹³Wömai yaha, Kopotoroc yu Adam osuc tobingmuna, Iv wömai mit tobigoc.

¹⁴O ihorocgon dogu kopot yu wömai osuc Iv tonguc yeuna Ivho matano sumboda Kopotorochon nongoru yembodoc. Adampho wömai mit togoc.

¹⁵Worochoi oro, owi yu kombing tobic tobicno sogit akep tonggai o nucni irot tong fup tong imoc imoc tonggai o yu Kopotorocho yangamin kunkun itmuna inoha kombiuya ohonggongyi idinai wömai woroc, Kopotorocho yu wönggon tong fogiuna managumboc bacbachon uyapdec itonggong koing sogitnahing.