Read Yimchungru Naga Thrün 16 Bible Online

Thrün 16 - Yimchungru Naga bible

Thrün 16

¹Kheakü, Abram niube Sarainü api kilim tsührü müzübejih. Tüsho anihbe Ijip yamlaberü amung Hagar lakheah.

²Jumonü Sarainü Abram ki tha, “Kheahang, ATUNGPUHNÜ I kheaknü tsührü mülashih. Muzhobah I yamlabe lung nungang; khükia anihbe hode I tsührü labah.” Tüsho Abramnü Sarai yu ani.

³Judüki Abram Kanan lomi ching kam thürü la dunglim, aniube Sarainü ayamlabe Hagar bea lu tüsho aniubuh Abram kilim aniube thsüpü jih.

⁴Jumonü apinü Hagar kheak nung, tüsho alibe mübünkeangde kam. Tüsho küyimki alibenü anihbe mübünkeangkhi mükheahkhea, alibenü anihbe putungbe mükhemükimpü tankih.

⁵Judüki Sarainü Abram ki tha, “I amülim nü kheak lashang! Inü I yamlabe nü kilim jih; tüsho küyimki anihbe mübünkeangkhi alibenü mükheahkhea, alibenü I mükhemükimde kam. ATUNGPUHNÜ ike dükeak mahkhapshang.”

⁶Jumonü Abramnü Sarai ki tha, “Nü yamlabe nü khah ching lah; nü tsükhinü alibe ki rhimoang.” Küyimki Sarainü anihbe ki mükihmürade arhimokheanü, amikinü alibe tsoabah.

⁷ATUNGPUH yunirünü Hagar ju sunglo ching Shur limro kenü ki ngü.

⁸Tüsho Apinü tha, “Sarai yamlabe Hagar, nü küchingnü arükhea, tüsho nü külim yücho?” Alibenü alo, “I putungbe Sarai kinü I tsochoh.”

⁹Judüki ATUNGPUH yunirünü alibe ki tha, “Nü putungbe kilim alode yüang tüsho anihbe bukkhüp laang.”

¹⁰Yunirünü thalo, “Inü nü tsühsoniusobo mükhekhampü thsüde hihde akamshihbah.

¹¹Kheahang, nü khungarü lah. Nünü athrürü khülang zübebah. Nünü api mung Ishmael de ajibah, tümütüsho ATUNGPUHNÜ nü thsünükhi sojihdo.

¹²Api mütüm donki nangde alabah; apinü alala kheak azhihde alabah, tüsho alalanü api kheak azhihbah, tüsho api keoniorü kheaknü chamkhibah alabah.”

¹³Judüki alibenü anihbe ki asukbuh ATUNGPUH mung hade ji: “Nü a I ngübuh Thrünpuh,” tümüde alibenü tha, “Kheakü inü I kheahbuh Khülang ngüdo.”

¹⁴Jumonü kekhip ki ju Beer Lahai Roi de ji; ju Kadesh le Bered dükeak kheakü khiungde lah.

¹⁵Junangde Hagarnü Abram kilim tsührü khülang zübejih, tüsho Abramnü amung Ishmael de ji.

¹⁶Hagarnü api kilim Ishmael zübejihchoki Abram kam 86 azorü lakheah.