Read Yimchungru Naga Thrün 14 Bible Online

Thrün 14 - Yimchungru Naga bible

Thrün 14

¹Ju kim ching Shinar kiulongthsüpuh Amraphel, Ellasar kiulongthsüpuh Ariok, Elam kiulongthsüpuh Kedorlaomer tüsho Goiim kiulongthsüpuh Tidal arübo,

²Sodom kiulongthsüpuh Bera, Gomorra kiulongthsüpuh Birsha, Adma kiulongthsüpuh Shinab, Zeboiim kiulongthsüpuh tüsho Bela (ju Zoar) kiulongthsüpuh Shemeber bede thirithsüpü yü.

³Harü kiulongthsürü phüngü ju Siddim jindükhün ching rukhüh thsüru (ju Thimi Keto).

⁴Arü kam thürükheak mahne Kedorlaomer bukkhüp la, tüshe kam thürükheak asampü ching arünü azhih.

⁵Kam thürükheak phüyipü ching Kedorlaomer tüsho api lung kiulongthsürübo arihbah wukhiuk tüsho Ashterothkarnaim ching Rhepharü, Ham ching Zuzimrü, Shave-kiriathaim ching Emirü

⁶tüsho loshelo phüni El-paran khiungde Seir awung lomi ching Horrü yan.

⁷Jushu arübo rholo tüsho Enmishpat (ju Kadesh) lim yü, tüsho Amalekrü lomi alala, Hazezontamar ching larü Amorrü she kukabah.

⁸Judüki Sodom kiulongthsüpuh, Gomorra kiulongthsüpuh, Adma kiulongthsüpuh, Zeboiim tüsho Bela (ju Zoar) kiulongthsüpuh Siddim dükhün ching thirithsüpü,

⁹Elam kiulongthsüpuh Kedorlaomer, Goiim kiulongthsüpuh Tidal, Shinar kiulongthsüpuh Amraphel tüsho Ellasar kiulongthsüpuh Ariok azhihde kiulongthsürü phüngünü kiulongthsürü phüyi azhih.

¹⁰Siddim dükhün ju loneakjipjip khünnü mia lakheah; tüsho Sodom le Gomorra kiulongthsürübo ju ching shande yü; khürü ju ching keamyuk, tüsho aningkhi awungbo ching tsode yü.

¹¹Judüki arünü Sodom tüsho Gomorra kukrukbo tüsho arü tsühyungbebo alala lubah arü limro ching tso.

¹²Arünü Sodom ching lakhi Abram niurü tsührü Lot she api kukrukbo bede lubah tso.

¹³Tüshe atsokhitkhi mihtsürü khülangnü, Amorrü Mamre arüngako sangdungbo thüninde alakhi Ibrirü Abram ki thiyusheak alala jih. Mamre le akeoniorübo Eshkol tüsho Aner ju Abram müshiprü lakheah.

¹⁴Küyimki Abramnü api keoniorü ramde atsokhi sokhea, apinü anihbuh yam ching zübebah anokhitkhi yamlarü 318 zülu yihjih, tüsho Dan khiungde müshamde yü.

¹⁵Apinü arü azhihde azhing ching api mihtsürübo chamnak tüsho api le yamlarübonü arü zündode Damaska dukulim lakhi Hoba khiungde arü müsham.

¹⁶Junangde apinü kukruk alala, akeoniorü Lot tüsho api kukrukbo, aliberübo tüsho mihtsürübo she belode arü.

¹⁷Abramnü Kedorlaomer tüsho api müshiprü kiulongthsürübo kukbah arü dunglim Sodom kiulongthsüpuhnü Shave Jindükhün (ju kiulongthsüpuh Jindükhün) ching api shorupü akhiuk.

¹⁸Tüsho Salem kiulongthsüpuh Melkizedeknü yikhap tüsho yukhu lude arü; api ju Khide Achang Thrünpuh amükeamrü lakheah.

¹⁹Apinü anihbuh müngühjihde tha: “Thüning tüsho alomi Thrünrü, Khide Achang Thrünpuhnü Abram müngühshang.

²⁰Tüsho nü riribo nü khah ching yukjihbuh Khide Achang Thrünpuh shiang.” Tüsho Abramnü alala yo thürü shihcham api kilim jih.

²¹Sodom kiulongthsüpuhnü Abram ki tha, “I kilim mihtsürübo jihang, tüsho kukrukbo a nü luang.”

²²Tüshe Abramnü Sodom kiulongthsüpuh ki tha, “Inü thüning tüsho alomi Thrünrü Khide Achang Thrünpuh ki I khah chungkihdo, tüsho thiyuchihchim ludo,

²³junangde inü nü yo tümü lang she mulu, hing büm khülang yungsho jingkhümpü zhi khülang she mulu, junangde ‘Inü Abram alarü kamshihkheah’ de nünü müthakhukde alabah.

²⁴Inü tümü she müleangkhi tüshe I mihtsürübonü atsühkhi tüsho I lung yürü Aner, Eshkol tüsho Mamre arü shihcham lushang.”