Read Yimchungru Naga Thrün 1 Bible Online

Thrün 1 - Yimchungru Naga bible

Thrün 1

¹Atankih ching Thrünpuhnü thüningbo tüsho alomi thrün.

²Alomi ju tümü mükamkhitdü lang akeangkeang lakheah; tüsho amiting ju kekim mi kheak lakheah. Tüsho Thrünpuh me kebo kumung aphapde alakheah.

³Judüki Thrünpuhnü tha, “Ayin akhiukang,” tüsho ayin akhiuk.

⁴Thrünpuhnü ayin ju tsülah de kheah; tüsho apinü ayin ju amiting chingnü chamkhit.

⁵Thrünpuhnü ayin ki, “Animung” tüsho amiting ki “Azhing” de ji. Tüsho akhuhbe nimung arelim tüsho yapsu lakheah.

⁶Tüsho Thrünpuhnü tha, “Kebo chingnü kebo chamnakde akhunung khülang kamang.”

⁷Junangde Thrünpuhnü akhunung khülang thsübah ke akube chingnü abobe büthsüjih; tüsho junangde kam.

⁸Apinü akhunung ki ju “Thüning” de ji. Tüsho ju mahnepü nimung arelim tüsho yapsu lakheah.

⁹Thrünpuhnü tha, “Thüningbo bukkhüp lakhi ke alala dangpungkhüh kingmukhungang tüsho alo akung akhiukang”; tüsho junangde kam.

¹⁰Thrünpuhnü alo akung ki “Alomi” tüsho ke kingmukhungkhi ki “Kekim” de ji. Tüsho Thrünpuhnü ju tsülah de kheah.

¹¹Thrünpuhnü tha, “Alonü rim, sangrungbo mungji alala akhiukshang, tüsho jurübo müjihphünü asobebo tüsho sangsolungso asobe thsüang”; tüsho junangde kam.

¹²Alonü rim, sangrung mungji alala, müjih asobe tüsho aso asobe sangdung alala akhiukshih. Tüsho Thrünpuhnü ju tsülah de kheah.

¹³Tüsho ju mahsam nimung arelim tüsho yapsu lakheah.

¹⁴Thrünpuhnü tha, “Azhing kheaknü animung büthsüpü thüning ching ayinatrümbo lashang, tüsho jurübonü nimungbo, kambo, tüsho akheahmünchibo müchitpü thsüang;

¹⁵tüsho alomi kheak yinshihpü thüning ching ayinatrümbo lashang”; tüsho jude alakheah.

¹⁶Jumonü Thrünpuhnü ayinatrüm atobo mahne thrün; animung thsungkheak ani, tüsho azhing thsungkheak khinu. Apinü chiningbo she thrün.

¹⁷Thrünpuhnü jurübo alomi yinshihpü thüning ching zojih,

¹⁸tüsho animung le azhing kurungkheak yakzan shuhpü, tüsho amiting kheaknü ayin büthsüpü lashih. Tüsho Thrünpuhnü ju tsülah de kheah.

¹⁹Tüsho ju aphüyipü nimung arelim tüsho yapsu lakheah.

²⁰Thrünpuhnü tha, “Ke ju rhangdung lakhi lorilokobonü mishang; tüsho wuhnubo alo kumung thüning ching phinshang.”

²¹Thrünpuhnü keto shiwüh atobo, ke ching labe lorilokobo tüsho wuhnubo mungji alala thrün. Tüsho Thrünpuhnü ju tsülah de kheah.

²²Apinü jurübo alala müngühjihde tha, “Aso asoang tüsho wüh buang, tüsho ketobo ching kebonü mishang, tüsho alomi kheak wuhnubo wüh bushang.”

²³Tüsho ju aphüngü nimung arelim tüsho yapsu lakheah.

²⁴Judüki Thrünpuhnü tha, “Alonü rhangdung lakhi shiwüh mungji alala: akam-shiwüh tüsho abüde atsahbe mütüm shiwüh, ato tüsho anini akhiukshang,” tüsho jude alakheah.

²⁵Tüsho Thrünpuhnü alomi ching mütüm shiwüh, akam-shiwüh tüsho alo kheak abüde atsahbe mungji alala thrün. Tüsho Thrünpuhnü ju tsülah de kheah.

²⁶Judüki Thrünpuhnü tha, “Isanü isa kiphahkhi ching mihtsürü thrünanü; tüsho keto ngüh, thüning wuhnubo, akam-shiwüh tüsho mütüm shiwüh tüsho alo kheak abübe alala kurungkheak arü atungrü thsüshihanü.”

²⁷Jumonü Thrünpuhnü api kiphahkhi ching mihtsürü thrün; apinü athrürü tüsho aliberü thrün.

²⁸Thrünpuhnü arü müngühjihde tha, “Aso asoang tüsho wüh buang; alomi mishang tüsho ju danyukang; keto ching thüngüh, thüning wuhnubo tüsho alo kheak abübe alala kurungkheak atungrü thsang.”

²⁹Thrünpuhnü tha, “Alomi ching lakhi aso asobe, sangrung tüsho aso asobe sangdung alala inü nüsa kilim jihchoh; nüsa thsungkheaknü ju tsühyungbe thsübah.

³⁰Tüsho alomi ching lakhi shiwühbo, thüning wuhnubo tüsho alo kheak abübe alala kilim inü sangrung phüyakbo tsühyungbe thsüpü jihdo”; tüsho jude alakheah.

³¹Thrünpuhnü apinü athrünkhi alala ngü tüsho ha khide tsüde alakheah. Tüsho ju athuruk nimung arelim tüsho yapsu lakheah.