Read Yau Mata öpma 7 Bible Online

Mata öpma 7 - Yau bible

Mata öpma 7

¹Oro manomano wo öngkungbödeuna nocho wönggon foringga agotmai, sum yaru awanomuno yu sa gurochon bungotno awanomuno wocin idongga idung. Wocin itmuya sa gurochon sum awanomuno wo yang firiuya sumpho gurodechu o topdechu o epdechu mabusongyu onggung.

²Oro mit nocho wönggon agotmai, sum yaru au yu sep öngkup öngkupdecma öngkungga Kopotoroc Itonggong Moröm yuhon weran sogitmuna eboc. Engmuna yu sum yaru awanomuno sa guroc orin top yamuc tun obukoc obukochon gesö idimogungma yu ecnang sinom ingoroc inogoc,

³“Son sa gurochu o top yamuchu o ephu wo abe dongyu obukoninga. Son torengga idiya nonu Kopotoroc nonihon weranu youp amnanihon daigodec fong fina. Fong fingbödeunai wömai woroc, sontho wo dongyu obukodarut.”

⁴Oro mit noc wönggon kombigotmai, owi amna Kopotorochon weran sogidungma worochon namba ingoroc sicsicyi idoc: Israel nanohon torop ambaracdema owi amna 144,000 yu worocho weran sogitmuya Kopotorochon fat öngkubung.

⁵Woi Yudaho toropdecma owi amna 12,000 werano sogidung, o Rubentho toropdecma 12,000, o Gathon toropdecma 12,000,

⁶o Aserho toropdecma 12,000, o Naptaliho toropdecma 12,000, o Manaseho toropdecma 12,000,

⁷o Simeön toropdecma 12,000, o Livaiho toropdecma 12,000, o Isakarhon toropdecma 12,000,

⁸o Sebulonthon toropdecma 12,000, o Yösepho toropdecma 12,000, o Benyamintho toropdecma 12,000. Oro owi amna torop worocho wömai Kopotorochon weran sogidung. Owi amna torop koböc yu tec tohomumöcno föhöcno tongfada Kopotorocha yong moröng imogung

⁹Oro mit nocho wönggon foringga agotmai, nocho yangamin owi amna koböcma sinompho suran tongga idung. Yuhon nambano wömai amna auho maembat embatno. O yu woi owi amna suraro wohon wohonthu o owi amna duc mata foro wohon wohonthu o godibo foro wohon wohonthu o kantri wohon wohonthu yudecma owi amna auhogon engmuya kinghon abam orin Bot Sipsip Gumbocho yangamin idongga idung. Yu woi tec tohomumöcno föhöc tongfada o oburodec sibat sakemo fogitmuya woce idung.

¹⁰Woce itmuya ecnang sinom ingoroc yong morögung: “Kopotoroc noni kinghon abamdec iditacma orin Bot Sipsip Gumboc yu yaima worocho non tong fogiunya batip idamon.”

¹¹Oro owi amna torop wo yu ihoroc yongga idiya sum yaru ambaracho kinghon abam orin amna dugo orin yaru itonggong-nobarac awanomuno woroc yang arenggumbec tongga ida kinghon abamdec foringmu onguna goruc yemoc tongo yangamo gurocdec out sogitho Kopotoroc yong moröng imogung.

¹²Yong moröng imong-muya ingoroc yogung: “Boinno sinom, yong moröng noni woi ambarac Kopotorochon itun. Yu woi yaguno wairurubarac itac. O yuhon kombic kombic ambarac orogoma sinom idimpac. Worocha nontho yuha ecec inongmanaina yuhon magon onoce töctöcno itun. Yuhon gesöno woi orongi sinom itac. Yu woi koing socsoc ambarachon Morömo itac. Yapmu orogoma ambarac woi yuhongon itacmaho edengoc, öngahu o bongono muno. Woi boinno.”

¹³Oro, sum yaruho ihoroc yuya amna dugo idungma yudecma tungu auho noc nanong ac togoc, “Owi amna tec tohomumöcno föhöcno tong faangma woi numari? O yui nahema ebung?”

¹⁴Yu ihoroc nanuna noc inogot, “Amna moröma, goc gaka wömai kombingdeharoc.” Nocho ihoroc inoya yu nanogoc, “Owi amna ngo yu woi emoc dirung morömadecma öngkubung. Yu wömai tec tohomumöcno Bot Sipsip Gumbochon nogotnodec sac woda föhöcno sinom idang.

¹⁵Worocha wömai woroc: “Yui Kopotorochon king abampho yangamin idongga ididang. Tongo sepdechu o kumbongu yu yong moröng bucin Kopotoroc mongorec tong imongidang. Tuna Kopotorocho kinghon abamdec iditacma yu wömai inoin gesöno yudec taun weuna batip sinom idtongonahing.

¹⁶Tuna yu wönggon maworec imoning. O ingguroho wönggon manman mayoning. O sepho godibo wönggon madining. O yapmu munmuroho yu wönggon madoun obökic.

¹⁷Wömai yaha, Bot Sipsip Gumboc kinghon abamo bonipnodec iditacma yu kangtorecno sinom tong tongungoc. Yuho wömai yangato fonguna yamuc itonggongnobaracma nanahing. Tuna Kopotorocho yuhon daro yamugo youn manman yuya focfoc au wönggon makombining.”